ꓡꓬ‐ꓗ 6ꓽ20‐26
ꓣꓳ ꓗꓳ ꓡꓳ ꓗꓪ ꓞꓳ ꓫꓸ ꓙꓳˍ ꓡꓳ꓾ ꓞꓳ ꓐꓳ ꓙꓳˍ ꓡꓳ= ꓥꓴꓻ ꓢꓴˍ ꓟꓲ ꓙꓳˍ ꓡꓳ= ꓪꓽ ꓧꓷꓼ ꓪꓽ ꓡꓰꓼ ꓢꓴˍ ꓟꓲ ꓙꓳˍ ꓡꓳ= ꓣꓳ ꓟꓲ ꓠꓯ ꓞꓳ ꓤ ꓐꓴ ꓥˍ ꓟꓲ ꓗꓹ ꓛꓲ ꓔꓬ ꓢꓴ ꓐꓴ꓾ ꓒꓴ ꓫꓵ ꓙꓳ ꓢꓴ ꓐꓴ ꓔꓯ ꓡꓰꓽ ꓔꓹ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓥˍ ꓟꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓐꓯˍ ꓟ ꓠꓬ ꓣꓳ ꓞꓳ ꓙꓳ ꓔꓬ ꓟ ꓐꓰ ꓟꓰꓹ ꓟꓰꓹ ꓫꓵ ꓥ ꓡꓳ= ꓟꓸ ꓡꓰ ꓟꓰꓹ ꓥ ꓡꓳ= ꓞꓳ ꓫꓸ ꓐꓴꓳ꓾ ꓟꓴꓽ ꓗꓪ ꓗꓴꓷꓼ ꓠꓽ ꓠꓴ ꓪ ꓔꓯ ꓟ ꓥ ꓡꓳ= ꓦꓰꓼ ꓟꓷꓼ ꓢꓴ ꓐꓴ ꓠꓬ ꓜꓽ ꓐꓳ ꓡꓰˍ ꓥꓳ= ꓞꓳ ꓐꓳ ꓠꓬ ꓫꓸ ꓙꓵˍ ꓥꓳ= ꓪꓽ ꓧꓷꓼ ꓪꓽ ꓡꓰꓼ ꓗꓹ ꓢꓴ ꓐꓴ ꓠꓬ ꓫꓸ ꓙꓵˍ ꓥꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯˍ ꓡꓳ= ꓬꓲ ꓐꓯ ꓘꓶꓽ ꓠꓬ ꓞꓳ ꓫꓸ ꓐꓴ꓾ ꓦꓰꓼ ꓟꓷꓼ ꓢꓴ ꓐꓴ꓾ ꓟꓽ ꓗꓹ ꓛꓲꓽ ꓢꓴ ꓐꓴ ꓐꓱ ꓶ ꓠꓬ ꓙꓲꓻˍ ꓟ ꓓꓳꓽ ꓥ ꓡꓳ= ꓟꓬ ꓠꓯ ꓢꓴ꓾ ꓠꓲꓹ ꓦꓯꓸ ꓢꓴ ꓐꓴ ꓐꓱ ꓶ ꓠꓬ ꓟꓽ ꓙꓲꓻ ꓟ ꓓꓳꓽ ꓥ ꓡꓳ=
ꓖꓳ ꓟ ꓑꓶꓸ ꓓꓴ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓥˍ ꓟꓲ꓾ ꓪꓴ-ꓢ ꓟꓲ ꓙꓬ ꓗꓪ ꓟꓽ ꓫꓸ ꓙꓵ ꓡꓰ ꓠꓹ ꓟ꓾ ꓟꓽ ꓙꓲꓻ ꓟ ꓠꓲꓹ ꓦꓯꓸ ꓟ ꓠꓲꓹ ꓟ ꓔꓯ ꓡꓳ ꓗꓷ ꓢꓲ꓾ ꓠꓱꓸ ꓐꓯ ꓢꓴ ꓕꓯꓽ ꓢꓲ ꓗꓪ ꓟꓽ ꓘꓳꓹ ꓜꓽ ꓪ ꓡꓰ ꓠꓹ ꓟ ꓢꓯꓼ ꓕꓵꓼ ꓠ ꓔ ꓡꓳ= ꓪꓴ-ꓢ ꓠꓬ ꓙꓲꓻˍ ꓟ ꓚꓱꓹ ꓗꓪ ꓐꓰ ꓪꓴꓽ ꓡ ꓟꓴ ꓡˍ ꓟ ꓔꓯ ꓡꓰꓽ ꓠꓲꓹ ꓫꓵˍ ꓡꓳ= ꓠꓱꓸ ꓐꓯ ꓢꓴ ꓔꓯ ꓘꓳꓹ ꓜꓽˍ ꓟ ꓗꓪ ꓐꓰ ꓟꓶ ꓡˍ ꓟ ꓒꓴ ꓫꓵ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓪꓴ-ꓢ ꓟꓽ ꓠꓲꓹ ꓒꓴ ꓟ ꓔꓲ ꓓꓴ ꓥ ꓡꓳ=
ꓖꓳ ꓟ ꓑꓶꓸ ꓓꓴ 1 ꓘꓳ-ꓡꓱ-ꓕꓴ 7ꓽ31 ꓗꓪ “ꓟꓲ ꓠꓯ ꓖꓴꓽ ꓙꓴꓽ ꓣꓱꓽ ꓓꓴ ꓙꓳ ꓢꓴ ꓠꓬ ꓣꓱꓽ ꓟꓽ ꓡꓳꓼ ꓢꓴˍ ꓡꓰ ꓐꓰ ꓔꓬ ꓠ ꓗꓹ ꓡꓳ= ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓠꓽ ꓡꓳꓹ ꓬꓰ ꓔꓬ ꓡꓳ=” ꓐꓰ ꓐꓯ ꓔ ꓡꓳ=
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠꓹ ꓟ ꓐꓱ ꓶ ꓔꓱꓹ ꓔꓱꓹ ꓚꓵ ꓚꓵ ꓡꓰꓽ ꓞꓳ ꓙꓳ ꓢꓯꓸ ꓔꓬ ꓢꓲ꓾ ꓣꓳ ꓢꓶꓸ ꓟꓽ ꓞꓲꓺ ꓟꓽ ꓙꓳ ꓢꓴ ꓫꓸ ꓢꓴ ꓐꓴ ꓔꓯ ꓬꓰ ꓙ ꓔꓳꓹ ꓙ ꓢꓲ ꓠꓬꓲ꓾ ꓞꓳ ꓙꓳ ꓙꓰ ꓡꓯ꓾ ꓐꓰ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ=
