ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓧꓪ. ꓧꓪꓸꓼ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓷ. ꓠꓲ, ꓙꓳ ꓒ ꓢꓽ ꓣꓳ ꓡꓰ ꓢꓲ ꓒ ꓬꓰ‐ꓢꓴ ꓔꓯ ꓡ ꓢꓲ ꓪꓴ. ꓓꓵ ꓕꓱꓽˍ ꓟ ꓔꓯ (ꓟ‐ꓕꓲ 2ꓽ1‐12) ꓗꓪ ꓣꓳ ꓡꓳ. ꓟꓳˍ ꓡꓳ꓿ ꓬꓲ ꓪ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓟꓽ ꓥ꓿ ꓬꓲ ꓪ ꓠꓬ ꓐꓶꓽ ꓞꓳ ꓐꓴ ꓥ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓡ ꓢꓲ ꓠꓬꓲ ꓬꓲ ꓪ ꓪꓴ. ꓓꓵ ꓕꓱꓽ ꓡˍ ꓡꓳ꓿ ꓬꓲ ꓪ ꓔꓯ ꓙꓳˍ ꓟ ꓖꓴꓽ ꓙꓴꓽ꓾ ꓒꓴ ꓫꓵ ꓔꓯ, ꓖꓶ ꓡˍ ꓡꓳ꓿ ꓑꓮꓲꓽ ꓕꓱ ꓟ ꓔꓯ ꓠꓬ ꓢ. ꓠꓯ ꓣꓳ ꓬꓰ ꓓꓴ ꓥꓳ꓿ Epiphany ꓐꓰ ꓐꓯˍ ꓟ ꓪꓴ‐ꓢ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓐꓴˍ ꓡꓰꓽ ꓟꓽ ꓞꓲ ꓐꓶꓽ ꓞꓳ ꓐꓴ ꓔꓯ ꓥˍ ꓟꓲ ꓬꓲ ꓚꓱ, ꓟꓳ. ꓖꓶ ꓗꓷꓳ꓿ Manifestation ꓐꓰ ꓐꓯˍ ꓟ ꓪꓴ‐ꓢ ꓠꓬ ꓟꓲ ꓠꓯ ꓞꓳ ꓤ ꓮ ꓙꓵꓽ ꓐꓱ ꓶ ꓒꓬꓱꓽ ꓟꓳꓻ ꓡꓺꓳ꓾ ꓐꓰ ꓐꓯˍ ꓟ ꓬꓲ ꓢꓷ. ꓡꓰ ꓓꓴ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓮ. ꓠꓬꓲꓽ ꓡꓳ ꓕꓴ ꓗꓪ ꓒꓬꓱꓽ ꓟꓳ ꓡˍ ꓕꓯ ꓓꓵꓽ ꓙꓽ ꓟꓶ ꓓꓴ ꓮ ꓟꓬ, ꓓꓳ ꓡˍ ꓡꓳ꓿ ꓮ ꓣꓳ ꓡꓳ. ꓢꓴ ꓥˍ ꓟꓲ ꓡ ꓢꓲ ꓠꓬꓲ ꓪꓴ. ꓓꓵ ꓕꓱꓽ ꓡˍ ꓡꓳ꓿ ꓢꓷ. ꓠꓲ, ꓙꓳ ꓢꓴ ꓐꓴ ꓥˍ ꓟꓲ ꓡ ꓢꓲ ꓠꓬꓲ ꓕꓱ ꓡꓱ ꓐꓰ ꓪꓴ. ꓓꓵ ꓕꓱꓽ ꓡˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓮ ꓣꓳ ꓡꓳ. ꓢꓴ ꓔꓯ ꓠꓬ ꓟꓴ ꓗꓪ ꓝꓲ ꓓꓴ ꓡ ꓢꓲ ꓠꓬꓲ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓐꓰ ꓐꓯ ꓟꓳ. ꓖꓶ ꓢꓲ ꓛꓲ ꓡˍ ꓥ ꓟꓲ꓾ ꓟ. ꓟꓲꓽ ꓑꓷꓠꓽ ꓗꓪ ꓣꓳ ꓑ ꓙꓽˍ ꓟ ꓢꓷ. ꓠꓲ, ꓙꓳ ꓒꓽ ꓐꓴ ꓠꓬ ꓟꓴ ꓗꓪ ꓗꓴ ꓤ ꓔꓯ ꓡꓳ. ꓢꓲ ꓠꓬꓲ ꓪꓴ‐ꓢ ꓔꓯ ꓧꓪ ꓡˍ ꓟ ꓚꓱ, ꓔꓯ ꓣꓳ ꓡꓳ. ꓟꓳˍ ꓡꓳ꓿
ꓖꓳ ꓡꓱ ꓠꓬꓲ (ꓟ‐ꓕꓲ 2ꓽ1‐12) ꓗꓪ ꓵ ꓠꓬꓲˍ ꓕꓯ ꓬꓳ‐ꓔ ꓪ ꓔꓲ. ꓒꓬꓱꓽ ꓟꓳ ꓡˍ ꓟ ꓠꓬ ꓮ ꓡꓲ ꓥ ꓡ ꓐꓰ ꓐꓯ ꓢꓲ ꓠꓬꓲ ꓢꓷ. ꓠꓲ, ꓙꓳ ꓒ ꓐꓴ ꓠꓬ ꓩꓴ‐ꓡꓲ ꓪ ꓔꓲ. ꓔꓯ ꓠ ꓠꓬꓲˍ ꓡꓳ꓿ ꓕꓱ ꓟ ꓚꓱ, ꓔꓯ ꓣꓳ ꓑ ꓙꓽˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓔꓯˍ ꓡꓰꓽ ꓟꓽ ꓞꓲ ꓬꓲ‐ꓢꓷ‐ꓡꓰ ꓡ ꓞꓳ ꓟꓽ ꓥ ꓟ ꓐꓶꓽ ꓞꓳ ꓐꓴ ꓮ ꓟꓬ, ꓔꓯ ꓥˍ ꓟꓲ ꓬꓲ ꓠꓬ ꓫ. ꓕꓱ ꓔꓬ ꓡꓳ꓿ ꓙ ꓖꓴ ꓧꓳꓽ ꓟꓳ. ꓖꓶ ꓔꓬ ꓡꓳ꓿ ꓮ ꓡꓲ ꓥ ꓡ꓿ ꓢꓷ. ꓠꓲ, ꓙꓳ ꓒ ꓐꓴ ꓔꓯ ꓡꓳ. ꓠꓬꓲ꓿ ꓬꓲ ꓪ ꓠꓬ ꓟ. ꓟꓲꓽˍ ꓟꓲ ꓟꓽ ꓢꓷ.꓿ ꓬꓲ ꓪ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓐꓴˍ ꓡꓰ ꓐꓰ ꓢꓲꓽ ꓫꓬ ꓕꓳꓽ ꓶ ꓥˍ ꓟꓲ ꓟꓽ ꓵ ꓠꓬꓲ꓿ ꓪꓴ‐ꓢ ꓙꓳˍ ꓫꓵꓽ ꓥˍ ꓟꓲ ꓟꓽ ꓢꓷ.꓿ ꓖꓳ ꓡꓱ ꓥˍ ꓟꓲ ꓬꓲ ꓪ ꓢꓷ. ꓠꓲ, ꓥ ꓟ astrology ꓐꓰ ꓐꓯˍ ꓟ ꓟꓴ ꓗꓪ ꓟꓵꓽ ꓪꓴꓽ ꓔꓯ ꓡꓳ. ꓠꓬꓲˍ ꓟ ꓢꓷ. ꓠꓲ, ꓗꓪ ꓐꓰ ꓪꓴ‐ꓢ ꓠꓬ ꓬꓲ ꓪ ꓔꓯ ꓫ. ꓕꓱ ꓔꓬ ꓡꓳ꓿ ꓬꓲ ꓪ ꓢꓷ. ꓔ ꓟ ꓢꓷ. ꓠꓲ,꓾ ꓬꓲ ꓪ ꓢꓳ ꓔ ꓟ ꓬꓲ ꓪ ꓓꓵꓽ ꓙꓽ ꓗꓴ.ˍ ꓟ ꓚꓱ, ꓗꓪ ꓐꓰ ꓪꓴ‐ꓢ ꓠꓬ ꓬꓲ ꓪ ꓔꓯ ꓙ ꓡꓯ ꓘꓳ ꓔꓬ ꓟ ꓥ ꓡꓳ꓿
