ꓢꓲꓺ ꓒ ꓬꓰ‐ꓢꓴ ꓡꓰ ꓝꓲ ꓓꓴ ꓞꓲ ꓠꓬꓲꓽ ꓣ ꓳ ꓔꓯ ꓝꓲ ꓩꓴ ꓗꓷˍ ꓟ (Monday reflection)
ꓧꓪ. ꓧꓪ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 10ꓽ1‐7 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓢꓲ ꓠꓬꓲ ꓟꓴ ꓗꓪ ꓗꓴꓷꓼ ꓠꓶꓽ ꓡꓻꓳ ꓐꓰ ꓟ. ꓟꓲꓽ ꓚꓺ ꓙꓰ ꓝꓲ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓙꓵꓽ ꓪ ꓖꓶ ꓢꓲ ꓠꓬꓲ ꓠꓲꓽ ꓖꓼ ꓓꓳ ꓟ ꓝꓮꓲ ꓫꓵ. ꓢꓴ ꓔꓯ ꓢꓯ. ꓬꓲ ꓡ ꓝꓲ ꓟ꓾ ꓠꓻ ꓓꓴ ꓒꓬ ꓓꓴ ꓔꓳ, ꓜꓳ ꓢꓴ ꓔꓯ ꓓ ꓡꓰ ꓝꓲ ꓟ ꓐꓰ ꓪꓴ‐ꓢ ꓗꓴꓷꓼ ꓠꓶꓽ ꓡ ꓟ ꓚꓱ, ꓔꓯ ꓟ. ꓟꓲ ꓚꓺ ꓙꓰ ꓝꓲ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓙꓵꓽ ꓪ ꓖꓶ ꓔ ꓢꓲ ꓠꓬꓲ ꓟ. ꓟꓲꓽ ꓚꓺ ꓙꓰ ꓝꓲ ꓟ ꓥ ꓡꓳ꓿ ꓙꓵꓽ ꓪ ꓐꓯ ꓟ ꓠꓬ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓖꓶ ꓔ ꓟ ꓙꓵꓽ ꓪ ꓠꓬ ꓣꓱ ꓙ ꓠ, ꓟ ꓙꓵꓽ ꓪ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓟꓲ ꓠꓯ ꓔꓯ ꓚꓬꓴ ꓙ ꓠ, ꓟ ꓬꓲ ꓕꓲ ꓣꓳ ꓡꓰ ꓟꓬꓱꓽ ꓬꓰ ꓐ ꓡ ꓥ ꓟꓲ꓾ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓙ ꓟꓬꓱꓽ ꓗꓪ ꓐ ꓠ, ꓐꓱ ꓶ ꓙꓵꓽ ꓪ ꓖꓶ ꓢꓴ ꓢꓲꓺ ꓒ ꓥ ꓡꓳ꓿
ꓘꓴ ꓜꓲꓼ ꓞꓳ ꓪꓴ‐ꓢ ꓐꓯ ꓘꓶꓽ ꓚꓺ ꓟ ꓪꓴ‐ꓢ ꓟꓬꓱꓽ ꓬꓰ ꓟ ꓗꓪ ꓪꓴꓽ ꓟꓴ ꓡ ꓟ ꓠꓬ ꓚꓲ. ꓛꓬ ꓢꓯꓼ ꓪ ꓗꓪ ꓐꓰ ꓟꓽ ꓥ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓪꓴꓽ ꓟꓴ ꓡ ꓟ ꓥ ꓡꓳ꓿ ꓪꓴ‐ꓢ ꓖꓶ ꓡ ꓟ ꓙꓵꓽ ꓪ ꓐꓰ ꓣꓱ ꓛꓰ ꓡꓯ ꓫꓴ ꓑꓶ. ꓓꓴ ꓘꓴ ꓜꓲꓼ ꓞꓳ ꓠꓯ, ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴꓽ ꓟꓴ ꓡ ꓟ ꓥ ꓡꓳ꓿
ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓟꓬꓱꓺ ꓔꓯ ꓐꓳ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓟꓽ ꓪ ꓡꓯꓽ ꓘꓳ ꓟ ꓫꓽ ꓫꓱ, ꓡꓯꓽ ꓘꓳ, ꓟ ꓔꓲ ꓗꓪ ꓐꓰ ꓘꓴ ꓢꓴ ꓐꓴ ꓥ ꓡꓳ꓿ ꓕꓲ ꓐꓱ ꓠꓬ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓐꓱ ꓶ ꓒꓴ ꓖꓳ ꓢꓴ꓾ ꓟꓽ ꓪ ꓡꓯ ꓘꓳ, ꓟ ꓡꓲꓽ ꓒꓰꓼ ꓗꓪ ꓔꓬ ꓢꓴ ꓐꓴ ꓬꓲ ꓝꓲ ꓓꓴ ꓐꓴ ꓔꓯ ꓘꓴ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓠꓬ ꓗꓳ ꓗꓷ ꓟ ꓙꓵ, ꓕꓯ ꓟꓽ ꓪ ꓡꓯꓽ ꓘꓳ, ꓟ ꓡꓲꓽ ꓒꓰꓼ ꓚꓱ, ꓗꓪ ꓔꓬ ꓢꓴ ꓐꓴ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ ꓗꓪ ꓛꓳꓽ ꓙꓰ ꓠꓬ ꓕꓲ ꓠꓲ, ꓕꓲ ꓪ ꓒꓬꓱꓼ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓠꓯ, ꓗꓪ ꓞꓳ ꓫꓵꓽ ꓟꓽ ꓘꓶꓽ ꓞꓳ ꓠꓯ ꓞꓳ ꓒꓴ ꓟꓽ ꓘꓶꓽ ꓡꓲꓼ ꓒꓰꓼ ꓟꓽ ꓘꓶꓽ ꓠ, ꓟ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓙꓵꓽ ꓪ ꓖꓶ ꓔ ꓟ ꓝꓲ ꓓꓴ ꓒꓲ‐ꓕꓱ ꓗꓪ ꓐꓰ ꓕꓲ ꓝ. ꓡꓰ ꓕꓲ ꓝ. ꓙꓵꓽ ꓡ ꓟ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓟꓲ ꓠꓯ ꓗꓪ ꓞꓳ ꓫꓵꓽ ꓞꓳ ꓙꓵꓽ ꓮ ꓙꓵꓽ ꓐ ꓟ ꓦꓻ ꓡꓱ ꓘꓴ ꓜꓲꓼ ꓞꓳ ꓓꓽ ꓥ ꓡꓳ꓿ ꓴꓠꓲꓦꓰꓣꓢꓮꓡ ꓚꓧꓴꓣꓚꓧ ꓐꓯ ꓟ ꓟꓴ ꓗꓳ ꓓꓵ ꓓꓵ ꓗꓪ ꓔꓬ ꓟ ꓞꓳ ꓫꓵꓽ ꓞꓳ ꓙꓰ ꓢꓯ. ꓫꓵꓽ ꓢꓯ. ꓙꓰ ꓮ ꓙꓵꓽ ꓗꓪ ꓐꓰ ꓗꓪ ꓫꓵꓽ ꓟ ꓘꓴ ꓜꓲꓼ ꓞꓳ ꓥ ꓡꓳ꓿
ꓘꓴ ꓜꓲꓼ ꓞꓳ ꓠꓯ, ꓗꓪ ꓞꓳ ꓫꓵꓽ ꓞꓳ ꓙꓰ ꓮ ꓟꓬ, ꓐ ꓡꓳ ꓡꓲꓽ ꓒꓰꓼ ꓟꓽ ꓪ ꓟ ꓮ ꓟꓬ, ꓙꓳ ꓡꓳ ꓖꓳ ꓡꓱ ꓥ ꓟꓲ ꓢꓲꓺ ꓒ ꓠꓵꓻ ꓠꓲ, ꓗꓪ ꓮ ꓙꓵꓽ ꓢꓴ ꓠꓬ ꓪꓽ ꓡꓯꓽ ꓘꓳ, ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓝꓲ‐ꓓꓴ ꓠꓬ ꓐꓴ ꓟꓴ ꓗꓪ ꓗꓴꓷꓼ ꓠꓬ ꓠꓶꓽ ꓡꓻꓳ ꓐꓰ ꓟ. ꓟꓲꓽ ꓚꓺ ꓙꓰ ꓝꓲ ꓟ ꓥꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓓꓽ ꓪꓴ ꓬꓲ ꓝꓲ ꓓꓴ ꓐꓴ ꓔꓯ ꓬ‐ꓢꓷ‐ꓡꓲ ꓡ ꓞꓳ ꓐꓴ ꓔꓬ ꓗꓪ ꓟ. ꓟꓲꓽ ꓚꓺ ꓙꓰ ꓝꓲ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓟꓴ ꓗꓪ ꓗꓴꓷꓼ ꓐꓯ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓫꓵꓻ ꓡꓰ ꓗ. ꓠꓯ ꓛꓲ ꓡ ꓟ ꓟꓽ ꓥ꓾ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓪꓴꓽ ꓔꓴ ꓢꓲ ꓠꓬꓲ ꓙꓵꓽ ꓔꓬ ꓟ ꓠꓬ ꓮ ꓟꓬ, ꓗꓪ ꓛꓳ ꓡꓰ ꓪꓴꓽ ꓔꓴ ꓔꓬ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓔꓱ, ꓚꓵˍ ꓟ꓾ ꓢꓲ ꓡꓲ ꓟ꓾ ꓠꓵꓻ ꓠꓲ, ꓗꓪ ꓐꓰ ꓡꓰ ꓧꓳꓽ ꓪꓴ. ꓟꓴ ꓢꓴ ꓢꓲꓺ ꓒ ꓥ ꓡꓳ꓿ ꓪꓴ‐ꓢ ꓠꓬ ꓠꓵꓻ ꓠꓲ, ꓢꓲꓺ ꓒ ꓥ ꓟ ꓑꓶ. ꓓꓴ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓟ. ꓟꓲꓽ ꓚꓺ ꓙꓰ ꓝꓲ ꓟ ꓡꓰ ꓐꓰ ꓠꓴ ꓥꓪ ꓒ ꓕꓲ ꓗꓪꓔꓬ ꓣꓳ ꓦꓲꓻ ꓘꓴꓽ ꓢꓴ ꓔꓯ ꓓꓽ ꓪꓴ. ꓟꓴ ꓠꓵꓻ ꓠꓲ, ꓟ. ꓖꓶ ꓠ ,ꓟ ꓢꓲꓺ ꓒ ꓠꓬ ꓠꓵꓻ ꓠꓲ, ꓥ ꓟ ꓚꓱ, ꓔꓯ ꓟ. ꓖꓶ ꓠ, ꓟ ꓘꓴ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓤꓶꓻ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓡꓰ ꓠꓴ ꓥꓪ ꓔꓯ ꓪꓴ‐ꓢ ꓠꓵꓻ ꓠꓲ, ꓔꓯ ꓠꓱ. ꓐꓯ ꓢꓴ ꓔꓯ ꓟ. ꓖꓶ ꓠ, ꓟ ꓘꓴ ꓔꓬ ꓟ ꓥ ꓡꓳ꓿ ꓣꓳ ꓠꓬ ꓮ ꓡꓲ ꓐꓰ ꓞꓳ ꓙꓳ ꓔꓬ ꓡ ꓓꓴ ꓙ ꓠꓬꓲ ꓡꓯ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓟꓴ ꓗꓪ ꓗꓴꓷꓼ ꓠꓶꓽ ꓡꓻꓳ ꓐꓰ ꓐꓯ ꓔꓬ ꓟ ꓥ ꓡꓳ꓿ ꓠꓬꓲ ꓣꓳ ꓞꓳ ꓙꓳ ꓚꓱ, ꓗꓪ ꓢꓲꓺ ꓒ ꓐꓰ ꓕꓲ ꓪ ꓞꓳ ꓙꓳ ꓔꓬ ꓡ ꓣꓳ ꓓꓵꓽ ꓙ ꓠꓬꓲ ꓡꓯ꓿ ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓠꓵꓻ ꓠꓲ, ꓢꓲꓺ ꓒ ꓔꓯ ꓘꓳ,ꓣ ꓴ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
