ꓬꓰ-ꓢꓴ ꓡꓰ ꓐꓯ ꓔ ꓡꓳ꓾ “ꓥꓪ ꓟꓬꓱ ꓗꓪ ꓐꓰ ꓡ ꓞꓳ ꓠꓬꓲꓽ ꓢ ꓣꓳ ꓜꓲꓼ ꓡꓯ ꓘꓳˍ ꓠꓬ꓾ ꓥꓪˍ ꓟꓲ ꓬꓲ ꓪ ꓗꓳ ꓡꓳ ꓗꓪ ꓔꓬ ꓡꓳ꓾” ꓐꓰ ꓐꓯ ꓔ ꓡꓳ=
ꓟꓲ ꓠꓯ ꓕꓱ ꓟ ꓗꓪ ꓮꓽ ꓟˍ ꓟꓲ ꓬꓰ ꓥꓳꓽ ꓡꓰ꓾ ꓬꓰ ꓛꓬ ꓡꓰ ꓟ ꓙꓳˍ ꓡꓳ= ꓟꓽ ꓬꓰ ꓛꓬ ꓗꓷ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ= ꓖꓳ ꓡꓱ ꓥ ꓟꓲ ꓣꓳꓽ ꓪꓴ-ꓢ ꓠꓬ ꓫꓱꓸ ꓤ ꓗꓴꓸˍ ꓡꓳ= ꓣꓳ ꓐꓴ ꓠꓬ ꓠꓲꓹ ꓟ ꓡꓶꓸ ꓢꓲ ꓚꓲꓸ ꓛꓬ ꓤꓶꓻ ꓔꓯ ꓚꓵ ꓚꓵ ꓒꓳꓹ ꓡꓶꓸ ꓗꓷ ꓠꓲꓹ ꓫꓵˍ ꓟ ꓠꓲꓹ ꓟ ꓡꓰ ꓪꓴ-ꓢ ꓔꓬ ꓗꓪ ꓙꓰˍ ꓕꓯ ꓠꓽ꓾ ꓬꓲ ꓠꓬ ꓣꓳ ꓝꓴꓲꓸ ꓮ ꓙꓵꓽ ꓔꓯ ꓖꓽ ꓖꓶ ꓡˍ ꓡꓳ= ꓖꓳ ꓡꓱ ꓥˍ ꓟꓲ꓾ ꓘꓶꓽ ꓘꓹ ꓠꓲꓹ ꓗꓪ ꓐꓰ ꓟꓬ ꓛꓱꓼ ꓗꓷ ꓡꓰ ꓢꓲ꓾ ꓚꓲꓸ ꓛꓬ ꓛꓬꓻ ꓗꓷ ꓥꓳꓽ ꓗꓷ ꓟ ꓔꓯ ꓘꓳ ꓣꓴ ꓠꓲꓹ ꓟꓽ ꓫꓵ ꓢꓴ ꓐꓴˍ ꓟꓲ ꓙꓳˍ ꓢꓰꓽ ꓡꓳ= ꓬꓲ ꓪ ꓐꓴ ꓔꓯ ꓣꓳ ꓮ ꓡꓲ ꓬꓰ ꓖꓶ ꓠꓯꓹˍ ꓡ?
ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ-ꓕꓲ 18ꓽ15-20 ꓗꓪ ꓠꓬ ꓛꓬ ꓢꓴ ꓔꓯ ꓮ ꓡꓲ ꓬꓰ ꓠꓯꓹ ꓟ ꓫꓬꓽ ꓫꓬꓽ ꓡꓰ ꓖꓴ ꓟꓸ ꓖꓶ ꓔ ꓡꓳ= ꓬꓲ ꓪꓴꓸ ꓬꓰ ꓠ ꓔ ꓟ ꓠꓬ꓾ ꓝꓴꓲ ꓬꓰ ꓢꓴ ꓛꓬ ꓗꓷ ꓢꓴ ꓖꓳ ꓕꓲ ꓣꓳ ꓔꓬ ꓗꓪ ꓙꓰ ꓢꓲ ꓬꓲ ꓐꓰ ꓠꓬꓲꓽ ꓣꓳ ꓔꓵꓸꓼ ꓔꓬ ꓟ ꓗꓪ ꓬꓲ ꓝꓴꓲꓸ ꓖꓴ ꓟꓳꓸ ꓖꓶ= ꓬꓲ ꓛꓬ ꓡꓰ ꓥꓳꓽ ꓡꓰ ꓟ ꓝꓴꓲꓸ ꓑꓶꓸ ꓓꓴ ꓬꓲ ꓔꓯ ꓑ ꓫꓬ ꓟꓲꓽ ꓙꓬ ꓗꓪ ꓕꓽ ꓫꓸ ꓔꓳ ꓡꓰ ꓝꓲ= ꓬꓲ ꓟꓽ ꓠ ꓠꓹ ꓡ ꓕꓯ ꓠꓬ ꓢꓷꓸ ꓙ ꓟꓳ ꓙ ꓢꓴ ꓠꓬꓲꓽ ꓢ ꓣꓳ ꓔꓯ ꓟꓲ ꓙꓬ ꓗꓪ ꓘꓴꓻ ꓔꓯꓹ ꓡ ꓢꓲ ꓬꓲ ꓝꓴꓲꓸ ꓔꓯ ꓖꓴ ꓟꓸ ꓖꓶ= ꓖꓳ ꓡꓱ ꓬꓰˍ ꓥ ꓟꓲ ꓟꓽ ꓠ ꓠꓹ ꓡ ꓕꓯ ꓠꓬ ꓘꓴ ꓜꓲꓼ ꓞꓳ ꓔꓯ ꓐꓯ ꓖꓶ= ꓘꓴ ꓜꓲꓼ ꓞꓳ ꓔꓯˍ ꓟꓲ ꓟꓽ ꓠ ꓠꓹ ꓕꓯ ꓠꓽ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ ꓗꓷ ꓐꓰ ꓐꓯ ꓔ ꓡꓳ=
ꓠ ꓠˍ ꓟ ꓠꓬ ꓠꓲꓹ ꓟ ꓟꓽ ꓢꓻ ꓟ ꓔꓯ ꓫꓬꓹ ꓖꓶˍ ꓟ ꓐꓰ ꓧꓳꓹ ꓡꓯ ꓘꓳˍ ꓟ ꓔꓯ ꓗ ꓘꓶꓽ ꓔꓯ ꓒꓴ ꓖꓶˍ ꓟ ꓢꓳꓼ ꓕꓲ ꓟ ꓥ ꓡꓳ= ꓕꓱ ꓟ ꓬꓲ ꓟꓬꓱꓽ ꓬꓰ ꓚꓱꓹ ꓠꓬ ꓠꓬꓲꓽ ꓚꓱꓹ ꓙꓳˍ ꓡꓳ= ꓪꓴ-ꓢ ꓠꓬ ꓣꓳ ꓪꓽ ꓘꓴ ꓘꓶꓽ ꓔꓯ ꓠ ꓠꓹ ꓟ ꓡꓰ ꓐꓰ ꓣꓳ ꓐꓴ ꓥˍ ꓟꓲ ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓠ ꓗꓹ ꓡꓳ= ꓮ ꓣꓳ ꓡꓳꓸ ꓢꓴ ꓐꓰ ꓮ ꓣꓳ ꓐꓴ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓠ ꓠꓹ ꓡꓯ ꓘꓳˍ ꓡꓳ= ꓮ ꓣꓳ ꓜꓴ ꓠꓬ ꓮ ꓣꓳ ꓡꓳꓸ ꓢꓴ ꓔꓯ ꓠ ꓠꓹ ꓡꓳ= ꓮ ꓣꓳ ꓡꓳꓸ ꓢꓴ ꓥˍ ꓟꓲ ꓮ ꓣꓳ ꓜꓴ ꓔꓯ ꓠ ꓠꓹ ꓡꓳ=
ꓣꓳ ꓟꓲ ꓠꓯ ꓞꓳ ꓤ ꓐꓴ ꓕꓲ ꓣꓳ ꓡꓰ ꓕꓲ ꓣꓳ ꓙ ꓡꓯ ꓘꓳꓹˍ ꓕꓯ ꓕꓲ ꓣꓳ ꓛꓳꓽ ꓕꓲ ꓣꓳ ꓠ ꓠꓹ ꓖꓶ ꓡꓯ ꓘꓳ ꓠ ꓗꓹ ꓡꓳ= ꓚꓲꓸ ꓛꓬ ꓒꓬꓱꓼ ꓠꓲꓹ ꓫꓵˍ ꓟ ꓔꓯ ꓡꓰꓽ ꓚꓲ ꓛꓬ ꓐꓯ ꓠꓲꓹ ꓫꓵˍ ꓟ ꓔꓯ ꓡꓰꓽ ꓐꓯ ꓟꓽ ꓓꓻ= ꓞꓳ ꓤ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓟꓽ ꓫꓱꓸ ꓡꓯ ꓘꓳ ꓟ ꓟꓸ ꓟꓲꓽ ꓚꓱꓹ ꓙꓳˍ ꓡꓳ= ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓔꓳꓹ ꓜꓳꓽ ꓗꓳꓸ ꓡˍ ꓟ ꓟꓽ ꓫꓱꓸ ꓡꓯ ꓘꓳ= ꓕꓲ ꓣꓳ ꓔꓯ ꓠꓬ ꓕꓲ ꓙꓰꓽ ꓔꓳꓹ ꓜꓳꓽ ꓗꓳꓸ ꓡˍ ꓡꓳ=
ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓔꓯ ꓛꓬ ꓡ ꓢꓴ ꓐꓴ ꓔꓯ ꓬꓲ ꓝꓴꓲꓸ ꓖꓴ ꓟꓳꓸ ꓖꓶˍ ꓟ ꓗꓪ ꓐꓰ ꓬꓲ ꓠꓬ ꓣꓳ ꓔꓯ ꓠ ꓠꓹ ꓠ ꓗˍ ꓐꓯ ꓥˍ ꓟꓲ꓾ ꓣꓳ ꓐꓴ ꓥˍ ꓟꓲ ꓬꓲ ꓐꓯˍ ꓟ ꓔꓯ ꓠ ꓠꓹ ꓠ ꓗꓹ ꓡꓳ= ꓟꓽ ꓥ ꓠꓬ ꓣꓳ ꓧꓶꓸ ꓕꓯ ꓛꓬ ꓡꓰ ꓥꓳꓽ ꓡꓰ ꓟ ꓑꓶꓸ ꓓꓴ ꓣꓳ ꓬꓲꓼ ꓤ ꓠꓬꓲ ꓤ ꓠꓬ ꓣꓳ ꓔꓯ ꓛꓬ ꓡˍ ꓟˍ ꓟꓲ ꓥ ꓗꓴꓸˍ ꓡꓳ= ꓣꓳ ꓟꓲ ꓠꓯ ꓛꓳ ꓤ ꓐꓯ ꓟ ꓠꓬ ꓚꓲꓸ ꓛꓬ ꓝꓴꓲꓸ ꓔꓯ ꓟꓽ ꓟꓳꓻ ꓟꓳꓻ ꓠꓱꓸ ꓐꓯ ꓢꓴ ꓝꓴꓲꓸ ꓔꓯ ꓟꓳꓻˍ ꓟ ꓟꓬꓽˍ ꓡꓳ= ꓬꓲ ꓣꓳ ꓔꓯ ꓛꓬ ꓡ ꓟ ꓥꓳꓽ ꓡ ꓟ ꓠꓬ ꓮ ꓫꓵꓽ ꓑꓶꓸ ꓓꓴ ꓥ ꓡ ꓐꓯ ꓟ ꓔꓯ ꓟꓽ ꓓꓵꓽ ꓙꓽ ꓙꓽ ꓐꓰ ꓬꓲ ꓠꓬ ꓛꓬ ꓡꓰꓳ꓾ ꓥꓳꓽ ꓡꓰꓳ꓾ ꓐꓰ ꓐꓯ ꓡꓳ= ꓖꓳ ꓡꓱ ꓥˍ ꓟꓲ ꓕꓲ ꓖ ꓕꓲ ꓧꓪꓹ ꓣꓳ ꓔꓯ ꓛꓬ ꓡ ꓟ ꓠꓬ ꓣꓳ ꓧꓶꓸ ꓕꓯ ꓬꓲ ꓔꓯ ꓛꓬ ꓡꓰ ꓟˍ ꓟꓲ ꓥ ꓗꓴꓸˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓥˍ ꓟꓲ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠ ꓠꓹ ꓠ ꓗꓹ ꓡꓳ꓾ ꓐꓯˍ ꓟ ꓥ ꓡꓳ=
ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓯꓸꓼ ꓗꓪ ꓟꓬꓽ ꓠꓬꓲ ꓙꓲ ꓓꓰ ꓡꓰˍ ꓟ ꓕꓲ ꓔꓳꓸ ꓠꓬ꓾ ꓫꓵꓽ ꓪꓴ ꓕꓲ ꓫꓵꓽ ꓫꓵꓽ ꓥ ꓠꓬ꓾ ꓙꓵꓽ ꓗ ꓕꓲ ꓫꓵꓽ ꓫꓵꓽ ꓑꓶꓸ ꓓꓴ ꓬꓰ-ꓢꓴ ꓟꓬꓱ ꓗꓪ ꓐꓰ ꓠꓬꓲꓽ ꓢ ꓣꓳ ꓜꓲꓼ ꓡꓯ ꓘꓳˍ ꓠꓬ꓾ ꓬꓲ ꓠꓬ ꓣꓳ ꓗꓳ ꓡꓳ ꓗꓪ ꓔꓬ ꓡꓳ ꓐꓯ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓮ ꓫꓵꓽ ꓬꓰˍ ꓥˍ ꓟꓲ ꓢꓲ ꓒ ꓬꓲ ꓙꓽ ꓜꓲꓼ ꓢꓷꓸ ꓠꓲꓹ ꓐꓰ ꓪꓽ ꓠꓬꓲˍ ꓟ ꓔꓯ ꓟꓳꓻ ꓠꓹ ꓟ ꓐꓱ ꓶ ꓧꓶꓸ ꓕꓯ ꓪꓽ ꓘꓴ ꓠ ꓔ ꓡꓳ= ꓟꓬꓱꓽ ꓬꓰˍ ꓟ ꓗꓪ ꓥˍ ꓟꓲ꓾ ꓬꓳꓸ ꓚꓵˍ ꓟ ꓫꓵꓽ ꓪꓴ ꓕꓲ ꓫꓵꓽ ꓐꓱ ꓶ ꓖꓪ ꓙꓱ ꓡꓯ ꓘꓳˍ ꓟ ꓗꓪ ꓥˍ ꓟꓲ꓾ ꓢꓷꓸ ꓠꓲꓹ ꓢꓳ ꓢꓴ ꓐꓴ ꓠꓬ ꓟꓽ ꓢꓳ ꓧꓶꓸ ꓕꓯ ꓕꓲ ꓙꓵꓹ ꓗꓪ ꓥˍ ꓟꓲ꓾ ꓮ ꓫꓵꓽ ꓬꓰˍ ꓟ ꓗꓪ ꓥˍ ꓟꓲ ꓪꓴ-ꓢ ꓔꓯ ꓧꓶꓸ ꓕꓯ ꓪꓽ ꓘꓴ ꓠꓯꓹ ꓡꓳ= ꓬꓲ ꓟꓽ ꓥ ꓠꓬ ꓣꓳ ꓐꓴ ꓠꓬ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ= ꓬꓰ ꓐ ꓡˍ ꓥˍ ꓟꓲ ꓮ ꓔꓲꓸ ꓤ ꓡꓰꓽ ꓧꓪꓸ ꓡꓰˍ ꓥꓳ= ꓪꓴ-ꓢ ꓐꓰ ꓕꓲ ꓪ ꓥ ꓕꓯ ꓠꓽ ꓫꓬꓹ ꓔꓱꓹ ꓟꓽ ꓐ ꓡ ꓟ ꓫꓵꓽ ꓪꓴ ꓕꓲ ꓟˍ ꓟꓲ ꓟꓽ ꓙꓳ= ꓬꓲ ꓫꓱꓸ ꓤ ꓠꓲꓹ ꓐꓰ ꓙꓽ ꓗꓴꓸ ꓠꓲꓹ ꓗꓪ ꓐꓰ ꓞꓳ ꓤ ꓠꓲꓹ ꓟ ꓥˍ ꓟꓲ ꓩꓴˍ ꓟ ꓗꓪ ꓐꓰ ꓠꓴꓽ ꓡꓰˍ ꓥꓳ=
