ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ “ꓥꓪ ꓠꓴ ꓛꓲ ꓒꓯ, ꓔꓯ ꓟꓽ ꓪ ꓞꓲꓽ ꓠꓬ ꓠꓴ ꓐꓰ ꓥꓪ ꓠꓬ ꓐꓰ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ” ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓥ ꓡꓳ꓿ ꓟ. ꓟꓲꓽ ꓝꓲ. ꓠꓬ (ꓬꓳ‐ꓦ 13ꓽ1‐15) ꓥ ꓡꓳ꓿ ꓟ. ꓟꓲꓽ ꓝꓲ. ꓘꓴꓽ ꓠꓯꓸꓼ ꓗꓪ ꓬꓲ ꓕꓲꓽ ꓟꓴꓽ ꓠꓬ ꓕꓱ ꓡꓱ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓞꓳ, ꓡ ꓧꓶ. ꓕꓯ ꓡꓳ, ꓬꓰˍ ꓟ ꓜ ꓜꓽ ꓑꓮꓲ ꓥ ꓡꓳ꓿ ꓜ ꓜꓽ ꓑꓮꓲ ꓕꓱ ꓟ ꓬꓰ ꓗꓷ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓢꓴ ꓡꓰ ꓘꓴ ꓔꓯ, ꓙꓰ ꓣꓴ ꓔꓯ, ꓙꓰ ꓢꓲ ꓠꓬꓲ ꓬꓲ ꓔꓯ ꓢꓰꓼ ꓗꓷ ꓠ, ꓟ ꓥꓳ꓿ ꓕꓰ ꓡꓰ ꓟꓽ ꓞꓳ, ꓔꓯ, ꓬꓰ ꓟ ꓧꓶ. ꓕꓯ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓟꓶ ꓘꓶꓽ ꓜ ꓜꓽ ꓑꓮꓲ ꓕꓲ ꓟ ꓬꓰˍ ꓡꓳ꓿
ꓟꓶ ꓘꓶꓽ ꓜ ꓜꓽ ꓑꓮꓲꓽ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓡꓳ꓿ ꓕꓱ ꓡꓱ ꓞꓲꓽ ꓖꓶˍ ꓕꓯ ꓒꓲ‐ꓕꓱ ꓔꓬ ꓗꓪ ꓛꓲ ꓡ ꓕꓯ ꓒꓲ‐ꓕꓱ ꓠꓬ ꓕꓱ ꓡꓱ ꓐꓯˍ ꓡꓳ꓿ “ꓢꓲꓺ ꓒꓽꓳ꓾ ꓠꓴ ꓥꓪ ꓔꓯ ꓛꓲ ꓒꓯ, ꓞꓲꓽ ꓖꓶ ꓠ, ꓟ ꓥꓪ ꓟꓽ ꓒꓵꓽ꓿ ꓥꓪ ꓔꓯ ꓕꓽ ꓞꓲꓽ” ꓕꓱ ꓡꓱ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ “ꓒꓲ‐ꓕꓱꓳ꓾ ꓥꓪ ꓠꓴ ꓛꓲ ꓒꓯ, ꓔꓯ ꓟꓽ ꓪ ꓞꓲꓽ ꓠꓬ ꓠꓴ ꓐꓰ ꓥꓪ ꓠꓬ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ” ꓐꓯ ꓖꓶˍ ꓡꓳ꓿ ꓕꓱ ꓟ ꓑꓶ. ꓓꓴ ꓢꓲ‐ꓟꓴ ꓒꓲ‐ꓕꓱ ꓠꓬ “ꓕꓱ ꓡꓱ ꓥ ꓠꓬ ꓢꓲꓺ ꓒꓽꓳ ꓥꓪ ꓛꓲ ꓒꓯ, ꓡꓰꓽ ꓟꓽ ꓞꓲ꓾ ꓕꓲ ꓖꓳ ꓓꓱꓽ ꓡꓱꓸꓼ ꓞꓲꓽ ꓖꓶ ꓡꓯ” ꓐꓰ ꓒꓳ, ꓖꓶˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ “ꓛꓲ ꓒꓯ, ꓔꓯ ꓞꓲꓽ ꓗꓷ ꓠꓬ ꓕꓲ ꓖꓳ ꓓꓱꓽ ꓡꓱꓸꓼ ꓗꓪ ꓫꓬ ꓡꓰˍ ꓟ ꓬꓲ. ꓬꓲ ꓢꓲ ꓥ ꓡꓳ” ꓐꓰ ꓐꓯ ꓖꓶˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓢꓲ ꓒ ꓬꓰ‐ꓢꓴ ꓠꓬ “ꓥꓪ ꓠꓴ ꓔꓯ ꓞꓲꓽ ꓖꓶˍ ꓟ ꓡꓰ ꓐꓰ ꓠꓴ ꓥˍ ꓟꓲ ꓕꓱ ꓡꓱ ꓬꓰ” ꓐꓰ ꓕꓵꓼ ꓪ ꓖꓶ ꓔꓲ. ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓘꓶ ꓔꓯ ꓣꓳ ꓬꓲ ꓜꓲ ꓠ ꓡꓳ. ꓓꓴ ꓬꓰ ꓡꓯ꓿ ꓢꓲ ꓒ ꓬꓰ‐ꓢꓴ ꓠꓬ꓾ ꓥꓪ ꓠꓴ ꓛꓲ ꓒꓯ, ꓔꓯ ꓟꓽ ꓪ ꓞꓲꓽ ꓠꓬ ꓠꓴ ꓐꓰ ꓥꓪ ꓠꓬ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓮ ꓘꓶ. ꓙꓳˍ ꓡꓳ꓿ ꓮ ꓫꓵꓽ ꓬꓲ. ꓬꓲ ꓢꓲ ꓥ ꓡ ꓐꓯ ꓠꓬ꓾ ꓢꓲ ꓒ ꓬꓰ‐ꓢꓴ ꓬꓲ ꓡꓯ ꓒꓯ, ꓗꓪ ꓐꓰ ꓱʼ ꓓꓰ ꓡˍ ꓟ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓡꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓠꓬ ꓝꓴꓲ. ꓮ ꓙꓵꓽ ꓟ ꓡꓳꓽ ꓖꓴ꓾ ꓱʼ ꓓꓰ ꓡꓰˍ ꓟ ꓠꓬ ꓮ ꓡꓲ ꓗꓪ ꓥ ꓡ ꓐꓯˍ ꓠꓬ ꓛꓲ ꓒꓯ, ꓗꓪ ꓥ ꓡꓳ꓿ ꓝꓴꓲ. ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓡꓯ ꓒꓯ, ꓔꓯ ꓢꓲꓺ ꓢꓲ ꓠꓬꓲ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓠꓬ꓾ ꓡꓯ ꓒꓯ, ꓖꓳ ꓟ ꓠꓬ ꓡꓯꓼ ꓐꓳ ꓔꓶ. ꓓꓴ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓔꓰ ꓝꓲꓼ ꓡꓰ ꓕꓯꓼ ꓠꓷꓼ ꓗꓷˍ ꓟ ꓔꓯ ꓐꓯˍ ꓟ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓟ ꓐꓯ ꓘꓶ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓔꓰ ꓝꓲꓼ ꓗꓪ ꓐꓰ ꓕꓯꓼ ꓔꓶ. ꓗꓷˍ ꓟ ꓥꓳ꓿ ꓐꓯ ꓠꓲ, ꓫꓵˍ ꓟ ꓬꓲ. ꓬꓲ ꓢꓲ ꓠꓬ ꓢꓲ ꓒ ꓬꓰ‐ꓢꓴ ꓠꓬ꓾ ꓥꓪ ꓠꓴ ꓔꓯ ꓟꓽ ꓚꓬꓴ. ꓖꓶ ꓥꓳ ꓐꓯˍ ꓠꓬ ꓠꓴ ꓐꓰ ꓥꓪ ꓠꓬ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓥꓪ ꓠꓬ ꓠꓴ ꓢꓲ ꓒ ꓥ ꓡꓳ꓿ ꓠꓴ ꓪꓴꓽ ꓓꓰ ꓡꓰˍ ꓟ ꓝꓴꓲ. ꓠꓯꓸꓼ ꓗꓪ ꓥꓪ ꓓꓵꓽ ꓙꓰ ꓢꓲ ꓠꓬꓲ ꓥꓪ ꓠꓴ ꓔꓯ ꓞꓲꓽ ꓖꓶˍ ꓟ꓾ ꓥꓪ ꓫꓵꓽ ꓗꓪ ꓐꓰ ꓞꓲꓽ ꓖꓶ ꓠ, ꓟ ꓕꓱ ꓡꓱ ꓬꓰˍ ꓟ ꓥ ꓡꓳ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓬꓲ ꓝꓲ ꓓꓴ ꓐꓴ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓟ ꓡꓯ ꓒꓯ, ꓖꓳ ꓟ ꓠꓬ ꓣꓳ ꓔꓯ ꓚꓬꓴ. ꓖꓶ ꓠ, ꓟ ꓐꓱ ꓶ ꓡꓯꓼ ꓐꓳ ꓔꓶ. ꓓꓴ ꓗꓪ ꓔꓰ ꓝꓲꓼ ꓕꓯꓼ ꓔꓶ ꓗꓷ ꓟꓶˍ ꓟ ꓠꓵꓻ ꓠꓲ,꓾ ꓙ ꓣꓳ ꓓꓰ ꓡꓰˍ ꓟ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓖꓳ ꓓꓱꓽ ꓡꓰ ꓓꓵꓽ ꓙꓰ ꓢꓲ ꓠꓬꓲ ꓣꓳ ꓮ ꓙꓵꓽ ꓔꓯ ꓚꓬꓴ. ꓖꓶ ꓡ ꓟ ꓥ ꓡꓳ꓿ ꓔꓱ ꓟ ꓑꓶ. ꓓꓴ ꓥꓪ ꓠꓴ ꓔꓯ ꓟꓽ ꓚꓬꓴ. ꓖꓶ ꓠꓬ ꓥꓪ ꓐꓰ ꓠꓴ ꓗꓴ. ꓙꓲꓽ ꓟꓽ ꓙꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓛꓲ ꓒꓯ, ꓔꓯ ꓞꓲꓽ ꓖꓶ ꓠ, ꓟ ꓠꓬꓲ. ꓠꓬꓲ ꓣꓳ ꓠꓬ ꓬꓲ ꓔꓯ ꓘꓳ ꓣꓴ ꓡꓯ꓿ ꓬꓲ. ꓬꓲ ꓢꓲ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓚꓬꓴ. ꓠ, ꓟ ꓡˍ ꓟ ꓥ ꓡꓳ꓿ ꓣꓳ ꓔꓯ ꓚꓬꓴ. ꓖꓶ ꓗꓷ ꓟ ꓢꓲ ꓒ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓬꓲ ꓔꓯ ꓣꓳ ꓮ ꓕꓯ ꓥ ꓟꓲ ꓣꓳ ꓤꓶꓻ ꓠꓯꓸꓼ ꓗꓪ꓾ ꓢꓲ ꓒ ꓠꓴ ꓠꓬ ꓥꓪ ꓚꓬꓴ. ꓢꓲ ꓒ ꓥ ꓡꓳ꓾ ꓠꓴ ꓔꓯ ꓥꓪ ꓘꓳ ꓣꓴ ꓟꓶ ꓡꓰꓳ꓾ ꓐꓰ ꓬꓲ ꓐꓰ ꓗꓴ. ꓙꓲꓽ ꓙꓳ ꓠ, ꓟ ꓬꓳ. ꓚꓰꓽ ꓓꓰ ꓡꓰˍ ꓟ ꓥ ꓡꓳ꓿
