ꓧꓪ. ꓧꓪ. ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓲ ꓫꓵꓽ ꓫꓵꓽ ꓔꓯ ꓣꓳ ꓙꓳꓺ ꓒꓲ.ˍ ꓕꓯ ꓮ ꓫꓵꓽ ꓬꓰ ꓗꓴ.ˍ ꓡ꓿ ꓟꓬꓽ ꓐꓱ ꓠꓬ ꓗ ꓘꓶ ꓚꓲ. ꓔ ꓢꓲ ꓔꓬ ꓗꓴ.ˍ ꓡꓳ꓿ ꓕꓲ ꓫꓵꓽ ꓫꓵꓽ ꓣꓳ ꓔꓯ ꓕꓲꓺ ꓡ ꓟ ꓕꓳ, ꓡ ꓟ ꓙꓳꓺˍ ꓕꓯ ꓔꓷ,ˍ ꓡꓳ꓿ ꓟꓽ ꓔꓷ, ꓠꓬ ꓗ ꓘꓶ ꓚꓲ. ꓢꓲ ꓠꓬꓲ ꓮ ꓠꓯ. ꓠꓯ. ꓘꓴꓽ ꓗꓪ ꓑꓬ ꓔꓬ ꓗꓴ.ˍ ꓡꓳ꓿ ꓕꓱ ꓟ ꓠꓬ ꓞꓳ ꓤ ꓬꓲ ꓫꓱ, ꓕꓲ ꓟ ꓥ ꓡꓳ꓿
ꓢ. ꓠꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓥ ꓟꓲ ꓝꓲ ꓓꓴ ꓐꓴ ꓠꓬ ꓬꓲ ꓪ ꓔꓯ ꓬꓴ‐ꓔ ꓡ ꓞꓳ ꓐꓴ꓾ ꓟꓯꓼ ꓐꓴ ꓢꓰꓼ ꓡ ꓟ ꓙꓳˍ ꓟ ꓑꓶ. ꓓꓴ ꓗ ꓘꓶ ꓚꓲ. ꓔ ꓢꓲ ꓔꓬ ꓟ ꓚꓱ, ꓔꓯ ꓣꓳ ꓠ ꓠ, ꓪˍ ꓡꓳ꓿ ꓬꓲ ꓪ ꓔꓯ ꓢꓲ ꓒ ꓬꓰ‐ꓢꓴ ꓮ ꓡꓲ ꓐꓰ ꓢꓯꓼ ꓖꓶˍ ꓟ꓾ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓮ ꓡꓲ ꓐꓰ ꓦꓰꓼ ꓞ, ꓔꓴ ꓡ ꓟ ꓔꓯ ꓣꓳ ꓠ ꓠ, ꓪ ꓓꓴ ꓥꓳ꓿ ꓬꓳ‐ꓦ ꓕꓳꓽ ꓶ 20ꓽ19‐29 ꓗꓪ ꓛꓲ ꓠ ꓠ, ꓓꓴ ꓥꓳ꓿ ꓣꓳ ꓟ. ꓟꓲꓽ ꓓꓴ. ꓓꓴ. ꓤ ꓠ ꓠ, ꓓꓴ ꓬꓰ ꓡꓯ꓿ ꓬꓳ‐ꓦ ꓕꓳꓽ ꓶ 20ꓽ19‐23 ꓗꓪ ꓛꓲ ꓵ ꓟ. ꓖꓶˍ ꓥꓳ꓿
ꓫꓵꓽ ꓠꓬꓲ ꓟ ꓬꓲ ꓪꓴ. ꓕꓲ ꓠꓬꓲ ꓟꓶꓽ ꓘꓶꓼ ꓝꓲ. ꓗꓪ꓾ ꓛꓳꓽ ꓒꓯ, ꓐꓴ ꓠꓬ ꓬꓴ‐ꓔ ꓡ ꓞꓳ ꓔꓯ ꓙꓳꓺ ꓠꓬꓲ ꓗ ꓘꓶꓽ ꓢꓳ; ꓔ ꓢꓲ ꓔꓬ ꓕꓯ꓾ ꓬꓰ‐ꓢꓴ ꓠꓬ ꓬꓲ ꓪ ꓗꓳ ꓡꓳ ꓗꓪ ꓦꓰꓼ ꓡ ꓢꓲ꓾ ꓠꓴ ꓪ ꓢꓲ ꓡꓲ ꓟ ꓟꓶ ꓝꓲ꓾ ꓐꓯˍ ꓡꓳ꓿ ꓬꓲ ꓕꓱ ꓡꓱ ꓐꓯ ꓗꓷ ꓠꓬ꓾ ꓬꓲ ꓡꓯ ꓒꓯ,ˍ ꓐꓰ ꓬꓲ ꓙꓳꓽ ꓐꓬ ꓬꓲ ꓪ ꓔꓯ ꓟꓳ. ꓖꓶˍ ꓡꓳ꓿ ꓛꓳꓽ ꓒꓯ, ꓐꓴ ꓠꓬ ꓢꓲ ꓒ ꓔꓯ ꓟꓳ ꓗꓷ ꓠꓬꓲ ꓮ ꓘꓶ. ꓗ, ꓛꓲˍ ꓡꓳ꓿
ꓬꓰ‐ꓢꓴ ꓡꓰ ꓝꓮꓲ ꓬꓲ ꓪ ꓔꓯ꓾ ꓠꓴ ꓪ ꓢꓲ ꓡꓲ ꓟ ꓟꓶ ꓝꓲ꓾ ꓐ, ꓐ ꓡꓰ ꓥꓪ ꓔꓯ ꓩꓴ ꓡ ꓟˍ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪ ꓔꓯ ꓝꓲ ꓩꓴ ꓗꓷˍ ꓥꓳ꓾ ꓐꓯˍ ꓡꓳ꓿ ꓬꓲ ꓕꓱ ꓡꓱ ꓐꓯ ꓗꓷ ꓠꓬ ꓬꓲ ꓪ ꓔꓯ ꓢꓯꓼ ꓦ ꓧꓳꓽ ꓖꓶ ꓢꓲ꓾ ꓢꓲ‐ꓫꓬ‐ꓟ‐ꓦ ꓠꓴ ꓪ ꓟꓶ ꓝꓲ꓿ ꓠꓴ ꓪ ꓡꓰ ꓮꓽ ꓟ ꓔꓯ ꓝꓴꓲ ꓖꓼ ꓖꓶˍ ꓠꓬ ꓬꓲ ꓝꓴꓲ ꓫꓬ ꓡꓰˍ ꓥꓳ꓿ ꓠꓴ ꓪ ꓡꓰ ꓮꓽ ꓟ ꓝꓴꓲ ꓝꓰ ꓔ ꓠꓬ ꓬꓲ ꓝꓴꓲ ꓟꓯꓻ ꓞ, ꓥꓳ꓾ ꓐꓯˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓝꓲ ꓓꓴ ꓐꓴ ꓠꓬ ꓬꓴ‐ꓔ ꓡ ꓞꓳ ꓐꓴ ꓔꓯ ꓮ ꓘꓶ. ꓙꓳꓺ ꓢꓲ ꓠꓬꓲ ꓗ ꓘꓶꓽ ꓚꓲ. ꓢꓲ ꓠꓬꓲ ꓔꓬ ꓖꓴˍ ꓡꓳ꓿ ꓛꓱꓽ ꓛꓱꓽ ꓷ, ꓷ, ꓙꓬ ꓠꓲ, ꓪꓴ ꓪꓴ ꓡꓰ ꓐꓰ ꓗ ꓘꓶꓽ ꓚꓲ. ꓢꓲ ꓠꓬꓲ ꓑꓬ ꓔꓬ ꓖꓴˍ ꓡꓳ꓿ ꓢꓯꓼ ꓟꓽ ꓦ ꓦ ꓬꓲ ꓢꓯꓼ ꓟꓽ ꓓꓳ ꓓꓳ ꓔꓬ ꓖꓴˍ ꓡꓳ꓿ ꓖꓳ ꓟ ꓠꓬꓲꓽ ꓗꓴ. ꓚꓸꓼ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓗꓳ ꓡꓳ ꓗꓪ ꓬꓯꓼ ꓡ ꓡꓳ꓾ ꓐꓰ ꓣꓳ ꓡꓳ. ꓟꓳˍ ꓡꓳ꓿
ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓚꓲ. ꓔ ꓟꓽ ꓐ ꓡ꓿ ꓮ ꓡꓲ ꓐꓰ ꓗ ꓘꓶꓽ ꓕꓶ ꓕꓶˍ ꓡꓰꓽ ꓚꓲ. ꓔ ꓥˍ ꓟꓲ ꓬꓲ ꓪ ꓗꓳ ꓡꓳ ꓗꓪ ꓢꓲ ꓒ ꓬꓰ‐ꓢꓴ ꓬꓯꓼ ꓛꓲ ꓐ ꓡˍ ꓡꓳ꓿ ꓕꓱ ꓟ ꓗꓪ ꓐꓰ ꓣꓳ ꓔꓯ ꓬꓲ ꓪꓴ. ꓕꓲ ꓟ ꓢꓷ. ꓝꓲ ꓠꓲ, ꓫꓵˍ ꓟ ꓠꓬ ꓣꓳ ꓥˍ ꓟꓲ ꓙꓳˍ ꓕꓯ ꓠꓬ ꓗ ꓘꓶꓽ ꓚꓲ. ꓢꓲ ꓠꓬꓲ ꓬꓲ ꓘꓴꓽ ꓗꓪ ꓑꓬ ꓔꓬ ꓗꓴ.ˍ ꓡꓳ꓿ ꓮ ꓫꓵꓽ ꓔꓯ ꓙꓳ ꓢꓲ ꓠꓬꓲ ꓮ ꓡꓲ ꓐꓰ ꓚꓲ.ˍ ꓡ꓿ ꓣꓳ ꓠꓲ, ꓟ ꓠꓻ ꓡꓰ ꓕꓯ ꓾ ꓣꓳ ꓠꓲ, ꓟ ꓕꓱ ꓟ ꓬꓲ ꓫꓵꓽ ꓓꓳ ꓡ ꓕꓯ꓾ ꓣꓳ ꓠꓬ ꓫꓵꓻ ꓙꓳ ꓙꓳˍ ꓕꓯ꓾ ꓢꓴ ꓡꓰ ꓣꓳ ꓔꓯ ꓗ. ꓧꓪ ꓡ ꓕꓯ꓾ ꓢꓴ ꓡꓰ ꓣꓳ ꓔꓯ ꓬꓲ ꓧ ꓙꓲˍ ꓟ ꓟꓽ ꓟꓳꓻ ꓕꓯ ꓣꓳ ꓠꓬ ꓠꓲ, ꓟ ꓗ ꓘꓶ ꓚꓲ. ꓢꓲ ꓠꓬꓲ ꓔꓬ ꓗꓴ.ˍ ꓡꓳ꓿ ꓙꓲˍ ꓟ ꓬꓰ ꓥ ꓟꓲ ꓢꓴ ꓙꓲˍ ꓟ ꓟꓽ ꓟꓳ ꓕꓯ꓾ ꓣꓳ ꓠꓬ ꓫꓱ. ꓤ ꓠꓲ, ꓗꓪ ꓐꓰ ꓫ. ꓕꓱˍ ꓥ ꓟꓲ ꓢꓴ ꓡꓰ ꓣꓳ ꓔꓯ ꓛꓴꓽ ꓙꓳ ꓘꓶꓽ ꓗꓪ ꓐꓰ ꓫ. ꓕꓱ ꓡ ꓕꓯ ꓣꓳ ꓠꓬ ꓠꓲ, ꓟ ꓗ ꓘꓶꓽ ꓚꓲ. ꓗꓷˍ ꓡꓳ꓿
ꓕꓱ ꓟˍ ꓡꓰꓽ ꓟꓽ ꓞꓲ ꓣꓳ ꓧꓶ. ꓕꓯ ꓘꓴ ꓜꓲꓼ ꓞꓳ ꓐꓱ ꓶ꓾ ꓞꓳ ꓫꓵꓽ ꓐꓱ ꓶ ꓢꓯꓼ ꓕꓵꓼ ꓔꓬ ꓢꓴ ꓕꓲ ꓣꓳ ꓥ ꓐꓯˍ ꓥ ꓟꓲ ꓕꓲ ꓣꓳ ꓣꓳ ꓣꓳꓽ ꓔꓯ ꓐꓯ ꓗꓷ ꓕꓯ꓾ ꓢꓴ ꓡꓰ ꓣꓳ ꓔꓯ ꓢꓰꓼ ꓗꓷ ꓠ, ꓟ ꓙꓽ ꓖꓶˍ ꓕꓯ ꓮ ꓡꓲ ꓥ ꓟꓲ ꓣꓳ ꓠꓬ ꓟꓬꓱꓽ ꓕꓱ ꓟ ꓔꓯ ꓬꓰ ꓟꓽ ꓐ ꓡꓺꓳ꓿ ꓣꓳ ꓠꓬ ꓠꓲ, ꓟ ꓗ ꓘꓶꓽ ꓚꓲ. ꓢꓲ ꓟꓽ ꓪꓳ, ꓐꓰ ꓔꓬ ꓕꓯ꓾ ꓮ ꓡꓲ ꓥ ꓠꓲ, ꓫꓵˍ ꓥ ꓣꓳ ꓠꓬ ꓮ ꓡꓲ ꓟ ꓔꓯ ꓥˍ ꓟꓲ ꓬꓰ ꓙ ꓠꓲ, ꓟꓽ ꓫꓵꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓠꓲ, ꓟ ꓕꓱ ꓡꓱ ꓫꓵꓽ ꓗꓪ ꓐꓰ ꓚꓲ. ꓞ, ꓟ ꓙꓳˍ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓬꓯꓼ ꓡˍ ꓡꓳ꓿ ꓠꓴ ꓙꓳꓺ ꓛꓱꓽ ꓔꓬ ꓟ ꓬꓲ ꓢꓷ.ˍ ꓡꓳ꓿ ꓠꓲ, ꓫ. ꓟꓬ ꓫ. ꓓꓴ ꓗꓪ ꓐꓰ ꓠꓴ ꓔꓯ ꓠꓬꓲ. ꓞ, ꓓ, ꓟ ꓔꓯ ꓬꓲ ꓢꓷ.ˍꓡꓳ꓿ ꓬꓲ ꓔꓯ ꓠꓬ ꓮ ꓡꓲ ꓫꓵꓽ ꓠꓲ, ꓫ. ꓟꓬ ꓫ. ꓓꓴ ꓮ ꓡꓲ ꓫꓵꓽ ꓘꓶ ꓡꓶ ꓗꓽ ꓡꓽ ꓓꓴ ꓥˍ ꓟꓲ ꓗꓽ ꓕˍ ꓟꓽ ꓐ ꓡ꓿ ꓠꓬꓲ. ꓠꓬꓲ ꓬꓲ ꓠꓬ ꓬꓯꓼ ꓡ ꓢꓲ ꓠꓴ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓢꓲ ꓡꓲ ꓟ ꓙꓳ ꓝꓲ ꓐꓰ ꓐꓯ ꓖꓶ ꓔꓬ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓘꓶꓽ ꓔꓯ ꓠ ꓠ, ꓡꓯ꓿
