ꓙꓴ‐ꓐꓲ‐ꓡꓲ ꓘꓳꓼ ꓡꓳ, ꓡꓰ ꓥ ꓟꓲ ꓣꓳ ꓠꓬ ꓙꓵꓻ ꓠꓲ, ꓐꓰ ꓫꓱ. ꓗꓳ. ꓠ, ꓟ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓙꓴ‐ꓐꓲ‐ꓡꓲ ꓘꓳꓼ ꓬꓲ ꓟꓶꓽ ꓐꓰ ꓠꓽ ꓛꓳꓼ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ_ ꓟ ꓙꓵ, ꓗꓪ ꓙꓴ‐ꓐꓲ‐ꓡꓲ ꓘꓳꓼ ꓖꓴ ꓡꓰ ꓥ ꓟꓲ ꓙꓲ‐ꓢꓴ ꓢꓲ ꓤ ꓐꓴ ꓗꓪ ꓐꓰ ꓥꓳ ꓡꓳ. ꓓꓴ ꓙ ꓫꓱꓽ ꓢꓴ ꓐꓰ ꓢꓯꓼ ꓕꓵꓼ ꓞꓳ ꓙꓳ ꓛꓳ ꓫꓱꓽ ꓠ, ꓟ ꓐꓯ ꓔ ꓡꓳ꓿
ꓚꓧꓣꓲꓢꓔꓟꓮꓢ ꓦꓬꓼ ꓠꓬꓲ ꓠꓬ ꓠꓶꓽ ꓡ ꓟ ꓑꓶ ꓓꓴ ꓚꓧꓣꓲꓢꓔꓟꓮꓢ ꓶ ꓓꓳ ꓫꓱ, ꓓꓳ ꓥ ꓟꓲ ꓥ ꓟ ꓥꓳ ꓡꓳ. ꓓꓴ ꓐꓰ ꓝ. ꓢꓲ ꓶ ꓓꓳ ꓫꓱ, ꓓꓳ ꓗꓪ ꓚꓺ ꓖꓶ ꓗꓷ ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓪꓴ‐ꓢ ꓐꓰ ꓠꓶꓽ ꓞ, ꓢꓲ ꓔꓬ ꓡꓳ꓾ ꓢꓲ ꓒ ꓬꓰ‐ꓢꓴ ꓟꓽ ꓐ ꓠꓬ “ꓢꓲ ꓒꓽ ꓠꓬ ꓠꓶꓽ ꓞ, ꓡꓰꓳ꓾” ꓐꓰ ꓐꓯ ꓟ ꓠꓬ ꓙꓳꓺ ꓦꓲ. ꓡꓰ ꓝꓲ ꓓꓴ ꓕꓲ ꓟ ꓥꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓬ ꓟ ꓑꓶ ꓓꓴ ꓖꓳ ꓘꓴ_ ꓟ ꓠꓬ ꓫꓱ. ꓤ ꓟ ꓢꓯꓼ ꓪ ꓗꓷ ꓡꓰ ꓟ ꓥꓳ꓾ ꓢꓲ ꓒ ꓬꓰ‐ꓢꓴ ꓡꓰ ꓙꓳꓺ ꓛꓳ, ꓔ ꓟ ꓟꓽ ꓥ꓾ ꓖꓽ ꓖꓶ_ ꓟ ꓡꓰ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓟꓲ ꓠꓯ ꓡ ꓞꓳ ꓕꓲ ꓣꓳ ꓐꓰ ꓘꓳ, ꓣꓴ ꓟ ꓔꓯ ꓠꓬꓲ. ꓠ. ꓟ ꓗꓪ ꓐꓰ ꓢꓯꓼ ꓟꓬ ꓖꓶ_ ꓟ ꓪꓴ‐ꓢ ꓥ ꓟ꓾ ꓮ ꓕꓯ ꓟꓲ ꓝꓮꓲ ꓬꓲ ꓫꓵꓼ ꓗꓷ ꓡꓰ ꓟ ꓔꓯ ꓟ. ꓖꓶ_ ꓟ ꓬꓲ ꓙꓱꓼ ꓥ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓝꓲ ꓓꓴ ꓒꓳ‐ꓡꓳ ꓣꓳ‐ꓟ ꓕꓳ ꓶ ꓗꓪ ꓐꓰ “ꓥꓳ ꓡꓳ. ꓓꓴ ꓗꓪ ꓣꓳ ꓠꓬ ꓚꓬꓴ ꓙ ꓟꓶ ꓡꓳ꓾” ꓐꓰ ꓐꓯ ꓔ ꓢꓲ ꓥꓳ ꓡꓳ. ꓓꓴ ꓠꓬ ꓟꓽ ꓚ_ ꓟ ꓟꓽ ꓔꓱ, ꓟ ꓟꓽ ꓥ꓾ ꓢꓯ. ꓔꓬ ꓟ ꓢꓯꓼ ꓪ ꓔꓯ ꓖꓶ_ ꓟ ꓥ ꓡꓳ꓿
ꓥꓳ ꓡꓳ. ꓓꓴ ꓟꓽ ꓙꓳ ꓠꓬ ꓣꓳ ꓠꓬ ꓫꓵꓻ ꓡꓰ ꓢꓴ ꓡꓰ ꓐꓰ ꓥ ꓡꓳ꓾ ꓥꓳ ꓡꓳ. ꓓꓴ ꓗꓪ ꓐꓰ ꓣꓳ ꓠꓬ ꓠꓬꓲ ꓟꓳ ꓓꓴ ꓠꓯꓼ ꓗꓪ ꓛꓲ ꓡꓳ꓾ ꓢꓯꓼ ꓟꓬ ꓔꓯ ꓖꓶ ꓟ ꓪꓴ‐ꓢ ꓢꓯꓼ ꓪ ꓥ ꓡꓳ꓿
ꓔꓱ, ꓟ ꓢꓯꓼ ꓪ ꓠꓬ ꓙꓵꓽ ꓚꓱ, ꓟꓽ ꓥ ꓠꓬ ꓙꓳꓺ ꓠꓲ, ꓔꓯ ꓧꓪ. ꓡꓰ ꓟ ꓠꓯꓼ ꓗꓪ ꓟꓳ ꓪ ꓟꓽ ꓓ꓾ ꓙꓳꓺ ꓛꓳ._ ꓟ ꓐꓰ ꓢꓰꓼ ꓟ ꓔꓯ ꓬꓰ ꓐ ꓡ ꓟ ꓠꓬ ꓢꓯꓼ ꓪ ꓟꓽ ꓥ꓾ ꓖꓳ ꓟ ꓔꓯ ꓒꓳ, ꓔꓴ ꓢꓲ ꓪꓴ‐ꓢ ꓢꓯꓼ ꓪ ꓠꓬ ꓥꓳ ꓡꓳ. ꓓꓴ ꓗꓪ ꓦꓵ ꓡ ꓟ ꓥꓳ꓾ ꓖꓳ ꓟ ꓑꓶ ꓓꓴ ꓥꓳ ꓡꓳ. ꓓꓴ ꓠꓬ ꓦꓵꓻ ꓡ ꓟ ꓥ ꓡꓳ꓿
ꓟꓲ ꓠꓯ ꓐꓰ ꓝ. ꓢꓲ ꓢꓯꓼ ꓖꓶ_ ꓟ ꓗꓪ ꓝꓲ ꓓꓴ ꓒꓳ‐ꓡꓳ ꓢꓲ ꓫꓬ ꓕꓳ ꓶ ꓗꓪ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓢꓯꓼ ꓖꓶ_ ꓟ ꓠꓬ ꓟꓲ ꓠꓯ ꓐꓰ ꓫ. ꓢꓴ ꓟꓷꓼ ꓢꓴ ꓐꓴ ꓢꓯꓼ ꓔꓯ ꓠ ꓠ, ꓓꓴ ꓬꓰ ꓡꓯ꓿ ꓟꓲ ꓠꓯ ꓗꓪ ꓗꓪ ꓓꓳ ꓡ ꓟ ꓪꓰ. ꓫꓵꓺ ꓮ ꓙꓵ ꓠꓬ ꓡ ꓞꓳ ꓮ ꓙꓵ ꓐꓱ ꓶ ꓥ ꓟꓲ ꓕꓲ ꓐꓱ ꓞꓳ ꓤ ꓡꓰ ꓙꓵꓽ ꓔꓬ ꓟ ꓥ ꓡꓳ꓿ ꓪꓴ‐ꓢ ꓠꓬ ꓬꓲ ꓡꓰ ꓚꓰꓼ ꓔ ꓟ ꓔꓯ ꓟꓲ ꓠꓯ ꓡ ꓞꓳ ꓐꓴ ꓙꓲ ꓖꓴ ꓙꓳ ꓠ, ꓟ ꓐꓱ ꓶ ꓬꓲ ꓔꓶꓻ ꓙꓱꓼ ꓙꓳ_ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓣꓳ ꓙꓵꓽ ꓪ ꓠꓬ ꓕꓱ ꓡꓱ ꓟꓽ ꓔꓱ, ꓔꓱ, ꓘꓴꓽ ꓞ, ꓔꓬ ꓠ, ꓟ ꓟꓽ ꓥ꓾ ꓟꓬ ꓡ ꓠ, ꓟ ꓐꓱ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿
ꓫ ꓔꓬ ꓟꓷꓼ ꓔꓬ ꓟ ꓡꓰ ꓥꓳ ꓡꓳ. ꓓꓴ ꓬꓲ ꓚꓱ, ꓫꓵꓼ ꓔꓯ ꓖꓶ_ ꓡꓳ꓿ ꓔꓯ ꓥꓳꓽ ꓭꓯ ꓠꓬ ꓤ ꓠꓱ ꓦꓵꓻ_ ꓟ ꓫ. ꓓꓴ ꓔꓯ ꓔꓱ, ꓕ ꓠꓬꓲ ꓡꓯ꓾ ꓪꓴ‐ꓢ ꓠꓬ ꓤ ꓠꓱ ꓦꓵꓻ ꓟ ꓠꓻ ꓓꓴ ꓫ ꓓꓴ ꓗꓪ ꓐꓰ ꓚꓰꓼ_ ꓟ ꓔꓯ ꓬꓰ ꓖꓶ_ ꓡꓳ꓾ ꓞꓳ ꓤ ꓔꓯ ꓟꓬ ꓡ ꓝꓲ_ ꓡꓳ꓾ ꓞꓳ ꓤ ꓠꓬ ꓥꓳ ꓡꓳ. ꓓꓴ ꓐꓰ ꓢꓯ. ꓔꓬ ꓡꓳ꓿
ꓕꓱ ꓡꓱ ꓠꓻ ꓓꓴ ꓫ ꓓꓴ ꓗꓪ ꓐꓰ ꓪꓴ‐ꓢ ꓚꓰꓼ ꓔ ꓟ ꓟꓬꓱꓽ ꓠꓯꓼ ꓗꓪ ꓐ ꓠ, ꓟ ꓘꓴ ꓔ ꓟ ꓥ ꓡꓳ꓾ ꓚꓺ ꓟꓲꓽ ꓠꓬ ꓪꓴ‐ꓢ ꓐꓰ ꓬꓲ ꓔꓯ ꓥꓳ ꓡꓳ. ꓓꓴ ꓡꓯ ꓒꓯ, ꓠꓯꓼ ꓗꓪ ꓔꓬ ꓡꓳ꓿
ꓟ, ꓟ ꓟ‐ꓡꓲ ꓤꓶꓻ ꓐꓰ ꓙꓲ ꓢꓴ ꓢꓲ ꓤ ꓐꓴ ꓪꓽ ꓘꓴ ꓟ ꓔꓯ ꓔꓱ, ꓕ ꓠꓬ ꓠ‐ꓢ‐ꓡꓱ ꓢꓴ ꓟ‐ꓡꓲ ꓠꓬ ꓢꓯꓼ ꓟꓬ ꓔꓯ ꓖꓶ ꓢꓴ ꓥꓳ ꓡꓳ. ꓓꓴ ꓬꓲ ꓛꓱꓼ ꓥ ꓡꓳ꓿ ꓬꓲ ꓤꓶꓻ ꓠꓯꓼ ꓗꓪ ꓣꓳ ꓙꓲ‐ꓢꓴ ꓢꓲ ꓤ ꓐꓴ ꓗꓪ ꓐꓰ ꓟꓳ ꓓ_ ꓟ ꓠꓬ ꓣꓳ ꓗꓪ ꓐꓰ ꓕꓲ ꓣꓳ ꓗꓪ ꓐꓰ ꓦꓵꓻ ꓠ ꓔ ꓡꓳ꓾ ꓪꓴ‐ꓢ ꓐꓯ ꓘꓶꓽ ꓔꓯ ꓛꓳ ꓢꓲ ꓢꓲ ꓒ ꓬꓰ‐ꓢꓴ ꓬꓲ ꓢꓯꓼ꓾ ꓬꓲ ꓖꓳ ꓓꓱ꓾ ꓒꓬꓱ ꓟꓬ ꓔꓯ ꓟ. ꓖꓶ ꓠ ꓔ ꓡꓳ꓿ ꓢꓲ_ꓒ ꓬꓰ‐ꓢꓴ ꓝꓮꓲ ꓕꓲ ꓧꓪ, ꓦꓵꓻ ꓡ ꓠꓲ, ꓫꓵ_ ꓡꓳ꓾ ꓖꓳ ꓟ ꓑꓶ ꓓꓴ ꓣꓳ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓲ ꓢꓯꓼ꓾ ꓖꓳ ꓓꓱ꓾ ꓒꓬꓱ ꓟꓬ ꓔꓯ ꓟ. ꓖꓶ ꓠ ꓔ ꓡꓳ꓾ ꓕꓱ ꓟ ꓠꓬ ꓤ ꓠꓱ ꓐꓴ ꓦꓵꓻ ꓡ ꓟ ꓬꓲ ꓔꓶꓻ ꓙꓱꓼ ꓐꓰ ꓚꓰꓼ ꓢꓴ ꓢꓲ ꓒ ꓠꓬ ꓥꓳ ꓡꓳ. ꓔꓬ ꓟ ꓥꓳ꓿ ꓥꓳ ꓡꓳ. ꓓꓴ ꓙꓳ ꓠ, ꓟ ꓠꓬ ꓟꓲ ꓠꓯ ꓠꓬ ꓪꓴ‐ꓢ ꓡꓰ ꓙꓵ_ ꓟ ꓟꓲ ꓠꓯ ꓗꓷ ꓠ, ꓟ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ꓿
