ꓡꓯ ꓒꓯ, ꓟꓽ ꓙꓳ ꓥ ꓟꓲ ꓐꓬꓱ ꓦꓲꓻ ꓫꓵ. ꓟ ꓥ ꓟ ꓙꓰꓢꓢꓲꓚꓮ ꓚꓳꓫ ꓚꓱ, (Jessica Cox Pilot no arm)
ꓡꓯ ꓒꓯ, ꓟꓽ ꓙꓳ ꓥ ꓟꓲ ꓐꓬꓱ ꓦꓲꓻ ꓫꓵ. ꓗꓪ ꓮ ꓘꓶ. ꓛꓲ ꓓ ꓢꓴ ꓙꓰꓢꓢꓲꓚꓮ ꓚꓳꓫ ꓚꓱ, ꓠꓬ ꓮ ꓘꓶ. ꓛꓲ ꓓꓴ ꓙ ꓟꓶ ꓓꓴ ꓥ ꓡꓳ꓿ ꓬꓲ ꓡꓰ ꓬꓰ ꓟ. ꓖꓶ ꓟ ꓚꓱ, ꓠꓬ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓢꓴ ꓬꓲ ꓔꓯ ꓮ ꓘꓶ. ꓛꓲ ꓔꓯ ꓢꓳ ꓠ, ꓟ ꓙꓳ ꓟ ꓥ ꓡꓳ꓿
ꓬꓲ ꓞꓲꓼ ꓣꓳ ꓟ ꓙꓵ, ꓔꓯ ꓣꓳ ꓡꓳ ꓠꓬꓲ ꓓꓴ ꓬꓰ ꓡꓯ꓿ ꓙꓰꓢꓢꓲꓚꓮ ꓔꓯ 1983 ꓘꓳꓼ ꓕꓯ ꓦꓵꓻ ꓗꓷ ꓥꓟꓲ ꓬꓲ ꓔꓯ ꓦꓵꓻ ꓡ ꓟ ꓙꓵ, ꓕꓯ ꓡꓯꓽ ꓒꓯ ꓟꓽ ꓐ ꓦꓵꓻ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓬꓲ ꓠꓬ ꓠꓲ, ꓟ ꓟꓽ ꓐꓬ ꓪꓴ‐ꓢ ꓡꓰ ꓚꓰꓼ ꓖꓶ ꓔ ꓟ ꓛꓲ ꓒꓯ, ꓔꓯ ꓣꓱ ꓢꓲ ꓠꓬꓲ ꓠꓱ. ꓐꓯꓼ ꓡ ꓞꓳ ꓐꓴ ꓟꓽ ꓒꓬꓱꓼ ꓡ ꓐꓰ ꓓꓴ ꓙ ꓔꓯ ꓟꓬꓱꓽ ꓔꓯ ꓬꓰ ꓐ ꓡ ꓢꓴ ꓕꓲ ꓣꓳ ꓥ ꓡꓳ꓿
ꓖꓳ ꓡꓱ ꓠꓬ ꓬꓲ ꓠꓬ ꓡꓯ ꓒꓯ, ꓟꓽ ꓐ ꓐꓬꓱ ꓦꓲꓻ ꓔꓯ ꓮ ꓡꓲ ꓐꓰ ꓫꓵ. ꓗꓷ ꓟ ꓚꓱ, ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓙꓰꓢꓢꓲꓚꓮ ꓠꓬ ꓐꓬꓱ ꓦꓲꓻ ꓫꓵ. ꓐ ꓡ ꓠ, ꓟ ꓐꓱ ꓶ ꓕꓳ ꓶ ꓔꓯ (3) ꓘꓳꓼ ꓣꓳ ꓣꓴ ꓗꓷ ꓕꓯ ꓢꓲ ꓠꓬꓲ ꓘꓳ, ꓣꓴ ꓪ ꓡꓰ ꓟ ꓥ ꓡꓳ꓿ ꓙꓰꓢꓢꓲꓚꓮ ꓫꓵ. ꓗꓷ ꓟ ꓐꓬꓱ ꓦꓲꓻ ꓠꓬ ꓡꓯ ꓒꓯ, ꓟꓽ ꓐ ꓢꓴ ꓐꓱ ꓐꓬꓱ ꓦꓲꓻ ꓫꓬ, ꓢꓴ ꓐꓴ ꓡꓰ ꓫꓬ, ꓔ ꓟ ꓔꓯ ꓣꓱ ꓢꓲ ꓠꓬꓲ ꓛꓲ ꓒꓯ, ꓡꓰ ꓣꓱ ꓢꓲ ꓠꓬꓲ ꓫꓵ. ꓗꓷ ꓟ ꓥ ꓡꓳ꓿
ꓬꓲ ꓛꓲ ꓒꓯ, ꓠꓬꓲ ꓐ ꓠꓬ ꓐꓬꓱ ꓔꓯ ꓮ ꓡꓲ ꓐꓰ ꓫꓵ. ꓟ ꓢꓷ. ꓠꓲ, ꓔꓯ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓢꓳꓻ ꓣꓴ ꓗꓷ ꓟꓥ ꓡꓳ꓿ ꓙꓰꓢꓢꓲꓚꓮ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷ ꓟ ꓪꓴ. ꓠꓬꓲ ꓛꓲ ꓡꓯ ꓡꓰ ꓐꓬꓱ ꓦꓲꓻ ꓔꓯ ꓫꓵ. ꓢꓴ ꓒꓬꓱꓼ ꓡ ꓟ ꓥ ꓡꓳ꓿
ꓝꓮꓲ ꓬꓲ ꓠꓬ ꓐꓬꓱꓼ ꓦꓲꓻ ꓔꓯ ꓛꓲ, ꓒꓯ, ꓣꓱ ꓢꓲ ꓠꓬꓲ ꓫꓵ. ꓖꓴ ꓔ ꓟ ꓡꓰ ꓟꓽ ꓞꓲ ꓬꓲ ꓠꓬ ꓚꓴ. ꓥꓳꓽ ꓥ ꓟꓲ ꓮ ꓘꓶ. ꓓ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓚꓴ. ꓥꓳꓽ ꓓꓶ ꓔꓯ ꓡꓯꓽ ꓘꓳ, ꓑꓮꓲꓽ ꓗꓪ ꓥ ꓟꓲ ꓚꓧꓮꓟꓑꓲꓳꓠ ꓪ ꓢꓴ ꓕꓲ ꓣꓳ ꓥ ꓡꓳ꓿
ꓬꓲ ꓬꓲ ꓞꓲ ꓣꓳ ꓟ ꓙꓵ, ꓕꓯ ꓡꓰ ꓛꓲ, ꓒꓯ ꓣꓱ ꓠꓬꓲ ꓕꓳ ꓶ ꓐꓳ ꓟ ꓚꓳꓟꓑꓴꓔꓰꓣ ꓣꓱ ꓟ ꓚꓱ, ꓔꓯ ꓢꓳꓻ ꓣꓴ ꓗꓷ ꓟ ꓥ ꓡꓳ꓿ ꓝꓮꓲ ꓬꓲ ꓠꓬ ꓬꓲꓻ ꓙꓬ ꓢ ꓗꓪ ꓥ ꓟꓲ ꓮ ꓘꓶ. ꓓ ꓢꓴ ꓕꓲ ꓣꓳ ꓥ ꓡꓳ꓿
ꓐꓬꓱ ꓦꓲꓻ ꓫꓬ, ꓢꓴ ꓐꓴ ꓡꓰ ꓙꓰꓢꓢꓲꓚꓮ ꓐꓱ ꓶ ꓫꓬ, ꓖꓶ ꓔ ꓟ ꓶꓻ ꓤ ꓔꓯ ꓣꓱ ꓢꓲ ꓠꓬꓲ ꓬꓲ ꓠꓬ ꓐꓬꓱ ꓦꓲꓻ ꓫꓵ. ꓟ ꓗꓪ ꓗ, ꓛꓲ ꓢ ꓢ ꓡꓰ ꓫꓵ. ꓠ, ꓟ ꓐꓱ ꓶ ꓬꓰ ꓪ ꓡꓰꓳ꓿
ꓬꓲ ꓔꓶ ꓐꓬꓱ ꓠꓬ 2028 ꓘꓳꓼ ꓕꓯ ꓴꓢꓮ ꓗꓴꓷꓼ ꓗꓪ ꓳꓡꓬꓑꓲꓚ ꓡꓳ ꓖꓪ ꓑꓮꓲꓽ ꓗꓪ ꓐꓬꓱ ꓦꓲꓻ ꓫꓵ. ꓟ. ꓖꓶ ꓠ, ꓟ ꓬꓲ ꓠꓬ ꓙ ꓖꓶ ꓔꓬ ꓢꓴ ꓥ ꓡꓳ꓿
ꓙꓰꓢꓢꓲꓚꓮ ꓡꓰ ꓣꓳ ꓞꓳ ꓡꓱ ꓐꓴ ꓔꓯ ꓮ ꓫꓵ. ꓟ. ꓖꓶ ꓠꓬ ꓐꓯ ꓠꓬ
ꓣꓳ ꓓꓴ ꓙ ꓚꓱ, ꓔꓯ ꓮ ꓟꓴ ꓟꓴ ꓗꓪ ꓛ ꓔ ꓢꓲ ꓠꓬꓲ ꓔꓶ ꓙꓱ ꓔꓯ ꓟꓽ ꓠꓽ ꓠꓽ ꓢꓯꓼ ꓕꓵꓼ ꓠ, ꓟ ꓣꓳ ꓚꓵ, ꓟ ꓔꓯ ꓟꓟ. ꓖꓶ ꓡ ꓡꓳ꓿ ꓙꓰꓢꓢꓲꓚꓮ ꓠꓬ ꓡꓯ ꓒꓯ, ꓠꓬꓲꓽ ꓐ ꓟꓽ ꓙꓳ ꓢꓴ ꓥ ꓟꓲ ꓬꓲ ꓠꓯ, ꓗꓪ ꓙꓳ ꓟ ꓛꓲ ꓒꓯ, ꓔꓯ ꓣꓱ ꓢꓲ ꓠꓬꓲ ꓐꓬꓱ ꓦꓲꓻ ꓫꓵ. ꓐ ꓡ ꓢꓴ ꓥ ꓡꓳ꓿
ꓟꓽ ꓓ ꓐꓯ ꓟ ꓫ. ꓕꓱ ꓘꓶꓽ ꓕꓯ ꓟꓬꓱꓽ ꓗꓪ ꓐꓰ ꓧꓪ. ꓡꓰ ꓟ ꓥ ꓡꓳ꓿ ꓬꓲ ꓠꓬ ꓐꓬꓱ ꓦꓲꓻ ꓫꓵ. ꓟ ꓢꓳꓻ ꓦꓲꓻ ꓗꓪ ꓙꓰ ꓟ ꓙꓵ, ꓕꓯ ꓟ. ꓒ ꓐꓴ ꓮ ꓟꓬ, ꓠꓬ ꓬꓲ ꓠꓬ ꓡꓯꓽ ꓒꓯ, ꓟꓽ ꓙꓳ ꓟ ꓪꓴ. ꓠꓬꓲ ꓬꓲ ꓠꓬ ꓐꓬꓱ ꓦꓲꓻ ꓫꓵ. ꓠ, ꓟ ꓫ. ꓡꓳ ꓐꓰ ꓓꓴ ꓙ ꓢꓲ ꓠꓬꓲ ꓮ ꓡꓲ ꓟ ꓥ ꓟꓲ ꓬꓲ ꓔꓯ ꓟ. ꓖꓶ ꓠꓲ, ꓫꓵˍ ꓖꓳ ꓡꓱ ꓥ ꓟꓲ ꓬꓲ ꓠꓬ ꓠꓲ, ꓟꓽ ꓐꓬ (3) ꓘꓳꓼ ꓢꓯꓼ ꓕꓵꓼ ꓢꓲ ꓠꓬꓲ ꓐꓬꓱ ꓦꓲꓻ ꓫꓵ. ꓕꓳ ꓶ ꓔꓯ ꓘꓳ, ꓣꓴ ꓪ ꓢꓴ ꓥ ꓡꓳ꓿
ꓣꓳ ꓚꓲ. ꓛꓬ ꓔꓯ ꓙꓵꓻ ꓢꓲ ꓠꓬꓲ ꓛꓳ ꓠꓲ, ꓛꓳ ꓐꓴ ꓡꓰ ꓫ. ꓕꓱ ꓘꓶꓽ ꓔꓯ ꓧꓪ. ꓡꓰ ꓢꓴ ꓥ ꓡꓳ꓿
ꓙꓰꓢꓢꓲꓚꓮ ꓠꓬ ꓟꓬꓱꓽ ꓮ ꓟꓬ, ꓢꓯꓼ ꓕꓵꓼ ꓢꓲ ꓠꓬꓲ ꓢꓴ ꓡꓰ ꓒꓬꓱꓼ ꓡ ꓟꓽ ꓓ ꓐꓰ ꓐꓯ ꓟ ꓔꓯ ꓧꓪ. ꓡꓰ ꓢꓴ ꓥ ꓡꓳ꓿
ꓫ. ꓓꓴ ꓟꓷ ꓓꓴ ꓔꓯ ꓧꓪ. ꓡꓰ ꓢꓴ ꓥ ꓡꓳ꓿ ꓬꓲ ꓠꓬ ꓡꓯꓽ ꓒꓯ, ꓟꓽ ꓙꓳ ꓢꓴ ꓥ ꓟꓲ ꓠꓲ, ꓟ ꓟꓽ ꓫ. ꓬꓲ ꓠꓬ ꓬꓲ ꓠꓯ, ꓗꓪ ꓙꓳ ꓟ ꓛꓲ, ꓒꓯ ꓔꓯ ꓣꓱ ꓢꓲ ꓠꓬꓲ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓣꓳ ꓠꓯ, ꓗꓪ ꓙꓳ ꓟ ꓢꓯꓼ ꓪ ꓔꓯ ꓣꓱ ꓢꓲ ꓠꓬꓲ ꓣꓳ ꓔꓶ ꓙꓱ ꓗꓪ ꓛꓲ ꓡꓰ ꓠ, ꓟ ꓢꓯꓼ ꓕꓵꓼ ꓡꓯ꓿ ꓠꓲ, ꓟ ꓐꓬ ꓡꓰ ꓔꓬ ꓟ ꓙꓵ, ꓔꓯ ꓙꓰꓢꓢꓲꓚꓮ ꓔꓯ ꓔꓯ ꓢꓳꓻ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
