ꓦꓯ. ꓠꓲ, ꓙꓵꓽ_ ꓟ ꓚꓱ,

ꓣꓳ ꓠꓲ, ꓟ ꓘꓴꓽ ꓠꓯꓼ ꓗꓪ ꓕꓲ ꓫꓵ ꓫꓵ ꓟꓳ_ ꓕꓯ ꓟꓬ ꓠꓯ ꓡ_ ꓟ꓾ ꓣꓴ ꓠꓲ, ꓫꓵ_ ꓟ ꓝꓮꓲ ꓠꓲ, ꓟ ꓠꓯꓼ ꓘꓴꓽ ꓗꓪ ꓦꓯ. ꓠꓲ, ꓟ ꓪꓴꓽ ꓡ ꓟ ꓙꓵꓽ ꓡ ꓟ ꓕꓲ ꓫꓵ ꓙꓳ_ ꓡꓳ꓾ ꓕꓱ ꓟ ꓠꓬ ꓪꓴ‐ꓢ ꓡꓰ ꓖꓶ ꓔ ꓟ ꓡꓯꓼ ꓫꓴ ꓕꓲ ꓟ ꓥ ꓡꓳ꓾ ꓐꓰ ꓐꓯ ꓠ ꓡꓳ꓿

ꓦꓯ. ꓠꓲ, ꓙꓵ_ ꓐꓯ_ ꓟ ꓠꓬ ꓬꓲ ꓚꓲ ꓛꓬ ꓬꓲ ꓠꓬ ꓙꓲ ꓫꓵ ꓟꓽ ꓥ꓾ ꓟꓽ ꓙꓲ ꓫꓵ ꓟꓲ ꓟꓽ ꓥ꓾ ꓬꓲ ꓔꓱ, ꓬꓲ ꓙꓳ_ ꓡꓳ꓾ ꓣꓳ ꓧꓪ ꓖꓳ ꓓꓱ ꓠꓯꓼ ꓘꓴ ꓗꓪ ꓬꓲ ꓔꓶ. ꓕꓲ ꓟ ꓙꓳ ꓢꓲ ꓠꓬꓲ ꓐꓲ_ ꓟ꓾ ꓗ, ꓛꓲ_ ꓟ ꓟꓳ ꓕꓯ ꓣꓳ ꓠꓬ ꓖꓳ ꓟ ꓔꓯ ꓣꓴ ꓠꓲ, ꓫꓵ_ ꓡꓳ꓿ ꓟꓶ ꓠꓲ, ꓫꓵ_ ꓡꓳ꓿ ꓕꓱ ꓟ ꓡꓰ ꓐꓰ ꓗ, ꓛꓲ_ ꓟ ꓟꓴ ꓖꓪ ꓣꓳ ꓑ ꓙ ꓕꓯ ꓠꓲ, ꓟ ꓠꓯꓼ ꓘꓴ ꓗꓪ ꓢꓯꓼ ꓙꓳ ꓡ ꓡꓳ꓾ꓣꓳ ꓔꓯ ꓗ. ꓡ ꓟ꓾ ꓣꓳ ꓔꓯ ꓕꓲ ꓡ ꓟ꓾ ꓣꓳ ꓔꓯ ꓫ. ꓝꓲ. ꓡ ꓟ ꓐꓯ ꓘꓶꓽ ꓣꓳ ꓑ ꓙ ꓕꓯ ꓣꓳ ꓠꓬ ꓠꓲ, ꓢꓲꓼ ꓡ ꓡꓳ꓾ ꓖ ꓡꓱ ꓠꓬꓲ ꓣꓳ ꓠꓲ, ꓟ ꓠꓯꓼ ꓘꓴ ꓗꓪ ꓦꓯ. ꓠꓲ, ꓙꓵꓽ_ ꓟ ꓕꓲ ꓟ ꓙꓳ ꓐꓷ ꓐꓰ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓪꓴ‐ꓢ ꓟ. ꓟꓲꓽ ꓗꓪ ꓐꓯ ꓔ ꓡꓳ꓿

ꓖꓳ ꓟ ꓠꓬ ꓙꓲ ꓫꓵ ꓟꓲ ꓟꓽ ꓥ꓾ ꓟꓽ ꓙꓲ ꓫꓵ ꓟꓲ ꓟꓽ ꓥ꓾ ꓖꓳ ꓟ ꓔꓯ ꓪꓴ. ꓠꓷ. ꓐꓰ ꓠꓲ, ꓡꓶꓽ ꓗꓪ ꓐꓰ ꓖꓳ ꓟ ꓔꓯ ꓙꓵꓽ ꓕꓯ ꓖꓳ ꓟ ꓠꓬ ꓙꓲ_ ꓟ ꓒꓬꓱꓼ ꓡ ꓡꓳ꓾ ꓔꓯ ꓥꓳꓽ ꓐꓯ ꓠꓬ ꓦꓯ. ꓠꓲ, ꓙꓵ ꓟ ꓖꓳ ꓟ ꓔꓯ ꓣꓳ ꓙꓲ_ ꓟ ꓗꓪ ꓣꓱ ꓕꓯ ꓣꓳ ꓐꓱ ꓶ ꓙꓲ ꓖꓴ ꓙꓳ_ ꓟ ꓙꓲ_ ꓟ ꓒꓬꓱꓼ ꓡ ꓡꓳ꓾ ꓙꓲ_ ꓟ ꓫ ꓕꓱ ꓘꓶꓽ ꓔꓯ ꓣꓳ ꓠ ꓠ, ꓢꓲ ꓠꓬꓲ ꓢꓯꓼ ꓕꓵꓼ ꓕꓯ ꓣꓳ ꓠꓲ, ꓟ ꓠꓯꓼ ꓗꓪ ꓢꓯꓼ ꓟꓶ. ꓡꓳ꓾ ꓢꓯꓼ ꓪ ꓖꓳ ꓟ ꓗꓪ ꓐꓰ ꓟꓬꓱꓽ ꓮ ꓟꓬ, ꓬꓰ ꓘꓴ ꓡꓳ꓾ ꓕꓱ ꓟ ꓠꓬ ꓙꓲ_ ꓡꓳ꓿

ꓖꓳ ꓟ ꓡꓰ ꓐꓰ ꓦꓯ. ꓠꓲ, ꓙꓵ_ ꓟ ꓖꓳ ꓟ ꓠꓬ ꓙꓲ_ ꓟ ꓕꓲ ꓒꓳ, ꓢꓯꓼ ꓕꓵꓼ ꓟ ꓚꓱ, ꓗꓪ ꓣꓱ ꓙꓰ ꓥ ꓟꓲ ꓣꓳ ꓪꓴ. ꓠꓷ. ꓗꓪ ꓐꓰ ꓓꓵꓽ ꓙ ꓚꓱ, ꓗꓪ ꓐꓰ ꓖꓳ ꓟ ꓔꓯ ꓟꓽ ꓙꓵ ꓕꓯ ꓣꓳ ꓢꓷ. ꓠꓲ,꓾ ꓪꓴ. ꓠꓷ. ꓣꓳ ꓠꓲ, ꓡꓶꓽ ꓗꓪ ꓐꓰ ꓖꓳ ꓟ ꓔꓯ ꓟꓽ ꓙꓵ ꓕꓯ ꓖꓳ ꓟ ꓠꓬ ꓣꓳ ꓔꓯ ꓙꓵꓽ ꓔꓬ ꓡꓳ꓾ ꓐꓲ_ ꓟ ꓧ, ꓟ ꓔꓯ ꓣꓳ ꓟꓳ ꓕꓯ ꓠꓴ ꓠꓲ, ꓫꓵ_ ꓟ ꓖꓳ ꓟ ꓔꓯ ꓣꓳ ꓗꓽ ꓕ ꓟꓽ ꓐ ꓡ ꓕꓯ ꓖꓳ ꓟ ꓠꓬ ꓣꓳ ꓔꓯ ꓐꓬ ꓡꓰ ꓝꓲ ꓟ ꓠꓲ, ꓡꓶꓽ ꓒꓬꓱꓼ ꓡ ꓡꓳ꓾ ꓮ ꓫꓵ ꓑꓶ ꓓꓴ ꓥ ꓡ꓾ ꓠꓲ, ꓦꓯ. ꓟ ꓟꓬ ꓠꓯ, ꓟ ꓖꓳ ꓟ ꓠꓬ ꓣꓳ ꓚꓲ ꓛꓬ ꓓꓵꓽ ꓙ ꓚꓱ, ꓚꓲ ꓛꓬ ꓪꓴ. ꓠꓷ. ꓗꓪ ꓐꓰ ꓗꓽ ꓕ ꓟꓽ ꓐ ꓡ ꓟ ꓑꓶ ꓓꓴ ꓖꓳ ꓟ ꓠꓬ ꓣꓳ ꓔꓯ ꓫ. ꓙꓵ ꓝꓲ_ ꓟ ꓥ ꓡꓳ꓾

ꓖꓳ ꓟ ꓠꓬ ꓙꓲ_ ꓫꓵ ꓥ ꓟꓲ ꓟꓽ ꓥ꓾ ꓟꓽ ꓙꓲ ꓫꓵ ꓥ ꓟꓲ ꓟꓽ ꓥ꓾ ꓣꓳ ꓣꓱ ꓟ ꓗꓪ ꓐꓰ ꓗꓳ. ꓙꓰ ꓢꓲ ꓠꓬꓲ ꓣꓳ ꓮ ꓡꓲ ꓣꓱ ꓠꓬ ꓮ ꓡꓰ ꓗꓷ ꓡꓰ_ ꓡꓳ꓿ ꓙꓲ_ ꓟ ꓕꓲ ꓒꓳ, ꓗꓪ ꓣꓱ ꓠꓬ ꓖꓳ ꓟ ꓠꓬ ꓙꓲ_ ꓫꓵ ꓥ ꓢꓲ ꓟꓽ ꓙꓲ ꓕꓲ ꓒꓳ, ꓗꓪ ꓣꓱ ꓠꓬ ꓟꓽ ꓙꓲ ꓥ ꓡꓳ=