ꓢꓲ ꓒꓽ ꓬꓰ‐ꓢꓴ꓾ ꓢꓯ. ꓔꓬ ꓟ ꓪꓴ‐ꓢ ꓐꓯ ꓘꓶꓽ꓾ ꓢꓲ ꓒꓽ ꓠꓯꓼ ꓗꓪ ꓐꓰ ꓥꓪ ꓠꓴ ꓛꓳ ꓫꓱꓽ ꓠ, ꓟ ꓔꓯ ꓧꓳꓽ ꓟꓳ. ꓖꓶ_ ꓟ ꓠꓬꓲ ꓟꓳ ꓓꓴ ꓔꓯ ꓥꓪ ꓠꓴ ꓟꓳ ꓡꓰ ꓟ ꓥꓳ꓿ ꓞꓳ ꓤ ꓤꓶꓻ ꓠꓬ ꓢꓲ ꓡꓲ, ꓐꓰ ꓟꓽ ꓔꓬ ꓟ ꓡꓰ ꓐꓰ ꓕꓱ ꓟ ꓔꓯ ꓢꓲ ꓡꓲ, ꓟ ꓐꓰ ꓐꓲ ꓜꓲꓼ ꓟ ꓔꓯ ꓖꓶ ꓐ ꓡꓰ ꓟ ꓠꓬ ꓢꓲ ꓒꓽ ꓠꓴ ꓐꓯ ꓘꓶꓽ ꓗꓪ ꓐꓰ ꓡꓰ ꓥ ꓡꓳ꓿ ꓢꓲ ꓫꓬ ꓕꓳ ꓶ ꓗꓪ ꓐꓰ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓲ ꓒꓽ ꓠꓴ ꓢꓯꓼ ꓔꓯ ꓠ ꓠ, ꓗꓴ. ꓠ, ꓟ ꓙ ꓖꓴ ꓟꓳ. ꓖꓶ ꓡꓯ꓾ ꓢꓲ ꓒꓽ ꓠꓴ ꓢꓯꓼ ꓑꓶ ꓓꓴ ꓥꓪ ꓠꓴ ꓠꓲ, ꓟ ꓔꓯ ꓡꓵ, ꓔꓴ ꓢꓯꓼ ꓪ ꓔꓯ ꓔꓳ, ꓐ ꓡ ꓠ, ꓟ꓾ ꓠꓴ ꓠꓲ, ꓟ ꓐꓰ ꓠꓶꓽ ꓞ, ꓟ ꓗꓪ ꓐꓰ ꓥꓪ ꓠꓴ ꓓꓵꓽ ꓙ ꓞꓷ, ꓟ ꓔꓯ ꓢꓷ. ꓗꓴ. ꓐ ꓡ ꓠ, ꓟ ꓧꓳꓽ ꓟꓳ. ꓖꓶ ꓡꓯ꓿ꓢꓲ ꓒꓽ ꓠꓴ ꓐꓯ ꓘꓶꓽ ꓠꓬ ꓢꓯꓼ ꓐ ꓕꓯ ꓢꓯꓼ ꓪ ꓗꓷ ꓡꓰ ꓝꓲ꓾ ꓠꓯ ꓞꓲ, ꓕꓯ ꓠꓬꓲ ꓟꓳ ꓓꓴ ꓗꓷ ꓡꓰ ꓝꓲ꓾ ꓥꓪ ꓠꓴ ꓠꓶꓽ ꓛꓳ ꓕꓲ ꓛꓳ ꓐꓱ ꓶ ꓢꓯꓼ ꓪ ꓗꓷ ꓡꓰ ꓝꓲ ꓡꓯ꓾ ꓳ ꓢꓲ ꓒꓽꓳ꓾ ꓢꓲ ꓒꓽ ꓠꓴ ꓐꓯ ꓘꓶꓽ ꓠꓬ ꓥꓪ ꓠꓴ ꓟꓶꓽ ꓠꓷ, ꓗꓪ ꓐꓰ ꓠꓲ, ꓟ ꓗꓪ ꓐꓰ ꓥ ꓟꓲ ꓮ ꓕꓯ ꓟꓲ ꓕꓽ ꓟꓶꓽ ꓡꓰ ꓾ ꓥꓪ ꓠꓴ ꓤ ꓠꓱ ꓤ꓾ ꓬꓲꓼ ꓠꓬꓲ ꓤ ꓐꓴ꓾ ꓢ‐ꓢꓲ‐ꓠ ꓟꓬꓱꓽ ꓬꓰ ꓝꓲ_ ꓟ ꓠꓴ ꓐꓯ ꓘꓶꓽ ꓶꓼ ꓓꓳꓽ ꓫꓱ, ꓓꓳꓽ ꓠꓬ ꓮ ꓕꓯ ꓟꓲ ꓕꓽ ꓟꓶꓽ ꓡꓰ ꓝꓲ꓾ ꓘꓴ ꓜꓲꓼ ꓞꓳ ꓠꓬ ꓪꓴ‐ꓢ ꓠꓴ ꓐꓯ ꓘꓶꓽ ꓗꓪ ꓐꓰ ꓪꓽ ꓘꓴ ꓠ, ꓟ꓾ ꓫꓬ, ꓔꓶꓻ ꓙꓻ ꓫꓱꓽ ꓠ, ꓟ꓾ ꓗ, ꓛꓲ ꓟ ꓔꓯ ꓕꓲ ꓪ ꓙꓻ ꓡꓯ ꓘꓳ_ ꓟ ꓗꓷ ꓡꓰ ꓝꓲ꓾ ꓖꓳ ꓟ ꓡꓰ ꓐꓰ ꓡ ꓞꓳ ꓮ ꓙꓵ ꓠꓬ ꓟꓲ ꓠꓯ ꓤꓶꓻ ꓫꓵꓼ ꓕꓲꓽ ꓟ ꓠꓯꓼ ꓗꓪ ꓥꓳ ꓡꓳ. ꓓꓴ ꓔꓯ ꓝꓮꓲ ꓦꓵꓻ ꓓꓳꓺ ꓡꓰ ꓝꓲ ꓡꓯ꓿ ꓢꓲ ꓒꓽ ꓠꓴ ꓐꓯ ꓘꓶꓽ ꓗꓪ ꓐꓰ ꓠꓴ ꓐꓰ ꓜꓲ ꓡꓯ ꓘꓳ_ ꓟ ꓠꓯꓼ ꓗꓪ ꓥꓪ ꓠꓴ ꓙꓵꓻ ꓠꓲ, ꓟꓬ ꓡ ꓝꓲ ꓡꓯ꓾ ꓕꓱ ꓙꓵꓻ ꓠꓲ, ꓗꓪ ꓐꓰ ꓥꓪ ꓠꓴ ꓠꓲ, ꓟ ꓗꓪ ꓐꓰ ꓠꓱ. ꓐꓯꓼ ꓢꓴ ꓔꓯ ꓡꓵ, ꓔꓴ ꓢꓴ ꓒꓬꓱꓼ ꓡꓰ ꓝꓲ ꓡꓯ꓾ ꓢꓯꓼ ꓐ ꓢꓴ ꓔꓯ ꓬꓰ ꓙ ꓠ, ꓟ꓾ ꓓꓽ ꓖꓴ ꓔꓯ ꓫꓬ, ꓔꓶꓻ ꓐ ꓡ ꓠ, ꓟ꓾ ꓖꓽ ꓖꓶ ꓐ ꓡ ꓠ, ꓟ꓾ ꓤꓶꓻ ꓢꓯꓼ ꓟꓬ ꓔꓯ ꓢꓷꓸ ꓙ ꓟꓳ ꓙ ꓐ ꓡ ꓠ, ꓟ ꓙ ꓖꓴ ꓟꓳ. ꓖꓶ ꓡꓯ꓿
