ꓬꓲꓻ ꓙꓬ ꓠꓬ ꓮ ꓘꓶ. ꓛꓲ ꓣꓳ ꓚꓵˍ ꓟ (Save water)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓬꓲꓻ ꓙꓬ ꓡ ꓞꓳ ꓕꓲ ꓣꓳ ꓐꓱ ꓶ ꓮ ꓘꓶ. ꓛꓲ ꓣꓳ ꓚꓵˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓣꓳ ꓠꓯꓼ ꓠꓯꓼ ꓔꓴ ꓡ ꓕꓯ ꓒꓴ ꓟꓬ ꓞꓲ꓾ ꓚꓳꓝꓝꓰ ꓓꓳ ꓕꓱ ꓡꓰ ꓐꓰ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓟ ꓙꓵ, ꓕꓯ ꓬꓲꓻ ꓙꓬ ꓔꓯ ꓣꓱ ꓔꓬ ꓢꓴ ꓐꓴ ꓡꓰ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓟꓲ ꓠꓯ ꓗꓪ ꓡ ꓞꓳ ꓡꓲ. ꓣꓳ ꓗꓪ ꓐꓰ (1) ꓣꓳ ꓠꓬ ꓢꓲꓽ ꓫꓬ ꓟ ꓬꓲꓻ ꓔꓯ ꓟꓽ ꓓꓳ ꓟ ꓔꓯ ꓣꓳ ꓢꓷ. ꓡ?
ꓣꓳ ꓔꓬ ꓟ ꓟꓲ ꓠꓯ ꓠꓬ 100 ꓩꓴ ꓗꓪ ꓐꓰ 97 ꓩꓴ. ꓠꓬ ꓬꓲꓻ ꓡꓳ ꓐꓱ ꓥ ꓡꓳ꓿ ꓬꓲꓻ ꓡꓳ ꓐꓱ ꓬꓲꓻ ꓙꓬ ꓞꓼ ꓐꓳ ꓮ ꓘꓶ. ꓐ ꓟ ꓪꓴ. ꓠꓬꓲ ꓓꓳ ꓟꓽ ꓙꓲ ꓟ ꓥ ꓡꓳ꓿ ꓓꓳ ꓙꓲ ꓟ ꓬꓲꓻ ꓙꓬ ꓠꓬ 1 ꓩꓴ ꓡꓰ ꓙꓳ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓟꓶ ꓟ ꓙꓵ, ꓗꓪ 1 ꓙꓳ ꓟ ꓬꓲꓻ ꓙꓬ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓝꓮꓲ ꓟꓲ ꓠꓯ ꓡ ꓞꓳ ꓐꓴ ꓔꓯ ꓠꓲ, ꓦꓯ ꓟ ꓒꓴ ꓧꓪ. ꓟ ꓑꓶ. ꓓꓴ ꓬꓲꓻ ꓙꓬ ꓡꓳ ꓮ ꓟꓬ, ꓠꓬ ꓐꓬ ꓡꓰꓳ ꓟꓶ ꓡꓰ ꓔꓬ ꓟ ꓔꓯ ꓣꓳ ꓓꓴ ꓙ ꓧꓪ ꓛꓲ ꓠ, ꓟ ꓥ ꓡꓳ꓿
ꓬꓲꓻ ꓙꓬ ꓟꓽ ꓙꓳ ꓡꓰ ꓟ꓾ ꓬꓲꓻ ꓙꓬ ꓢꓪ ꓡꓰ ꓟ ꓠꓬ ꓣꓳ ꓐꓰ ꓬꓲꓻ ꓤ ꓗꓪ ꓙꓳ ꓟ ꓟꓽ ꓥ꓿ ꓟꓬ‐ꓟ ꓗꓴꓷꓼ ꓗꓪ ꓞꓽ ꓝꓲ. ꓛꓲ ꓡ ꓟ ꓙꓵ, ꓕꓯ ꓬꓲꓻ ꓙꓬ ꓘꓴꓽ ꓮ ꓟꓬ, ꓗꓪ ꓬꓲꓻ ꓙꓬ ꓟꓽ ꓙꓳ ꓡꓰ ꓟ ꓔꓯ ꓠꓬꓲ. ꓠꓬꓲ ꓣꓳ ꓔꓳ ꓜꓳ ꓔꓬ ꓟ ꓥ ꓡꓳ꓿
ꓝꓮꓲ ꓟꓬ‐ꓟ ꓗꓴꓷꓼ ꓡꓳ ꓒꓱ ꓓꓽ ꓮ ꓟꓬ, ꓐꓰ ꓞꓳ ꓘ, ꓮ ꓟꓬ, ꓗꓪ ꓬꓲꓻ ꓙꓬ ꓔꓯ ꓤ ꓶ ꓗꓪ ꓐꓰ ꓙꓰ ꓢꓲ ꓠꓬꓲ ꓬꓲꓻ ꓙꓬ ꓘꓳꓼ ꓡꓰ ꓟ ꓥ ꓡꓳ꓿
ꓬꓲꓻ ꓙꓬ ꓟꓽ ꓙꓳ ꓬꓲꓻ ꓙꓬ ꓢꓱ ꓡꓰ ꓔꓬ ꓟ ꓪꓴ. ꓠꓬꓲ ꓔꓶ ꓜ ꓔꓶ ꓓꓳ ꓟ ꓟꓬꓱꓽ ꓬꓰ ꓟꓽ ꓬꓰ ꓟ ꓔꓯ ꓣꓳ ꓡꓳ. ꓟꓳ ꓔꓬ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓙꓼ ꓦꓲꓻ ꓗꓪ ꓐꓰ ꓡꓳ ꓗꓷ ꓟ ꓑꓶ ꓛꓵꓽ ꓑꓶ. ꓟꓲ ꓠꓬ ꓬꓲꓻ ꓙꓬ ꓡꓳ ꓗꓪ ꓮ ꓔꓳ ꓔꓳ ꓡꓰ ꓡꓳ ꓔ ꓟ ꓪꓴ. ꓠꓬꓲ ꓓꓳ ꓓꓴ ꓬꓲꓻ ꓙꓬ ꓠꓬ ꓟꓽ ꓢꓲꓽ ꓫꓬ ꓡꓰ ꓟ ꓥ ꓡꓳ꓿
ꓑꓡꓮꓢꓔꓲꓚ ꓑꓶ. ꓓꓴ ꓠꓲ, ꓥ ꓟꓲ ꓬꓲꓻ ꓙꓬ ꓟꓽ ꓢꓲꓽ ꓫꓬ ꓗꓷ ꓡꓰ ꓟ ꓥ ꓡꓳ꓿ ꓬꓲꓻ ꓙꓬ ꓟꓽ ꓙꓳ ꓗꓷ ꓡꓰ ꓟ ꓪꓴ. ꓠꓬꓲ ꓜ ꓓꓴ ꓓꓳ ꓓꓴ ꓫ. ꓡ ꓓꓴ ꓙꓳ ꓟ ꓥꓡꓳ꓿ ꓖꓳ ꓗꓷ ꓠꓯ ꓡ ꓞꓳ ꓐꓴ ꓠꓻ ꓓꓴ ꓒꓬ ꓓꓴ ꓙꓳ ꓡ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲꓻ ꓙꓬ ꓫ. ꓔ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓡꓰ ꓟꓽ ꓛꓲ ꓠꓬꓲ. ꓠꓬꓲ ꓣꓳ ꓮ ꓙꓵꓽ ꓢꓴ ꓔꓳ, ꓜꓳ ꓔꓬ ꓟ ꓫꓵꓽ ꓪꓴꓽ ꓓꓽ ꓟ ꓕꓲ ꓫꓵꓽ ꓟꓲ ꓥ ꓟ ꓔꓯ ꓣꓳ ꓧꓪ. ꓛꓲ ꓠ, ꓟ ꓥꓡꓳ꓿
ꓢꓲꓽ ꓫꓬ ꓟ ꓬꓲꓻ ꓙꓬ ꓪ ꓠ, ꓟ ꓐꓱ ꓶ ꓮ ꓡꓲ ꓐꓰ ꓟꓬꓱꓽ ꓬꓰ ꓠ, ꓟ ꓚꓱ,
ꓖꓳ ꓡꓱ ꓠꓬ ꓣꓳ ꓐꓴ ꓮ ꓙꓵꓽ ꓮ ꓡꓲ ꓐꓰ ꓬꓰ ꓠꓯ, ꓡ? (ꓪꓮꓔꓰꓣ ꓟꓮꓠꓮꓖꓰꓟꓰꓠꓔ) ꓐꓯ ꓟ ꓮ ꓘꓶ. ꓛꓲ ꓣꓳ ꓚꓵˍ ꓡꓳ꓿ ꓕꓱ ꓟ ꓠꓬ ꓙꓵꓽ ꓪ ꓙꓳ ꓢꓴ ꓐꓴ꓾ ꓢꓷ. ꓠꓲ, ꓙꓳ ꓒ ꓐꓴ ꓡꓰ ꓬꓰ ꓠ,ꓟ ꓟꓽ ꓥ ꓣꓳ ꓗꓪ ꓐꓰ ꓪꓴ. ꓔꓴ ꓢꓲ ꓠꓬꓲ ꓟꓬꓱꓽ ꓬꓰ ꓠ, ꓟ ꓥ ꓡꓳ꓿
1 ꓠꓬ ꓬꓲꓻ ꓙꓬ ꓔꓯ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱ ꓟ ꓙꓵ, ꓕꓯ ꓮ ꓔꓳꓽ ꓔꓳꓽ ꓗꓽ ꓕꓽ ꓗ ꓡꓰ ꓝꓲ꓿ ꓖꓳ ꓓꓱ꓾ ꓡꓯꓽ ꓒꓯ, ꓞꓲ ꓟ ꓙꓵ, ꓕꓯ ꓬꓲꓻ ꓙꓬ ꓔꓯ ꓣꓱ ꓬꓯꓼ ꓠ, ꓟ ꓡꓰ ꓣꓱ ꓠ, ꓟ ꓢꓯꓼ ꓕꓵꓼ ꓡꓯ꓿
2 ꓠꓬ ꓟꓲ ꓦ ꓬꓲꓻ ꓔꓯ ꓣꓱ ꓠ, ꓟ ꓥ ꓡꓳ꓿ ꓟꓲ ꓦ ꓬꓲꓻ ꓔꓯ ꓓ ꓢꓲ ꓠꓬꓲ ꓣꓳ ꓦꓲꓻ ꓢꓲꓽ ꓫꓬ ꓟ ꓗꓪ ꓐꓰ ꓔꓶ ꓫꓵꓽ ꓔꓶ ꓓꓴ ꓬꓲꓻ ꓙꓬ ꓔꓲ ꓕꓯ ꓣꓱ ꓠ, ꓟ ꓥ ꓡꓳ꓿
3. ꓠꓬ ꓬꓲ ꓓꓴ ꓬꓲ ꓣꓳ ꓟ ꓢꓲ, ꓜꓲ ꓢꓲ, ꓟꓲ ꓔꓯ ꓮꓽ ꓔꓳꓽ ꓔꓳꓽ ꓟꓽ ꓘꓶ ꓠ, ꓟ ꓣꓳ ꓚꓵ ꓡꓳ꓿ ꓝꓮꓲ ꓢꓲ, ꓜꓲ ꓮ ꓟꓬ, ꓔꓶ ꓠ, ꓟ ꓣꓳ ꓚꓵ ꓡꓳ꓿ ꓢꓲ, ꓜꓲ ꓠꓬ ꓬꓲꓻ ꓙꓬ ꓪ ꓠ, ꓟ ꓐꓱ ꓶ ꓮ ꓘꓶ. ꓣꓳ ꓚꓵˍ ꓟ ꓕꓲ ꓫꓵꓽ ꓥ ꓡꓳ꓿ ꓬꓲꓻ ꓙꓬ ꓡꓳ꓾ ꓡꓳ ꓗ ꓗꓪ ꓑꓡꓮꓢꓔꓲꓚ ꓐꓰ ꓑꓶ ꓚꓵꓽ ꓑꓶ. ꓟꓲ ꓔꓯ ꓕꓽ ꓡꓳ ꓓꓴ ꓬꓰ ꓡꓯ꓿
ꓣꓳ ꓮ ꓙꓵꓽ ꓢꓴ ꓮ ꓡꓲ ꓐꓰ ꓬꓰ ꓠꓯ, ꓟ ꓚꓱ,
ꓠꓬꓲ.ꓠꓬꓲ ꓟꓲ ꓠꓯ ꓠꓬ ꓮ ꓘꓶ. ꓛꓲ ꓪꓴꓽ ꓟꓴ ꓔꓬ ꓥ ꓟꓲ ꓬꓲꓻ ꓙꓬ ꓟꓽ ꓙꓳ ꓠꓬ ꓕꓲ ꓑ ꓤ ꓢꓯ. ꓔꓬ ꓠ, ꓟ ꓮ ꓘꓶ. ꓫ. ꓟ ꓥ ꓡꓳ꓿ ꓬꓲ ꓙꓬ ꓔꓯ ꓤ ꓟꓳ ꓢꓲ ꓠꓬꓲ ꓣꓱ ꓟ ꓠꓬ ꓟꓲ ꓠꓯ ꓔꓯ ꓚꓬꓴ ꓟ ꓟꓬꓱꓽ ꓬꓰ ꓟ ꓥ ꓡꓳ꓿
ꓝꓮꓲ ꓛꓲ ꓡ ꓟ ꓣꓳ ꓤ ꓠꓱ ꓐꓴ ꓔꓯ ꓚꓬꓴ ꓙ ꓟ ꓟꓬꓱꓽ ꓔꓯ ꓬꓰ ꓔꓬ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓐꓰ ꓬꓲꓻ ꓙꓬ ꓔꓯ ꓤ ꓟꓳ ꓢꓲ ꓠꓬꓲ ꓣꓱ ꓓꓴ ꓬꓰ ꓡꓯ꓿ ꓬꓲ ꓒꓵꓽ ꓙꓳ ꓟ ꓬꓲꓻ ꓙꓬ ꓥ ꓟ ꓔꓯ ꓢꓷ. ꓡꓰ ꓠ, ꓟ ꓢꓯꓼ ꓕꓵꓼ ꓡꓯ꓿ ꓬꓲꓻ ꓙꓬ ꓢꓲꓽ ꓢꓲꓽ ꓫꓬ ꓫꓬ ꓬꓲꓻ ꓠ, ꓟ ꓢꓯꓼ ꓕꓵꓼ ꓡꓯ꓿ ꓫ. ꓟꓳ ꓪ꓿
