ꓞꓳ ꓤ ꓕꓲ ꓣꓳ ꓠꓬ ꓫꓵꓻ ꓡꓰ ꓗ. ꓠꓯ. ꓬꓲ. ꓟꓲ ꓠꓯ ꓗꓪ ꓔꓳ, ꓜꓳ ꓗꓳ. ꓡ ꓟ꓾ ꓣꓱꓽ ꓗꓳ. ꓡ ꓟ ꓮ ꓙꓵ ꓬꓲ ꓚꓵ. ꓟꓶ ꓓ_ ꓡ꓾ (ꓥ ꓠꓬ) ꓬꓲ ꓚꓵ. ꓟꓶ ꓓꓴ ꓮ ꓙꓵ ꓒꓰꓼ ꓬꓰ ꓡ꓾
ꓞꓳ ꓤ ꓕꓲ ꓣꓳ ꓬꓲ ꓫꓻ ꓘꓪ ꓡꓰ ꓗ. ꓯ. ꓠꓬ ꓬꓲ ꓦꓻ ꓕꓲꓽ ꓒꓳ, ꓗꓪ ꓛꓲ ꓬꓰ_ ꓡꓳ꓾ ꓦꓻ ꓖꓳ ꓟ ꓠꓬ ꓟꓲ ꓠꓯ ꓗꓪ ꓗꓳ. ꓗꓷ ꓟ ꓮ ꓙꓵ ꓔꓯ ꓬꓲ ꓚꓵ. ꓟꓶ. ꓡ꓾ ꓐꓯ ꓠꓬ ꓕꓲ ꓐꓱ ꓠꓬ ꓚꓵ. ꓟꓶ_ ꓥꓳ꓾ ꓕꓲ ꓐꓱ ꓠꓬ ꓚꓵ. ꓟꓽ ꓟꓶ꓾ꓮ ꓫꓵ ꓑꓶ ꓓꓴ ꓕꓲ ꓐꓱ ꓟ ꓔꓯ ꓠꓬ ꓚꓵ. ꓟꓶ ꓢꓲ ꓠꓬꓲ ꓕꓲ ꓐꓱ ꓟ ꓔꓯ ꓬꓲ ꓟꓽ ꓢꓷ. ꓓ_ ꓟ ꓠꓬ ꓪꓴ‐ꓢ ꓡꓰ ꓬꓰ ꓖꓶ ꓔ ꓟ ꓥ ꓡꓳ꓿
ꓪꓴ‐ꓢ ꓠꓬ ꓮ ꓡꓰ ꓐꓰ ꓬꓰ ꓖꓶ ꓔ ꓡ ꓐꓯ ꓠꓬ ꓟꓳ. ꓖꓶ ꓓꓴ ꓕꓳ ꓶ 21ꓽ 4 ꓗꓪ ꓬꓲ ꓪ ꓔꓯ ꓥꓪ ꓠꓬ ꓟꓬ ꓐꓲ ꓮ ꓙꓵ ꓗꓪ ꓐꓰ ꓫꓵ, ꓖꓶ ꓥꓳ꓾ ꓬꓲ ꓪ ꓗꓳ. ꓗꓷ ꓟ ꓮ ꓙꓵ ꓔꓯ ꓥꓪ ꓠꓬ ꓒꓬ, ꓗꓷ_ ꓥꓳ ꓐꓰ ꓐꓳ ꓔ ꓟ ꓥ ꓡꓳ꓿ 1 ꓘꓳ‐ꓡꓱ‐ꓕꓴ 13ꓽ 12 ꓗꓪ ꓥ ꓟꓲ ꓕꓱ ꓡꓱ ꓐꓳ ꓔ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓠꓲ, ꓠꓵꓻ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓪꓴ‐ꓢ ꓠꓬ ꓟꓲ ꓠꓯ ꓗꓪ ꓔꓳ, ꓜꓳ ꓗꓳ._ ꓟ ꓕꓲ ꓐꓱ ꓟ ꓔꓯ ꓬꓲ ꓡꓰ ꓒꓬ, ꓗꓷ ꓥꓳ ꓐꓯ_ ꓟ ꓠꓬ ꓮ ꓫꓵ ꓔꓯ ꓒꓬ, ꓗꓷ_ ꓡ ꓐꓯ ꓠꓬ ꓟꓲ ꓯ ꓗꓪ ꓔꓳ, ꓜꓳ ꓗꓳ. ꓡ ꓟ ꓫ. ꓙꓵ ꓟꓷꓼ ꓙꓵ ꓓꓴ ꓠꓲ, ꓫ. ꓟꓬ ꓫ. ꓓꓴ ꓮ ꓙꓵ ꓕꓱ ꓡꓱ ꓐꓰ ꓠꓲ, ꓟ ꓫ. ꓟ ꓮ ꓙꓵ ꓔꓯ ꓠꓬ ꓪꓴ‐ꓢ ꓠꓬ ꓒꓬ, ꓗꓷ_ ꓥꓳ꓿ ꓚꓵ. ꓟꓶ ꓓꓴ ꓮ ꓙꓵ ꓔꓯ ꓪꓴ‐ꓢ ꓡꓰ ꓫꓵ, ꓦ ꓗꓷ_ ꓥꓳ꓿ ꓟꓬ ꓐꓲ ꓔꓯ ꓫꓵ, ꓖꓶ_ ꓟ ꓡꓰ ꓬꓲ ꓡꓰ ꓫꓵ, ꓖꓶ ꓗꓷ_ ꓥꓳ꓾ ꓖꓳ ꓟ ꓔꓯ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓠꓬ ꓠꓲ, ꓫ. ꓟꓬ ꓫ. ꓟ ꓕꓱ ꓡꓱ ꓟꓲ ꓠꓯ ꓗꓪ ꓟ ꓫꓵ ꓪꓴ ꓮ ꓙꓵ ꓠꓬ ꓟꓽ ꓙꓳ꓾ ꓖꓳ ꓗ. ꓠꓯ. ꓟꓲ ꓠꓯ ꓗꓪ ꓮ ꓫꓵ ꓚꓵ. ꓟꓶ_ ꓡ ꓐꓯ ꓠꓬ ꓣꓳ ꓠꓲ, ꓠꓵꓻ ꓢꓴ ꓣꓳ ꓗ, ꓛꓲ ꓗꓳ. ꓡ ꓟ ꓗ, ꓛꓲ ꓓꓴ ꓙꓲ_ ꓟ ꓮ ꓙꓵ ꓡꓰ ꓣꓳ ꓚꓵ. ꓟꓶ ꓓ_ ꓡꓳ꓿
ꓖꓳ ꓟ ꓑꓶ ꓓꓴ ꓠꓬꓲ. ꓠꓬꓲ ꓣꓳ ꓟꓴ ꓗꓪ ꓗꓴꓷꓼ ꓗꓪ ꓕꓲ ꓒꓳ, ꓗꓪ ꓛꓲ ꓬꓰ ꓕꓯ ꓠꓬ ꓣꓳ ꓠꓲ, ꓫ. ꓟꓬ ꓫ. ꓓꓴ ꓠꓬ ꓮ ꓙꓵ ꓒꓰꓼ ꓬꓰ ꓟ ꓥꓳ꓿ ꓖꓳ ꓡꓱ ꓥ ꓟꓲ ꓣꓳ ꓠꓲ, ꓠꓵꓻ ꓗꓳ. ꓡ ꓟ ꓗ, ꓛꓲ ꓗꓳ. ꓡ ꓟ ꓪꓴ‐ꓢ ꓬꓲ ꓙꓲ_ ꓟ ꓮ ꓙꓵ ꓠꓬ ꓣꓳ ꓚꓵ. ꓟꓶ ꓓ_ ꓟ ꓥꓳ꓿ ꓟꓲ ꓯ ꓗꓪ ꓐꓰ ꓫꓵꓻ ꓗ. ꓠꓯ. ꓦ ꓕꓲ ꓒꓳ, ꓗꓪ ꓣꓳ ꓚꓵ. ꓟꓶ ꓡ ꓚꓵ. ꓟꓽ ꓟꓶ ꓡ ꓐꓯ_ ꓟ ꓠꓬ ꓠꓬꓲ. ꓠꓬꓲ ꓣꓳ ꓟ. ꓟꓲꓽ ꓗꓪ ꓥ ꓟꓲ ꓙꓳ_ ꓟ ꓥ ꓡꓳ꓿ ꓞꓳ ꓤ ꓕꓲ ꓣꓳ ꓫꓵꓻ ꓘꓪ ꓡꓰ ꓗ. ꓠꓯ. ꓠꓬ ꓚꓵ. ꓟꓶ ꓓꓴ ꓕꓲ ꓐꓱ ꓠꓬ ꓚꓵ. ꓟꓶ ꓥꓳ꓾ ꓕꓲ ꓐꓱ ꓠꓬ ꓚꓵ. ꓟꓽ ꓟꓶ ꓫ. ꓙꓵ ꓟꓷꓼ ꓙꓵ ꓓꓴ ꓮ ꓙꓵ ꓚꓵ. ꓟꓽ ꓟꓶ ꓖꓳ ꓡꓱ ꓥ ꓟꓲ ꓗ, ꓛꓲ ꓓꓴ ꓮ ꓙꓵ ꓠꓬ ꓣꓳ ꓚꓵ. ꓟꓶ ꓓ_ ꓟ ꓥꓳ꓿ ꓕꓱ ꓟ ꓠꓬ ꓪꓴ‐ꓢ ꓬꓲ. ꓮ ꓓꓰ ꓪꓴ_ ꓟ ꓠꓵꓻ ꓠꓲ, ꓡꓯꓼ ꓫꓴꓺ ꓖꓶ ꓔ ꓟ ꓥ ꓡꓳ꓿
