ꓟꓲ ꓠꓯ ꓥꓴꓻ ꓢꓯꓼ ꓐꓰ ꓞꓳ ꓫ. ꓐꓴ ꓥꓴꓻ ꓢꓯꓼ (Laudato si)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓟꓲ ꓠꓯ ꓥꓴꓻ ꓢꓯꓼ ꓐꓰ ꓞꓳ ꓫ. ꓐꓴ ꓥꓴꓻ ꓢꓯꓼ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓮ ꓟꓶ ꓟ ꓙꓵ, ꓗꓪ ꓣꓳ ꓐꓴ ꓮ ꓙꓵꓽ ꓮ ꓘꓶ. ꓛꓲ ꓟꓽ ꓓꓴ ꓙ ꓗꓷ ꓟ ꓟꓽ ꓢꓪ ꓗꓷ ꓟ ꓮ ꓘꓶ. ꓛꓲ ꓠꓲ, ꓟ ꓟꓽ ꓢ ꓓꓴ ꓚꓱ, ꓠꓬ ꓟꓲ ꓠꓯ ꓥꓴꓻ ꓔꓬ ꓐꓰ ꓞꓳ. ꓫ. ꓐꓴ ꓥꓴꓻ ꓢꓯꓼ ꓔꓯ ꓠ ꓠ, ꓖꓶ ꓠ, ꓟ ꓐꓱ ꓶ ꓥ ꓡꓳ꓿
ꓕꓱ ꓟꓲ ꓠꓯ ꓥꓴꓻ ꓢꓯꓼ ꓐꓰ ꓞꓳ ꓫ. ꓐꓴ ꓥꓴꓻ ꓢꓯꓼ ꓠꓬ ꓮ ꓡꓲ ꓥ ꓟꓲ ꓘꓶꓽ ꓟꓽ ꓓ ꓕꓲ ꓫꓵꓽ ꓡꓰ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓙꓵ, ꓕꓯ ꓞꓳ ꓫ. ꓐꓴ ꓠꓬ ꓟꓬ ꓠꓬ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓢꓴ ꓐꓴ ꓥ ꓡꓳ꓿
ꓟꓲ ꓠꓯ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓟꓲ ꓠꓯ ꓗꓪ ꓟꓵꓽ ꓞꓴ ꓟꓶ ꓡꓶꓽ ꓛꓬ ꓞꓲ ꓥ ꓟꓲ ꓮ ꓘꓶ. ꓛꓲ ꓟꓽ ꓪꓽ ꓓꓴ ꓙꓳ ꓟ ꓥ ꓡꓳ꓿ ꓖꓳ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫꓵꓽ ꓪꓴꓽ ꓔꓳ, ꓜꓳ ꓡ ꓟ ꓥ ꓡꓳ꓿ ꓕꓱ ꓟ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓬꓲꓻ ꓙꓬ ꓙꓵꓽ ꓟꓵꓽ ꓙꓴꓽ ꓙꓵˍ ꓟꓵꓽ ꓡꓶꓽ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓡ ꓟ ꓙꓵ, ꓕꓯ ꓓꓽ ꓪꓴ. ꓫꓵꓽ ꓪꓴꓽ ꓔꓳ, ꓜꓳ ꓡꓰ ꓢꓴ ꓐꓴ ꓠꓬ ꓞꓳ ꓫ. ꓐꓴ ꓥ ꓡꓳ꓿
ꓞꓳ ꓐꓳ ꓐꓴ ꓠꓬ ꓮ ꓘꓶ. ꓛꓲ ꓟꓽ ꓔꓳ, ꓜꓳ ꓡꓰ ꓟ ꓥ ꓡꓳ꓿ ꓕꓲ ꓠꓬꓲ ꓬꓰ ꓟ ꓪꓽ ꓒꓵꓽ ꓕꓲ ꓠꓬꓲ ꓜ ꓢꓴ ꓓꓳ ꓢꓴ ꓞꓳ ꓫ. ꓐꓴ ꓠꓬ ꓟꓵꓼ ꓘꓳꓼ ꓦꓬꓼ ꓠꓬꓲ ꓙꓲ ꓠꓬ ꓫ ꓓꓴ ꓟꓷ ꓓꓴ ꓮ ꓘꓶ. ꓟꓽ ꓙꓳ ꓥ ꓟꓲ ꓟꓵꓽ ꓘꓳꓼ ꓒꓳ, ꓡ ꓠꓬ ꓫ. ꓓꓴ ꓟꓷ ꓓꓴ ꓮ ꓘꓶ. ꓛꓲ ꓔꓳ, ꓜꓳ ꓔꓬ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓟꓵꓽ ꓐꓬ ꓡꓰ ꓟ ꓑꓶ. ꓓꓴ ꓞꓳ ꓫ. ꓐꓴ ꓔꓯ ꓮ ꓡꓲ ꓐꓰ ꓫꓵꓽ ꓪꓴꓽ ꓔꓳ, ꓜꓳ ꓡꓰ ꓟ
ꓢꓲ, ꓠꓯ ꓗꓪ ꓢꓲ, ꓜꓲ ꓡꓳ ꓜꓲ ꓟꓽ ꓙꓳ ꓗꓷ ꓡꓰ ꓕꓯ ꓬꓲꓻ ꓙꓬ ꓙꓵꓽ ꓓꓴ ꓙꓳ ꓟ ꓥꓡꓳ꓿ ꓢꓲ, ꓜꓲ ꓠꓬ ꓟꓶ ꓦ ꓬꓲꓻ ꓐꓰ ꓬꓲꓻ ꓙꓬ ꓔꓯ ꓗꓽ ꓕꓽ ꓐ ꓟ ꓐꓰ ꓙꓲ ꓟ ꓟꓲ ꓦꓲ ꓔꓯ ꓖꓶ ꓐ ꓡ ꓟ ꓮ ꓘꓶ. ꓛꓲ ꓟꓵꓽ ꓘꓳꓼ ꓔꓯ ꓙꓲ ꓡꓰ ꓝꓲ ꓟ ꓥ ꓡꓳ꓿
ꓝꓮꓲ ꓬꓲꓻ ꓙꓬ ꓙꓵꓽ ꓡ ꓟ ꓑꓶ. ꓓꓴ ꓑ ꓫꓬ ꓐꓴ ꓡꓰ ꓔꓶ ꓔ ꓟ ꓑꓶ. ꓫꓴ ꓟꓲ ꓓꓲ‐ꓟꓲ ꓐꓬ ꓡꓰ ꓟ ꓪꓴ. ꓠꓬꓲ ꓜ ꓟꓽ ꓪ ꓗꓷ ꓡꓰ ꓟ ꓥ ꓡꓳ꓿ ꓝꓮꓲ ꓬꓲꓻ ꓙꓬ ꓙꓵꓽ ꓡ ꓟ ꓑꓶ. ꓓꓴ ꓓꓳ ꓓꓴ ꓬꓲꓻ ꓙꓬ ꓥ ꓟꓲ ꓮ ꓘꓶ. ꓫ. ꓓꓴ ꓔꓳ, ꓜꓳ ꓡꓰ ꓢꓲ ꓠꓬꓲ ꓠꓻ ꓓꓴ ꓒꓬ ꓓꓴ ꓔꓳ, ꓜꓳ ꓡ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓑꓶ. ꓓꓴ ꓑ ꓫꓬ ꓐꓴ ꓔꓶ ꓔ ꓟ ꓜ ꓐꓬ ꓡꓰ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓬꓲꓻ ꓙꓬ ꓙꓵˍ ꓡ ꓟ ꓪꓴ. ꓠꓬꓲ ꓑ ꓫꓬ ꓐꓴ ꓔꓬ ꓦꓲꓻ ꓐꓬ ꓡꓰ ꓢꓲ ꓠꓬꓲ ꓡ ꓞꓳ ꓫꓵꓻ ꓡꓰ ꓟ ꓠꓻ ꓓꓴ ꓡꓰ ꓟ ꓫꓵꓽ ꓪꓴꓽ ꓠꓬ ꓮ ꓟꓶ ꓟꓲ ꓠꓯ ꓗꓪ ꓕꓲ ꓠꓬꓲ ꓕꓯ ꓢꓲ ꓕꓲ ꓠꓬꓲ ꓟꓬ ꓡ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓙꓲ ꓟ ꓟꓲ ꓦꓲꓻ ꓙꓲ ꓟ ꓬꓲꓻ ꓙꓬ ꓟꓽ ꓪ ꓡꓰ ꓟ ꓪꓴ. ꓠꓬꓲ ꓧꓪ ꓖꓳ ꓓꓱ ꓗꓪ ꓠꓻ ꓓꓴ ꓒꓬ ꓓꓴ ꓟꓬ, ꓡ ꓟ ꓥꓡꓳ꓿
ꓕꓱ ꓟ ꓮ ꓙꓵꓽ ꓠꓬ ꓟꓲ ꓠꓯ ꓡ ꓞꓳ ꓐꓴ ꓡꓰ ꓠꓲ, ꓦꓰ ꓙꓵˍ ꓟ ꓪꓴ. ꓠꓬꓲ ꓢꓲ, ꓜꓲ ꓡꓳ ꓢꓲ, ꓟꓲ ꓠꓯ ꓔꓯ ꓐꓬ ꓡꓰ ꓠ, ꓟ ꓬꓰ ꓗꓷ ꓪꓴ. ꓠꓬꓲ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓬꓲꓻ ꓙꓬ ꓙꓵꓽ ꓟꓵꓽ ꓡꓶꓽ ꓟꓵꓽ ꓙꓴꓽ ꓙꓵˍ ꓫꓵꓽ ꓪꓴ. ꓔꓳ, ꓜꓳ ꓡ ꓕꓯ ꓞꓳ ꓫ. ꓐꓴ ꓔꓯ ꓮ ꓟꓬ, ꓛꓲ ꓫꓵꓽ ꓪꓴꓽ ꓔꓳ, ꓜꓳ ꓔꓬ ꓢꓲ ꓠꓬꓲ ꓮ ꓡꓲ ꓥ ꓟꓲ ꓝꓮꓲ ꓢꓯ. ꓔꓬ ꓠ, ꓟ ꓮ ꓘꓶ. ꓛꓲ ꓫ. ꓡꓰ ꓟ ꓥ ꓡꓳ꓿ ꓞꓳ ꓫ. ꓐꓴ ꓤꓶꓻ ꓠꓬ ꓫ. ꓔ ꓟ ꓕꓯ ꓫ. ꓡꓰ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓞꓳ ꓡꓯ. ꓐꓴ ꓮ ꓡꓲ ꓐꓰ ꓟꓬꓱꓽ ꓬꓰ ꓠꓯˍ ꓟ
ꓟꓵꓽ ꓘꓳꓼ ꓒꓳ, ꓡ ꓟ ꓗꓽ ꓕꓽ ꓟ ꓞꓳ ꓡꓱ ꓐꓴ ꓬꓰ ꓟ ꓚꓱ, ꓠꓬ ꓛꓲ ꓡ ꓟ ꓙꓵ, ꓗꓪ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓘꓳ, ꓣꓴ ꓪ ꓠ, ꓟ ꓐꓱ ꓶ ꓡꓰ ꓟꓽ ꓞꓲ ꓮ ꓟꓶ ꓟ ꓙꓵ, ꓗꓪ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓔꓬ ꓢꓴ ꓞꓳ ꓫ. ꓐꓴ ꓔꓯ ꓬꓰ ꓙ ꓟ ꓟꓬꓱꓽ ꓓ ꓟ ꓟꓲ ꓥ ꓡꓳ꓿
ꓖꓳ ꓡꓱ ꓠꓬ ꓞꓳ ꓡꓱ ꓞꓳ ꓡꓯ. ꓐꓴ ꓣꓳ ꓓꓴ ꓙ ꓫꓪ ꓠꓬꓲ ꓚꓱ, ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓒꓬꓱꓼ ꓡ ꓝꓲ ꓟ ꓚꓱ, ꓔꓯ ꓤ ꓟꓳ ꓓꓴ ꓬꓰ ꓡꓯ꓿
ꓣꓳ ꓓꓲ ꓟ ꓟꓬꓱꓽ ꓗꓪ ꓐꓰ ꓪꓴ. ꓔꓴ ꓢꓲ ꓠꓬꓲ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓪ ꓠ, ꓟ ꓢꓯꓼ ꓕꓵꓼ ꓡꓯ꓿
ꓢꓲ, ꓜꓲ ꓮ ꓟꓬ, ꓔꓶ ꓓꓴ ꓬꓰ ꓡꓯ꓿ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓪ ꓠꓬ ꓫ. ꓓꓴ ꓟꓷ ꓢꓴ ꓐꓴ ꓮ ꓟꓬ, ꓟꓽ ꓔꓬ ꓡ ꓓꓴ ꓥ ꓡꓳ꓿
ꓟꓲ ꓠꓯ ꓔꓯ ꓚꓬꓴ ꓙ ꓟ ꓟꓬꓱꓽ ꓬꓰ ꓟ ꓠꓬ ꓞꓳ ꓫ. ꓐꓴ ꓔꓯ ꓙꓲ ꓟ ꓤꓶꓻ ꓗꓪ ꓞꓳ ꓙꓳ ꓢꓯ. ꓔꓬ ꓠ, ꓟ ꓐꓱ ꓶ ꓬꓰ ꓙ ꓟ ꓐꓰ ꓕꓲ ꓡꓲ ꓥ ꓡꓳ꓿
ꓟꓲ ꓠꓯ ꓥꓴꓻ ꓢꓯꓼ ꓔꓯ ꓐꓰ ꓞꓳ ꓫ. ꓐꓴ ꓞꓳ ꓢꓯꓼ ꓔꓯ ꓠ ꓠ, ꓖꓶ ꓓꓴ ꓬꓰ ꓡꓯ꓿ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓘꓳ, ꓣꓴ ꓪ ꓠ,ꓟ ꓞꓳ ꓡꓱ ꓞꓳ ꓡꓯ. ꓐꓴ ꓡꓯ ꓒꓯ, ꓗꓪ ꓙꓳ ꓟ ꓥꓡꓳ꓿
ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓪ ꓝꓲ꓿ꓫ. ꓟꓳ ꓪ꓿
