ꓟꓲ-ꓚꓲ-ꓠ ꓢ-ꓢꓲ-ꓠ ꓢꓔꓸꓟꓲꓚꓧꓮꓰꓡ ꓔꓲꓺ ꓒ ꓙꓵꓽ ꓔꓶꓸ ꓠꓮꓪꓠꓖ-ꓑꓴꓠꓖ ꓞꓳ ꓘꓹ ꓗꓪ ꓢꓲꓽ ꓫꓬ ꓢꓴ ꓙꓳꓧꓠ ꓐꓳꓢꓚꓳ ꓑꓮꓲꓽ ꓬꓰ ꓗꓷ ꓟ ꓓꓳꓽ
ꓠꓬꓲꓸ ꓠꓬꓲ 1 ꓦ ꓟ 31 ꓠꓬꓲ 2026 ꓘꓳꓼ ꓠꓽ ꓛꓳꓼ ꓠꓬꓲ ꓕꓯ ꓟꓲ-ꓚꓲ-ꓠ ꓢ-ꓢꓲ-ꓠ ꓢꓔꓸꓟꓲꓚꓧꓮꓰꓡ ꓔꓲꓺ ꓒ ꓙꓵꓽ ꓔꓶꓸ ꓠꓮꓪꓠꓖ-ꓑꓴꓠꓖ ꓞꓳ ꓘꓹ ꓗꓪ ꓢꓲꓽ ꓫꓬ ꓢꓴ ꓙꓳꓧꓠ-ꓐꓳꓢꓚꓳ ꓑꓮꓲꓽ ꓔꓯ ꓟꓲ-ꓚꓲ-ꓠ ꓔꓲꓺ ꓒ ꓓꓽ ꓙꓳꓧꓠ ꓡꓮ-ꓢꓮꓟ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓑꓮꓲꓽ ꓔꓯ ꓠꓯꓼ 9 ꓙꓵꓹ ꓕꓯ ꓬꓰ ꓗꓷ ꓟ ꓥ ꓡꓳ=
ꓢꓲ-ꓫꓬ-ꓢꓴ ꓙꓳꓧꓠ-ꓐꓳꓢꓚꓳ ꓑꓮꓲꓽ ꓗꓪ ꓟꓲ-ꓚꓲ-ꓠ ꓔꓲꓺ ꓒ ꓓꓽ ꓡꓰ ꓟꓲ-ꓢ ꓔꓲ ꓟ ꓙꓵꓹ ꓗꓪ ꓟꓸ ꓟꓲꓽ ꓚꓺ ꓗꓷ ꓟ ꓙꓵꓹ ꓕꓯ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓬꓰ ꓛꓬꓻ ꓡꓰ ꓟ ꓥꓳꓽ ꓡꓰ ꓟ ꓝꓴꓲ ꓔꓯ ꓖꓼ ꓖꓶ ꓡꓯꓽ ꓘꓳˍ ꓠꓹ ꓟ ꓣꓳ ꓚꓵˍ ꓟ ꓥ ꓡꓳ= ꓝꓮꓲ ꓞꓲꓼ ꓣꓳ ꓟ ꓤ ꓠꓱ ꓤ ꓐꓴ ꓔꓯ ꓔꓱ ꓚꓵˍ ꓟ ꓫꓸ ꓕꓱ ꓘꓶꓽ ꓔꓯ ꓫꓸ ꓕꓱ ꓗꓴꓸ ꓠꓹ ꓟ ꓐꓹ ꓐ ꓟꓹ ꓟ ꓐꓴ ꓡꓰ ꓟꓸ ꓖꓶ ꓠꓹ ꓟ ꓣꓳ ꓚꓵˍ ꓟ ꓚꓱꓹ ꓔꓯ ꓥ ꓟꓲ ꓟꓸ ꓟꓲꓽ ꓚꓺ ꓗꓷ ꓟ ꓥ ꓡꓳ=
ꓮ ꓟꓶ ꓟ ꓙꓵꓹ ꓕꓯ ꓣꓳ ꓒꓻ ꓕꓲ ꓗꓪ ꓕꓲ ꓣꓳ ꓛꓳꓽ ꓕꓲ ꓣꓳ ꓟꓽ ꓔꓱ ꓟꓽ ꓜꓳꓽ ꓟ ꓟꓲ ꓠꓯ ꓕꓲ ꓒꓳꓹ ꓗꓪ ꓔꓯꓺ ꓡꓯꓽ ꓘꓳꓹ ꓓꓴ ꓔꓯ ꓣꓳ ꓮ ꓘꓶꓸ ꓛꓲ ꓡꓳꓸ ꓟꓳ ꓪ ꓟ ꓦꓬꓼ ꓠꓬꓲ ꓟꓲ ꓥ ꓡꓳ= ꓪꓴ-ꓢ ꓣꓱ ꓛꓰ ꓟꓽ ꓐ ꓟ꓾ ꓠꓵꓻ ꓠꓲꓹ ꓟꓽ ꓐ ꓟ꓾ ꓔꓯꓺ ꓡꓯꓽ ꓘꓳꓹ ꓟ ꓠꓬ ꓮ ꓘꓶꓸ ꓛꓲ ꓙꓳꓺ ꓓꓴ ꓓꓽ ꓟ ꓥ ꓡꓳ ꓐꓰ ꓔꓲꓺ ꓒ ꓓꓽ ꓡꓰ ꓐꓯ ꓗꓷ ꓟ ꓥ ꓡꓳ=
ꓪꓴ-ꓢ ꓠꓬ ꓣꓳ ꓮ ꓙꓵꓽ ꓔꓯ ꓟꓽ ꓫꓱꓹ ꓡꓯꓽ ꓘꓳꓹ ꓟ ꓡꓯꓽ ꓫꓴ ꓔꓯ ꓣꓳ ꓮ ꓙꓵꓽ ꓔꓯ ꓖꓶ ꓔ ꓟ ꓥ ꓡꓳ= ꓖꓳ ꓟ ꓔꓯ ꓣꓳ ꓢꓲ ꓠꓬꓲ ꓙꓲˍ ꓟ ꓟꓬꓱꓽ ꓗꓪ ꓢꓯꓼ ꓕꓵꓼ ꓠꓹ ꓟ ꓮ ꓘꓶꓸ ꓛꓲ ꓣꓳ ꓚꓵˍ ꓟ ꓚꓱꓹ ꓔꓯ ꓔꓲꓺ ꓒ ꓓꓽ ꓡꓰ ꓟꓸ ꓟꓲꓽ ꓚꓺ ꓗꓷꓳ=
ꓝꓮꓲ ꓟꓲ-ꓢ ꓔꓲ ꓙꓵꓹ ꓗꓪ (Confirmation Sacrament) ꓦꓻ ꓢꓯꓼ ꓪ ꓡꓵꓽ ꓖꓶ ꓟ ꓢ-ꓗ-ꓟꓲ-ꓔꓴ ꓔꓯ ꓥ ꓟꓲ ꓔꓲꓺ ꓒ ꓓꓽ ꓙꓳꓧꓠ-ꓡꓮ-ꓢꓮꓟ ꓡꓰ ꓖꓶ ꓗꓷ ꓟ ꓥ ꓡꓳ= ꓦꓻ ꓢꓯꓼ ꓪ ꓡꓵꓽ ꓖꓶ ꓟ ꓢ-ꓗ-ꓟꓲ-ꓔꓴ ꓔꓯ ꓘꓳꓹ ꓣꓴ ꓪ ꓡꓰ ꓢꓴ ꓮ ꓙꓵꓽ ꓠꓬ (163) ꓣꓳ ꓔꓬ ꓡꓳ ꓐꓰ ꓢꓷꓸ ꓪ ꓡꓳ=
