ꓕꓲ ꓧꓪꓹ ꓙꓳˍ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓬꓲꓻ ꓡꓴꓽ ꓐꓱ ꓬꓲ ꓘꓶꓽ ꓗꓪ ꓙꓻ ꓫꓱꓽ ꓔꓬ ꓕꓯ ꓡ ꓞꓳ ꓕꓲ ꓜꓴꓻ ꓠꓬ ꓠꓸ ꓑꓳ ꓟꓽ ꓑ ꓙ꓾ ꓫꓸ ꓕꓱ ꓟꓽ ꓗꓴꓸ ꓢꓴ ꓕꓲ ꓣꓳ ꓔꓯ꓾ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓧꓳꓽ ꓔꓯꓹ ꓡˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓫꓱꓸ ꓤ ꓢꓲ ꓠꓬꓲ ꓬꓲ ꓔꓯ ꓘꓳ ꓫꓱ ꓫꓱ ꓗꓪ ꓘꓴ ꓔꓯꓹ ꓙꓰ ꓢꓲ꓾ ꓬꓲ ꓡꓯꓽ ꓒꓯꓹ ꓡꓰ ꓬꓲ ꓟꓬ ꓢꓶꓽ ꓬꓲ ꓠꓸ ꓑꓳꓻ ꓗꓪ ꓕꓲ ꓖꓶˍ ꓡꓳ= ꓗ ꓠꓯꓸ ꓖꓳ ꓕꓲ ꓣꓳ ꓠꓬ ꓠꓸ ꓑꓳꓻ ꓑ ꓙꓽ ꓡꓰ ꓢꓲ ꓠꓬꓲ ꓫꓸ ꓕꓱ ꓗꓴꓸ ꓡꓰꓳ=
ꓞꓳ ꓤ ꓮ ꓟꓬꓹ ꓠꓬ ꓬꓲ ꓔꓯ ꓓꓵꓽ ꓙꓽ ꓮ’ ꓡꓰ ꓢꓲ ꓠꓬꓲ꓾ ꓕꓱ ꓡꓱ ꓫꓵꓽ ꓡ ꓞꓳ ꓕꓱ ꓕꓲ ꓣꓳ ꓠꓬ ꓮ ꓡꓲ ꓫꓵꓽ ꓥ ꓡ? ꓠꓸ ꓑꓳꓻ ꓟꓽ ꓑ ꓙꓽ꓾ ꓟꓷꓽ ꓠꓷꓹ ꓟꓶ ꓢꓴ ꓕꓲ ꓣꓳ ꓔꓯ ꓥˍ ꓟꓲ ꓬꓲ ꓠꓬ ꓕꓱ ꓡꓱ ꓫꓬꓹ ꓐ ꓡˍ ꓡꓳ꓾ ꓐꓰ ꓐꓯ ꓢꓲ ꓬꓲ ꓔꓯ ꓫꓱꓸ ꓖꓶˍ ꓡꓳ= ꓕꓱ ꓟ ꓠꓬ ꓢꓸ ꓠꓯ ꓢꓲ ꓒ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ (ꓟ-ꓘꓳ 7ꓽ31-37) ꓥ ꓡꓳ=
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓴ-ꓖꓪ ꓕꓳꓽ ꓶ ꓗꓪ ꓕꓱ ꓡꓱ ꓐꓳ ꓔ ꓟ ꓙꓳˍ ꓡꓳ= “ꓬꓲ ꓪ ꓠꓬ ꓟꓬ ꓢꓶꓽ ꓙꓳˍ ꓥ ꓟꓲ ꓟꓽ ꓟꓳꓻ꓾ ꓠꓸ ꓑꓳꓻ ꓙꓳˍ ꓥ ꓟꓲ ꓟꓽ ꓑ ꓙꓽ= ꓟꓷꓽ ꓠꓷꓹ ꓙꓳˍ ꓥˍ ꓟꓲ ꓫꓸ ꓕꓱ ꓟꓽ ꓗꓴꓸ” ꓐꓰ ꓐꓳ ꓔ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓠꓸ ꓑꓳꓻ ꓟꓽ ꓑ ꓙꓽ ꓟ ꓔꓯ ꓫꓬꓹ ꓖꓶˍ ꓟ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓢꓷꓸ ꓡꓰ ꓝꓲˍ ꓟ ꓠꓬ ꓣꓳ ꓔꓯ ꓠꓸ ꓑꓳꓻ ꓠꓬ ꓙꓳˍ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓣꓳ ꓚꓵ ꓚꓵ ꓑ ꓙꓽˍ ꓡ꓾ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓡꓯ= ꓣꓳ ꓠꓸ ꓑꓳꓻ ꓠꓬ ꓙꓳˍ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓠꓸ ꓑꓳꓻ ꓖꓳ ꓟ ꓠꓬ ꓞꓳ ꓫꓸ ꓐꓴ ꓱꓽ ꓠꓱꓽ ꓔꓬ ꓟ ꓫꓸ ꓕꓱ ꓘꓶꓽ꓾ ꓝꓮꓲ ꓣꓱꓽ ꓞꓹ ꓔꓬ ꓢꓴ ꓐꓴ ꓫꓸ ꓕꓱ ꓘꓶꓽ ꓐꓴ ꓔꓯ ꓣꓳ ꓑ ꓙꓽˍ ꓡ= ꓕꓱ ꓟ ꓡꓰꓽ ꓟꓽ ꓞꓲ ꓟꓬꓽ ꓠꓬꓲ ꓐꓷꓹ ꓠꓬꓲ ꓪꓴ-ꓢ ꓐꓯ ꓘꓶꓽ ꓔꓯ ꓣꓳ ꓠ ꓠꓹ ꓔꓬ ꓡ꓾ ꓐꓯ ꓟ ꓣꓳ ꓓꓵꓽ ꓙꓽ ꓠꓬꓲ ꓡꓯ=
ꓮ ꓟꓶ ꓣꓳ ꓦꓬꓼ ꓠꓬꓲ ꓗꓪ ꓢꓳꓚꓲꓮꓡ ꓟꓰꓓꓲꓮ ꓮꓖꓰ ꓐꓯˍ ꓟ꓾ ꓮ ꓫꓵꓽ ꓥˍ ꓟꓲ ꓕꓱ ꓢꓳꓚꓲꓮꓡ ꓟꓰꓓꓲꓮ ꓗꓪ ꓡꓰꓽ ꓣꓳ ꓟꓳꓻˍ ꓟ ꓑꓶꓸ ꓓꓴ ꓣꓳ ꓠꓸ ꓑꓳꓻ ꓠꓬ ꓖꓳ ꓟ ꓔꓯ ꓡꓰꓽ ꓕꓲ ꓠꓬꓲ ꓕꓲ ꓠꓬꓲ ꓠ ꓠꓹ ꓔꓬ ꓕꓯ꓾ ꓢꓴ ꓮ ꓡꓲ ꓐꓰ ꓓꓶꓽ ꓡꓯ ꓘꓳ ꓔꓬ ꓟ꓾ ꓮ ꓡꓲ ꓐꓰ ꓟꓽ ꓙꓲꓻ ꓟ ꓬꓰ ꓗꓷ ꓟ꓾ ꓕꓱ ꓡꓱ ꓫꓵꓽ ꓔꓯ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓠ ꓠꓹ ꓔꓬ ꓕꓯ ꓠꓬ꓾ ꓣꓳ ꓠꓬ ꓠꓸ ꓑꓳꓻ ꓙꓳˍ ꓥ ꓟꓲ ꓠꓸ ꓑꓳꓻ ꓟꓽ ꓑ ꓙꓽ ꓢꓴ ꓐꓰ ꓕꓲ ꓡꓰꓹ ꓗꓷ ꓡꓰˍ ꓥꓳ=
ꓕꓱ ꓟˍ ꓡꓰ ꓐꓰ ꓣꓳ ꓟꓬ ꓢꓶꓽ ꓙꓳˍ ꓥ ꓟꓲ ꓣꓳ ꓟꓬ ꓢꓶꓽ ꓠꓬ ꓢꓴ ꓔꓯ ꓟꓽ ꓙꓲꓻ ꓟ ꓟꓳꓻ꓾ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓠꓬ ꓙꓲꓻˍ ꓟ ꓡꓰꓽ ꓟꓳꓻ ꓢꓲ ꓠꓬꓲ ꓠꓱꓸ ꓐꓯ ꓢꓴ ꓔꓯ ꓟꓽ ꓙꓲꓻ ꓟ ꓡꓰꓽ ꓟꓳꓻ꓾ ꓝꓮꓲ ꓫꓸ ꓢꓴ ꓟꓷꓼ ꓢꓴ ꓐꓴ ꓔꓯ ꓡꓳꓸ ꓟꓽ ꓟꓳꓻ ꓠꓬ ꓣꓳ ꓟꓬ ꓢꓶꓽ ꓙꓳˍ ꓥ ꓟꓲ ꓬꓲ ꓖꓳꓽ ꓥꓳ= ꓟꓷꓽ ꓠꓷꓹ ꓘꓶ ꓥˍ ꓟꓲ ꓕꓱ ꓡꓱ ꓐꓰ ꓥꓳ=
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓸ ꓠꓯ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓔꓯ ꓣꓳꓽ ꓪꓽ ꓘꓴ ꓠꓹ ꓟ ꓬꓳꓸ ꓚꓰꓽˍ ꓡꓳ= ꓣꓳ ꓟꓬ ꓢꓶꓽ ꓟꓳꓻ ꓘꓴ ꓠꓹ ꓟ꓾ ꓪꓴ-ꓢ ꓔꓯ ꓟꓳꓻ ꓘꓴ ꓠꓹ ꓟ꓾ ꓙꓲꓻˍ ꓟ ꓔꓯ ꓟꓳꓻ ꓘꓴ ꓠꓹ ꓟ꓾ ꓣꓳ ꓠꓸ ꓑꓳꓻ ꓥˍ ꓟꓲ ꓙꓲꓻˍ ꓟ ꓔꓯ ꓠ ꓠꓹ ꓗꓴꓸ ꓠꓹ ꓟ꓾ ꓫꓸ ꓢꓴ ꓟꓷꓼ ꓢꓴ ꓘꓴ ꓘꓶ ꓔꓯ ꓑ ꓙꓽ ꓘꓴ ꓠꓹ ꓟ ꓐꓰ꓾ ꓣꓳ ꓟꓷꓽ ꓠꓷꓹ ꓥˍ ꓟꓲ ꓙꓲꓻˍ ꓟ ꓔꓯ ꓫꓸ ꓕꓱ ꓗꓴꓸ ꓠꓹ ꓟ꓾ ꓧꓸ ꓟ ꓬꓰ ꓐ ꓡˍ ꓠꓹ ꓟ꓾ ꓧꓸ ꓟ ꓕꓱ ꓐ ꓡ ꓠꓹ ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓙꓰ ꓡꓯ=
