ꓠꓲ, ꓠꓵˍ ꓟ ꓮꓽ ꓐ ꓮ ꓟ ꓐꓴꓳ꓾ ꓞꓲꓼ ꓙꓳ ꓡꓺꓳ꓾ ꓞꓲꓼ ꓟꓳꓽ ꓡꓺꓳ꓾ ꓐꓰ ꓐꓯ ꓗꓷˍ ꓟ ꓡꓰ ꓮ ꓫꓵꓽ ꓔꓯˍ ꓟꓲ ꓟꓽ ꓐ ꓡꓺꓳ꓾ ꓮ ꓫꓵꓽ ꓗꓪˍ ꓟꓲ ꓣꓱꓽ ꓟꓽ ꓬꓯꓼꓳ꓾ ꓐꓯˍ ꓟ ꓠꓽ ꓟꓽ ꓥ꓿ ꓣꓳ ꓚꓲ. ꓛꓬ ꓗ, ꓛꓲꓽ ꓐ ꓡˍ ꓟ ꓚꓱ, ꓔꓯ ꓥˍ ꓟꓲ ꓬꓰ ꓠ ꓔˍ ꓡꓳ꓿ ꓞꓲꓼ ꓙꓳ ꓡˍ ꓕꓯ ꓮ ꓙꓵꓽ ꓔꓯ ꓩꓴ ꓗꓷ ꓢꓲ ꓮ ꓫꓵꓽ ꓗꓷ ꓡꓰ ꓠꓲ, ꓫꓵˍ ꓗꓷ ꓡꓰ ꓝꓲ ꓐꓯ ꓢꓲˍ ꓟꓲ ꓕꓽ ꓡꓳ ꓩꓴ ꓗꓷ꓿ ꓬꓲ ꓞꓲꓼ ꓐꓯˍ ꓟ ꓠꓽ ꓠ‐ꓐ ꓕꓲ ꓟˍ ꓡꓰꓽ ꓥ ꓡꓳ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓙꓳˍ ꓡꓳ ꓟꓽ ꓥ ꓡ꓿
ꓚꓵ ꓚꓵ ꓮ ꓑ ꓮ ꓤ ꓕꓲ ꓐꓱ ꓠꓬ ꓞꓳ ꓡꓱ ꓞꓳ ꓡꓯ. ꓐꓴ ꓢꓶ. ꓟꓽ ꓞꓲ ꓢꓰꓺ ꓢꓰꓺ ꓡꓰ ꓔꓷ, ꓚꓳꓻ ꓔꓬ ꓟ ꓔꓯ ꓣꓳ ꓟꓳˍ ꓥꓳ꓿ ꓞꓲꓼ ꓟꓳꓽ ꓡ ꓐꓯˍ ꓥ ꓟꓲ ꓬꓲ ꓪ ꓓꓻˍ ꓟ꓾ ꓐ ꓡˍ ꓟ ꓗꓪ ꓬꓲ ꓢꓯꓼ ꓒ ꓐꓲ ꓣꓱꓽ ꓬꓰ ꓔꓬ ꓢꓴ꓾ ꓮ ꓕꓯ ꓟꓲ ꓫꓬ ꓫꓬ ꓡꓯꓽ ꓡꓯꓽ ꓐꓰ ꓬꓲ ꓐꓵ ꓫꓬ ꓫꓬˍ ꓡꓰꓽ꓾ ꓬꓲ ꓐꓵ ꓛꓱꓽ ꓠꓱ ꓗ, ꓛꓲꓽ ꓛꓲꓽ ꓡꓰ ꓔꓬˍ ꓟ ꓮ ꓑ ꓟꓳꓽ ꓮ ꓤ ꓟꓳꓽ ꓐꓴ ꓔꓯ ꓠꓴ ꓟꓳꓻ ꓠꓬꓲˍ ꓥꓳ꓿ ꓬꓲ ꓪ ꓐꓱ ꓶ ꓬꓲ ꓞꓲꓼ ꓐꓯˍ ꓟ ꓠꓽ ꓠ‐ꓐ ꓕꓲ ꓟˍ ꓡꓰꓽ ꓥ ꓡꓳ꓿ ꓬꓲ ꓪ ꓮ ꓫꓵꓽ ꓑꓶ. ꓓꓴ ꓕꓱ ꓡꓱ ꓢꓰꓺ ꓢꓰꓺ ꓡꓰꓽ ꓐꓰ ꓐꓲꓻ ꓔꓬ ꓡ꓿
ꓕꓱ ꓟ ꓠꓬ ꓬꓲ ꓞꓲꓼ ꓕꓲ ꓠꓬꓲ ꓔꓬ ꓕꓲ ꓠꓬꓲ ꓪꓴꓽ ꓡ ꓟꓳꓽ ꓡ ꓔꓬ ꓟ ꓠꓯꓸꓼ ꓗꓪ ꓧꓪꓽ ꓖꓳ ꓓꓱꓽ ꓔꓯ ꓔꓬ, ꓢꓻ ꓝꓲˍ ꓟ ꓑꓶ. ꓓꓴ ꓥ ꓡꓳ꓿ ꓖꓳ ꓓꓱꓽ ꓔꓬ, ꓢꓻ ꓓꓴ ꓠꓽ ꓬꓲ ꓪꓴ. ꓠ‐ꓐ ꓕꓲꓽ ꓥ ꓡꓳ꓿
ꓬꓲ ꓞꓲꓼ ꓙꓳ ꓡˍ ꓕꓯ ꓞꓲꓼ ꓣꓳˍ ꓕꓯ ꓟ ꓡꓰ ꓮ ꓫꓵꓽ ꓔꓯ ꓥˍ ꓟꓲ ꓟꓽ ꓜꓽ ꓜꓽ ꓦꓯ. ꓡꓰ ꓝꓱ ꓡꓰ ꓠ ꓬꓰˍ ꓟ꓾ ꓦꓯ. ꓡꓰ ꓓꓴ ꓝꓱ ꓡꓰ ꓓꓴ ꓠꓯꓻ ꓞꓲꓼ ꓓꓳˍ ꓟ꓾ ꓕꓱ ꓡꓱ ꓫꓵꓽ ꓔꓯ ꓠꓽ ꓬꓰ ꓟꓽ ꓓꓻꓳ꓿
ꓝꓮꓲ ꓙ ꓖꓴ ꓫꓱꓽ꓾ ꓚꓵ. ꓬꓲꓻ ꓓꓳ ꓠ ꓛꓲ ꓖꓳ ꓓꓱ ꓡꓵ ꓖꓶˍ ꓟ ꓔꓯ ꓬꓰ ꓖꓶ꓿ ꓦꓲ ꓘꓴꓽ ꓗꓪ ꓟꓽ ꓓꓵ. ꓔꓬ ꓟ ꓢꓶ. ꓟꓽ ꓞꓲ ꓙ ꓖꓴ ꓫꓱꓽ ꓖꓶˍ ꓟ꓾ ꓚꓵ. ꓬꓲꓻ ꓓꓳ ꓠ ꓖꓳ ꓓꓱ ꓡꓵ ꓖꓶˍ ꓟ ꓠꓬ ꓚꓲ. ꓛꓬ ꓖꓳ ꓓꓱꓽ ꓔꓯ ꓔꓬ, ꓢꓻ ꓡꓰ ꓝꓲˍ ꓟ ꓥ ꓡꓳ꓿ ꓕꓲ ꓣꓳ ꓔꓵ. ꓬꓰ ꓠꓲ, ꓟꓽ ꓫꓵ ꓕꓯ ꓞꓳ ꓟꓳꓽ ꓛꓳ ꓒꓯ, ꓐꓴ ꓐꓰ ꓕꓲ ꓡꓰ, ꓬꓰ ꓠꓬꓲ꓿
ꓖꓳ ꓡꓱ ꓥˍ ꓟꓲ ꓚꓲ. ꓔ ꓓꓴ ꓠꓬ ꓮ ꓘꓶ. ꓢꓯꓼ ꓩꓴ ꓢꓲ ꓠꓽ ꓕꓽ ꓬꓰ꓿ ꓢꓯꓼ ꓮ ꓘꓶ. ꓩꓴ ꓪ ꓡꓰˍ ꓕꓯ ꓪꓳꓽ ꓔꓳ ꓐꓰ ꓧꓪꓽ ꓘꓴ. ꓐꓴ ꓔꓯ ꓠꓻ ꓡꓰ ꓝꓲˍ ꓡꓳ꓿
ꓜꓽ ꓓꓴ ꓜꓽ ꓙꓰꓽ ꓔꓯ ꓥˍ ꓟꓲ ꓩꓼ ꓔ ꓠ ꓗ, ꓡꓳ꓿
ꓞꓲꓼ ꓙꓳ ꓡˍ ꓠꓬ ꓮ ꓫꓵꓽ ꓜꓽˍ ꓟꓲ ꓜꓽ ꓟꓽ ꓟꓲ꓾ ꓜꓽ ꓠꓲ, ꓟꓽ ꓫꓵ ꓕꓱ ꓡꓱ ꓗꓷ ꓡ ꓗꓴ.ˍ ꓡꓳ꓿ ꓖꓳ ꓟ ꓑꓶ. ꓓꓴ ꓮ ꓔꓲ. ꓤ ꓥˍ ꓟꓲ ꓖꓳ ꓓꓱꓽ ꓐꓱ ꓶ ꓢꓯꓼ ꓟꓶˍ ꓟ꓾ ꓜꓽ ꓠꓲ, ꓫꓵˍ ꓟ ꓜꓽ ꓓꓴ ꓔꓯ ꓜꓽ ꓖꓶ꓿ ꓜ ꓡꓰꓽ ꓟꓽ ꓥ꓾ ꓖꓳ ꓓꓱꓽ ꓐꓱ ꓶ ꓢꓯꓼ ꓟꓶˍ ꓟ ꓮ ꓫꓵꓽ ꓔꓯ ꓥˍ ꓟꓲ ꓜꓽ ꓐ ꓡˍ ꓟ ꓥ ꓡꓳ꓿
ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓬꓲ ꓛꓵ꓾ ꓧꓪꓽ ꓞꓶꓻ ꓬꓲ ꓞꓶꓻ ꓟꓬꓽˍ ꓟ꓾ ꓛꓼ ꓐꓳ ꓘꓪꓽˍ ꓟ꓾ ꓣꓰꓮꓓꓬ ꓟꓮꓓꓰ ꓫꓬ, ꓔ ꓟ ꓜꓽ ꓓꓴ ꓐꓴ ꓔꓯ ꓠꓽ ꓤ ꓟꓳ ꓠ ꓔˍ ꓡꓳ꓿
ꓬꓲꓼ ꓔ ꓬꓲꓼ ꓟꓶ ꓐꓳ ꓡꓰ ꓝꓲ꓾
ꓞꓲꓼ ꓙꓳ ꓡˍ ꓕꓯ ꓜꓽ ꓓꓴ ꓜꓽ ꓠꓲ, ꓟꓽ ꓫꓵ ꓟꓽ ꓡꓰꓽ ꓟꓽ ꓞꓲ꓾ ꓬꓲꓼ ꓟꓲ ꓬꓲꓼ ꓟꓶ ꓟꓽ ꓓꓻ ꓟ ꓥ ꓡꓳ꓿ ꓬꓲꓼ ꓔ ꓙꓵ, ꓮ ꓘꓶ. ꓠꓲ. ꓡ ꓟ ꓥ ꓡꓳ꓿ ꓖꓳ ꓡꓱ ꓥˍ ꓟꓲ ꓞꓳ ꓟꓳꓽ ꓐꓴ ꓠꓽ ꓢꓯꓼ ꓐꓲ ꓡ ꓠ, ꓟ ꓐꓱ ꓶ ꓕꓲ ꓑ, ꓕꓲ ꓑ, ꓪꓴꓽ ꓧꓶ ꓠꓽ ꓠ ꓔˍ ꓟ ꓡꓰꓽ ꓟꓽ ꓞꓲꓺ ꓬꓲꓼ ꓔ ꓬꓲꓼ ꓟꓶ ꓐꓳ ꓡꓰ ꓝꓲ ꓠ ꓗ, ꓡꓳ꓿
ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓔꓬ꓾
ꓖꓳ ꓓꓱꓽ ꓢꓲꓽ ꓫꓬˍ ꓟ ꓠꓬ ꓖꓳ ꓓꓱꓽ ꓔꓬ, ꓢꓻ ꓓꓴ ꓐꓱ ꓶ ꓐꓰ ꓠꓲ, ꓟ ꓔꓬ, ꓢꓻ ꓠ, ꓟ ꓐꓱ ꓶˍ ꓟꓲ ꓬꓳ. ꓚꓰꓽˍ ꓟ ꓥ ꓡꓳ꓿ ꓐꓵꓻ ꓞꓶꓽ ꓟꓶ ꓛꓲ ꓥˍ ꓟꓲ ꓚꓲ. ꓛꓬ ꓔꓯ ꓒꓰ.ˍ ꓟ ꓪꓽˍ ꓟ ꓔꓯ ꓖꓪꓽ ꓖꓶ꓿
ꓠꓲ, ꓟ ꓐꓱ ꓶ ꓥˍ ꓟꓲ ꓗꓪꓽ ꓫꓵꓼ ꓖꓶ꓿ ꓞꓲ ꓣꓳˍ ꓟ ꓡꓰꓽ ꓟꓽ ꓓꓻ ꓟ ꓟꓽ ꓐ ꓡ ꓟ ꓔꓯ ꓘꓳ ꓣꓴ ꓐ ꓡ ꓠ ꓔˍ ꓡꓳ꓿ ꓚꓲ. ꓛꓬ ꓔꓯ ꓙꓳˍ ꓟ ꓗꓪˍ ꓡꓰꓽ ꓮ ꓡꓲ ꓐ ꓡˍ ꓮ ꓡꓲ ꓖꓳ ꓓꓱꓽ ꓔꓬ, ꓢꓻ ꓠ, ꓟ ꓢꓯꓼ ꓕꓵꓼˍ ꓥꓳ꓾ ꓐꓰ ꓠꓲ, ꓟ ꓗꓪ ꓘꓳ ꓣꓴ ꓗꓴ. ꓠ ꓗ, ꓡꓳ꓿
ꓠꓲ, ꓟˍ ꓟꓲ ꓕꓽ ꓙꓬ꓿ ꓞꓲꓼ ꓟꓳꓽ ꓡˍ ꓕꓯ ꓠꓲ, ꓟ ꓫ. ꓠꓲ, ꓟ ꓙꓬ ꓡꓰ ꓠꓬ ꓖꓳ ꓓꓱꓽ ꓗꓪˍ ꓟꓲ ꓔꓬ, ꓘꓶꓻ ꓡꓶ ꓡˍ ꓟ ꓑꓶ. ꓓꓴ ꓠꓲ, ꓟ ꓕꓽ ꓙꓬ ꓡꓰ꓿ ꓚꓲ. ꓛꓬ ꓕꓲ ꓦꓲ ꓢꓴ ꓐꓴ ꓐꓰˍ ꓟꓲ ꓔꓽ ꓔꓽ ꓧꓳꓽ ꓔꓳꓽ ꓔꓬ꓿ ꓬꓰ ꓠ ꓔ ꓟ ꓟꓬꓱꓽ ꓟꓬꓽ ꓠꓬꓲ ꓔꓯ ꓚꓲ. ꓛꓬ ꓤ ꓮ ꓟꓲꓽ꓾ ꓞꓳ ꓡꓱ ꓐꓴ ꓔꓯ ꓡꓰꓽ ꓡꓯꓼ ꓙꓱ ꓗꓷ꓿
ꓠꓲ, ꓟ ꓘꓶꓻ ꓡꓶ ꓓꓴ ꓔꓯ ꓥˍ ꓟꓲ ꓟꓶ ꓤ ꓟꓽ ꓫ ꓔˍ ꓔˍ ꓐꓰ꓾ ꓚꓲ. ꓛꓬ ꓬꓰ ꓠꓲ, ꓫꓵˍ ꓟ ꓗꓪ ꓬꓰ ꓠꓬꓲ ꓢꓲ ꓠꓲ, ꓟ ꓔꓯ ꓢꓲ ꓡꓲ ꓡꓰ ꓝꓲ꓿
ꓝꓮꓲ ꓢꓳ ꓣꓴ ꓐ ꓡˍ ꓟ ꓢꓳ ꓣꓴ ꓢꓻˍ ꓟ ꓕꓲ ꓙꓰꓽ ꓙꓰꓽ ꓔꓯ ꓢꓳ ꓣꓴ꓿
ꓛꓳꓽ ꓒꓯ, ꓛꓳꓽ ꓤ ꓐꓴ ꓐꓰˍ ꓟꓲ ꓜꓲ ꓡꓯ ꓘꓳ꓿ ꓧꓶ. ꓕꓯ ꓚꓲ. ꓛꓬ ꓤ ꓠꓱ ꓔꓯ ꓡꓰꓽ ꓬꓲ ꓙꓵ, ꓖꓶ ꓪˍ ꓟ ꓑꓶ. ꓓꓴ꓾ ꓟꓬꓱꓽ ꓮ ꓟꓬ, ꓬꓰ ꓔꓬ ꓪˍ ꓟ ꓑꓶ. ꓓꓴ ꓟꓽ ꓜꓲ ꓡꓯ ꓘꓳ ꓪ ꓡꓰ ꓟ ꓛꓳꓽ ꓒꓯ, ꓐꓴ ꓐꓰ ꓜꓲ ꓡꓯ ꓘꓳ ꓢꓲ ꓫ. ꓕꓱ ꓡꓯ ꓘꓳ꓿ ꓕꓱ ꓡꓱ ꓬꓰˍ ꓟ ꓠꓬ ꓞꓲꓼ ꓣꓳˍ ꓟ ꓦꓬꓼ ꓠꓬꓲ ꓕꓯ ꓟ ꓟ. ꓟꓲꓽ ꓐꓴ ꓔꓯ ꓐꓯ ꓖꓶˍ ꓟ ꓠꓬ ꓣꓳ ꓠꓲ, ꓟ ꓔꓯ ꓕꓲ ꓑ, ꓤ ꓢꓰꓺ ꓡꓰ ꓝꓲˍ ꓡꓳ꓿
ꓠꓯꓻ ꓞꓲꓼ ꓓꓳꓻˍ ꓟ ꓗꓪ ꓕꓽ ꓐꓴ꓾
ꓞꓲꓼ ꓟꓳꓽ ꓡˍ ꓕꓯ ꓠꓻ ꓫꓵꓽ ꓠꓻ ꓙꓰꓽ ꓮ ꓟꓬ, ꓠꓽ ꓙꓳˍ ꓡꓳ꓿ ꓖꓳ ꓡꓱ ꓥˍ ꓟꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓬꓲ ꓢꓯꓼ ꓪꓽ ꓠꓬꓲˍ ꓟ ꓠꓯꓻ ꓞꓲꓼ ꓮ ꓟꓬ, ꓙꓳ ꓡ ꓔꓬ ꓟ ꓑꓶ. ꓓꓴ ꓠꓯꓻ ꓞꓲꓼ ꓔꓯ ꓟꓽ ꓐꓴ ꓐꓴ ꓓꓳꓻ ꓖꓶˍ ꓕꓯ ꓠꓽ ꓔꓬ, ꓢꓻ ꓢꓻ ꓡꓰꓽ ꓔꓬ ꓐ ꓡˍ ꓥꓳ꓿
ꓝꓮꓲ ꓒꓴ ꓙꓳˍ ꓠꓬ ꓚꓲ. ꓛꓬ ꓠꓻ ꓔꓯ ꓚꓬ, ꓠꓬꓲ꓿ ꓠꓻ ꓓꓳ ꓡˍ ꓟ ꓠꓻ ꓟꓳꓻ ꓡˍ ꓟ ꓔꓯ ꓙꓳꓺˍ ꓟ ꓑꓶ. ꓓꓴ ꓠꓻ ꓚꓬ, ꓠꓬꓲˍ ꓟ ꓔꓯ ꓟꓽ ꓬꓰ ꓬꓰ ꓐꓰ ꓕꓽ ꓔꓬ꓿ ꓠꓯꓼ ꓠꓯꓼ ꓟꓳꓻˍ ꓠꓬ ꓠꓯꓼ ꓠꓯꓼ ꓫꓬ, ꓓꓻ ꓡꓰ ꓓˍ ꓟ ꓥ ꓡꓳ꓿
