ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓠꓯꓸꓼ ꓗꓪ (5) ꓠꓽ ꓕꓲ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ꓿ ꓟꓽ ꓟꓶ ꓫꓵ ꓟ ꓦꓬꓼ ꓠꓬꓲ ꓕꓯ ꓣꓳ ꓠꓬ ꓢꓯ. ꓬꓲꓼ ꓡ ꓑꓮꓲꓽ ꓔꓯ ꓬꓰ ꓓꓴ ꓥꓳ꓿ ꓢꓯ. ꓬꓲꓼ ꓡ ꓑꓮꓲꓽ ꓟꓽ ꓛꓲ ꓡˍ ꓕꓯ ꓣꓳ ꓠꓬ ꓜ ꓚꓲ. ꓧꓪꓽ ꓚꓲ.ˍ ꓡꓳ꓿ ꓪꓽ ꓘꓴ ꓠꓬꓲ ꓕꓱ ꓡꓱ ꓬꓰˍ ꓟ ꓥ ꓡꓳ꓿ ꓟ. ꓟꓲꓽ ꓕꓳꓽ ꓶ ꓠꓬ (ꓬꓳ‐ꓦ 11ꓽ1‐45) ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓟ‐ꓡꓲ ꓐꓰ ꓟ‐ꓕ ꓬꓲ ꓪ ꓠꓬꓲ ꓤ ꓡ‐ꓢ‐ꓣꓴ ꓔꓯ ꓢꓯ. ꓬꓲꓼ ꓡ ꓝꓲˍ ꓟ ꓟ. ꓟꓲꓽ ꓥ ꓡꓳ꓿
ꓟ. ꓟꓲꓽ ꓝꓲ. ꓔꓯ ꓣꓳ ꓡꓳ. ꓠꓬꓲˍ ꓕꓯ ꓬꓲ ꓮ ꓝꓲ ꓥ ꓟ ꓟ‐ꓡꓲ ꓐꓰ ꓟ‐ꓕ ꓠꓬ ꓫꓵꓻ ꓘꓪꓽ ꓡꓰ ꓟ ꓠꓬꓲ ꓤ ꓡ‐ꓢ‐ꓣꓴ ꓑꓶ. ꓓꓴ ꓠꓲ, ꓟ ꓫ. ꓠꓬꓲ ꓔꓬ ꓡꓳ꓿ ꓠꓬꓲ ꓤ ꓔꓯ ꓥˍ ꓟꓲ ꓫ ꓔꓵ. ꓗꓷꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓡ‐ꓢ‐ꓣꓴ ꓠꓻ ꓔꓬ ꓒꓬ ꓔꓬ ꓟ ꓬꓲ ꓢꓷ.ˍ ꓥ ꓟꓲ ꓠꓲ, ꓞ ꓟꓽ ꓙꓰ꓿ ꓡ‐ꓢ‐ꓣꓴ ꓫꓵꓻ ꓘꓪꓽ ꓡꓰ ꓗ ꓠꓯ. ꓔꓵ. ꓗꓷ ꓢꓲ ꓠꓬꓲ ꓬꓲ ꓛꓲ ꓬꓰˍ ꓡꓳ꓿ ꓖꓳ ꓡꓱ ꓠꓬꓲ ꓖꓳ ꓗꓪ ꓛꓲ ꓬꓰ ꓕꓯ ꓟ‐ꓡꓲ ꓐꓰ ꓟ‐ꓕ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓳˍ ꓕꓯ “ꓢꓲꓺ ꓒꓽꓳ ꓠꓴ ꓕꓱ ꓗꓪ ꓔꓬ ꓠꓬ ꓥꓪ ꓠꓬꓲ ꓤ ꓠꓬ ꓟꓽ ꓫꓵꓻ” ꓐꓰ ꓐꓯ ꓖꓶˍ ꓡꓳ꓿ ꓢꓲ ꓒ ꓬꓰ‐ꓢꓴ ꓥˍ ꓟꓲ꓾ ꓠꓴ ꓪ ꓙꓵˍ ꓠꓬ ꓮ ꓟꓶ ꓥˍ ꓟꓲ ꓢꓯ. ꓬꓲꓼ ꓡ ꓐ ꓡˍ ꓢꓰꓽ ꓡꓳ꓾ ꓐꓰ ꓒꓳ, ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟ. ꓟꓲꓽ ꓝꓲ. ꓔꓯ ꓣꓳ ꓡꓳ. ꓠꓬꓲˍ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓡ‐ꓢ‐ꓣꓴ ꓫꓵꓻ ꓢꓲ ꓔꓵ. ꓗꓷ ꓗ ꓠꓯ. ꓛꓲ ꓬꓰˍ ꓡꓳ꓿ ꓖꓳ ꓕꓯ ꓠꓬ ꓡ‐ꓢ‐ꓣꓴ ꓐꓱ ꓶ ꓥꓳ ꓡꓳ. ꓓꓴ ꓐꓯˍ ꓟ ꓟꓽ ꓙꓳꓻꓳ꓿ ꓟ‐ꓕ ꓐꓰ ꓟ‐ꓡꓲ ꓐꓴ ꓥˍ ꓟꓲ ꓮ ꓫꓵꓽ ꓥꓳ ꓡꓳ. ꓓꓴ ꓟꓽ ꓙꓳ꓿ ꓮ ꓫꓵꓽ ꓡꓰ. ꓬꓰ ꓟꓽ ꓐ ꓡ ꓟ ꓬꓲ ꓙꓵ, ꓕꓲ ꓙꓵ, ꓗꓪ ꓛꓲ ꓬꓰꓳ꓿ ꓮ ꓡꓲ ꓟ ꓥˍ ꓟꓲ ꓡꓯꓽ ꓒꓯ, ꓞꓲꓽ ꓗꓷꓳ꓿ ꓮ ꓡꓲ ꓟ ꓥˍ ꓟꓲ ꓡ‐ꓢ‐ꓣꓴ ꓠꓬ ꓚꓬꓴ. ꓟꓽ ꓠꓺꓳ ꓐꓰ ꓐꓯ ꓢꓲ ꓠꓬꓲ ꓩꓴ ꓗꓷˍ ꓟ ꓬꓲ ꓙꓵ, ꓕꓲ ꓙꓵ, ꓗꓪ ꓢꓲ ꓒ ꓬꓰ‐ꓢꓴ ꓛꓲ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓟꓳ ꓡꓰ ꓕꓯ ꓟ‐ꓡꓲ ꓐꓰ ꓟ‐ꓕ ꓠꓬ ꓥꓳ ꓡꓳ. ꓓꓴ ꓮ ꓔꓲ. ꓤ ꓙꓳ ꓡꓰˍ ꓡꓳ꓿ ꓮ ꓡꓲ ꓙꓳ ꓡꓰˍ ꓐꓰ ꓐꓯˍ ꓠꓬ꓾ ꓖꓳ ꓗꓪ ꓟ‐ꓕ ꓡꓰ ꓢꓲ ꓒ ꓬꓰ‐ꓢꓴ ꓔꓯ꓾ ꓢꓲꓺ ꓒꓽꓳ ꓠꓴ ꓕꓱ ꓗꓪ ꓔꓬ ꓠꓬ ꓥꓪ ꓠꓬꓲ ꓤ ꓠꓬ ꓟꓽ ꓫꓵꓻ꓿ ꓮ ꓟꓶ ꓕꓯˍ ꓟꓲ ꓠꓴ ꓟꓽ ꓔꓬ ꓥꓳ ꓐꓯˍ ꓠꓬ ꓐ, ꓐ ꓪꓴ‐ꓢ ꓡꓰ ꓠ ꓡꓳ.ˍ ꓥꓳ ꓐꓯˍ ꓟ ꓔꓯ ꓙꓵꓻˍ ꓡꓳ꓾ ꓐꓰ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓬꓲ ꓔꓯ ꓬꓰ ꓙ ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓚꓱ, ꓠꓬ ꓕꓱ ꓡꓱ ꓥꓳ꓿ ꓮ ꓙꓵꓽ ꓥꓳ ꓡꓳ. ꓓꓴ ꓟꓽ ꓙꓳ꓾ ꓮ ꓫꓵꓽ ꓥˍ ꓟꓲ ꓒꓲꓼ ꓬꓰ ꓟꓶꓽ ꓬꓰꓳ꓾ ꓐꓯˍ ꓕꓲ ꓙꓵ, ꓗꓪ ꓢꓲ ꓒ ꓠꓬ ꓛꓲ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓟ‐ꓡꓲ ꓟ‐ꓕ ꓔꓯ ꓥꓳ ꓡꓳ. ꓓꓴ ꓖꓶˍ ꓟ ꓡꓰ ꓐꓰ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓥˍ ꓟꓲ ꓥꓳ ꓡꓳ. ꓓꓴ ꓖꓶ ꓔꓬ ꓡꓳ꓿ ꓣꓳ ꓮ ꓙꓵꓽ ꓡꓱꓸꓼ ꓥꓳ ꓡꓳ. ꓓꓴ ꓟꓽ ꓙꓳ ꓟ ꓦꓬꓼ ꓠꓬꓲ꓾ ꓠꓲ, ꓟ ꓠꓻ ꓠꓬꓲ ꓠꓲ, ꓟ ꓫ. ꓠꓬꓲ ꓥ ꓟ ꓑꓶ. ꓓꓴ ꓥꓳ ꓡꓳ. ꓟꓽ ꓑꓶ. ꓟ ꓦꓬꓼ ꓠꓬꓲ꓾ ꓝꓮꓲ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓘꓶꓻ ꓡꓶꓽ ꓗꓽ ꓡꓽ ꓓꓴ ꓠꓲ, ꓫ. ꓟꓬ ꓫ. ꓓꓴ ꓕꓱ ꓡꓱ ꓐꓰ ꓔꓳ, ꓜꓳꓽˍ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓮ ꓫꓵꓽ ꓔꓯ ꓥˍ ꓟꓲ ꓥꓳ ꓡꓳ. ꓟꓽ ꓑꓶ.꓿ ꓣꓳ ꓠꓬ ꓮ ꓫꓵꓽ ꓥˍ ꓟꓲ ꓣꓱꓽ ꓬꓰ ꓟꓽ ꓑꓶ. ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓠꓬ ꓛꓲ ꓡ ꓐꓷ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
ꓟꓬꓽ ꓠꓬꓲ ꓟ‐ꓡꓲ ꓐꓰ ꓟ‐ꓕ ꓠꓬ ꓬꓲ ꓪ ꓟꓳˍ ꓟ ꓮ ꓙꓵꓽ ꓠꓬ ꓠꓯ ꓞꓲ, ꓟ ꓡꓰꓽ ꓥ ꓡꓳ꓿ ꓮ ꓡꓲ ꓟ ꓔꓯ ꓡꓳ. ꓠꓬꓲˍ ꓥ ꓟꓲ ꓠꓯ ꓞꓲ, ꓞꓲ, ꓮ ꓫꓵꓽ ꓥꓳ ꓡꓳ. ꓓꓴ ꓟꓽ ꓙꓳ ꓟ ꓡꓰ ꓐꓰ ꓣꓳ ꓥ ꓟꓲ ꓚꓳ ꓡꓳ ꓚꓳ ꓫꓵ ꓗꓪ ꓡꓳ. ꓠꓬꓲˍ ꓕꓯ ꓮ ꓫꓵꓽ ꓥꓳ ꓡꓳ. ꓓꓴ ꓟꓽ ꓙꓳ ꓟ ꓫꓱ. ꓫꓱ.ˍ ꓓ, ꓟ ꓦꓬꓼ ꓠꓬꓲ ꓗꓪ꓾ ꓮ ꓫꓵꓽ ꓬꓰ ꓠꓯ, ꓥ ꓟꓽ ꓢꓷ. ꓟ ꓦꓬꓼ ꓠꓬꓲ ꓗꓪ꓾ ꓢ. ꓠꓯ ꓪ ꓠꓬꓲ ꓮ ꓫꓵꓽ ꓒꓬꓱꓼ ꓡˍ ꓟ ꓟꓽ ꓢꓷ. ꓟ ꓦꓬꓼ ꓠꓬꓲ ꓗꓪ꓾ ꓞꓳ ꓤ ꓣꓱꓽ ꓠꓲ, ꓟꓽ ꓫꓵ ꓟ ꓠꓲ, ꓟ ꓙꓳ ꓡ ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓠꓬ ꓣꓳ ꓒ ꓕꓲ ꓗꓪ ꓞꓼ ꓐꓰ ꓛꓲ ꓡˍ ꓡꓳ꓾ ꓐꓯˍ ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓓꓵꓽ ꓙꓽ ꓟꓶ ꓓꓴ ꓗꓪ ꓐꓰ ꓡ‐ꓢ‐ꓣꓴ ꓔꓯ ꓢꓯ. ꓬꓲꓼ ꓡ ꓝꓲˍ ꓟ ꓡꓰ ꓐꓰ ꓠꓬꓲ. ꓠꓬꓲ ꓥꓳ ꓡꓳ. ꓓꓴ ꓟꓽ ꓙꓳ ꓟ ꓣꓳ ꓦꓬꓼ ꓠꓬꓲ ꓗꓪ꓾ ꓗ ꓘꓶ ꓚꓲ. ꓔ ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓡꓰ ꓣꓳ ꓒ ꓕꓲ ꓗꓪ ꓛꓲ ꓡˍ ꓡꓳ ꓐꓯˍ ꓟ ꓣꓳ ꓔꓯ ꓬꓲ ꓪꓴ. ꓕꓲ ꓫꓵꓽ ꓐꓯ ꓟ. ꓖꓶ ꓡ ꓔꓬ ꓡꓳ꓿ ꓝꓮꓲ ꓢꓲ ꓒ ꓬꓰ‐ꓢꓴ ꓠꓬ ꓟ‐ꓡꓲ ꓐꓰ ꓟ‐ꓕ ꓔꓯ ꓡ‐ꓢ‐ꓣꓴ ꓔꓵ. ꓔˍ ꓟ ꓗꓪ ꓛꓵꓽ ꓔ ꓟ ꓡꓳ ꓓꓰ ꓔꓯ ꓥ. ꓦ ꓗꓷ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓠꓬ꓾ ꓡ‐ꓢ‐ꓣꓴ ꓔꓴ ꓡꓯ꓾ ꓐꓰ ꓘꓴˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ ꓠꓬꓲ. ꓠꓬꓲ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓛꓵꓽ ꓔ ꓟ ꓡꓳ ꓓꓰ ꓔꓯ ꓥ. ꓩꓴ ꓡꓯ꓾ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿ ꓣꓳ ꓠꓲ, ꓟ ꓠꓯꓸꓼ ꓗꓪ ꓐꓰ ꓠꓻ ꓓꓴ ꓑ꓾ ꓫ. ꓓꓴ ꓮ ꓙꓵꓽ ꓬꓲ ꓔꓯ ꓟꓳ. ꓖꓶ ꓡꓯ꓿ ꓕꓲ ꓖ ꓕꓲ ꓧꓪ, ꓣꓳ ꓠꓬ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓭ. ꓛꓲ ꓑꓲ. ꓢꓲ ꓠꓬꓲ ꓔꓬ, ꓗꓴ.ˍ ꓡꓳ꓿ ꓫ. ꓔꓳ ꓓꓴ ꓬꓰ ꓗꓷ ꓟ꓾ ꓠꓲ, ꓟ ꓫ. ꓓꓴ ꓬꓰ ꓗꓷ ꓟ꓾ ꓛꓬ ꓗꓷ ꓟ ꓥꓳꓽ ꓗꓷ ꓟ꓾ ꓠꓻ ꓓꓴ ꓓꓴ ꓡꓰ ꓟ ꓕꓱ ꓟ ꓔꓯ ꓮ ꓟ ꓔꓯ ꓡꓰ. ꓟꓽ ꓟꓳ. ꓖꓶ ꓖꓶ ꓗ ꓘꓶ ꓚꓲ. ꓔ ꓢꓲ ꓠꓬꓲ ꓕꓲ ꓣꓳ ꓔꓵꓸꓼ ꓔꓬ ꓢꓲ ꓞꓳ ꓙꓳ ꓙꓰ ꓗꓴ.ˍ ꓡꓳ꓿ ꓠꓯ ꓞꓲ,ˍ ꓟ ꓘꓴꓽ ꓗꓪ ꓡꓰꓽ ꓣꓳ ꓠꓬ ꓔꓬ ꓗꓴ.ˍ ꓡꓳ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ꓾ ꓠꓴ ꓔꓯ ꓛꓵꓽ ꓞ, ꓟ ꓭ. ꓛꓲ ꓔꓯ ꓥ. ꓦ ꓗꓷ꓾ ꓐꓰ ꓒꓳ, ꓖꓶ ꓡˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓠꓴ ꓐꓰ ꓥꓪ ꓔꓯ ꓓꓰꓽ ꓔꓬ ꓡꓳ꓿ ꓠꓴ ꓠꓯꓸꓼ ꓗꓪ ꓙꓳˍ ꓟ ꓮ ꓙꓵꓽ ꓥꓪ ꓔꓯ ꓖꓶ ꓡꓯ꓿ ꓠꓴ ꓥꓳꓽ ꓗꓷ ꓟ꓾ ꓫ. ꓔꓳ ꓗꓷ ꓟ ꓮ ꓙꓵꓽ ꓬꓲ ꓔꓯ ꓖꓶ ꓡꓯ꓿ ꓠꓴ ꓠꓲ, ꓟ ꓠꓯꓸꓼ ꓗꓪ ꓤꓰ ꓞ, ꓟ ꓠꓻ ꓓꓴ ꓑ ꓮ ꓙꓵꓽ ꓬꓲ ꓔꓯ ꓟꓳ. ꓖꓶ ꓡꓯ꓿ ꓠꓻ ꓫꓬ, ꓖꓶˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓘꓴ ꓓꓰꓽ ꓔꓬ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓡ‐ꓢ‐ꓣꓴ ꓔꓯ ꓛꓵꓽ ꓔ ꓟ ꓭ. ꓛꓲ ꓔꓯ ꓥ. ꓩꓴ ꓗꓷˍ ꓟ ꓡꓰ ꓐꓰ ꓠꓬꓲ. ꓠꓬꓲ ꓠꓴ ꓥꓪ ꓤꓶꓻ ꓗꓪ ꓥˍ ꓟꓲ ꓠꓴ ꓐꓰ ꓥꓪ ꓔꓯ ꓚꓵ. ꓔ ꓟ꓾ ꓠꓬꓲ. ꓞ ꓓˍ ꓟ ꓮ ꓙꓵꓽ꓾ ꓥꓳ ꓡꓳ. ꓓꓴ ꓟꓽ ꓙꓳ ꓟ ꓮ ꓙꓵꓽ ꓬꓲ ꓔꓯ ꓖꓶ ꓡꓯ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓘꓴ ꓓꓰꓽ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓢꓴ ꓔꓯ ꓢꓯ. ꓬꓲꓼ ꓡ ꓝꓲ ꓐ ꓡ ꓢꓴ꓾ ꓮ ꓫꓵꓽ ꓥˍ ꓟꓲ ꓬꓰ ꓐ ꓡ ꓢꓴ ꓥ ꓟ ꓑꓶ. ꓓꓴ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓘꓳ ꓗꓳ. ꓔꓬ ꓟ ꓮ ꓙꓵꓽ ꓬꓲ ꓔꓯ ꓖꓶ ꓢꓲ ꓠꓬꓲ ꓬꓲ ꓐꓰ ꓕꓲ ꓛꓳˍ ꓞꓳ ꓙꓳ ꓙꓰ ꓡꓯ꓿ ꓬꓲ ꓠꓯꓸꓼ ꓗꓪ ꓠꓬ ꓟꓽ ꓟꓶ ꓬꓰ ꓟ꓾ ꓟꓽ ꓖꓴ ꓡꓰ ꓟ ꓥꓳ ꓡꓳ. ꓓꓴ ꓙꓳˍ ꓡꓳ ꓐꓯˍ ꓟ ꓣꓳ ꓓꓵꓽ ꓙꓽ ꓔˍ ꓡꓯ꓿
