ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓧꓪ. ꓧꓪꓸꓼ꓾ ꓕꓲ ꓧꓪ, ꓙꓳˍ ꓠꓬ ꓢ‐ꓟ‐ꓡꓲ ꓤ ꓟꓶ ꓤ ꓕꓲ ꓣꓳ ꓟꓳꓼ ꓡꓳ ꓗꓪ ꓬꓲꓻ ꓙꓬ ꓘꓳꓼ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓙ ꓖꓴ ꓫꓱꓽ ꓪꓴꓽ ꓧꓶ ꓢꓲ ꓠꓬꓲ ꓬꓲꓻ ꓙꓬ ꓘꓶꓽ ꓗꓪ ꓕꓲ ꓑ, ꓤ ꓠꓽ ꓔꓬ ꓡꓳ꓿ ꓢ‐ꓟ‐ꓡꓲ ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓠꓬ ꓬꓲꓻ ꓙꓬ ꓘꓳꓼˍ ꓐꓰ ꓡˍ ꓕꓯ ꓢꓲ ꓒ ꓬꓰ‐ꓢꓴ ꓐꓰ ꓙꓵ ꓡꓯ ꓘꓳˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓐꓰ ꓢ‐ꓟ‐ꓡꓲ ꓡ ꓞꓳ ꓫ. ꓕꓱ ꓡꓯ ꓘꓳˍ ꓟ ꓚꓱ, ꓔꓯ (ꓬꓳ‐ꓦ꓿4ꓽ5‐42) ꓗꓪ ꓣꓳ ꓑ ꓙꓽˍ ꓡꓳ꓿ ꓕꓱ ꓟ ꓠꓬ (3) ꓠꓽ ꓕꓲ ꓠꓽ ꓜꓻ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿
ꓤ ꓟꓶ ꓤ ꓖꓳ ꓟ ꓠꓬ ꓟꓳꓼ ꓡꓳ ꓮ ꓘꓶ. ꓛ, ꓕꓲ ꓙꓵ, ꓗꓪ ˍ ꓡꓳ꓿ ꓖꓳ ꓡꓱ ꓢꓲ ꓢꓲ ꓒ ꓬꓰ‐ꓢꓴ ꓫ. ꓕꓱ ꓗꓷ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓚꓱ, ꓮ ꓙꓵꓽ ꓢꓷ. ꓔˍ ꓟ ꓡꓰ꓾ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓗꓪ ꓐꓰ ꓬꓲ ꓠꓬ ꓟꓬ ꓢꓶꓽ ꓒꓴ ꓙꓰ ꓟ ꓙꓵꓻ ꓠꓲ, ꓟꓶ ꓡꓰ ꓟ ꓑꓶ. ꓓꓴ ꓬꓲ ꓠꓬ ꓠꓲ, ꓟ ꓗ, ꓛꓲꓽ ꓛꓲꓽ ꓡꓰꓽ ꓬꓲꓼ ꓙꓰ ꓢꓲ ꓠꓬꓲ ꓬꓲ ꓛꓳꓽ ꓒꓯ, ꓛꓳꓽ ꓤ꓾ ꓝꓮꓲ. ꓝꓲ ꓢꓴ ꓮ ꓙꓵꓽ ꓔꓯ ꓘꓴ ꓔꓯ, ꓡ ꓟ ꓚꓱ, ꓔꓯ ꓣꓳ ꓑ ꓙꓽ ꓪˍ ꓡꓳ꓿
ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓠꓬ ꓝꓴꓲ. ꓙꓳ ꓢꓴ꓾ ꓥ ꓠꓬ ꓞꓳ ꓜꓴꓻ ꓐꓰ ꓟꓽ ꓔꓬ, ꓢꓴ ꓥ꓾ ꓐꓯˍ ꓟ ꓣꓳ ꓡꓳ. ꓢꓷ. ꓓˍ ꓡꓳ꓿ ꓮ ꓡꓲ ꓐꓰ ꓡꓳ. ꓢꓷ. ꓓˍ ꓡ ꓐꓰ ꓐꓯˍ ꓠꓬ꓾ ꓤ ꓟꓶ ꓤ ꓕꓱ ꓕꓲ ꓣꓳ ꓬꓲꓻ ꓙꓬ ꓘꓳꓼ ꓡˍ ꓟ ꓙꓵ, ꓠꓬ ꓟꓳꓼ ꓡꓳ ꓮ ꓘꓶ. ꓛˍ ꓟ ꓕꓲ ꓙꓵ, ꓥ ꓡꓳ ꓐꓰ ꓐꓳ ꓔ ꓡꓳ꓿ ꓖꓳ ꓟ ꓠꓬ ꓟ. ꓟꓲꓽ ꓐꓳ ꓒ ꓠꓬ ꓬꓲ. ꓬꓲ ꓢꓲ ꓟꓽ ꓙꓳ ꓙꓳ ꓐꓳ ꓔ ꓟ ꓟꓽ ꓥ꓿ ꓬꓲ. ꓬꓲ ꓢꓲ ꓙꓳ ꓙꓳ ꓡꓰꓽ ꓐꓳ ꓔ ꓡꓳ꓿ ꓮ ꓡꓲ ꓐꓳ ꓔ ꓡ꓿ ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓠꓬ ꓠꓱ. ꓐꓯ ꓛꓳꓽ ꓒꓯ, ꓛꓳꓽ ꓤ ꓐꓴ ꓐꓰ ꓕꓲ ꓪꓽ ꓡ ꓟꓽ ꓑꓶ. ꓟ ꓑꓶ. ꓓꓴ ꓬꓲꓻ ꓙꓬ ꓘꓴ ꓗꓪ ꓡꓽ ꓞꓳ ꓮ ꓟˍ ꓟꓲ ꓟꓽ ꓔꓬ ꓕꓯ ꓡˍ ꓡꓳ꓿
ꓟꓬꓽ ꓠꓬꓲ ꓬꓲꓻ ꓙꓬ ꓘꓳꓼˍ ꓟ ꓙꓵ, ꓠꓬ ꓠꓯꓼ ꓠꓯꓼ ꓙꓵ, ꓜꓻ ꓪꓳꓽ ꓒꓬꓽ ꓚꓬ. ꓝꓲ. ꓗꓪ ꓬꓲꓻ ꓙꓬ ꓘꓳꓼˍ ꓟ ꓟꓬꓽˍ ꓡꓳ꓿ ꓬꓲꓻ ꓪ ꓗꓴꓷꓼ ꓗꓪ ꓤ ꓟꓶ ꓤ ꓐꓴ ꓠꓬ ꓖꓳ ꓕꓲ ꓙꓵ, ꓗꓪ ꓜꓻ ꓪꓳꓽ ꓒꓬꓽ ꓚꓬ.ˍ ꓟ ꓑꓶ. ꓓꓴ ꓖꓳ ꓕꓲ ꓙꓵ, ꓗꓪ ꓬꓲꓻ ꓙꓬ ꓘꓳꓼˍ ꓡꓳ꓿ ꓝꓮꓲ ꓟꓶꓽ ꓘꓶꓽ ꓙꓵ, ꓗꓪ ꓬꓲꓻ ꓙꓬ ꓘꓳꓼˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓟ. ꓟꓲꓽ ꓘꓴꓽ ꓗꓪ ꓓꓵˍ ꓟ ꓢ‐ꓟ‐ꓡꓲ ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓝꓮꓲ. ꓝꓲ ꓢꓴ ꓔꓯ ꓡꓳ. ꓟꓽ ꓑꓶ.꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓬꓲ ꓠꓬ ꓝꓴꓲ. ꓙꓳ ꓢꓴ ꓥ ꓡꓳ꓿ ꓦꓲ ꓢꓲ ꓒ ꓥꓪꓽ ꓣꓳ ꓧꓪ ꓗꓳ. ꓡ ꓟ ꓡꓰꓽ ꓟꓽ ꓞꓲ ꓮ ꓟꓶ ꓬꓲ ꓐꓰ ꓔꓬ ꓟˍ ꓟꓲ ꓬꓲ ꓦꓲ ꓢꓲ ꓒ ꓟꓽ ꓥ꓾ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓖꓶ ꓗꓷ ꓢꓴ ꓕꓲ ꓣꓳ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓠꓬ ꓫ. ꓔꓳˍ ꓡꓳ꓿ ꓟꓳꓼ ꓡꓳ ꓮ ꓘꓶ. ꓛˍ ꓟ ꓕꓲ ꓙꓵ, ꓗꓪ ꓡˍ ꓟ ꓐꓰ ꓐꓯ ꓔ ꓟ ꓡꓰ ꓐꓰ ꓬꓲ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓫ. ꓔꓳˍ ꓟ꓾ ꓛˍ ꓟ ꓝꓴꓲ. ꓡꓰ ꓐꓲ ꓞ, ꓟ ꓡꓰꓽ ꓬꓲ ꓔꓳ, ꓜꓳꓽ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓛꓱꓽ ꓛꓱꓽ ꓷ, ꓷ, ꓐꓰ ꓞꓳ ꓤ ꓟꓽ ꓔꓬ ꓕꓯ ꓬꓲ. ꓬꓲꓻ ꓙꓬ ꓘꓳꓼ ꓡˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓖꓳ ꓗꓪ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ ꓢꓲ ꓒ ꓬꓰ‐ꓢꓴ ꓐꓯˍ ꓟ ꓠꓬ ꓙꓲꓻ ꓫꓬ ꓢꓴ ꓥ ꓡꓳ꓿ ꓒꓵꓽ ꓓꓰ ꓡꓰ ꓢꓴ ꓥ ꓡꓳ꓿ ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓥ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓔꓯ ꓟꓳꓻ ꓡꓰˍ ꓕꓯ ꓬꓲ ꓠꓲ, ꓟ ꓠꓯꓸꓼ ꓗꓪ ꓮ ꓫꓵꓽ ꓓꓯ, ꓡ ꓐꓯˍ ꓟ ꓮ ꓙꓵꓽ ꓢꓷ.ˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓡꓰ ꓤ ꓟꓶ ꓤ ꓔꓯ ꓬꓲꓻ ꓙꓬ ꓓꓰꓽ ꓓꓳˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓕꓲ ꓞꓲꓼ ꓬꓲꓻ ꓙꓬ ꓓꓳꓻ ꓓꓴ ꓥ ꓟ ꓬꓲ ꓐꓯ ꓟꓳ. ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓐꓯ ꓘꓶꓽ ꓕꓲ ꓘꓶꓽ ꓡꓰ ꓕꓲ ꓘꓶꓽ ꓤ ꓟꓶ ꓤ ꓔꓯ ꓬꓲ ꓫ. ꓕꓱ ꓖꓶˍ ꓡꓳ꓿
