ꓒ‐ꓯ ꓢꓽ‐ꓢꓶ‐ꓠ ꓔꓯ (17) ꓘꓳꓼ ꓧꓳꓽ ꓪꓴ. ꓟꓴ ꓬꓰ ꓗꓷ ꓟ ꓔꓲꓺ ꓒ ꓓꓽ Justin Saw Min Theid ꓬꓲ ꓟꓬꓱꓽ ꓠꓽ ꓠ, ꓟ ꓐꓱ ꓶ ꓓꓰꓽ ꓔˍ ꓟ ꓕꓳꓽ ꓶ ꓔꓯ ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ 3 ꓦ 26 ꓠꓬꓲ ꓕꓯ ꓘꓳ ꓣꓴ ꓗꓷꓳ꓾ ꓐꓰ ꓦꓮꓔꓲꓚꓮꓠ ꓗꓪ ꓐꓰ ꓐꓯ ꓑꓶ ꓗꓷꓳ꓿

ꓒ‐ꓯ ꓢꓽ‐ꓢꓶ‐ꓠ ꓗꓪ ꓔꓳ, ꓙ ꓔꓲꓺ ꓒ ꓓꓽ ꓟꓬꓱꓽ ꓬꓰ ꓢꓴ (Coadjutor Bishop) ꓔꓲꓺ ꓒ ꓓꓽ Stanislaus Min Ko ꓠꓬ ꓮ ꓟꓶ ꓕꓯ ꓢꓽ‐ꓢꓶ‐ꓠ ꓙꓵꓽ ꓔꓲꓺ ꓒ ꓓꓽ ꓙꓵꓽ ꓪ ꓘꓳ ꓣꓴ ꓗꓷ ꓟ ꓥ ꓡꓳ꓿ ꓕꓱ ꓟ ꓔꓯ ꓣꓳ‐ꓟ ꓬꓲ ꓙꓵ, ꓟꓳꓼ ꓡꓳ 12 ꓙꓵ, (ꓟꓬ‐ꓟ ꓙꓵ, ꓟꓶꓽ ꓘꓶ 5ꓽ30) ꓕꓯ ꓐꓯ ꓑꓶ ꓗꓷ ꓟ ꓥ ꓡꓳ꓿

ꓪꓽ ꓘꓴˍ ꓟ ꓐꓰ ꓐꓯ ꓑꓶˍ ꓟ

ꓐꓯ ꓑꓶ ꓙꓵ, ꓟꓽ ꓛꓲ ꓡ ꓢꓰꓽ ꓕꓯ ꓔꓲꓺ ꓒ ꓓꓽ ꓐꓴ꓾ ꓔꓲꓺ ꓒ ꓐꓴ ꓔꓲꓺ ꓟ ꓐꓴ꓾ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬ ꓒ‐ꓯ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲ ꓗꓪ ꓜꓲꓼ ꓡꓳꓽ ꓢꓲ ꓢꓲ ꓡꓲ ꓟ ꓟꓶ ꓠ, ꓟ ꓐꓱ ꓶ ꓪꓽ ꓘꓴ ꓗꓷꓳ꓿ ꓖꓳ ꓕꓲ ꓙꓵ, ꓗꓪ ꓔꓲꓺ ꓒ ꓪ ꓔꓲ. ꓝꓣꓮꓠꓚꓲꓢ ꓡꓰ ꓐꓳ ꓔˍ ꓟ ꓢꓲ ꓡꓲ ꓟ ꓐꓱ ꓶ ꓪꓽ ꓘꓴ ꓘꓶ ꓔꓯ ꓥˍ ꓟꓲ ꓘꓴ ꓗꓷꓳ꓿

ꓟꓬ‐ꓟ ꓙꓵ, ꓟꓶꓽ ꓘꓶ (5ꓽ30) ꓙꓵ, ꓕꓯ ꓠꓬ ꓢꓽ‐ꓢꓶ‐ꓠ ꓗꓪ ꓣꓱꓽ ꓙ ꓢꓴ ꓔꓲꓺ ꓒ Anselm Nay Zaw Oo ꓡꓰ ꓔꓲꓺ ꓒ ꓪ ꓔꓲ. ꓡꓰ ꓢꓷ. ꓙ ꓟꓳ ꓙ ꓔˍ ꓟ ꓐꓯ ꓑꓶ ꓘꓶꓽ ꓔꓯ ꓵ ꓗꓷꓳ꓿ ꓖꓳ ꓗ ꓠꓯ. ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬ ꓔꓲꓺ ꓒ ꓓꓽ ꓠꓬꓲꓽ ꓣꓳ ꓐꓱ ꓶ ꓣꓳ‐ꓢ‐ꓣꓲ ꓪꓽ ꓘꓴ ꓗꓷ ꓢꓲ ꓠꓬꓲ꓾ ꓔꓲꓺ ꓒ ꓓꓽ ꓡꓰ ꓮ ꓙꓵꓽ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓗꓷ ꓢꓲ ꓬꓲ ꓙꓵ, ꓖꓳ ꓟ ꓔꓯ ꓬꓲ ꓟꓶꓽ ꓢꓰꓼ ꓗꓷꓳ꓿

ꓪꓴꓽ ꓡ ꓟꓴ ꓡ ꓗꓷ ꓟ ꓢꓽ‐ꓢꓶ‐ꓠ

ꓒ‐ꓯ ꓢꓽ‐ꓢꓶ‐ꓠ ꓔꓯ 2009 ꓘꓳꓼ 1 ꓦ (24) ꓠꓬꓲ ꓕꓯ ꓫꓬ, ꓔꓶ ꓔˍ  ꓟ ꓥ ꓡꓳ꓿ ꓔꓲꓺ ꓒ ꓓꓽ Justin Saw Min Theid ꓬꓲ (17) ꓘꓳꓼ ꓧꓳꓽ ꓪꓴ. ꓟꓴ ꓗꓷ ꓟ ꓠꓯꓸꓼ ꓗꓪ ꓢꓽ‐ꓢꓶ‐ꓠ ꓠꓬ ꓮ ꓘꓶ. ꓪꓴꓽ ꓡ ꓟꓴ ꓡ ꓗꓷ ꓟ ꓥ ꓡꓳ꓿

ꓬꓲ ꓧꓳꓽ ꓣꓱꓽ ꓔꓬ ꓟ ꓬꓲ ꓙꓵ, ꓗꓪ ꓬꓲ ꓠꓬ ꓪꓽ ꓘꓴ ꓦꓲ꓾ ꓔꓲꓺ ꓒ ꓔꓬ ꓦꓲ꓾ ꓔꓲꓺ ꓟ ꓦꓲ ꓐꓰ ꓢꓷ. ꓠꓲ, ꓢꓳ ꓤ ꓔꓬ ꓦꓲ ꓐꓴ ꓔꓯ ꓫꓬ, ꓖꓶ ꓗꓷꓳ꓿ ꓬꓲ ꓣꓱꓽ ꓙˍ ꓟ ꓐꓰ ꓪꓴ‐ꓢ ꓣꓱꓽ ꓛꓰꓽ ꓑꓶ. ꓓꓴ ꓢꓽ‐ꓢꓶ‐ꓠ ꓘꓴꓽ ꓠꓯꓸꓼ ꓗꓪ ꓙꓲꓻ ꓖꓴ ꓮ ꓟꓬ, ꓙꓳ ꓟꓶ ꓟ ꓥ ꓡꓳ꓿

ꓔꓲꓺ ꓒ ꓓꓽ ꓬꓲ ꓫꓵꓼ ꓐꓯ ꓘꓶꓽ

ꓔꓲꓺ ꓒ ꓓꓽ Stanislaus Min Ko ꓬꓲ ꓔꓯ ꓶꓻ ꓓꓽ ꓟ ꓙꓳˍ ꓟ ꓔꓯ ꓐꓯ ꓗꓷꓳ꓿ “ꓮ ꓟꓶ ꓗꓪ ꓐꓰ ꓪꓴ. ꓔꓴ ꓢꓲ ꓒ‐ꓯ ꓢꓽ‐ꓢꓶ‐ꓠ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓥꓪ ꓔꓯ ꓡꓯꓼ ꓙꓱ ꓔ ꓟ ꓥ ꓡꓳ꓿ ꓠꓴ ꓪ ꓪꓽ ꓘꓴ ꓖꓶˍ ꓟ꓾ ꓬꓰ ꓙ ꓔꓳ, ꓟ ꓖꓶˍ ꓟ ꓐꓰ ꓪꓴ‐ꓢ ꓣꓱꓽ ꓛꓰꓽ ꓗꓪ ꓐꓰ ꓟꓬꓱꓽ ꓕꓱ ꓟ ꓔꓯ ꓬꓰ ꓙꓰˍ ꓥꓳ” ꓐꓰ ꓐꓯ ꓗꓷꓳ꓿

ꓮ ꓟꓶ ꓢꓽ‐ꓢꓶ‐ꓠ ꓗꓪ ꓔꓲꓺ ꓒ 23 ꓣꓳ꓾ ꓔꓲꓺ ꓟ ꓐꓴ ꓐꓰ ꓐꓣꓳ ꓐꓴ 40 ꓣꓳ ꓛꓲ ꓐꓰ꓾ ꓘꓴ ꓜꓲꓼ ꓞꓳ ꓟ. ꓒ ꓟ. ꓟ (70) ꓣꓳ ꓛꓲˍ ꓡꓰꓽ ꓙꓳˍ ꓡꓳ꓿ ꓢꓽ‐ꓢꓶ‐ꓠ ꓠꓬ ꓣꓳꓺˍ ꓐꓯ ꓥ  ꓟꓲ ꓙꓵꓻ ꓠꓲ, ꓐꓰ ꓮ ꓙꓵꓽ ꓕꓲ ꓠꓲ, ꓕꓲ ꓪˍ ꓬꓰˍ ꓟ ꓪꓴ. ꓠꓬꓲ ꓢꓽ‐ꓢꓶ‐ꓠ ꓠꓬ ꓮ ꓘꓶ. ꓢꓯꓼ ꓙꓳ ꓓ, ꓢꓰꓽ ꓟ ꓥ ꓡꓳ꓿

ꓫ. ꓟꓳˍ ꓟ ꓐꓰ ꓬꓰ ꓙ ꓔꓳ, ꓙˍ ꓟ

ꓒ‐ꓯ ꓢꓽ‐ꓢꓶ‐ꓠ ꓗꓪ ꓔꓬ ꓟ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬ ꓔꓲꓺ ꓒ ꓓꓽ Justin ꓬꓲ ꓟꓬꓱꓽ ꓬꓰ ꓖꓶ ꓗꓷ ꓟ ꓐꓱ ꓶ ꓫ. ꓟꓳ ꓔꓬ ꓟ ꓥ ꓢꓲ꓾ ꓔꓲꓺ ꓒ ꓓꓽ Stanislaus Min Ko ꓐꓱ ꓶˍ ꓟꓲ ꓪꓽ ꓘꓴ ꓙˍ ꓟ ꓐꓰ ꓬꓰ ꓙ ꓔꓳ, ꓙ ꓖꓶˍ ꓥꓳ꓾ ꓐꓰ ꓐꓯ ꓗꓷꓳ꓿ ꓬꓲ ꓪ ꓠꓬ ꓔꓲꓺ ꓒ ꓓꓽ ꓠꓬꓲꓽ ꓣꓳ ꓐꓰ ꓢꓽ‐ꓢꓶ‐ꓠ ꓔꓲ ꓟ ꓡꓱꓸꓼ ꓔꓯ ꓪꓴ‐ꓢ ꓬꓲ ꓧꓳꓽ ꓟ. ꓖꓶˍ ꓟ ꓐꓰ ꓠꓬꓲ ꓙ ꓔ, ꓙ ꓟ ꓠꓯꓸꓼ ꓗꓪ ꓝ. ꓢꓲ ꓙ ꓫꓱꓽ ꓐ ꓡ ꓠ, ꓟ ꓪꓽ ꓘꓴ ꓗꓷꓳ꓿

ꓓꓳꓽ꓾ RVA Sgaw Karen Service