ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ ꓘꓴ ꓜꓲꓼ ꓞꓳ ꓘꓳꓼ ꓠꓯꓸꓼ ꓗꓪ 27 ꓠꓽ ꓠ ꓢꓲ‐ꓒ‐ꓦꓬꓼ‐ꓠꓬꓲ ꓥ ꓡꓳ꓿ ꓟ. ꓟꓲꓽ ꓗꓪ ꓒ‐ꓡꓲ‐ꓢꓷ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓠꓺ ꓠꓬꓲ ꓘꓶ ꓕꓲꓽ ꓘꓶ ꓠꓺ ꓠꓬꓲˍ ꓡꓳ꓿ ꓤ ꓖꓴ ꓤ ꓟꓶ ꓗꓪ ꓡꓯ ꓘꓳ ꓓ, ꓡ꓾ ꓞꓳ ꓑ. ꓤ ꓕꓲ ꓣꓳ ꓠꓬ ꓤ ꓟꓶ ꓔꓯ ꓐꓰꓽ ꓗꓷ ꓐ ꓡˍ ꓡ꓾ ꓐꓰ ꓠꓺ ꓠꓬꓲˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓪ ꓔꓯ ꓟꓳ‐ꓫꓲ ꓠꓴ ꓪ ꓔꓯ ꓮ ꓡꓲ ꓐꓯ ꓔ ꓡ꓾ ꓐꓰ ꓠꓺ ꓠꓬꓲˍ ꓡꓳ꓿ ꓬꓲ ꓪ ꓠꓬ ꓕꓳꓽ ꓶ ꓐꓳ ꓢꓲ ꓠꓬꓲ ꓗꓪꓺ ꓓ, ꓡꓳ ꓐꓰ ꓐꓳ ꓔ ꓡꓳ꓾ ꓐꓰ ꓐꓯˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓡꓰ꓾ ꓖꓳ ꓕꓯ ꓟ ꓦꓬꓼ ꓠꓬꓲ ꓗꓪ ꓬꓲ ꓪ ꓠꓬ ꓪꓴ. ꓓꓵ ꓮ ꓘꓶ. ꓩꓴꓻˍ ꓟ ꓑꓶ. ꓓꓴ ꓟꓳ‐ꓫꓲ ꓡꓰ ꓕꓱ ꓡꓱ ꓐꓯ ꓔ ꓟ ꓥ ꓡꓳ꓿ ꓬꓲ. ꓚꓰ ꓬꓲ ꓪꓴ. ꓕꓯ ꓠꓬ ꓕꓱ ꓡꓱ ꓟꓽ ꓥ꓾ ꓐꓰ ꓒꓳ, ꓖꓶˍ ꓡꓳ꓿ ꓮꓽ ꓟ ꓥˍ ꓟꓲ ꓚꓲ. ꓛꓬ ꓤ ꓟꓶ ꓔꓯ ꓒꓰ, ꓗꓷ ꓢꓲ ꓠꓱ. ꓐꓯ ꓕꓲ ꓣꓳ ꓔꓯ ꓙꓰˍ ꓠꓬ ꓕꓱ ꓟ ꓠꓬ ꓝꓴꓲ. ꓙꓳˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ ꓬꓲ ꓒꓰ, ꓗꓷ ꓟ ꓤ ꓟꓶ ꓔꓯ ꓣꓴ ꓢꓴ ꓥˍ ꓟꓲ ꓝꓴꓲ. ꓙꓳˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓡꓳ꓿
ꓖꓳ ꓕꓲ ꓫꓬ. ꓗꓪ ꓕꓳꓽ ꓶ ꓑꓷꓠꓽ ꓪꓴꓽ ꓔꓶ. ꓗꓪ ꓥꓪ ꓕꓲ ꓧꓪ, ꓛꓲ ꓬꓰˍ ꓡꓳ꓿ ꓖꓳ ꓗꓪ ꓥꓪ ꓟꓳꓻˍ ꓟ ꓠꓬ Healthy Divorce ꓐꓰ ꓟꓬꓱ ꓔ ꓟ ꓕꓳꓽ ꓶ ꓕꓲꓽ ꓑꓷꓠꓽ ꓟꓳꓻˍ ꓡꓳ꓿ ꓖꓳ ꓟ ꓠꓬ ꓗꓴꓷꓼ ꓘꓴꓽ ꓗꓪ ꓮ ꓟꓬ, ꓪꓴꓽ ꓓꓳ ꓙꓰ ꓟ ꓕꓳꓽ ꓶ ꓕꓲ ꓑꓷꓠꓽ ꓥ ꓡꓳ꓿ Healthy Divorce ꓐꓯ ꓟ ꓠꓬ “ꓗ, ꓛꓲꓽ ꓛꓲꓽ ꓡꓰꓽ ꓒꓰ, ꓡꓯ ꓘꓳ ꓡꓯ” ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓤ ꓖꓴ ꓤ ꓟꓶ ꓢꓻ ꓢꓻ ꓡꓰꓽ ꓒꓰ, ꓡꓯ ꓘꓳ ꓠ, ꓟ ꓐꓯ ꓔ ꓟ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓬꓲ ꓙꓵꓽ ꓗ ꓐꓰ ꓮ ꓡꓲ ꓘꓶ ꓛꓲ ꓟꓽ ꓪꓽ ꓟ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓣꓳ ꓡꓳ. ꓟꓳꓻˍ ꓡꓳ꓿ ꓕꓳꓽ ꓶ ꓐꓳ ꓢꓴ ꓢꓷ. ꓠꓲ, ꓙꓳ ꓢꓴ ꓥ ꓟꓲ ꓬꓲ ꓪ ꓟꓬꓱꓺ ꓟꓶ ꓠ, ꓟ꓾ ꓬꓲ ꓟꓬꓱꓺ ꓪꓴꓽ ꓡ ꓠ, ꓟ꓾ ꓝꓮꓲ ꓬꓲ ꓪ ꓟꓬꓱ ꓓꓳꓽ ꓐꓱ ꓶ ꓕꓱ ꓡꓱ ꓞꓳ ꓤ ꓠꓲ, ꓫꓵˍ ꓟ ꓔꓯ ꓐꓳ ꓔꓬ ꓡꓳ꓿
ꓖꓳ ꓡꓱ ꓠꓬꓲ ꓤ ꓖꓴ ꓐꓰ ꓤ ꓟꓶ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓟ ꓠ ꓡꓯ ꓘꓳ ꓠ, ꓟ꓾ ꓕꓲ ꓣꓳ ꓐꓱ ꓶ ꓕꓲ ꓣꓳ ꓢꓯꓼ ꓟꓬ ꓖꓶ ꓐ ꓡ ꓠ, ꓟ ꓮ ꓠꓱ ꓬꓲ ꓚꓰ ꓬꓲ ꓪꓴ. ꓔꓯ ꓕꓱ ꓡꓱ ꓙꓳˍ ꓥ ꓟꓲ ꓮ ꓟꓶ ꓕꓯ ꓠꓬ ꓕꓱ ꓡꓱ ꓟꓽ ꓙꓳꓻꓳ꓿ ꓤ ꓖꓴ ꓤ ꓟꓶ ꓐꓯ ꓟ ꓠꓬ ꓢꓻ ꓢꓻ ꓡꓰꓽ ꓛꓲ ꓠꓲ ꓕꓲ ꓙꓰꓽ ꓪꓴꓻ ꓠꓬꓲˍ ꓟ ꓡꓰ꓾ ꓛꓲ ꓠꓲ ꓕꓱ ꓟ ꓠꓬꓲ ꓐꓰꓽ ꓡꓰ ꓠꓬ ꓡꓳ ꓦ ꓗꓷ꓾ ꓐꓬ ꓡꓰˍ ꓠꓬ ꓡꓳ ꓩꓴ ꓗꓷ꓾ ꓕꓱ ꓡꓱ ꓓꓵꓽ ꓙˍ ꓟ ꓡꓰ ꓐꓰ꓾ ꓤ ꓖꓴ ꓤ ꓟꓶ ꓣꓴ ꓔ ꓥˍ ꓟꓲ ꓠꓴ ꓐꓱ ꓶ ꓥꓪ ꓐꓱ ꓶ ꓟꓽ ꓙꓲꓻ ꓕꓯ ꓗꓪꓻ ꓡꓯ ꓘꓳ ꓡꓯ꓾ ꓕꓱ ꓡꓱ ꓢꓻ ꓢꓻ ꓡꓰꓽ ꓣꓱꓽ ꓬꓰˍ ꓡꓳ꓿ ꓠꓲꓽ ꓪ ꓔꓲ. ꓪꓻ ꓕꓴꓻ ꓔ ꓟ ꓕꓲ ꓫꓵꓽ ꓥ ꓡꓳ꓿
ꓮ ꓟꓶ ꓞꓲꓼ ꓢꓳꓚꓲꓮꓡ ꓟꓰꓓꓲꓮ ꓦꓬꓼ ꓠꓬꓲ ꓗꓪ ꓢꓻ ꓢꓻ ꓡꓰꓽ ꓤ ꓖꓴ ꓤ ꓟꓶ ꓗꓪ ꓡꓯ ꓘꓳ ꓔꓬ, ꓟ ꓢꓲꓠꓖꓡꓰ ꓟꓳꓟ ꓐꓰ ꓐꓯˍ ꓟ ꓕꓲꓽ ꓣꓳ ꓔꓵꓸꓼ ꓚꓲ. ꓛꓬ ꓚꓳꓽ ꓚꓲ. ꓛꓬ ꓢꓯꓼ ꓕꓵꓼ ꓢꓲ ꓠꓬꓲ ꓤ ꓠꓱ ꓔꓯ ꓧꓪ ꓖꓶ ꓜꓽˍ ꓟ ꓠꓬ ꓟꓬꓱꓺ ꓓꓳꓽ ꓓꓽ ꓟ꓾ ꓢꓲꓠꓖꓡꓰ ꓝꓮꓔꓧꓰꓣ ꓐꓯˍ ꓟˍ ꓟꓲ ꓬꓲ ꓕꓲ ꓡꓰ, ꓥꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓲ ꓚꓰ ꓬꓲ ꓪꓴ. ꓕꓯ ꓠꓬ ꓕꓱ ꓡꓱ ꓟꓽ ꓥ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓚꓱ, ꓠꓬ ꓕꓱ ꓟ ꓚꓱ, ꓐꓰ ꓟꓽ ꓪꓽ꓿ ꓢꓲ ꓒ ꓬꓰ‐ꓢꓴ ꓬꓲ ꓚꓱ, ꓠꓬ ꓙꓵꓻ ꓠꓲ, ꓠꓯꓸꓼ ꓗꓪ ꓔꓶ ꓔ ꓟ꓾ ꓪꓴ‐ꓢ ꓟꓲꓽ ꓙꓬ ꓗꓪ ꓔꓶ ꓔ ꓟ ꓦꓲꓻ ꓕꓱ ꓟ ꓠꓬ ꓮ ꓕꓯ ꓥˍ ꓟꓲ ꓗꓪ ꓙꓰ ꓟꓽ ꓓꓻ꓿ ꓫꓵꓻˍ ꓗꓪ ꓛꓲ ꓮ ꓕꓯ ꓥˍ ꓟꓲ ꓘꓶꓽ ꓙꓰ ꓟꓽ ꓓꓻ꓾ ꓐꓰ ꓪꓴ‐ꓢ ꓣꓳ ꓔꓯ ꓚꓵ ꓘꓶꓽ ꓖꓶ ꓔ ꓡꓳ꓿
ꓖꓳ ꓡꓱ ꓠꓬꓲ ꓦꓲꓻ ꓧꓪˍ ꓐꓰ ꓐꓯ ꓕꓯ꓾ ꓦꓲꓻ ꓟꓽ ꓧꓪ ꓧꓶ. ꓕꓯ ꓡꓰ ꓓꓵꓽ ꓙꓽ꓿ ꓕꓲ ꓣꓳ ꓚꓱ, ꓔꓯ ꓕꓲ ꓣꓳ ꓚꓱ, ꓔꓯ ꓡꓳ. ꓠꓬꓲ ꓡꓯ ꓘꓳ꓿ ꓚꓵ ꓚꓵ ꓪꓽ ꓘꓴꓻ ꓢꓲ ꓪꓴ‐ꓢ ꓟꓲꓽ ꓙꓬ ꓗꓪ ꓙꓲꓻˍ ꓟ ꓔꓱ,ˍ ꓟ ꓚꓲ. ꓛꓬ ꓐꓱ ꓶ꓾ ꓦꓲꓻ ꓕꓴꓽ ꓗꓪ ꓕꓴꓽ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓠ ꓗ, ꓡꓳ꓿ ꓖꓳ ꓡꓱ ꓐꓰ ꓟꓳꓻ ꓡꓰ ꓗꓷ ꓗ ꓠꓯ.꓾ ꓪꓴ‐ꓢ ꓟꓲꓽ ꓙꓬ ꓞꓳ ꓤ ꓟꓲꓽ ꓙꓬ ꓗꓪ ꓪꓵꓼ ꓘꓶ ꓖꓶ ꓗꓷ ꓗ ꓠꓯ. ꓠꓬ ꓮ ꓡꓲ ꓥˍ ꓟꓲ ꓗꓪ ꓟꓽ ꓓꓻꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓪꓴ‐ꓢ ꓟꓲꓽ ꓙꓬ ꓞꓳ ꓤ ꓟꓲꓽ ꓙꓬ ꓗꓪ ꓙꓵꓽ ꓗ ꓔꓶ ꓔ ꓢꓴ꓾ ꓘꓶꓽ ꓫꓵꓽ ꓬꓰ ꓔ ꓢꓴ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥ ꓡꓳ꓾ꓦꓲꓻ ꓘꓴꓽ ꓐꓯ ꓟ ꓠꓬ ꓕꓲ ꓖ ꓕꓲ ꓔꓳ. ꓗꓪ ꓠꓬ ꓮ ꓘꓶ. ꓫ.ˍ ꓟ ꓙꓳˍ ꓡꓳ꓿ ꓗꓪ ꓗꓷ ꓠꓲ, ꓫꓵˍ ꓟ ꓙꓳˍ ꓡꓳ꓿ ꓬꓲ ꓫꓱ, ꓟꓽ ꓫꓱ. ꓡꓯ ꓘꓳ ꓠꓲ, ꓟ ꓟꓽ ꓫꓱ. ꓡꓯ ꓘꓳ ꓟ ꓞꓳ ꓤ ꓠꓬꓲꓽ ꓣꓳ ꓕꓱ ꓡꓱ ꓡꓳꓽ ꓔ ꓟ ꓑꓶ. ꓓꓴ ꓕꓲ ꓖ ꓕꓲ ꓝꓲ. ꓗꓪ ꓠꓬ ꓠꓲ, ꓟ ꓓꓵꓽ ꓙ ꓚꓱ, ꓟꓽ ꓫꓱ. ꓡꓯ ꓘꓳ꓿ ꓕꓲ ꓖ ꓕꓲ ꓝꓲ. ꓗꓪ ꓠꓬ ꓫ. ꓪ ꓟꓽ ꓫꓱ. ꓡꓯ ꓘꓳ꓿ ꓕꓲ ꓖ ꓕꓲ ꓝꓲ. ꓗꓪ ꓠꓬ ꓬꓰ ꓫꓵꓽ ꓬꓰ ꓙꓰꓽ ꓟꓽ ꓫꓱ. ꓡꓯ ꓘꓳ꓿ ꓕꓱ ꓟ ꓑꓶ. ꓓꓴ ꓮ ꓘꓶ. ꓫ.ˍ ꓟˍ ꓟꓲ ꓮ ꓟꓬ, ꓓꓳ ꓡˍ ꓥꓳ꓿
ꓖꓳ ꓡꓱ ꓐꓯ ꓥ ꓟꓲ ꓣꓳꓽ ꓓꓵꓽ ꓙꓽ ꓠ ꓔ ꓟ ꓠꓬ ꓙꓵꓻ ꓠꓯꓸꓼ ꓗꓪ ꓔꓶ ꓔ ꓟ꓾ ꓘꓶꓽ ꓫꓵꓽ ꓠꓯꓸꓼ ꓗꓪ ꓔꓶ ꓔ ꓟ ꓪꓴ‐ꓢ ꓠꓯꓸꓼ ꓗꓪ ꓔꓶ ꓔ ꓟ ꓦꓲꓻ ꓘꓴꓽ ꓥ ꓟ ꓑꓶ. ꓓꓴ ꓣꓳ ꓠꓲ, ꓡꓶ ꓮ ꓡꓲ ꓠꓲ, ꓫꓵˍ ꓠꓬ ꓖꓳ ꓡꓱ ꓬꓰ ꓟꓽ ꓓꓻ꓿ ꓣꓳ ꓠꓲ, ꓟ ꓠꓯꓸꓼ ꓗꓪ ꓔꓶ ꓔ ꓟ ꓠꓵꓻ ꓠꓲ, ꓦꓲꓻ ꓘꓴꓽ ꓥ ꓟ ꓑꓶ. ꓓꓴ ꓠꓵꓻ ꓠꓲ, ꓖꓳ ꓟ ꓔꓯ ꓡꓳ. ꓢꓲ ꓠꓬꓲ ꓡꓯꓼ ꓫꓵ ꓪꓽ ꓘꓴ ꓢꓲ ꓠꓬꓲ ꓚꓲ. ꓛꓬ ꓦꓲꓻ ꓔꓯ ꓕꓶꓻ ꓞ, ꓠ, ꓟ ꓐꓱ ꓶ ꓢꓯꓼ ꓕꓵꓼ ꓠ ꓗ, ꓡꓳ꓿
ꓖꓳ ꓡꓱ ꓬꓰˍ ꓠꓬ ꓣꓱꓽ ꓛꓰꓽ ꓙꓳˍ ꓟ ꓦꓲꓻ ꓘꓴꓽ ꓗ, ꓛꓲꓽˍ ꓟ ꓦꓲꓻ ꓘꓴꓽ ꓒꓬꓱꓼ ꓡ ꓢꓲ ꓠꓬꓲ ꓕꓲ ꓠꓬꓲ ꓙꓳˍ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓥꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓢꓲ ꓒ ꓠꓯꓸꓼ ꓗꓪ ꓕꓶꓻ ꓕꓶꓻ ꓞ ꓞ ꓡꓰꓽ ꓐꓲ ꓐꓲ ꓜꓲꓼ ꓜꓲꓼ ꓡꓰꓽ ꓬꓰ ꓐ ꓡ ꓢꓲ ꓠꓬꓲ ꓚꓳ ꓡꓳ ꓚꓳ ꓫꓵ ꓐꓴ ꓔꓯ ꓮ ꓟꓶ ꓞꓲꓼ ꓟꓲ ꓠꓯ ꓕꓱ ꓟ ꓗꓪ ꓠꓬꓲ ꓟꓳꓻ ꓓꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿
