ꓟꓲ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓟꓪꓴ. ꓠꓬꓲ ꓠꓻ ꓒꓬ ꓓꓴ ꓙꓳ ꓡ ꓟ ꓚꓱ, ꓮꓲꓣ (ꓑꓳꓡꓡꓴꓔꓲꓳꓠ )
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓟꓲꓽ ꓦꓲꓻ ꓔꓯ ꓟꓽ ꓫꓬꓽ ꓫꓬ ꓡꓰ ꓗꓷ ꓡꓰ ꓝꓲ ꓟ ꓪꓴ. ꓠꓬꓲ ꓠꓻ ꓒꓬꓻ ꓓꓴ ꓙꓳ ꓡꓰ ꓟ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯꓼ ꓦꓻ ꓔꓬ ꓟ ꓟꓲ ꓦꓲꓻ ꓠꓬ ꓢꓯꓼ ꓫꓵꓼ ꓮ ꓙꓵꓽ ꓐꓰ ꓶ ꓮ ꓘꓶ. ꓣꓳ ꓚꓵˍ ꓟ ꓥ ꓡꓳ꓿
ꓟꓲꓽ ꓦꓲꓻ ꓔꓯ ꓡ ꓞꓳ ꓟꓬ ꓢꓶꓽ ꓡꓰ ꓡꓳ. ꓟꓳ ꓟꓽ ꓓꓽ ꓥ ꓟꓲ ꓟꓲꓽ ꓦꓲꓻ ꓠꓬ ꓚꓵˍ ꓚꓵˍ ꓙꓳ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓢꓯꓼ ꓦꓻ ꓠ, ꓟ ꓐꓱ ꓶ ꓟꓲ ꓦꓲꓻ ꓔꓯ ꓕꓲ ꓑ ꓤ ꓟꓽ ꓙꓳ ꓟꓽ ꓓꓽ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓠꓬꓲ. ꓠꓬꓲ ꓢꓯꓼ ꓦꓻ ꓔꓬ ꓟ ꓟꓲꓽ ꓦꓲꓻ ꓠꓬ ꓢꓲꓽ ꓫꓬ ꓟ ꓟꓲꓽ ꓦꓲꓻ ꓥ ꓡ?
ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲˍ ꓟ ꓠꓬ ꓮ ꓫꓵꓽ ꓑꓶ. ꓓꓴ ꓥ ꓡ? ꓟꓲꓽ ꓦꓲꓻ ꓘꓴꓽ ꓗꓪ ꓟꓽ ꓢꓲꓽ ꓫꓬ ꓟ ꓡ ꓞꓳ ꓟꓲꓽ ꓢꓶ ꓗꓪ ꓐꓰ ꓡꓳ. ꓟꓳ ꓟꓽ ꓓꓽ ꓟ ꓬꓲ ꓧꓶꓽ ꓤ ꓤ ꓮ ꓟꓬ, ꓐ ꓟ ꓑꓶ. ꓓꓴ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲ ꓟ ꓥ ꓡꓳ꓿ ꓟꓬ‐ꓟ ꓗꓴꓷꓼ ꓗꓪ ꓠꓬ ꓡꓳ ꓒꓱ ꓓꓽ ꓥ ꓟ ꓬ‐ꓖꓳꓥ꓾ ꓟ‐ꓓꓯ‐ꓡꓯ꓾ ꓡꓳ ꓒꓱ ꓓꓽ ꓮ ꓟꓬ, ꓗꓪ ꓟꓲꓽ ꓦꓲꓻ ꓟꓽ ꓢꓲꓽ ꓫꓬ ꓡꓰ ꓟ ꓔꓯ ꓡꓳ ꓒꓱ ꓓꓽ ꓮ ꓟꓬ, ꓗꓪ ꓡꓳ. ꓟꓳ ꓓꓽ ꓥ ꓡꓳ꓿
ꓮ ꓫꓵꓽ ꓠꓬ ꓟꓲꓽ ꓦꓲꓻ ꓟꓽ ꓫꓬ, ꓡꓰ ꓝꓲˍ ꓡ?
ꓓꓽ ꓪꓴ. ꓕꓲ ꓫꓵꓽ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲ ꓟ ꓠꓬ ꓟꓳ‐ꓓꓳ꓾ ꓟꓳ‐ꓓꓳ‐ꓒ ꓔꓳ‐ꓡ‐ꓛꓲ꓾ ꓗꓪ ꓐꓰ ꓓꓳ ꓟꓴ ꓘꓴꓽ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓟ ꓥ ꓡꓳ꓿
ꓠꓬꓲꓽ ꓫꓵꓽ ꓠꓬ ꓙꓼ ꓦꓲꓻ ꓓꓽ ꓗꓪ ꓐꓰ ꓓꓳ ꓟ ꓟꓴ ꓘꓴꓽ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓗꓷ ꓡꓰ ꓟ ꓥ ꓡꓳ꓿ ꓢꓽ ꓫꓵꓽ ꓠꓬ ꓓꓰ‐ꓟꓲ ꓦꓻ ꓟꓲ ꓗꓪ ꓐꓰ ꓮ‐ꓔꓳ ꓛꓴꓽ ꓟ ꓗꓪ ꓐꓰ ꓓꓳ ꓡ ꓟ ꓟꓴ ꓘꓴꓽ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓗꓷ ꓡꓰ ꓝꓲ ꓟ ꓥ ꓡꓳ꓿
ꓡꓲ ꓫꓵꓽ ꓠꓬ ꓦꓲꓻ ꓓꓽ ꓫꓬ, ꓟ ꓗꓪ ꓐꓰ ꓓꓳ ꓡ ꓟ ꓟꓽ ꓫꓬ, ꓟ ꓟꓴ ꓘꓴꓽ ꓝꓮꓲ ꓬꓲ ꓧꓶꓽ ꓮ ꓟꓬ, ꓗꓪ ꓐꓰ ꓟꓲꓽ ꓦꓲꓻ ꓔꓯ ꓟꓽ ꓫꓬ, ꓡꓰ ꓗꓷ ꓡꓰ ꓟ ꓥ ꓡꓳ꓿ ꓬꓲ ꓟꓶ ꓗꓪ ꓠꓬ ꓣꓳ ꓦꓲꓻ ꓗꓪ ꓜ ꓚ. ꓔꓯ ꓣꓱ ꓟ ꓢꓲ, ꓚꓴ. ꓗꓪ ꓐꓰ ꓓꓳ ꓡ ꓟ ꓟꓴ ꓘꓴꓽ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓗꓷ ꓡꓰ ꓝꓲ ꓟ ꓥ ꓡꓳ꓿
ꓟꓲꓽ ꓦꓲꓻ ꓔꓯ ꓟꓽ ꓫꓬ ꓗꓷ ꓡꓰ ꓠꓬ ꓮ ꓫꓵꓽ ꓒꓬꓱꓼ ꓡ ?
ꓟꓲꓽ ꓦꓲꓻ ꓔꓯ ꓟꓽ ꓫꓬ ꓗꓷ ꓡꓰ ꓠꓬ ꓮ ꓘꓶ. ꓛꓲ ꓟꓽ ꓙꓲ ꓟ ꓒꓬꓱꓼ ꓡ ꓟ ꓠꓬ ꓡ ꓞꓳ ꓧꓪꓽ ꓖꓳ ꓓꓱꓽ ꓔꓬ ꓟꓽ ꓢꓽ ꓗꓷ ꓡꓰ ꓟ꓾ ꓠꓻ ꓓꓴ ꓒꓬꓱꓼ ꓡ ꓟ ꓥ ꓡꓳ꓿ ꓟꓲꓽ ꓦꓲꓻ ꓟꓽ ꓢꓲꓽ ꓫꓬ ꓟ ꓔꓶ. ꓟꓵꓽ ꓗꓪ ꓔꓬ ꓢꓴ ꓐꓴ ꓠꓬ ꓢꓯꓼ ꓦꓻ ꓙꓴꓽ ꓗꓪ ꓠꓻ ꓓꓴ ꓠꓻ ꓫꓵꓽ ꓒꓬꓱꓼ ꓡ ꓟ ꓥ ꓡ ꓳ꓿ ꓢꓯꓼ ꓦꓻ ꓟꓽ ꓓ ꓟ ꓠꓻ ꓫꓵꓽ ꓒꓬꓱꓼ ꓡ ꓟ ꓥ ꓡꓳ꓿ ꓝꓮꓲ ꓬꓲ ꓙꓵ, ꓫꓵˍ ꓫꓵˍ ꓛꓶꓽ ꓥꓰ ꓞꓲꓽ ꓟ꓾ ꓠꓲ, ꓟ ꓘꓴꓽ ꓗꓪ ꓠꓻ ꓫꓵꓽ ꓒꓬꓱꓼ ꓡ ꓟ꓾ ꓚꓮꓠꓚꓰꓣ ꓠꓻ ꓫꓵꓽ ꓒꓬꓱꓼ ꓡ ꓟ ꓮ ꓟꓬ, ꓫꓵꓽ ꓠꓽ ꓫꓵꓽ ꓙꓳ ꓡ ꓟ ꓥ ꓡꓳ꓿
- ꓖꓳ ꓟ ꓡꓰ ꓟꓽ ꓞꓲ ꓟꓲꓽ ꓦꓲꓻ ꓔꓯ ꓟꓽ ꓫꓬ, ꓗꓷ ꓡꓰ ꓠꓬ ꓟꓵꓽ ꓘꓳꓼ ꓒꓳ, ꓡ ꓢꓲ ꓠꓬꓲ ꓑ ꓫꓬ ꓐꓴ ꓔꓶ. ꓔ ꓟ ꓜ ꓪꓳ ꓡꓳ ꓪꓳꓽ ꓮ ꓘꓶ. ꓟꓽ ꓪ ꓗꓷ ꓡꓰ ꓟ ꓥ ꓡꓳ꓿
- ꓖꓳ ꓡꓱ ꓠꓬ ꓣꓳ ꓠꓬꓲ.ꓠꓬꓲ ꓮ ꓫꓵꓽ ꓬꓰ ꓠꓯ, ꓡ?
ꓕꓱ ꓟꓬ ꓛꓲ ꓪꓴꓽ ꓟ ꓫꓵꓽ ꓪꓴꓽ ꓔꓯ ꓣꓳ ꓬꓰ ꓟ ꓒ ꓡ ꓐꓰ ꓓꓽ ꓓꓵꓽ ꓙ꓿ ꓣꓳ ꓮ ꓙꓵꓽ ꓢꓴ ꓕꓲ ꓠꓲ, ꓕꓲ ꓪ ꓬꓰ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓝꓲ ꓟ ꓫꓵꓽ ꓪꓴꓽ ꓔꓯ ꓣꓳ ꓗꓽ ꓕꓽ ꓐ ꓡ ꓟ ꓥ ꓡꓳ꓿
ꓓꓽ ꓪꓴ. ꓕꓲ ꓫꓵꓽ ꓠꓬ ꓠꓬꓲ.ꓠꓬꓲ ꓗꓪ ꓐꓰ ꓣꓳ ꓦꓲꓻ ꓒ ꓕꓲ ꓗꓪ ꓢ‐ꓗꓮꓲ ꓟꓽ ꓣꓱ ꓙ ꓖꓴ ꓫꓱ,꓾ ꓧꓳ‐ꓛꓯ‐ꓡꓯ ꓣꓱ ꓡꓯ꓾ ꓐꓲꓚꓬꓡꓰ ꓣꓱ ꓡꓯ꓾ ꓝꓮꓲ ꓟꓳ‐ꓓꓳ ꓣꓱ ꓟ ꓔꓯ ꓮ ꓘꓶ. ꓟꓽ ꓣꓱ ꓤ ꓟꓳ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓟ ꓔꓯ ꓣꓳꓺ ꓡꓰ ꓝꓲˍ ꓥꓳ꓿
ꓠꓬꓲ. ꓫꓵꓽ ꓠꓬ ꓣꓳ ꓦꓲꓻ ꓒ ꓕꓲ ꓗꓪ ꓢꓲ, ꓜꓲ ꓔꓶ. ꓓꓴ ꓬꓰ ꓡꓯ꓿ ꓢꓲ, ꓜꓲ ꓠꓬ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲ ꓔꓯ ꓣꓴ ꓔꓯ ꓙꓰ ꓢꓲ ꓠꓬꓲ ꓮ ꓘꓶ. ꓙꓲ ꓟ ꓟꓲꓽ ꓦꓲꓻ ꓔꓯ ꓖꓶ ꓟ ꓥ ꓡꓳ꓿
ꓢꓽ ꓫꓵꓽ ꓠꓬ ꓣꓳ ꓦꓲꓻ ꓒ ꓕꓲ ꓗꓪ ꓮꓽ ꓔꓳ ꓚꓴ. ꓟ ꓔꓯ ꓤ ꓟꓳ ꓡꓯ꓿ ꓑꓡꓮꓢꓔꓲꓚ ꓐꓰ ꓣꓱ ꓐꓯꓼ ꓣꓱ ꓫꓵꓽ ꓣꓱ ꓙꓲ ꓟ ꓔꓯ ꓮ. ꓔꓳ ꓚꓴ. ꓟ ꓔꓯ ꓤ ꓟꓳ ꓡꓯ꓿
ꓡꓲ. ꓫꓵꓽ ꓠꓬꓲ ꓣꓳ ꓔꓬ ꓟ ꓞꓳ ꓘ, ꓡꓳ ꓒꓱ ꓗꓪ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲ ꓟ ꓔꓯ ꓗꓽ ꓕꓽ ꓠ, ꓟ ꓢꓷ. ꓠꓲ, ꓚꓳ ꓬꓲ, ꓟ. ꓖꓶ ꓠ, ꓟ ꓢꓯꓼ ꓕꓵꓼ ꓡꓯ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲꓽ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲ ꓟ ꓠꓬ ꓣꓳ ꓮ ꓙꓵꓽ ꓪꓴ ꓢꓴ ꓐꓱ ꓶ ꓫꓵꓽ ꓪꓴꓽ ꓓꓽ ꓟ ꓥ ꓡꓳ꓿ ꓞꓳ ꓡꓱ ꓡꓱ ꓞꓳ ꓡꓯ ꓐꓴ ꓠꓬ ꓟꓲꓽ ꓕꓯ ꓦꓬꓼ ꓠꓬꓲ ꓗꓪ ꓞꓳ ꓪꓴꓽ ꓞꓳ ꓟ ꓥ ꓟ ꓪꓴ. ꓠꓬꓲ ꓟꓲꓽ ꓦꓲꓻ ꓟꓽ ꓢꓲꓽ ꓫꓵꓽ ꓡꓰ ꓟ ꓝꓲˍ ꓟ ꓫꓵꓽ ꓪꓴꓽ ꓔꓯ ꓮ ꓡꓰ ꓐꓰ ꓗꓽ ꓕꓽ ꓠ, ꓟ ꓢꓯꓼ ꓕꓵꓼ ꓠ, ꓟ ꓔ ꓡꓳ꓿
ꓢꓲꓽ ꓫꓬ ꓟ ꓟꓲꓽ ꓦꓲꓻ ꓔꓯ ꓢꓯꓼ ꓦꓻ ꓪ ꓠ, ꓟ ꓐꓱ ꓶ ꓠꓬ ꓟꓲ ꓠꓯ ꓡ ꓞꓳ ꓕꓲ ꓣꓳ ꓪꓽ ꓙꓵꓽ ꓪ ꓥ ꓡꓳ꓿ ꓕꓱ ꓡꓰ ꓐꓰ ꓢꓲꓽ ꓫꓬ ꓟ ꓟꓲꓽ ꓦꓲꓻ ꓔꓯ ꓘꓳ, ꓣꓴ ꓟꓶ ꓠ, ꓟ ꓢꓯꓼ ꓕꓵꓼ ꓙꓰ ꓡꓯ꓿ ꓮ ꓙꓵꓽ ꓢꓴ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓔꓯ ꓗꓽ ꓕꓽ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
