“ꓟꓳꓼ ꓜꓲ ꓠꓬ ꓙꓴꓺ ꓡꓰ ꓗꓴ.ˍ ꓡꓳ꓿ ꓬꓲ ꓜꓲ ꓥˍ ꓟꓲ ꓫꓵꓻ ꓗꓴ.ˍ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓠꓽ ꓕꓲ ꓞꓲꓼ ꓕꓶ ꓞ, ꓡꓳ꓿” ꓟꓷꓽ ꓠꓷ, ꓝ ꓒ ꓬꓲ‐ꓢ‐ꓬ ꓥˍ ꓟꓲ꓾ ꓮ ꓙꓵꓽ ꓠꓬ ꓐꓬ ꓡꓰ ꓟꓶꓽ ꓡꓰˍ ꓥꓳ꓿ ꓖꓳ ꓡꓱ ꓥˍ ꓟꓲ ꓪꓴ‐ꓢ ꓐꓯ ꓘꓶꓽ ꓠꓽ ꓕꓲ ꓞꓲꓼ ꓕꓲ ꓑ ꓕꓶ ꓞ, ꓥꓳ꓾ ꓐꓰ ꓐꓯ ꓔ ꓡꓳ꓿ (ꓬꓲ‐ꓢ‐ꓬ 40ꓽ8)꓿ Avila ꓡꓳ ꓒꓱ ꓗꓪ ꓟ ꓙꓲꓻ ꓫꓬ ꓢꓴ Teresa ꓥˍ ꓟꓲ “ꓙꓳˍ ꓟ ꓮ ꓙꓵꓽ ꓠꓬ ꓒꓳ, ꓡꓶ. ꓙꓰ ꓢꓲ ꓟꓶꓽ ꓡꓰ ꓖꓴˍ ꓥꓳ꓿ ꓪꓴ‐ꓢ ꓠꓬ ꓟꓽ ꓒꓳ, ꓟꓽ ꓡꓶ.꓾ ꓕꓲ ꓞꓲꓼ ꓕꓲ ꓞ, ꓡꓳ” ꓐꓰ ꓬꓲ ꓪꓽ ꓘꓴ ꓘꓶꓽ ꓗꓪ ꓐꓯ ꓔ ꓡꓳ꓿ (ꓟꓴ ꓖꓪ 136ꓽ1) ꓗꓪ ꓪꓴ‐ꓢ ꓙꓲꓻˍ ꓠꓬꓲ ꓬꓲ ꓔꓯ ꓫ. ꓟꓳ ꓖꓶ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓵꓻ ꓠꓲ, ꓠꓽ ꓮ ꓕꓯˍ ꓟꓲ ꓟꓽ ꓡꓳ, ꓬꓰ꓾ ꓐꓰ ꓐꓯ ꓔ ꓡꓳ꓿

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓞꓳ ꓤ ꓤꓶꓻ ꓥˍ ꓟꓲ ꓟꓳꓼ ꓜꓲˍ ꓡꓰ ꓐꓰ ꓕꓲ ꓑ, ꓤ ꓡꓰꓽ ꓥ ꓡꓳ꓿ ꓕꓲ ꓑ, ꓤ ꓕꓲ ꓝꓲ. ꓤ ꓡꓰꓽ ꓔꓬ ꓪˍ ꓟ ꓞꓳ ꓤ ꓤꓶꓻ ꓗꓪ ꓞꓳ ꓤ ꓐꓴ ꓔꓯ ꓥˍ ꓟꓲ ꓦ ꓡꓱ ꓪˍ ꓡꓳ꓿ ꓪꓴ‐ꓢ ꓔꓯ ꓥˍ ꓟꓲ ꓦ ꓡꓱ ꓠ ꓗ, ꓡꓳ꓿ ꓕꓲ ꓑ, ꓤ ꓡꓰꓽ ꓕꓶ ꓞ, ꓟ ꓟꓲ ꓠꓯ ꓞꓳ ꓤ ꓐꓴ ꓠꓬ ꓣꓳ ꓔꓯ ꓕꓲ ꓑ, ꓤ ꓐꓱ ꓶˍ ꓡꓰꓽ ꓬꓰ ꓙ ꓐ ꓡˍ ꓡꓳ꓿ ꓕꓲ ꓞꓲꓼ ꓕꓲ ꓑ ꓕꓶ ꓞ, ꓟ ꓪꓴ‐ꓢ ꓠꓬ ꓕꓲ ꓞꓲꓼ ꓢꓯꓼ ꓟꓬ ꓐꓱ ꓶ ꓬꓰ ꓙ ꓐ ꓡˍ ꓡꓳ꓿

ꓟꓲ ꓠꓯ ꓞꓳ ꓤ ꓡꓰ ꓬꓰ ꓙˍ ꓟ ꓗꓪ ꓠꓬ “ꓕꓱ ꓡꓱ ꓬꓰ ꓙˍ ꓟ ꓗꓪ ꓐꓰ ꓥꓪ ꓮ ꓡꓲ ꓟꓬ ꓟꓶˍ ꓡ꓾ ꓮ ꓡꓲ ꓫꓵꓽ ꓔꓯ ꓫꓴꓻ ꓗꓷˍ ꓡ” ꓐꓯˍ ꓟ ꓔꓯ ꓢꓪ. ꓢꓲ ꓬꓰ ꓙˍ ꓡꓳ꓿ ꓪꓴ‐ꓢ ꓬꓲ ꓬꓰ ꓙ ꓔꓳ, ꓙ꓾ ꓠꓬꓲ ꓙ ꓡꓳ. ꓙˍ ꓟ ꓗꓪ ꓠꓽ ꓖꓳ ꓡꓱ ꓟꓽ ꓥ꓿ ꓣꓳ ꓠꓬ ꓙ ꓖꓴ ꓥꓳꓽ ꓡꓰ ꓢꓲ ꓝꓴꓲ. ꓬꓰ ꓪ ꓡꓰˍ ꓟ ꓗꓪ ꓟꓲ ꓠꓯ ꓞꓳ ꓤ ꓐꓴ ꓠꓬ ꓟꓶ ꓤ ꓠꓲ, ꓟ ꓫꓵ ꓟꓽ ꓘꓴ꓿ ꓞꓳ ꓤ ꓠꓲ, ꓟ ꓫꓵˍ ꓟ ꓠꓬ ꓕꓲ ꓑ, ꓤ ꓡꓡꓰꓽ ꓥ ꓡꓳ꓿ ꓖꓳ  ꓡꓱ ꓥˍ ꓟꓲ ꓪꓴ‐ꓢ ꓬꓲ ꓖꓽ ꓖꓶ ꓠꓲ,꓾ ꓬꓲ ꓜꓲꓽ ꓘꓴ ꓠꓲ, ꓠꓬ ꓮ ꓕꓯ ꓟꓲ ꓟꓽ ꓡꓳ, ꓬꓰ꓿ ꓪꓴ‐ꓢ ꓠꓵꓻ ꓠꓲ, ꓠꓬ ꓕꓲ ꓞꓲꓼ ꓕꓶ ꓞ, ꓡꓳ꓿