ꓟꓴ ꓗꓪ ꓝꓲ ꓓꓴ ꓚꓬ‐ꓑꓷ‐ꓡꓰ ꓡꓰ ꓢꓲꓺ ꓒ ꓬꓰ‐ꓢꓴ ꓦꓵꓻ ꓡ ꓟ ꓚꓱ, ꓔꓯ ꓟ‐ꓡꓲ ꓔꓯ ꓐꓯ ꓟ. ꓖꓶ ꓡ ꓟ
ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓗꓪ ꓡꓴ‐ꓘ ꓕꓳ ꓶ 1ꓽ 26‐38 ꓝꓲ ꓗꓪ ꓛꓲ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓦꓵꓻ ꓡ ꓟ ꓚꓱ, ꓥ ꓡꓳ꓿ ꓦ‐ꓐ ꓛꓳꓼ ꓟ ꓗ ꓠꓯ. ꓪꓴ‐ꓢ ꓡꓰ ꓟꓴ ꓗꓪ ꓝꓲ ꓓꓴ ꓚꓬ‐ꓑꓷ‐ꓡꓰ ꓔꓯ ꓖ‐ꓡꓲ‐ꓡꓰ ꓟꓵ ꓠ‐ꓢ‐ꓡꓱ ꓟꓬꓱ ꓔ ꓟ ꓡꓳ ꓒꓱ ꓗꓪ ꓟ‐ꓡꓲ ꓟꓬꓱꓽ ꓔ ꓟ ꓤ ꓟꓶ ꓡꓯ. ꓚꓵ ꓔꓬ ꓗꓪ ꓝꓲ ꓩꓴ ꓗꓷ ꓡꓳ꓿
ꓟꓴ ꓗꓪ ꓝꓲ ꓓꓴ ꓡꓰ ꓧꓪ. ꓧꓪ.ꓼ ꓢꓲꓽ ꓒ ꓠꓬ ꓠꓴ ꓐꓰ ꓔꓬ ꓡꓳ ꓐꓰ ꓐꓯ ꓡꓳ ꓐꓯ ꓖꓶ ꓗꓷ ꓟ ꓥ ꓡꓳ꓿ ꓝꓮꓲ ꓟꓴ ꓗꓪ ꓝꓲ ꓓꓴ ꓡꓰ ꓢꓲꓺꓒ ꓬꓰ‐ꓢꓴ ꓦꓵꓻ ꓡ ꓟ ꓚꓱ, ꓔꓯ ꓐꓯ ꓖꓶ ꓟ ꓙꓵ, ꓕꓯ ꓟꓲ‐ꓡꓲ ꓠꓬ ꓮ ꓘꓶ. ꓛꓲ ꓓꓵꓽ ꓙ ꓟꓶ ꓡꓰ ꓔꓬ ꓡꓳ꓿ ꓖꓳ ꓕꓯ ꓟꓴ ꓗꓪ ꓝꓲ ꓓꓴ ꓡꓰ ꓟ‐ꓡꓲ ꓕꓽ ꓙꓳ ꓠꓴ ꓠꓬ ꓪꓴ‐ꓢ ꓣꓱ ꓛꓰ ꓟꓶ ꓗꓷ ꓢꓴ ꓥ ꓡꓳ ꓐꓰ ꓐꓯ ꓖꓶ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓟ, ꓟ ꓟ‐ꓡꓲ ꓠꓬ ꓥꓪ ꓠꓬ ꓢꓲꓽ ꓒ ꓚꓳ ꓟ ꓥꓳ꓿ ꓠꓴ ꓐꓯˍ ꓟ ꓡꓰ ꓐꓰ ꓥꓪ ꓖꓳ ꓓꓱꓽ ꓗꓪ ꓒꓬꓱꓼ ꓡ ꓝꓲˍ ꓐꓯ ꓖꓶ ꓗꓷꓟ ꓥ ꓡꓳ꓿ ꓖꓳ ꓟ ꓠꓬ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓙ ꓠ, ꓟ ꓟꓬꓱꓽ ꓬꓰ ꓟ ꓙꓵ, ꓕꓯ ꓟ‐ꓡꓲ ꓔꓯ ꓟꓽ ꓬꓰ ꓟꓽ ꓓ ꓐꓰ ꓟꓽ ꓐꓯ ꓖꓶ ꓟ ꓥ ꓡꓳ꓿ ꓟ,ꓟ ꓟ. ꓡꓲ ꓡꓰ ꓥꓪ ꓠꓬ ꓢꓲꓽ ꓒ ꓚꓳ ꓟ ꓥꓪ ꓐꓰ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓢꓲꓺ ꓒ ꓐꓯ ꓖꓶ ꓔꓯ ꓠ ꓠ, ꓗꓷ ꓑꓶ. ꓓꓴ ꓚꓬꓴ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓗꓪ ꓦꓵꓻ ꓡ ꓗꓷ ꓟ ꓥ ꓡꓳ꓿
ꓓꓽ ꓪꓴ ꓣꓳ ꓒꓵꓽ ꓒ ꓐꓴ ꓟ, ꓟ ꓲ‐ꓪ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓟꓽ ꓠ ꓡꓳ ꓗꓷ ꓥ ꓟꓲ ꓟ, ꓟ ꓟ‐ꓡꓲ ꓠꓬ ꓪꓴ‐ꓢ ꓐꓯ ꓘꓶꓽ ꓶꓼ ꓓꓳ ꓫꓱ, ꓓꓳ ꓔꓯ ꓙꓻ ꓣꓳ ꓟ ꓠꓲ, ꓟ ꓗꓪ ꓐꓰ ꓘꓳ, ꓣꓴ ꓗꓷ ꓟ ꓑꓶ. ꓓꓴ ꓟꓲ ꓠꓯ ꓡ ꓞꓳ ꓔꓯ ꓪꓴ‐ꓢ ꓡꓰ ꓚꓬꓴ ꓙ ꓟ ꓟꓬꓱꓽ ꓔꓯ ꓬꓰ ꓗꓷ ꓟ ꓥ ꓡꓳ꓿
ꓣꓳ ꓡꓱ ꓥ ꓟ ꓪꓴ. ꓠꓬꓲ ꓟ, ꓟ ꓟ‐ꓡꓲ ꓔꓯ ꓲ‐ꓪ ꓬꓲ ꓫꓵꓼ ꓐꓰ ꓘꓴ ꓟ ꓥ ꓡꓳ꓿
ꓟꓴ ꓗꓪ ꓝꓲ ꓓꓴ ꓡꓰ ꓟ‐ꓡꓲ ꓔꓯ ꓓꓽ ꓪꓴ. ꓒꓴ ꓗ ꓬꓰ ꓟ ꓙꓵ, ꓔꓯ ꓬꓲ ꓟꓬꓱꓺ ꓔꓯ ꓟꓽ ꓘꓴ ꓣꓱ ꓛꓰ ꓟꓶ ꓢꓴ ꓧꓪ. ꓧꓪ.ꓼ ꓐꓰ ꓘꓴ ꓗꓷ ꓟ ꓥ ꓡꓳ꓿ ꓖꓳ ꓟ ꓠꓬ ꓟ, ꓟ ꓟ‐ꓡꓲ ꓠꓬ (Immaculate Conception) ꓮ‐ꓠꓱ ꓮ‐ꓓꓯ ꓐꓰ ꓲ‐ꓪ ꓬꓰ ꓛꓬ ꓗꓷ ꓟ ꓝꓴꓲ ꓟꓽ ꓙꓳ ꓢꓴ ꓥ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓟ‐ꓡꓲ ꓖꓳ ꓓꓱꓽ ꓗꓪ ꓟꓯ ꓔ ꓟ ꓐꓱ ꓶ ꓝꓴꓲ ꓟꓽ ꓙꓳ ꓢꓴ ꓔꓯ ꓪꓴ‐ꓢ ꓡꓰ ꓢꓲ ꓔ ꓟ ꓥ ꓡꓳ꓿
ꓟ, ꓟ ꓟ‐ꓡꓲ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓓꓽ ꓪꓴ. ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓢꓴ ꓓꓽ ꓪꓴ. ꓢꓲꓺꓒ ꓬꓰ‐ꓢꓴ ꓗ. ꓠꓯ ꓢꓲ ꓗꓪ ꓛꓳ ꓢꓴ ꓥ ꓡꓳ꓿
ꓝꓮꓲ ꓪꓴ‐ꓢ ꓠꓬ ꓮ ꓫꓵꓽ ꓥ ꓟꓲ ꓒꓬꓱꓼ ꓡ ꓝꓲ ꓐ ꓡ ꓢꓴ ꓥ ꓡꓳ꓿ ꓟꓲ ꓠꓯ ꓡ ꓞꓳ ꓐꓴ ꓓꓵꓽ ꓙ ꓚꓱ, ꓗꓪ ꓒꓬꓱꓼ ꓡ ꓟꓽ ꓓ ꓟ ꓔꓯ ꓒꓬꓱꓼ ꓡ ꓝꓲ ꓐ ꓡ ꓢꓴ ꓥ ꓡꓳ꓿
ꓟ, ꓟ ꓟ‐ꓡꓲ ꓠꓬ ꓪꓴ‐ꓢ ꓡꓰ ꓝꓲ ꓩꓴ ꓡ ꓟ ꓟꓴ ꓗꓪ ꓝꓲ ꓓꓴ ꓐꓴ ꓡꓰ ꓐꓯ ꓖꓶ ꓡ ꓟ ꓐꓯ ꓘꓶꓽ ꓔꓯ ꓟꓽ ꓙ ꓝꓲ ꓟꓽ ꓢꓷ. ꓥ ꓟꓲ ꓬꓲ ꓠꓬ ꓪꓴ‐ꓢ ꓙꓵꓻ ꓟ ꓑꓶ. ꓓꓴ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓘꓳ, ꓣꓴ ꓟ ꓥ ꓡꓳ꓿ ꓖꓳ ꓟ ꓠꓬ ꓟ‐ꓡꓲ ꓙꓵꓻ ꓠꓲ, ꓮ ꓟꓬ, ꓛꓲ ꓙꓳ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓣꓳ ꓢꓯ. ꓔꓬ ꓟ ꓤꓶꓻ ꓠꓯ, ꓗꓪ ꓓꓵꓽ ꓙ ꓚꓱ, ꓗꓪ ꓐꓰ ꓓꓵꓽ ꓙ ꓟꓽ ꓓ ꓝꓮꓲ ꓫ. ꓓꓴ ꓟꓷ ꓓꓴ ꓮ ꓟꓬ, ꓛꓲ ꓙꓳ ꓡ ꓟ ꓙꓵ, ꓕꓯ ꓪꓴ‐ꓢ ꓠꓯ, ꓗꓪ ꓙ ꓣꓳ ꓟ ꓠꓲ, ꓗꓪ ꓐꓰ ꓙꓰ ꓢꓲ ꓠꓬꓲ ꓬꓲ ꓔꓯ ꓶꓻ ꓓꓰ ꓠ, ꓟ ꓣꓳ ꓚꓵˍ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓪꓴ‐ꓢ ꓠꓬ ꓬꓲ ꓔꓯ ꓙꓵꓻ ꓢꓴ ꓐꓴ ꓡꓰ ꓶꓼ ꓥꓳ ꓙꓱ ꓖꓶ ꓟ ꓥ ꓡꓳ꓿
ꓟ, ꓟ ꓟ‐ꓡꓲ ꓠꓬ ꓟꓴ ꓗꓪ ꓝꓲ ꓓꓴ ꓡꓰ ꓐꓯ ꓟ. ꓖꓶ ꓡ ꓟ ꓢꓲꓺ ꓒ ꓬꓰ‐ꓢꓴ ꓬꓲ ꓧꓪ ꓖꓳ ꓓꓱ ꓘꓴꓽ ꓗꓪ ꓤ ꓶꓼ ꓡ ꓟ ꓚꓱ, ꓔꓯ ꓢꓷ. ꓡꓰ ꓕꓯ ꓙꓳꓺ ꓗꓷ ꓥ ꓟꓲ ꓪꓴ‐ꓢ ꓔꓯ ꓙꓵꓻ ꓟ ꓙꓵꓻ ꓠꓲ, ꓗꓪ ꓐꓰ ꓘꓳ, ꓣꓴ ꓗꓷ ꓟ ꓥ ꓡꓳ꓿ ꓣꓳ ꓤꓶꓻ ꓠꓯ, ꓗꓪ ꓥ ꓟꓲ ꓠꓲ, ꓫ ꓟꓬ ꓫ. ꓓꓴ ꓫ. ꓓꓴ ꓟꓷ ꓓꓴ ꓮ ꓘꓶ. ꓛꓲ ꓔꓳ, ꓜꓳ ꓡ ꓟ ꓙꓵ, ꓔꓯ ꓢꓲꓺ ꓒ ꓬꓰ‐ꓢꓴ ꓔꓯ ꓔꓬ ꓔꓶ. ꓖꓶ ꓠ, ꓟ ꓬꓲ ꓔꓯ ꓘꓳ, ꓣꓴ ꓠ, ꓟ ꓣꓳ ꓚꓵˍ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓺ ꓒ ꓔꓯ ꓙꓵꓻ ꓓꓴ ꓬꓰ ꓡꓯ꓿ ꓪꓴ‐ꓢ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
