ꓡꓴ‐ꓘ꓿10ꓽ1‐12
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ 72 ꓣꓳ ꓔꓯ 2 ꓣꓳ 2 ꓣꓳ ꓔꓯ꓾ ꓟ. ꓟꓲꓽ ꓚꓺ ꓠ, ꓟ ꓝꓲ ꓩꓴ ꓗꓷˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓠꓴ ꓪ ꓠꓬ ꓮ ꓡꓲ ꓕꓲ ꓦꓲ ꓗꓪ ꓓꓵꓽ ꓡꓰˍ ꓟꓲ ꓖꓳ ꓕꓲ ꓦꓲ ꓗꓪ ꓢꓲ ꓡꓲ ꓟ ꓙꓳ ꓝꓲ꓾ ꓐꓰ ꓧꓶ. ꓕꓯ ꓐꓯ ꓖꓶ ꓬꓰ꓿ ꓖꓳ ꓢꓲ ꓡꓲ ꓟ ꓠꓬ ꓖꓳ ꓗꓪ ꓔꓬ ꓢꓴ ꓟꓶ ꓒꓵꓽˍ ꓕꓯ ꓠꓽ ꓬꓲ ꓪ ꓘꓳ ꓣꓴ ꓟꓶˍ ꓟ ꓥꓳ꓿ ꓖꓳ ꓡꓱ ꓟꓽ ꓥ ꓕꓯ ꓠꓽ ꓖꓳ ꓢꓲ ꓡꓲ ꓟ ꓠꓬ ꓠꓴ ꓪ ꓔꓯ ꓚꓱ, ꓬꓲꓼ ꓡˍ ꓥꓳ꓾ ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓔꓬ ꓟ “ꓠꓴ ꓪ ꓦꓲꓻ ꓠꓯꓸꓼ ꓗꓪ ꓢꓲ ꓡꓲ ꓟ ꓙꓳ ꓝꓲ” ꓐꓯ ꓟ ꓬꓲ. ꓬꓲ ꓢꓲ ꓠꓬ꓾ ꓣꓳ ꓢꓷ. ꓔ ꓟ ꓢꓲ ꓡꓲ ꓟ ꓠꓬ ꓦꓲꓻ ꓘꓴꓽ ꓠꓯꓸꓼ ꓗꓪ ꓜꓽ ꓟꓲ ꓔꓬ, ꓢꓻˍ ꓟ꓾ ꓣꓱꓽ ꓛꓰꓽ ꓘꓳ ꓣꓴ ꓟꓶˍ ꓟ꓾ ꓪꓴ‐ꓢ ꓬꓲ ꓢꓯꓼ ꓪ ꓟꓶˍ ꓟ꓾ ꓦꓲꓻ ꓘꓴꓽ ꓠꓯꓸꓼ ꓗꓪ ꓐꓲ ꓐꓲ ꓜꓲꓼ ꓜꓲꓼ ꓐꓰ ꓔꓬ ꓪˍ ꓟ ꓔꓯ ꓐꓯ ꓟ ꓥ ꓡꓳ꓾ ꓐꓰ ꓣꓳ ꓢꓷ. ꓔ ꓡꓳ꓿ ꓟꓬꓽ ꓠꓬꓲ ꓣꓳꓽ ꓕꓱ ꓡꓱ ꓓꓵꓽ ꓙꓽˍ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔꓬ ꓟ “ꓢꓲ ꓡꓲ ꓟ ꓙꓳ ꓝꓲ” ꓐꓰ ꓐꓯ ꓟ ꓠꓬ ꓕꓱ ꓡꓱ ꓥ ꓡꓳ꓿ ꓬꓲ. ꓬꓲ ꓢꓲꓺ ꓬꓲ ꓟ. ꓟꓲꓽ ꓮ ꓘꓶ. ꓠꓯ. ꓟ ꓥ ꓡꓳ꓿ “ꓢꓲ ꓡꓲ ꓟ” ꓐꓯ ꓟ ꓠꓬ ꓣꓳ ꓡꓲ‐ꓢꓴ ꓥꓳꓽ ꓥ ꓡꓳ꓿ ꓕꓱ ꓟ ꓔꓯ ꓦꓲ‐ꓐꓱ‐ꓣꓴ ꓥꓳꓽ ꓥ ꓟ ꓢꓧꓮꓡꓳꓟ ꓗꓪ ꓐꓰ ꓒꓳ, ꓔ ꓟ ꓥ ꓡꓳ꓿ ꓢꓧꓮꓡꓳꓟ ꓐꓯˍ ꓟ ꓬꓲ. ꓟ. ꓟꓲꓽ ꓚꓵ ꓠꓬ ꓪꓴ‐ꓢ ꓐꓰ ꓡꓽ ꓞꓳ ꓠꓬꓲꓽ ꓗꓴ. ꓚꓸꓼ ꓗꓪ ꓝꓴꓲ. ꓑꓶ. ꓓꓴ ꓟꓽ ꓧꓳ, ꓡꓯ ꓘꓳ ꓟ ꓮ ꓙꓵꓽ ꓠꓬ ꓠꓬꓲ. ꓠꓬꓲ ꓪꓴ‐ꓢ ꓡꓰ ꓠꓴ ꓪ ꓦꓲ ꓠꓯꓸꓼ ꓗꓪ ꓔꓬ ꓢꓴ ꓮ ꓙꓵꓽ ꓐꓰ ꓧꓳ, ꓑꓼ ꓡꓯ ꓘꓳ ꓠꓲ, ꓫꓵˍ ꓟ ꓥꓳ꓾ ꓐꓯ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓖꓳ ꓟ ꓑꓶ. ꓓꓴ “ꓢꓲ ꓡꓲ ꓟ ꓙꓳ ꓝꓲ” ꓐꓯ ꓟ ꓠꓬ “ꓪꓴ‐ꓢ ꓠꓬ ꓠꓬꓲ. ꓠꓬꓲ ꓠꓴ ꓪ ꓐꓰ ꓧꓳ, ꓑꓼ ꓡꓯ ꓘꓳ ꓠꓲ, ꓫꓵˍ ꓡꓳ” ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓮ ꓡꓲ ꓫꓵꓽ ꓑꓶ. ꓓꓴ ꓧꓳ, ꓑꓼ ꓡꓯ ꓘꓳ ꓠꓲ, ꓫꓵˍ ꓡ ꓐꓯ ꓠꓬ꓾ ꓠꓬꓲ. ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓪꓴ‐ꓢ ꓐꓰ ꓣꓳ ꓠꓬ ꓶꓽ ꓤ ꓗꓷ ꓡꓰ ꓕꓯ꓾ ꓣꓳ ꓝꓴꓲ. ꓬꓰˍ ꓟ ꓗꓪ ꓐꓰ ꓟꓽ ꓙꓲꓻ ꓟ ꓬꓰˍ ꓟ ꓗꓪ ꓐꓰ ꓣꓳ ꓠꓬ ꓪꓴ‐ꓢ ꓐꓰ ꓶꓽ ꓤ ꓗꓷ ꓡꓰꓳ꓿
ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓙꓰ ꓝꓲ ꓢꓲ ꓕꓱ ꓡꓱ ꓐꓯ ꓖꓶ ꓝꓲˍ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓬ ꓪꓴ‐ꓢ ꓠꓴ ꓪ ꓦꓲꓻ ꓠꓯꓸꓼ ꓗꓪ ꓓꓵꓽ ꓡˍ ꓟ ꓥꓳ꓿ ꓠꓴ ꓪ ꓠꓲ, ꓟ ꓠꓯꓸꓼ ꓗꓪ ꓓꓵꓽ ꓡ ꓟ ꓥꓳ ꓐꓯ ꓟ ꓬꓲ. ꓬꓲ ꓢꓲ ꓠꓬ ꓢꓲ ꓡꓲ ꓟ ꓙꓳ ꓝꓲ ꓐꓯ ꓟ ꓐꓯ ꓘꓶꓽ ꓥ ꓡꓳ꓿
ꓖꓳ ꓟ ꓪꓴ. ꓠꓬꓲ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓙꓰ ꓝꓲ ꓠꓲ, ꓫꓵˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓟꓷꓽ ꓠꓷ, ꓘꓶꓽ ꓗꓪ ꓐꓰ “ꓢꓲ ꓡꓲ ꓟ ꓙꓳ ꓝꓲ” ꓐꓰ ꓐꓯ ꓟ ꓡꓰꓽ ꓟꓽ ꓞꓲꓺ ꓣꓳꓽ ꓣꓱꓽ ꓬꓰˍ ꓟ ꓗꓪ ꓐꓰ ꓥˍ ꓟꓲ ꓢꓴ ꓔꓯ ꓢꓷ. ꓡꓰ ꓝꓲ ꓓ, ꓡꓳ꓿
