ꓣꓳ ꓣꓱ ꓔꓬ ꓟ ꓑꓡꓮꓢꓔꓲꓚ ꓠꓬ ꓟꓲ ꓠꓯ ꓞꓳ ꓤ ꓐꓰ ꓟꓵꓽ ꓘꓳꓼ ꓔꓯ ꓫꓵꓽ ꓪꓴ ꓓꓽ ꓟ ꓖꓶ ꓟ ꓚꓱ, (Plastic Pollution)
ꓮ ꓙꓵꓽ ꓢꓴ ꓔꓯ ꓧꓪ. ꓧꓪ ꓠꓬꓲ. ꓠꓬꓲ ꓣꓳ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓣꓱ ꓔꓬ ꓟ ꓑꓡꓮꓔꓲꓚ ꓠꓬ ꓟꓵꓽ ꓘꓳꓼ ꓐꓰ ꓟꓲ ꓠꓯ ꓞꓳ ꓤ ꓔꓯ ꓮ ꓡꓰ ꓙꓲ ꓖꓴ ꓟꓽ ꓙꓲ ꓗꓷ ꓡꓰ ꓝꓲ ꓟ ꓚꓱ, ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ꓿ ꓑꓡꓮꓢꓔꓲꓚ ꓔꓯ ꓣꓳ ꓣꓱ ꓟ ꓝꓮꓲ ꓕꓱ ꓟ ꓑꓶ. ꓓꓴ ꓣꓳ ꓧꓪꓽ ꓖꓳ ꓓꓱ ꓔꓬ ꓢ ꓠ, ꓟ ꓐꓱ ꓶ ꓣꓳ ꓔꓯ ꓫꓵꓽ ꓪꓴꓽ ꓮ ꓡꓰ ꓐꓰ ꓒꓬꓱꓼ ꓡ ꓝꓲ ꓡ ꓐꓯ ꓠꓬ ꓑꓡꓮꓢꓔꓲꓚ ꓠꓬ ꓫꓵꓽ ꓪꓴꓽ ꓓꓽ ꓟ ꓕꓲ ꓟ ꓥ ꓡꓳ꓿
ꓣꓳ ꓟꓲ ꓠꓯ ꓡ ꓞꓳ ꓐꓴ ꓣꓱ ꓗꓷ ꓟ ꓑꓡꓮꓢꓔꓲꓚ ꓠꓬ ꓟꓲ ꓦꓲꓻ ꓢꓯꓼ ꓐꓱ ꓶ ꓥ ꓟꓲ ꓙꓲ ꓖꓴ ꓟꓽ ꓙꓳ ꓟ ꓥ ꓡꓳ꓿ ꓝꓮꓲ ꓟꓵꓽ ꓘꓳꓼ ꓐꓱ ꓶ ꓥ ꓟꓲ ꓫꓵꓽ ꓪꓴꓽ ꓓꓽ ꓟ ꓥ ꓡꓳ꓿ ꓑꓡꓮꓢꓔꓲꓚ ꓠꓬ (100) ꓟꓽ ꓞꓲ ꓟꓽ ꓟꓶ ꓟꓽ ꓐꓬ ꓡꓰ ꓟ ꓥ ꓡꓳ꓿ ꓟꓲ ꓠꓯ ꓞꓳ ꓤ ꓐꓴ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱ ꓓꓴ ꓗꓪ ꓢꓽ ꓢꓽ ꓐꓰ ꓣꓱ ꓗꓷ ꓥ ꓟꓲ ꓕꓱ ꓟ ꓠꓬ ꓫꓵꓽ ꓪꓴꓽ ꓓꓽ ꓟ ꓕꓲ ꓟ ꓥ ꓡꓳ꓿
ꓑꓡꓮꓢꓔꓲꓚ ꓠꓬ ꓢꓲ, ꓜꓲ ꓡꓳ ꓜꓲ, ꓙꓱ ꓤ ꓐꓰ ꓟꓲ ꓠꓯ ꓡ ꓞꓳ ꓐꓴ ꓔꓯ ꓫꓵꓽ ꓪꓴꓽ ꓓꓽ ꓟ ꓖꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓑꓡꓮꓢꓔꓲꓚ ꓔꓯ ꓤ ꓟꓳ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱ ꓟ ꓠꓯ, ꓗꓪ ꓐꓰ ꓑꓡꓮꓢꓔꓲꓚ ꓔꓯ ꓤ ꓟꓳ ꓢꓲ ꓠꓬꓲ ꓣꓳ ꓔꓬ ꓟ ꓗꓴꓷꓼ ꓣꓳ ꓔꓬ ꓟ ꓟꓵꓽ ꓘꓳꓼ ꓔꓯ ꓬꓰ ꓙ ꓓꓴ ꓬꓰ ꓡꓯ꓿
ꓛꓲ ꓡ ꓟ ꓣꓳ ꓤꓶꓻ ꓠꓯ ꓗꓪ ꓣꓳ ꓤ ꓠꓱ ꓐꓴ ꓔꓯ ꓠꓵꓻ ꓠꓲ, ꓠꓬ ꓑꓡꓮꓢꓔꓲꓚ ꓔꓯ ꓮ ꓘꓶ. ꓟꓽ ꓣꓱ ꓠ, ꓟ ꓤ ꓟꓳ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓪꓴꓽ ꓟꓴ ꓡ ꓟ ꓗꓴꓷꓼ ꓮ ꓟꓬ, ꓗꓪ ꓠꓬ ꓮ ꓟꓶ ꓟ ꓙꓵ, ꓗꓪ ꓑꓡꓮꓢꓔꓲꓚ ꓔꓯ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓙꓵꓽ ꓗꓽ ꓔꓶ ꓢꓲ ꓠꓬꓲ ꓟꓽ ꓣꓱ ꓝꓲ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓑꓡꓮꓔꓲꓚ ꓔꓯ ꓟꓽ ꓣꓱ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓳꓻ ꓔꓬ ꓟ ꓬꓲꓻ ꓙꓬ ꓠꓬ ꓮ ꓘꓶ. ꓫꓬ, ꓡꓰ ꓝꓲˍ ꓢꓲ ꓠꓬꓲ ꓙꓱ ꓤ ꓐꓰ ꓟꓵꓽ ꓘꓳꓼ ꓒꓳ, ꓡ ꓝꓲ ꓟ ꓔꓯ ꓗꓽ ꓕ ꓖꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓑꓡꓮꓢꓔꓲꓚ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓠꓲ, ꓠꓵ ꓡꓯ꓿ ꓣꓳ ꓔꓬ ꓟ ꓟꓲ ꓠꓯ ꓔꓯ ꓠꓲ, ꓠꓵ ꓠꓬ ꓑꓡꓮꓢꓔꓲꓚ ꓔꓯ ꓮ ꓘꓶ. ꓟꓽ ꓣꓱ ꓠ, ꓟ ꓤ ꓟꓳ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
