ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓚꓵ ꓚꓵ ꓞꓳ ꓤ ꓚꓵ ꓚꓵ ꓥ ꓟ ꓣꓳ ꓢꓷꓸ ꓡꓰꓳ= ꓬꓰ-ꓢꓴ ꓠꓬ ꓪꓴ-ꓢˍ ꓟꓲ ꓥ ꓡꓳ꓾ ꓞꓳ ꓤˍ ꓟꓲ ꓥ ꓡꓳ= ꓬꓲ ꓠꓯꓸꓼ ꓗꓪ ꓕꓱ ꓡꓱ ꓐꓰ ꓠꓬꓲꓽ ꓫꓵꓽ ꓙꓳˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓡꓯꓼ ꓫꓵ ꓡꓳꓸ ꓠꓬꓲˍ ꓕꓯ ꓠꓲꓹ ꓡꓶꓽ ꓥˍ ꓟꓲ ꓠꓬꓲꓽ ꓟ ꓠꓬꓲꓽ ꓫꓵꓽ ꓙꓳˍ ꓟ ꓣꓳ ꓟꓳꓻˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓐꓰ ꓞꓳ ꓤ ꓠꓬꓲꓽ ꓫꓵꓽ꓾ ꓕꓰ ꓡꓰ ꓓꓹ ꓟ ꓡꓰ ꓐꓰ ꓬꓲ ꓠꓯꓸꓼ ꓗꓪ ꓠꓲꓹ ꓡꓶꓽ ꓥˍ ꓟꓲ ꓠꓬꓲꓽ ꓫꓵꓽ ꓙꓳˍ ꓡꓳ=
ꓪꓴ-ꓢ ꓠꓲꓹ ꓡꓶꓽ ꓐꓰ ꓞꓳ ꓤ ꓠꓲꓹ ꓠꓲꓹ ꓡꓶꓽ꓾ ꓬꓰ-ꓢꓴ ꓞꓳ ꓤ ꓠꓲꓹ ꓡꓶꓽ ꓐꓰ ꓬꓰ-ꓢꓴ ꓪꓴ-ꓢ ꓠꓲꓹ ꓡꓶꓽ ꓠꓬ ꓠꓬꓲꓽ ꓫꓵꓽ ꓗꓪꓺ ꓡꓯ ꓘꓳꓹˍ ꓟ ꓟꓽ ꓙꓳ= ꓮ ꓡꓲꓳ ꓐꓯ ꓠꓬ ꓬꓲ ꓞꓳ ꓤ ꓠꓲꓹ ꓡꓶꓽ ꓠꓬ ꓬꓲ ꓪꓴ-ꓢ ꓠꓲꓹ ꓡꓶꓽ ꓐꓰ ꓕꓲ ꓛꓳꓹˍ꓾ ꓬꓲ ꓞꓳ ꓤ ꓠꓲꓹ ꓡꓶꓽ ꓠꓬ ꓪꓴ-ꓢ ꓠꓲꓹ ꓡꓶꓽ ꓠꓯꓸꓼ ꓗꓪ ꓡꓯꓼ ꓙꓱ ꓗꓷˍ ꓡꓳ ꓐꓯ ꓟ ꓔꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓡꓳꓸ ꓟꓳꓻˍ ꓡꓳ= ꓕꓱ ꓟˍ ꓡꓰ ꓐꓰ ꓘꓴ ꓜꓲꓼ ꓞꓳ ꓗꓪ ꓥˍ ꓟꓲ ꓣꓳ ꓔꓯ ꓕꓱ ꓡꓱ ꓟꓸ ꓖꓶ ꓡˍ ꓡꓳ=
ꓬꓲ ꓠꓯꓸꓼ ꓗꓪ ꓠꓬ ꓠꓲꓹ ꓡꓶꓽ ꓠꓬꓲꓽ ꓟ ꓙꓳˍ ꓡꓳ= ꓖꓳ ꓡꓱ ꓥ ꓟꓲ ꓠꓲꓹ ꓡꓶꓽ ꓖꓳ ꓠꓬꓲꓽ ꓟ ꓠꓬ ꓕꓲ ꓟ ꓐꓰ ꓕꓲ ꓟ ꓪꓴꓸ ꓔꓲꓸ ꓪꓴꓸ ꓑ ꓗꓷ ꓡꓰˍ ꓟ ꓟꓽ ꓙꓳ= ꓮ ꓡꓲꓳ ꓐꓯ ꓠꓬ ꓬꓲ ꓞꓳ ꓤ ꓠꓲꓹ ꓡꓶꓽ ꓠꓬ ꓪꓴ-ꓢ ꓠꓲꓹ ꓡꓶꓽ ꓠꓯꓸꓼ ꓗꓪ ꓡꓯꓼ ꓙꓱ ꓔ ꓟ ꓑꓶꓸ ꓓꓴ꓾ ꓬꓲ ꓬꓰˍ ꓟ ꓮ ꓙꓵꓽ ꓠꓬ ꓬꓲ ꓠꓲꓹ ꓡꓶꓽ ꓙꓳˍ ꓡꓳ=
ꓔꓯ ꓥꓳꓽ꓾ ꓢꓲ ꓒ ꓬꓰ-ꓢꓴ ꓠꓬ ꓖꓰ-ꓢꓰ-ꓟ-ꓠꓲ ꓐꓱ ꓗꓪ ꓪꓽ ꓘꓴˍ ꓕꓯ ꓬꓲ ꓞꓳ ꓤ ꓠꓲꓹ ꓡꓶꓽ ꓠꓬ ꓪꓴ-ꓢ ꓠꓲꓹ ꓡꓶꓽ ꓠꓯꓸꓼ ꓗꓪ ꓡꓯꓼ ꓙꓱ ꓐ ꓡˍ ꓡꓳ= ꓕꓱ ꓟ ꓠꓬ ꓠꓲꓹ ꓡꓶꓽ ꓠꓬꓲꓽ ꓫꓵꓽ ꓙꓳˍ ꓥ ꓟꓲ ꓬꓲ ꓞꓳ ꓤ ꓠꓲꓹ ꓡꓶꓽ ꓠꓬ ꓪꓴ-ꓢ ꓠꓲꓹ ꓡꓶꓽ ꓠꓯꓸꓼ ꓗꓪ ꓡꓯꓼ ꓙꓱ ꓐ ꓡ ꓢꓲ ꓠꓬꓲ ꓞꓳ ꓙꓳ ꓗꓳꓸ ꓙꓰ ꓟ ꓣꓳ ꓡꓳꓸ ꓟꓳꓻˍ ꓡꓳ=
ꓣꓳ ꓝꓴꓲꓸ ꓙꓳ ꓢꓴ ꓠꓲꓹ ꓡꓶꓽ ꓠꓬ ꓕꓲ ꓝꓲꓸ ꓤ ꓟꓲ ꓟꓽ ꓠꓽ ꓠꓽ꓾ ꓟꓽ ꓥ ꓟ ꓔꓯ ꓟꓳꓸ꓾ ꓥꓶˍ ꓟ ꓔꓯ ꓟꓳꓸ꓾ ꓝꓴꓲꓸ ꓔꓯ ꓟꓳꓸ ꓟꓽ ꓠꓽ ꓠꓽ ꓛꓱꓹ ꓔꓴ ꓗꓴꓸˍ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓔꓯ ꓢꓳ ꓓꓴ ꓠꓬ ꓣꓳ ꓠꓲꓹ ꓡꓶꓽ ꓥˍ ꓟꓲ ꓪꓴ-ꓢ ꓠꓲꓹ ꓡꓶꓽ ꓠꓯꓸꓼ ꓗꓪ ꓡꓯꓼ ꓙꓱ ꓗꓷ ꓠꓹ ꓟ꓾ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓚꓱꓹ ꓢꓳ ꓣꓴˍ ꓟ ꓗꓪ ꓐꓰ ꓣꓳ ꓢꓳ ꓣꓴ ꓡꓯ=
ꓢꓲ ꓒ ꓬꓰ-ꓢꓴ ꓠꓬ ꓬꓲ ꓞꓳ ꓤ ꓠꓲꓹ ꓡꓶꓽ ꓔꓯ ꓪꓴ-ꓢ ꓠꓲꓹ ꓡꓶꓽ ꓠꓯꓸꓼ ꓗꓪ ꓕꓲ ꓛꓳˍ ꓡꓯꓼ ꓙꓱ ꓗꓷˍ ꓟ ꓡꓰ ꓐꓰ ꓠꓬꓲꓸ ꓠꓬꓲ ꓠꓴ ꓬꓰˍ ꓟ꓾ ꓥꓪ ꓬꓰˍ ꓟ꓾ ꓠꓴ ꓓꓵꓽ ꓙꓽˍ ꓟ꓾ ꓥꓪ ꓓꓵꓽ ꓙꓽˍ ꓟ ꓮ ꓙꓵꓽ ꓠꓬ ꓚꓲꓸ ꓛꓬ ꓠꓲꓹ ꓡꓶꓽ ꓚꓲꓸ ꓛꓬ ꓚꓱꓹ ꓟꓽ ꓥ ꓥ꓾ ꓪꓴ-ꓢ ꓠꓲꓹ ꓡꓶꓽ ꓚꓱꓹ ꓠꓯꓸꓼ ꓗꓪ ꓡꓯꓼ ꓙꓱ ꓐ ꓡˍ ꓥꓳ ꓐꓯ ꓠꓬ꓾ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓠꓲꓹ ꓫꓵˍ ꓟ ꓤꓶꓻ ꓔꓯ ꓣꓳ ꓛꓳ ꓫꓱꓽ ꓔꓬ ꓡꓳ꓾ ꓐꓯ ꓟ ꓣꓳ ꓢꓷꓸ ꓪ ꓓꓹ ꓡꓳ= ꓮ ꓡꓲꓳ ꓐꓯ ꓠꓬ ꓣꓳ ꓙꓲ-ꓢꓴ ꓢꓲ ꓤ꓾ ꓢꓲ ꓒ ꓬꓰ-ꓢꓴ ꓗ ꓠꓯꓸ ꓖꓼ ꓛꓳ ꓢꓴ ꓐꓯ ꓟ ꓠꓬ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓡꓰꓹ ꓫꓱꓸ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓔꓯ ꓫꓱꓸ ꓡꓰ ꓠꓹ ꓟ ꓐꓱ ꓶ ꓢꓲ ꓒ ꓬꓰ-ꓢꓴ ꓬꓲ ꓫꓱꓹ ꓔꓯ ꓣꓳ ꓔꓯꓺ ꓢꓳ ꓔꓬ ꓟ ꓥ ꓡꓳ=
ꓖꓳ ꓡꓱ ꓠꓬꓲ ꓙꓲ-ꓢꓴ ꓢꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓔꓬ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓢꓲ ꓒ ꓬꓰ-ꓢꓴ ꓔꓯ ꓙꓵꓻˍ ꓟ ꓡꓰ ꓐꓰ ꓢꓲ ꓒ ꓬꓰ=ꓢꓴˍ ꓡꓰ ꓐꓰ ꓣꓳ ꓠꓲꓹ ꓡꓶꓽ ꓔꓯ ꓪꓴ-ꓢ ꓠꓲꓸ ꓡꓶꓽ ꓠꓯꓸꓼ ꓘꓴꓽ ꓗꓪ ꓡꓯꓼ ꓙꓱ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ=
