ꓮꓽ ꓐ ꓮ ꓟ ꓐꓰ ꓮ ꓑ ꓮ ꓤ ꓐꓴ ꓔꓯ ꓒꓵꓽ ꓗ ꓬꓰˍ ꓟ ꓦ ꓐ ꓔꓯ ꓟꓬꓱꓽ ꓓꓳꓽ ꓖꓶ ꓓꓴ ꓐꓯ ꓢꓲ ꓬꓮꓥ‐ꓖꓳꓥ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓟ Pontifical Mission Society – PMS ꓜꓴ ꓡꓰ 7 ꓦ 22 ꓠꓬꓲ ꓕꓯ ꓡꓯ.‐ꓬꓮ.‐ꓢꓯ, ꓞꓳ ꓘ, ꓗꓪ ꓟ ꓞꓲꓼ ꓟꓳꓽ ꓢꓴ ꓔꓯ ꓡꓳ. ꓙˍ ꓟ ꓔꓶ. ꓗꓪ ꓙꓰ ꓢꓲ ꓡꓯꓼ ꓫꓴ꓾ ꓜꓽ ꓓꓴ ꓐꓰ ꓠꓵꓻ ꓠꓲ, ꓗꓪ ꓐꓰ ꓞꓲꓼ ꓟꓳꓽ ꓢꓴ 50 ꓣꓳ ꓔꓯ ꓬꓰ ꓙ ꓔꓳ, ꓙ ꓗꓷꓳ꓿
ꓕꓱ ꓟ ꓔꓯ ꓬꓮꓥ‐ꓖꓳꓥ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓟ ꓑꓟꓢ ꓗꓪ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ James Kyaw Lin Tun ꓡꓰ ꓧꓳꓽ ꓪꓴ. ꓟꓴ ꓗꓷ ꓢꓲ ꓠꓬꓲ꓾ ꓬꓲ, ꓐꓵ꓾ ꓜꓽ ꓓꓴ꓾ ꓠꓯ ꓞꓲꓼ ꓕꓲ ꓪˍ ꓮ ꓙꓵꓽ ꓟꓬ‐ꓟ ꓒꓴ 40 ꓫꓬ, ꓞꓲ ꓙꓳˍ ꓟ ꓶꓻ ꓤ ꓚꓬ ꓢꓲ. ꓔꓳ, ꓙ ꓗꓷꓳ꓿ ꓖꓳ ꓟ ꓡꓰꓽ ꓟꓽ ꓞꓲ ꓞꓲꓼ ꓟꓳꓽ ꓢꓴ ꓞꓳ ꓟꓳꓽ ꓮ ꓙꓵꓽ ꓐꓱ ꓶ ꓠꓯꓼ ꓠꓯꓼ ꓜꓻ꓾ ꓟꓳꓼ ꓡꓳ ꓜꓻ ꓐꓰ ꓟꓶ ꓘꓶ ꓜꓻ ꓫꓬ, ꓖꓶ ꓜꓽ ꓗꓷꓳ꓾ ꓐꓰ ꓢꓷ. ꓪˍ ꓡꓳ꓿
ꓖꓳ ꓞꓳ ꓟꓳꓽ ꓐꓴ ꓔꓯ ꓠꓬꓲ ꓙ ꓡꓳ. ꓙ ꓔꓶ. ꓗꓪ ꓠꓬ ꓐꓴ‐ꓓ ꓦ ꓡꓱ ꓢꓴ꓾ ꓪꓴ‐ꓢ ꓦ ꓡꓱ ꓢꓴ꓾ ꓲ‐ꓢ‐ꓡꓯꓟ ꓦ ꓡꓱ ꓢꓴ ꓐꓰ ꓧꓲꓠ‐ꓓꓴ ꓦ ꓡꓱ ꓢꓴ ꓮ ꓙꓵꓽ ꓗꓪ ꓐꓰ ꓞꓳ ꓟꓳꓽ ꓐꓴ ꓔꓬ ꓡꓳ꓿ ꓙꓵꓻ ꓠꓲ, ꓚꓱ, ꓐꓰ ꓞꓳ ꓫꓵꓽ ꓟꓽ ꓘꓶꓽ ꓘꓶꓽ ꓐꓰ ꓬꓰ ꓙ ꓖꓶˍ ꓟ ꓗꓪ ꓐꓰ ꓖꓳ ꓗꓪ ꓬꓰ ꓙ ꓢꓴ ꓐꓴ ꓠꓬ ꓙꓲ‐ꓢꓴ ꓢꓲ ꓤ ꓐꓴ ꓠꓵꓻ ꓠꓲ, ꓐꓰ ꓞꓳ ꓤ ꓮ ꓙꓵꓽ ꓔꓯ ꓒꓵꓽˍ ꓟ ꓠꓲ, ꓟ ꓔꓯ ꓡꓯꓼ ꓕꓲ ꓣꓱꓽ ꓬꓰ ꓠꓲ, ꓫꓵˍ ꓟ ꓑꓶ. ꓓꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲ ꓞꓲꓼ ꓟꓳꓽ ꓢꓴ ꓞꓳ ꓟꓳꓽ ꓐꓴ ꓔꓯ ꓠꓲ, ꓠꓵ ꓠ ꓗ, ꓟ ꓐꓰ ꓒꓵꓽ ꓠ ꓗ, ꓟ ꓠꓬ ꓦ ꓡꓱ ꓚꓱ, ꓫꓱ. ꓡꓯ ꓘꓳˍ ꓟ ꓪꓴ. ꓠꓬꓲ ꓟꓽ ꓥ ꓥ ꓐꓰ꓾ ꓞꓲꓼ ꓟꓳꓽ ꓢꓴ ꓞꓳ ꓟꓳꓽ ꓮ ꓙꓵꓽ ꓠꓬ ꓠꓬꓲ ꓙ ꓡꓳ. ꓙˍ ꓟ꓾ ꓞꓳ ꓤ ꓬꓲ ꓒꓵꓽ ꓐꓰ ꓠꓵꓻ ꓠꓲ, ꓫꓱ, ꓤ ꓠꓲ, ꓟꓶ ꓒꓵꓽ ꓢꓴ ꓐꓴ ꓥ ꓟ ꓔꓯ ꓐꓯ ꓔ ꓡꓳ꓿
ꓕꓱ ꓬꓰ ꓙ ꓜꓴ ꓠꓬ ꓟꓬ‐ꓟ ꓗꓴꓷꓼ ꓞꓳ ꓡꓱ ꓐꓴ ꓠꓬꓲꓽ ꓗꓴ. ꓚꓸꓼ ꓗꓪ ꓬꓲ ꓦꓬꓼ ꓠꓬꓲ ꓟꓶ ꓤ ꓕꓶ ꓞ, ꓟ ꓡꓲꓽ ꓒꓰꓼ ꓕꓲ ꓟ ꓡꓰ ꓐꓰ ꓦꓰꓼ ꓔꓴ ꓡ ꓢꓲ ꓠꓬꓲ ꓠꓵꓻ ꓠꓲ, ꓟꓬꓱꓽ ꓬꓲ ꓔꓯ ꓐꓬꓱꓽ ꓔꓯ ꓟꓳ. ꓖꓶ ꓔꓬ ꓟ ꓥ ꓡꓳ꓿ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓡꓰ ꓐ, ꓐ ꓟ, ꓟ ꓐꓰ ꓞꓲꓼ ꓟꓳꓽ ꓢꓴ ꓐꓴ ꓔꓯ ꓒꓵꓽ ꓗ ꓬꓰˍ ꓟ ꓚꓱ, ꓔꓯ ꓟꓳ. ꓖꓶ ꓠ, ꓟ ꓞꓳ ꓟꓳꓽ ꓐꓴ ꓐꓰ ꓜꓲ ꓡꓯ ꓘꓳˍ ꓟ꓾ ꓬꓰ ꓙ ꓔꓳ, ꓙ ꓟꓬꓱꓽ ꓬꓰˍ ꓟ ꓕꓱ ꓡꓱ ꓫꓵꓽ ꓬꓰ ꓔꓬ ꓟ ꓥ ꓢꓲ ꓠꓬꓲ꓾ ꓞꓳ ꓡꓱ ꓐꓴ ꓡꓰ ꓫ. ꓟꓳ ꓗꓴ.ˍ ꓟ ꓐꓰ ꓮꓽ ꓐ ꓮ ꓟ ꓐꓴ ꓔꓯ ꓒꓵꓽ ꓗꓴ.ˍ ꓟ ꓠꓵ ꓠꓲ, ꓔꓯ ꓡꓯꓼ ꓕꓲꓺ ꓣꓱꓽ ꓬꓰˍ ꓟ ꓗꓪ ꓐꓰ ꓟꓳ. ꓖꓶ ꓗꓴ. ꓠ, ꓟ ꓢꓯꓼ ꓖꓶ ꓔꓬ ꓡꓳ꓿
7 ꓦ ꓠꓬ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓐꓱ ꓶ ꓮ ꓘꓶ. ꓬꓳ. ꓚꓰꓽˍ ꓟ ꓦ ꓐ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ 7 ꓦ 26 ꓠꓬꓲ ꓠꓬ ꓤ ꓟꓶ ꓡꓯ. ꓚꓵ ꓟ‐ꓡꓲ‐ꓬ ꓬꓲ ꓮꓽ ꓐ ꓙꓳꓮꓚꓧꓲꓠ ꓐꓰ ꓬꓲ ꓮ ꓟ ꓮꓠꓠꓰ ꓐꓴ ꓔꓯ ꓚꓲ. ꓟꓶ ꓓꓴ ꓑꓮꓲꓽ ꓔꓯ ꓘꓴ ꓜꓲꓼ ꓞꓳ ꓡꓰ ꓬꓰ ꓔꓬ ꓟ ꓑꓶ. ꓓꓴ ꓥ ꓡꓳ꓿ ꓟꓬ‐ꓟ ꓗꓴꓷꓼ ꓗꓪ ꓥ ꓟꓲ ꓖꓳ ꓕꓲ ꓠꓬꓲ ꓔꓯ ꓮꓽ ꓐ ꓮ ꓟ ꓑꓮꓲꓽ ꓬꓰ ꓔꓬ ꓟ ꓥ ꓡꓳ꓿
ꓬꓮꓥ‐ꓖꓳꓥ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓟ ꓑꓟꓢ ꓗꓪ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ James Kyaw Lin Tun ꓡꓰ ꓮ ꓟꓶ ꓬꓰ ꓙˍ ꓟ ꓚꓱ, ꓔꓯ ꓧꓪ. ꓧꓪ. ꓐꓰ ꓬꓰ ꓐ ꓡ ꓠ, ꓟ ꓒꓴ ꓬꓰ ꓙ ꓖꓶ ꓢꓴ ꓐꓰ ꓬꓰ ꓙ ꓡ ꓢꓴ ꓐꓴ ꓔꓯ ꓫ. ꓟꓳ ꓘꓶꓽ ꓫ. ꓕꓱ ꓗꓷꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓞꓲꓼ ꓟꓳꓽ ꓢꓴ ꓞꓳ ꓟꓳꓽ ꓐꓴ ꓔꓯ ꓠꓬꓲ ꓡꓳ. ꓗꓪꓽ ꓫꓵꓼˍ ꓟ ꓠꓬ ꓦꓲ ꓕꓲ ꓦꓲ ꓬꓰ ꓙꓲꓽ ꓙꓳˍ ꓟ ꓟꓬꓱꓽ ꓡꓰꓽ ꓟꓽ ꓥ꓾ ꓘꓴ ꓜꓲꓼ ꓞꓳ ꓕꓲ ꓟ ꓡꓱꓸꓼ ꓕꓲ ꓠꓲ, ꓕꓲ ꓪꓽ ꓬꓰ ꓠ ꓔˍ ꓟ ꓘꓴ ꓜꓲꓼ ꓞꓳ ꓟꓬꓱꓽ ꓥ ꓟ ꓔꓯˍ ꓟꓲ ꓐꓯ ꓟ. ꓖꓶ ꓗꓷꓳ꓿
“ꓠꓬꓲ. ꓠꓬꓲ ꓣꓳ ꓠꓬ ꓟꓲ ꓡꓰ, ꓗꓷ ꓟꓶ ꓔˍ ꓡꓳ ꓐꓰ ꓓꓵꓽ ꓙꓽ ꓪ ꓢꓴ꓾ ꓡꓳ ꓒꓰ, ꓗꓷˍ ꓟ ꓟꓶ ꓔ ꓡꓳ ꓐꓰ ꓓꓵꓽ ꓙꓽ ꓟꓶ ꓢꓴ ꓔꓬ ꓐꓴ ꓐꓱ ꓶ ꓙꓲ‐ꓢꓴ ꓬꓲ ꓫꓱ. ꓤ ꓠꓲ, ꓔꓯ ꓖꓴ ꓟꓳ. ꓖꓶˍ ꓟ ꓒꓬꓱꓽ ꓟꓬ ꓒꓬꓱꓼ ꓠ, ꓟ ꓘꓴ ꓘꓶꓽ ꓔꓬ ꓡꓳ꓿ ꓮ ꓡꓲ ꓟꓬ ꓛꓲ ꓣꓳˍ ꓟ ꓫꓱ. ꓤˍ ꓟ ꓟꓬꓱꓽ ꓐꓯˍ ꓥ ꓟꓲ꓾ ꓕꓱ ꓟꓬꓱꓽ ꓮ ꓙꓵꓽ ꓠꓬ ꓪꓴ‐ꓢ ꓬꓲ ꓠꓵꓻ ꓠꓲ, ꓔꓯ ꓖꓴ ꓟ. ꓖꓶ ꓢꓲ ꓣꓱꓽ ꓞ, ꓔꓬ ꓢꓴ ꓐꓴ ꓐꓱ ꓶ ꓥꓳ ꓡꓳ. ꓓꓴ ꓔꓯ ꓖꓶˍ ꓡꓳ” ꓐꓰ ꓔꓲꓺ ꓒ ꓡꓰ ꓐꓯ ꓗꓷꓳ꓿
ꓕꓱ ꓣꓱꓽ ꓙ ꓬꓰ ꓙ ꓟꓬꓱꓽ ꓗꓪ ꓐꓰ ꓕꓲ ꓝ. ꓬꓮꓥ‐ꓖꓳꓥ ꓔꓲꓺ ꓒ ꓓꓽ ꓙꓵꓽ ꓔꓶ. ꓑꓟꓢ ꓜꓴ ꓠꓬ ꓣꓱꓽ ꓞ, ꓔꓬ ꓢꓴ ꓐꓴ ꓔꓯ ꓮ ꓕꓯ ꓟꓲ ꓣꓱꓽ ꓙ ꓠ, ꓟ ꓘꓴ ꓜꓲꓼ ꓞꓳ ꓪꓵꓼ ꓘꓶꓽ ꓔꓯ ꓝꓮꓲ ꓬꓰ ꓗꓷ ꓢꓲ꓾ ꓠꓵꓻ ꓠꓲ,꓾ ꓫ. ꓟꓳ ꓗꓴ.ˍ ꓟ ꓐꓰ ꓕꓲ ꓣꓳ ꓐꓰ ꓕꓲ ꓣꓳ ꓕꓲ ꓠꓲ, ꓕꓲ ꓪꓽ ꓬꓰ ꓢꓲ ꓬꓰ ꓙ ꓡꓯ ꓘꓳˍ ꓟ ꓗꓪ ꓪꓴꓽ ꓡ ꓟꓴ ꓡ ꓠ, ꓟ ꓬꓰ ꓔꓬ ꓡꓳ꓾ ꓐꓰ ꓐꓯ ꓔ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲ ꓕꓱ ꓡꓱ ꓬꓰ ꓙ ꓔꓳ, ꓙˍ ꓟ ꓠꓬ ꓞꓲꓼ ꓪꓴꓽ ꓢꓴ ꓞꓳ ꓟꓳꓽ ꓐꓴ ꓔꓯ ꓠꓬꓲ ꓡꓳ. ꓗꓪꓽ ꓫꓵꓼˍ ꓟ ꓠꓬ ꓕꓲ ꓦꓲ ꓡ ꓞꓳ ꓬꓰ ꓠ ꓔˍ ꓟ ꓟꓬꓱꓽ ꓡꓰꓽ ꓟꓽ ꓥ ꓥ ꓐꓰ ꓞꓳ ꓜꓴ ꓕꓲ ꓟ ꓡꓱꓸꓼ ꓕꓲ ꓡꓰ, ꓬꓰ ꓠ, ꓟ ꓟꓬꓱꓽ ꓥ ꓟ ꓔꓯ ꓝ. ꓢꓲ ꓢꓷ. ꓙ ꓗꓷꓳ꓿ ꓫꓱ. ꓤ ꓠꓲ, ꓠꓵ ꓠꓲ, ꓗꓪ ꓐꓰ ꓟꓬꓱꓽ ꓬꓰˍ ꓟ ꓗꓪ ꓐꓰ ꓙꓲ‐ꓢꓴ ꓢꓲ ꓒ ꓬꓲ ꓠꓵ ꓠꓲ, ꓔꓯ ꓡꓯꓼ ꓕꓲ ꓬꓰ ꓠ, ꓟ ꓙꓵꓻ ꓢꓴ ꓮ ꓙꓵꓽ ꓔꓯ ꓘꓴ ꓔꓬ ꓡꓳ꓿
ꓓꓳꓽ ꓐꓰ ꓐꓬꓱꓽ RVA Sgaw Karen Service
