ꓠꓬꓲ. ꓠꓬꓲ ꓟꓲ ꓠꓯ ꓡ ꓞꓳ ꓞꓳ ꓙꓳ ꓚꓱ, ꓗꓪ ꓐꓰ ꓮ ꓙꓵꓽ ꓐꓱ ꓶ ꓚꓲ. ꓛꓬ ꓮ ꓡꓲ ꓥ ꓠꓬ ꓖꓳ ꓡꓱ ꓞꓳ ꓙꓳ ꓐꓰ ꓐꓯˍ ꓟ ꓚꓱ, ꓗꓪ ꓐꓰ ꓮ ꓙꓵꓽ ꓔꓯ ꓢꓷ. ꓙ ꓟꓳ ꓙ ꓖꓶ ꓩꓴ ꓡ ꓠꓲ, ꓫꓵˍ ꓡꓳ꓿

ꓚꓲ. ꓛꓬ ꓤꓶꓻ ꓔꓯ ꓚꓲ. ꓛꓬ ꓘꓳ ꓣꓴˍ ꓐꓯˍ ꓟ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓒꓴˍ ꓟ ꓕꓲ ꓫꓵꓽ ꓥ ꓡꓳ꓿ ꓚꓲ. ꓛꓬ ꓮ ꓡꓲ ꓗ, ꓟ ꓔꓯ ꓘꓳ ꓣꓴˍ ꓟ꓾ ꓠꓱ. ꓐꓯ ꓮ ꓡꓲ ꓕꓲ ꓣꓳ ꓔꓯ ꓥˍ ꓟꓲ ꓫꓱ. ꓡꓰ ꓠ ꓝ. ꓢꓲ ꓟꓽ ꓢꓯꓼ ꓕꓵꓼ ꓕꓵꓼ ꓐꓰ ꓚꓲ. ꓛꓬ ꓮ ꓡꓲ ꓥ ꓮ ꓡꓲ ꓞꓳ ꓙꓳˍ ꓟ ꓥ ꓡꓳ꓿

ꓮ ꓟꓶ ꓟ ꓡꓰ ꓟꓵꓽ ꓘꓳꓼ ꓟꓽ ꓢꓲ ꓡꓲ ꓟ ꓦꓬꓼ ꓠꓬꓲ ꓗꓪ ꓚꓲ. ꓛꓬ ꓔꓯ ꓚꓲ. ꓛꓬ ꓠꓲ, ꓘꓪꓽ ꓟꓽ ꓫꓵ ꓢꓴ ꓮ ꓟꓬ, ꓙꓳˍ ꓡꓳ꓿ ꓕꓲ ꓖ ꓕꓲ ꓧꓪ, ꓞꓳ ꓤ ꓮ ꓙꓵꓽ ꓔꓯ ꓕꓱ ꓟ ꓡꓰ ꓒꓬꓱꓼ ꓡꓰ ꓗꓴ.ˍ ꓡꓳ ꓐꓯˍ ꓥ ꓟꓲ꓾ ꓮ ꓕꓯ ꓟꓲ ꓕꓱ ꓡꓱ ꓗꓷ ꓡˍ ꓕꓯ ꓠꓽ ꓠꓲ, ꓟ ꓔꓬ, ꓢꓻ ꓚꓱ, ꓔꓯ ꓘꓶꓻ ꓡꓶ ꓡꓰ ꓝꓲ ꓗꓴ.ˍ ꓡꓳ꓿ ꓚꓲ. ꓛꓬ ꓤꓶꓻ ꓔꓯ ꓚꓲ. ꓛꓬ ꓠꓲ, ꓘꓪꓽ ꓫꓵ ꓢꓴ ꓐꓴ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓒꓵꓽ ꓗꓴ. ꓢꓴ ꓐꓴ ꓥ ꓡꓳ꓿ ꓕꓲ ꓚꓱ, ꓐꓯ ꓪˍ ꓠꓬ ꓚꓲ. ꓛꓬ ꓚꓳꓽ ꓛꓬ ꓙꓲˍ ꓟ ꓔꓯ ꓟꓳꓻ ꓢꓴ ꓐꓴˍ ꓡꓰꓽ ꓥ ꓡꓳ꓿

ꓮ ꓡꓲ ꓫꓵꓽ ꓑꓶ. ꓓꓴ ꓚꓲ. ꓛꓬ ꓤꓶꓻ ꓔꓯ ꓚꓲ. ꓛꓬ ꓠꓲ, ꓘꓪꓽ ꓫꓵ ꓔꓬ ꓖꓴˍ ꓡ? ꓕꓱ ꓟ ꓠꓬ ꓞꓲꓼ ꓣꓳˍ ꓕꓯ ꓡꓰ ꓪꓴ. ꓔꓴ ꓡˍ ꓟ ꓥ ꓡꓳ꓿ ꓔꓯꓺ ꓥꓳꓽ꓾ ꓞꓲꓼ ꓣꓳˍ ꓕꓯ ꓮ. ꓠꓽ ꓘꓳꓼ ꓘꓽ ꓪ ꓡꓰ ꓢꓲ ꓬꓲ ꓑ ꓓꓽ ꓟ ꓒꓬꓱꓼ ꓡꓰ ꓠꓬꓲ ꓢꓴ ꓐꓴ ꓠꓬ ꓞꓲꓼ ꓪꓴꓽ ꓡˍ ꓗꓪ ꓛꓲꓽ ꓮ. ꓠꓽ ꓔꓯ ꓟꓳ ꓗꓷˍ ꓕ ꓑꓳꓸꓼ ꓙꓳꓺ ꓗꓴ.ˍ ꓡꓳ꓿ ꓞꓲꓼ ꓣꓳˍ ꓕꓯ ꓚꓲ. ꓛꓬ ꓔꓳ, ꓜꓳꓽ ꓠꓬꓲ ꓗꓷ ꓟ ꓫꓵꓽ ꓪꓴ ꓗꓪ ꓛꓳ ꓢꓲ ꓠꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓘꓪꓽ ꓫꓵˍ ꓟ ꓚꓱ, ꓟꓽ ꓫꓱ. ꓡꓯ ꓘꓳ ꓗꓷ ꓡꓰˍ ꓡꓳ꓿

ꓮꓽ ꓐ ꓮ ꓟ ꓐꓰ ꓟ. ꓒ ꓟ. ꓟ ꓐꓴ ꓡꓰ ꓣꓳ ꓔꓯ ꓠꓱ. ꓐꓯ ꓢꓴ ꓐꓰ ꓮ ꓘꓶ. ꓔꓯꓺ ꓗꓷ ꓟ꓾ ꓒꓬꓱꓼ ꓡ ꓟꓽ ꓓꓻ ꓟ ꓔꓯ ꓬꓲ ꓜꓲꓽ ꓬꓲ ꓑꓰ, ꓬꓰ ꓔꓬ ꓝꓲˍ ꓟ꓾ ꓛꓳꓽ ꓒꓯ, ꓛꓳꓽ ꓤ ꓐꓴ ꓠꓬꓲꓽ ꓗꓴ. ꓚꓸꓼ ꓗꓪ ꓧꓪ. ꓜꓽˍ ꓟ ꓟꓶˍ ꓟ꓾ ꓠꓬꓲ. ꓤꓲˍ ꓟ ꓟꓶˍ ꓟ꓾ ꓖꓳ ꓓꓱꓽ ꓒ. ꓢꓴ ꓠꓬ ꓒ. ꓢ ꓡꓰꓳ꓾ ꓐꓰ ꓐꓯ ꓢꓲ ꓪꓽ ꓫꓱˍ ꓟ ꓟꓶ ꓫꓵ ꓡˍ ꓕꓯ ꓚꓲ. ꓛꓬ ꓖꓳꓽ ꓓꓱꓽ ꓔꓯ ꓠꓲ, ꓜꓳ ꓡˍ ꓡꓳ꓿ ꓖꓳ ꓟ ꓪꓴ. ꓠꓬꓲ ꓥˍ ꓟꓲ ꓞꓲꓼ ꓪꓴꓽ ꓡˍ ꓕꓯ ꓚꓲ. ꓛꓬ ꓚꓳꓽ ꓚꓲ. ꓛꓬ ꓔꓯ ꓠꓱ. ꓐꓯ ꓢꓴ ꓐꓰ ꓔꓯꓺ ꓢꓲ ꓠꓲ, ꓟ ꓣꓳˍ ꓟ ꓠꓲ, ꓟ ꓙꓬˍ ꓟ ꓠꓲ, ꓟ ꓓꓵꓽ ꓡ ꓢꓲ ꓠꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓘꓪꓽ ꓟꓽ ꓫꓵ ꓗꓷ ꓡꓰˍ ꓡꓳ꓿

ꓖꓳ ꓟ ꓡꓰꓽ ꓟꓽ ꓞꓲ ꓬꓲ ꓞꓲꓼ ꓕꓯꓽ ꓢꓲ ꓫ. ꓙꓵ ꓟꓶ ꓙꓵ ꓓꓴ ꓮ ꓟꓬ, ꓔꓳ, ꓜꓳꓽ ꓪˍ ꓟ꓾ ꓮ ꓘꓶ. ꓠꓲ, ꓠꓵ ꓪ ꓢꓴ ꓔꓯ ꓛꓵꓽ ꓩꓴ ꓗꓷ ꓪˍ ꓟ꓾ ꓕꓱ ꓟꓬ ꓫꓵꓽ ꓥˍ ꓟꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓘꓪꓽ ꓟꓽ ꓫꓵ ꓗꓷ ꓡꓰ ꓝꓲˍ ꓡꓳ꓿

ꓖꓳ ꓡꓱ ꓠꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓘꓪꓽ ꓫꓵ ꓢꓲ ꓠꓲ, ꓠꓵ ꓐ ꓡ ꓠ, ꓟ ꓮ ꓡꓲ ꓫꓵꓽ ꓔꓯ ꓬꓰ ꓠ ꓗ, ꓡ ꓐꓯ ꓠꓬ꓾

ꓠ‐ꓐ ꓕꓲꓽ ꓠꓬ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓟꓽ ꓙꓲ ꓟ ꓟꓳˍ ꓟ ꓚꓱ, ꓐꓴ ꓔꓯ ꓐꓳ ꓠ ꓗ, ꓡꓳ꓿

ꓔꓯꓺ ꓥꓳꓽ꓾ ꓟꓬꓱꓽ ꓧꓪ ꓟꓽ ꓟꓶ ꓡꓰ ꓟ ꓠꓬ ꓥꓪ ꓟꓽ ꓓꓻ ꓟ ꓑꓶ. ꓓꓴ ꓥꓳ꓾ ꓥꓪ ꓠꓬ ꓬꓲ ꓙꓲꓻ ꓫ. ꓕꓱ ꓟꓽ ꓗꓴ.꓾ ꓥꓪ ꓠꓬ ꓮ ꓘꓶ. ꓫ. ꓔꓳ ꓗꓴ.ˍ ꓡꓳ꓾ ꓕꓱ ꓡꓱ ꓚꓲ. ꓛꓬ ꓚꓳꓽ ꓚꓲ. ꓛꓬ ꓟꓽ ꓓꓻ ꓐꓰ ꓫꓪ. ꓟꓶˍ ꓟ ꓚꓱ, ꓐꓴ ꓔꓯ ꓐꓳ ꓗꓷ꓿ ꓖꓳ ꓗ ꓠꓯ. ꓠꓬ ꓣꓳ ꓟꓽ ꓓꓻ ꓐꓰ ꓫꓪ. ꓟꓶˍ ꓟ ꓚꓱ, ꓐꓴ ꓔꓯ ꓕꓲ ꓟ ꓗ ꓠꓯ. ꓕꓲ ꓟ ꓢꓯꓼ ꓕꓵꓼ ꓠꓬꓲ꓿ ꓚꓵ ꓚꓵ ꓐꓯ ꓪˍ ꓠꓬ ꓮ ꓡꓲ ꓕꓲ ꓟˍ ꓟꓲ ꓮ ꓘꓶ. ꓬꓰ ꓫˍ ꓟ ꓟꓽ ꓥ꓿ ꓕꓲ ꓟ ꓗ. ꓠꓯ ꓕꓲ ꓟ ꓢꓯꓼ ꓕꓵꓼ ꓠꓬꓲ ꓠ ꓗ, ꓡꓳ꓿

ꓝꓮꓲ ꓕꓲ ꓟ ꓠꓬ ꓚꓲ. ꓛꓬ ꓔꓯ ꓙꓳˍ ꓟ ꓓꓻˍ ꓟ ꓚꓱ, ꓔꓯ ꓐꓳ ꓠꓬꓲ꓾

ꓔꓯꓺ ꓥꓳꓽ꓾ ꓚꓲ. ꓛꓬ ꓠꓬ ꓠꓲ, ꓟ ꓔꓱ, ꓢꓲ ꓠꓲ, ꓟ ꓒꓴˍ ꓟ꓾ ꓮ ꓟꓬ, ꓐꓱ ꓶ ꓙꓲˍ ꓟ ꓬꓰ ꓖꓶ ꓐ ꓡˍ ꓟ꓾ ꓕꓳꓽ ꓶ ꓐꓳˍ ꓟ ꓗꓪ ꓓꓻˍ ꓟ꓾ ꓕꓱ ꓡꓱ ꓫꓵꓽ ꓚꓲ. ꓛꓬ ꓠꓯꓸꓼ ꓗꓪ ꓙꓳˍ ꓟ ꓓꓻˍ ꓟ ꓔꓯ ꓐꓳ ꓗꓷ ꓢꓲ ꓕꓱ ꓟ ꓐꓴ ꓔꓯ ꓕꓲ ꓠꓬꓲ ꓕꓲ ꓠꓬꓲ ꓪ ꓜꓲ ꓓꓻ ꓡꓰ ꓠ ꓬꓰˍ ꓟ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓦ ꓡꓱ ꓐꓳ ꓢꓲ꓾ ꓠꓲ, ꓘꓪꓽ ꓫꓵ ꓡꓰ ꓝꓲˍ ꓡꓳ꓿

ꓠ‐ꓐ ꓢꓺ ꓠꓬ꓾ ꓠꓱ. ꓐꓯ ꓢꓴ ꓐꓰ ꓚꓲ. ꓛꓬ ꓔꓯ ꓔꓯꓺˍ ꓟ ꓗꓪ ꓐꓰ ꓠꓽ ꓗꓷ ꓠ ꓗ, ꓡꓳ꓿ ꓤꓶꓻ ꓗꓪ ꓕꓲ ꓣꓳ ꓐꓰ ꓕꓲ ꓣꓳ ꓠꓬ ꓮ ꓡꓲ ꓥˍ ꓟꓲ ꓫꓱ. ꓡꓱ ꓘꓳ ꓟꓽ ꓐ ꓡ ꓟ ꓥ ꓡꓳ꓿ ꓬꓲ ꓦꓵ ꓡ ꓖꓴ꓾ ꓬꓲ ꓕꓲ ꓦꓲ ꓢꓴ꓾ ꓬꓲ ꓢꓷ. ꓠꓲ,꓾ ꓬꓲ ꓘꓳ ꓗꓳ. ꓡ ꓗꓷ ꓟ ꓚꓱ, ꓐꓴ ꓗꓪ ꓛꓳ ꓢꓲ ꓠꓬꓲ ꓬꓲ ꓫꓱ, ꓐꓰ ꓬꓲ ꓓꓻˍ ꓟ ꓟꓽ ꓫꓱ. ꓡꓯ ꓘꓳ ꓗꓷ ꓡꓰˍ ꓡꓳ꓿ ꓖꓳ ꓟ ꓔꓯ ꓣꓳ ꓠꓬ ꓙꓰ ꓢꓲ꓾ ꓳ꓾ ꓬꓲ ꓠꓽ ꓮ ꓘꓶ. ꓫ. ꓕꓱ ꓗꓴ.ˍ ꓐꓭ꓾ ꓮ ꓫꓵꓽ ꓔꓯˍ ꓟꓲ ꓟꓽ ꓙꓳ ꓙꓳ ꓐꓯ ꓑꓶ.ˍ  ꓐꓭ꓾ ꓐꓯ ꓢꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓟ ꓣꓳꓺ ꓡꓰ ꓗꓴ.ˍ ꓡꓳ꓿

ꓚꓲ. ꓛꓬ ꓔꓯ ꓥˍ ꓟꓲ ꓟꓽ ꓫꓱ. ꓟ ꓓꓻˍ ꓟ ꓬꓲ ꓚꓱ, ꓙꓳˍ ꓡꓳ꓿ ꓚꓲ. ꓛꓬ ꓠꓬ ꓫꓱ. ꓤ ꓗꓴ.ˍ ꓡꓳ꓾ ꓠꓲ, ꓟ ꓫꓵ ꓗꓴ.ˍ ꓡꓳ꓾ ꓬꓰ ꓙ ꓗꓴ.ˍ ꓡꓳ꓾ ꓢꓲ ꓡꓲ ꓐꓰ ꓗ, ꓡꓳ꓾ ꓕꓱ ꓡꓱ ꓫꓵꓽ ꓙꓲˍ ꓟ ꓓꓻ ꓟ ꓕꓲ ꓙꓰꓽ ꓟꓽ ꓥ ꓕꓲ ꓙꓰꓽ ꓠꓬ ꓣꓳ ꓮ ꓙꓵꓽ ꓠꓯꓸꓼ ꓗꓪ ꓙꓳˍ ꓟ ꓥ ꓡꓳ꓿ ꓕꓲ ꓣꓳ ꓐꓰ ꓕꓲ ꓣꓳ ꓟꓽ ꓫꓱ. ꓡꓯ ꓘꓳ ꓟ ꓔꓯ ꓫꓱ. ꓡꓰ ꓠ ꓬꓲ ꓜꓲꓽ ꓬꓲ ꓑꓰ, ꓔꓯꓺ ꓟꓽ ꓠ ꓟ ꓡꓰ ꓐꓰ꓾ ꓟꓽ ꓫꓱ. ꓡꓯ ꓘꓳ ꓟ ꓑꓶ. ꓓꓴˍ ꓟꓲ ꓣꓳ ꓔꓯ ꓮ ꓡꓲˍ ꓟꓲ ꓟꓽ ꓗꓶ ꓡꓰ꓿ ꓖꓳ ꓡꓱ ꓠꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓘꓪꓽ ꓫꓵ ꓫꓵˍ ꓡꓰꓽ ꓔꓬ ꓠ ꓗ, ꓡꓳ꓿

ꓤꓶꓻ ꓐꓯˍ ꓟ ꓠꓬ ꓔꓷ, ꓔꓯꓺ ꓡꓯ ꓘꓳ ꓓꓴ ꓟꓽ ꓥ꓿ ꓮꓽ ꓟ ꓠꓬ ꓧꓶ. ꓕꓯ ꓔꓶ ꓙꓱꓼ ꓗꓪ ꓛꓲ ꓬꓰˍ ꓡ ꓐꓰˍ ꓟꓲ ꓟꓽ ꓐꓳ ꓚꓲ. ꓔ꓿ ꓞꓳ ꓤ ꓮ ꓙꓵꓽ ꓠꓬ ꓬꓲ ꓙꓵ, ꓬꓲ꓾ ꓬꓲ ꓝꓲ. ꓬꓲ ꓥ ꓡꓳ꓿ ꓖꓳ ꓡꓱ ꓠꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓡꓰꓽ ꓡꓳ. ꓠꓬꓲ꓿ ꓕꓲ ꓠꓬꓲ ꓕꓲ ꓠꓬꓲ ꓚꓲ. ꓛꓬ ꓚꓳꓽ ꓚꓲ. ꓚꓬ ꓪ ꓜꓲ ꓙꓲ ꓡꓰ ꓠ ꓬꓰ꓿ ꓮ ꓡꓲ ꓟ ꓔꓯ ꓥˍ ꓟꓲ ꓕꓽ ꓔꓯꓺ꓿ ꓮꓽ ꓟ ꓮ ꓡꓲ ꓫꓵꓽ ꓒꓬꓱꓼ ꓡꓰ ꓥˍ ꓟꓲ ꓖꓳ ꓟ ꓠꓬ ꓬꓲ ꓪ ꓟꓬꓱꓽˍ ꓡꓰꓽ ꓥ ꓡꓳ꓾ ꓣꓳ ꓟꓬꓱꓽ ꓟꓽ ꓥ꓿

ꓝꓮꓲ ꓕꓲ ꓚꓱ, ꓟ ꓠꓬ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓫꓱ. ꓤ ꓙꓽ ꓗꓳ꓿ ꓤꓶꓻ ꓗꓪ ꓕꓲ ꓐꓱ ꓔꓯ ꓣꓳ ꓠꓬ ꓬꓰ ꓐ ꓡ ꓢꓲ ꓠꓬꓲ ꓕꓲ ꓐꓱ ꓔꓯ ꓠꓬ ꓣꓳ ꓬꓰ ꓐ ꓡˍ ꓕꓯ ꓡꓰꓽ ꓬꓰ ꓐ ꓡˍ ꓡꓳ꓿ ꓥꓳꓽˍ ꓟꓲ ꓥꓳꓽ ꓡꓰ ꓗꓴ.ˍ ꓥꓳ꓿ ꓢꓴ ꓡꓰ ꓫ. ꓝꓲ. ꓡˍ ꓟˍ ꓟꓲ ꓟꓶ ꓡꓰ ꓗꓴ.ˍ ꓥꓳ꓿ ꓛꓳꓽ ꓒꓯ, ꓛꓳꓽ ꓤ ꓐꓴ ꓗꓪ ꓐꓰ ꓣꓳ ꓔꓯ ꓟꓽ ꓙꓲ ꓟ ꓬꓰ ꓡˍ ꓟˍ ꓟꓲ ꓙꓳˍ ꓥꓳ꓿ ꓫ. ꓔꓳ ꓪˍ ꓟ ꓬꓲ ꓙꓵˍ ꓟꓲ ꓙꓳˍ ꓥꓳ꓿ ꓟꓬꓱꓽ ꓗꓪ ꓐꓰˍ ꓟꓲ ꓠꓽ ꓗꓷ ꓪ ꓡꓰˍ ꓟ ꓙꓳˍ ꓥꓳ꓿ ꓖꓳ ꓡꓱ ꓒꓬꓱꓼ ꓡˍ ꓕꓯ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓟ ꓣꓳꓺ ꓡꓰˍ ꓟ꓾ ꓠꓲ, ꓟ ꓦꓶ ꓡˍ ꓟ ꓒꓬꓱꓼ ꓡ ꓗꓴ.ˍ ꓡꓳ꓿ ꓛꓳꓽ ꓒꓯ, ꓐꓴ ꓠꓯꓸꓼ ꓗꓪ ꓖꓳ ꓡꓱ ꓔꓳ, ꓜꓳꓽ ꓢꓴ ꓙꓳ ꓡˍ ꓕꓯ ꓬꓲ ꓪ ꓔꓯ ꓠꓲ, ꓗꓴ ꓟꓬ ꓗꓴ ꓖꓶˍ ꓟ ꓡꓰ ꓐꓰ꓾ ꓚꓲ. ꓛꓬ ꓔꓳ, ꓜꓳꓽ ꓡ ꓕꓯ ꓥˍ ꓟꓲ ꓚꓲ. ꓛꓬ ꓥ ꓟꓲ ꓚꓲ. ꓛꓬ ꓔꓯ ꓫꓱ. ꓤ ꓙꓽ ꓗꓳ꓾ ꓢꓯꓼ ꓖꓶ꓿

ꓞꓳ ꓤ ꓠꓬ ꓮ ꓫꓵꓽ ꓗꓪˍ ꓟi ꓟꓽ ꓓꓻ ꓔꓬ꓿ ꓮ ꓡꓲ ꓗꓪˍ ꓟꓲ ꓙꓲ ꓟꓽ ꓐ ꓡ꓿ ꓮ ꓕꓯ ꓟꓲ ꓗ, ꓛꓲꓽ ꓟꓽ ꓐ ꓡ꓿ ꓮ ꓕꓯˍ ꓟꓲ ꓠꓲ, ꓪꓴꓽ ꓔꓬ ꓟꓽ ꓐ ꓡ꓿ ꓞꓳ ꓤ ꓮ ꓙꓵꓽ ꓐꓰˍ ꓟꓲ ꓠꓲ, ꓧꓳ, ꓫꓵꓽ ꓧꓳˍ ꓕꓯ ꓡꓰꓽ ꓠꓲ, ꓧꓳ ꓫꓵꓽ ꓧꓳˍ ꓥꓳ꓿ ꓠꓲ, ꓫꓵˍ ꓟ ꓥ ꓕ ꓑꓳꓸꓼ ꓟꓶˍ ꓕꓯ ꓡꓰꓽ ꓟꓶˍ ꓥꓳ꓿ ꓟꓽ ꓠꓲ, ꓫꓵ ꓟ ꓔꓯ ꓥˍ ꓟꓲ ꓘꓳ ꓣꓴ ꓟꓶ ꓗꓴ.ˍ ꓡꓳ꓿ ꓬꓰ ꓠꓲ, ꓟꓽ ꓫꓵ ꓟ ꓔꓯ ꓥ ꓟꓲ ꓬꓰ ꓠ ꓗꓷ ꓡꓰˍ ꓥꓳ꓿ ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓥˍ ꓟꓲ ꓣꓳ ꓠꓯꓸꓼ ꓗꓪ ꓕꓶ ꓞ, ꓠꓲ, ꓫꓵˍ ꓕꓯ ꓡꓰꓽ ꓕꓶ ꓞ, ꓥꓳ꓿ ꓕꓱ ꓟꓬ ꓫꓵꓽ ꓔꓯ ꓘꓳ ꓣꓴ ꓐ ꓡ ꓠ, ꓟˍ ꓟꓲ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓣꓱꓽ ꓞ, ꓡꓳ꓾ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿ ꓮ ꓙꓵꓽ ꓢꓴ ꓗ, ꓛꓲ ꓢꓲ ꓡꓲˍ ꓟ ꓤꓶꓻ ꓔꓯ ꓑꓯ, ꓟꓶ ꓡꓰ ꓝꓲ꓿