ꓙꓲꓻ ꓫꓬ ꓢꓴ ꓚꓰꓚꓲꓡꓲꓮ ꓚꓺ ꓟꓲꓽ (St. Cecilai)
ꓙꓲꓻ ꓫꓬ ꓢꓴ ꓚꓰꓚꓲꓡꓲꓮ ꓠꓬ ꓣꓳ‐ꓟ ꓗꓴꓷꓼ ꓗꓪ ꓮꓓ (180) ꓘꓳꓼ ꓕꓯ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ ꓐ, ꓐ ꓟ, ꓟ ꓐꓴ ꓠꓬ ꓮ ꓘꓶ. ꓛꓲ ꓒꓴ ꓫꓵꓺ ꓙꓳ ꓢꓴ ꓐꓴ ꓥ ꓡꓳ꓿ ꓙꓲꓻ ꓫꓬ ꓢꓴ ꓚꓰꓚꓲꓡꓲꓮ ꓔꓯ ꓠꓬ ꓪꓴ‐ꓢ ꓡꓰ ꓟꓴ ꓖꓪ ꓖꓪ ꓟ ꓡꓯ ꓫꓴ ꓖꓶ ꓟ ꓥ ꓡꓳ꓿ ꓬꓲ ꓠꓬ ꓬꓲ ꓤꓶꓻ ꓡꓱ ꓦꓲꓻ ꓢꓲꓽ ꓒ ꓟꓽ ꓣꓴ ꓠ, ꓟ ꓓꓴ ꓙ ꓔ ꓢꓴ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓬꓲ, ꓐ, ꓐ ꓢꓲ ꓟ, ꓟ ꓠꓬ ꓬꓲ ꓔꓯ ꓦꓮꓡꓰꓣꓲꓮꓠ ꓟꓬꓱꓺ ꓔ ꓟ ꓞꓳ ꓐꓳ ꓤ ꓐꓰ ꓦꓲꓻ ꓕꓵꓽ ꓗꓪ ꓕꓵꓽ ꓠ, ꓟ ꓙ ꓖꓶ ꓟ ꓥ ꓡꓳ꓿ ꓬꓲ ꓡꓯꓽ ꓒꓯ, ꓝ. ꓑꓮꓲꓽ ꓬꓰ ꓗꓷ ꓟ ꓙꓵ, ꓕꓯ ꓚꓰꓚꓲꓡꓲꓮ ꓠꓬ ꓬꓲ ꓕꓲ ꓣꓳ ꓕꓵꓼ ꓔꓬ ꓢꓲ ꓠꓬꓲ ꓪꓴ‐ꓢ ꓔꓯ ꓟꓴ ꓖꓪ ꓢꓯꓼ ꓗꓪ ꓐꓰ ꓫꓱ, ꓖꓶ ꓓꓳ ꓟꓴ ꓗꓷꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓔꓯ ꓠꓬ ꓟꓴ ꓖꓪ ꓖꓪ ꓢꓴ ꓐꓴ ꓔꓯ ꓬꓰ ꓙ ꓢꓴ ꓡꓳ. ꓙ ꓢꓴ ꓙꓲꓻ ꓫꓬ ꓢꓴ ꓐꓰ ꓟꓬꓱꓺ ꓓꓳꓽ ꓮ ꓘꓶ. ꓙꓳ ꓟ ꓥ ꓡꓳ꓿ ꓬꓲ ꓠꓬ ꓢꓯꓼ ꓮ ꓘꓶ. ꓙꓲ ꓢꓴ ꓥ ꓡꓳ꓿ ꓚꓰꓚꓲꓡꓲꓮ ꓐꓴ ꓡꓯꓽ ꓒꓯ, ꓝ. ꓑꓮꓲꓽ ꓬꓰ ꓓꓳ ꓗ. ꓠꓯ ꓬꓲ ꓠꓬꓲꓽ ꓫꓵˍ ꓔꓬ ꓟ ꓦꓲꓻ ꓗꓪ ꓓꓵ ꓡꓰ ꓟ ꓙꓵ, ꓕꓯ ꓚꓰꓚꓲꓡꓲꓮ ꓠꓬ ꓮ ꓘꓶ.ꓛꓲ ꓠꓲ, ꓟ ꓢꓲꓽ ꓫꓬ ꓟ ꓐꓰ ꓪꓴ‐ꓢ ꓔꓯ ꓮ ꓘꓶ. ꓛꓲ ꓦꓻ ꓡꓱ ꓢꓴ ꓙꓵꓻ ꓠꓲ, ꓙꓳ ꓢꓴ ꓥ ꓟ ꓔꓯ ꓬꓲ ꓢꓲꓽ ꓒ ꓢꓷ. ꓡꓰ ꓗ. ꓠꓯ, ꓬꓲ ꓠꓬꓲꓽ ꓪ ꓠꓬ ꓡꓯꓼ ꓒꓯ, ꓝ. ꓔ ꓥ ꓟꓲ ꓧꓪꓽ ꓖꓳ ꓓꓱ ꓟꓽ ꓑꓯ, ꓡꓯꓽ ꓘꓳ, ꓠ, ꓟ ꓐꓯ ꓞꓰ ꓔ ꓟ ꓥ ꓡꓳ꓿
ꓖꓳ ꓗ. ꓠꓯ ꓚꓰꓚꓲꓡꓲꓮ ꓬꓲ ꓦꓲꓻ ꓢꓲꓽ ꓒ ꓦꓰꓡꓰꓣꓲꓮꓠ ꓠꓬ ꓪꓴ‐ꓢ ꓔꓯ ꓦꓻ ꓡꓱ ꓡ ꓢꓴ ꓕꓲ ꓣꓳ ꓒꓬꓱꓼ ꓡ ꓢꓲ ꓠꓬꓲ ꓧꓪꓽ ꓓꓱ ꓔꓲ ꓟꓶ ꓡꓰ ꓟ ꓥ ꓡꓳ꓿ ꓦꓲꓡꓰꓣꓲꓮꓠ ꓧꓪ ꓖꓳ ꓓꓱ ꓓꓳ ꓡꓰ ꓗ. ꓠꓯ ꓟꓴ ꓗꓪ ꓝꓲ ꓓꓴ ꓦꓕꓲ ꓣꓳ ꓠꓬ ꓬꓲ ꓔꓯ ꓟꓳ. ꓖꓶ ꓡ ꓟ ꓥ ꓡꓳ꓿ ꓖꓳ ꓟ ꓔꓯ ꓦꓲꓡꓰꓣꓲꓮꓠ ꓡꓳ. ꓟꓳ ꓗꓷ ꓟ ꓥ ꓡꓳ꓿ ꓟꓴ ꓗꓪ ꓝꓲ ꓓꓴ ꓡꓰ ꓚꓰꓚꓲꓡꓲꓮ ꓔꓯ ꓮ ꓘꓶ. ꓛꓲ ꓡꓳ. ꓐꓲ ꓟ ꓢꓲ ꓪꓰ ꓔꓯ ꓕꓯꓺ ꓡ ꓢꓲ ꓠꓬꓲ ꓦꓴ ꓖꓶ ꓟ ꓔꓯ ꓡꓳ. ꓟꓳ ꓪ ꓡꓳ꓿
ꓚꓰꓚꓲꓡꓲꓮ ꓠꓬ ꓬꓲ ꓦꓲꓻ ꓢꓲꓽ ꓒ ꓥ ꓟ ꓦꓲꓡꓰꓣꓲꓮꓠ ꓬꓲ ꓮ ꓬꓲ ꓔꓯ ꓥ ꓟꓲ ꓪꓴ‐ꓢ ꓦꓻ ꓡ ꓠ, ꓟ ꓟ.ꓟꓲ ꓚꓺ ꓗꓷ ꓢꓲ ꓠꓬ ꓖꓳ ꓓꓱ ꓔꓲ ꓖꓶ ꓟꓶ ꓡꓰ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓮꓓ (192) ꓘꓳꓼ ꓣꓳ‐ꓟ ꓗꓴꓷꓼ ꓗꓪ ꓪ ꓔꓲ ꓚꓳꓟꓟꓳꓓꓴꓢ ꓠꓬ ꓪꓴ‐ꓢ ꓦꓻ ꓡꓱ ꓢꓴ ꓐꓴ ꓔꓯ ꓮ ꓘꓶ. ꓛꓲ ꓢꓰꓼ ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓗꓷ ꓟ ꓥ ꓡꓳ꓿ ꓗ. ꓠꓯ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓚꓰꓚꓲꓡꓲꓮ ꓔꓯ ꓥ ꓟꓲ ꓣꓴ ꓟꓶ ꓡꓰ ꓢꓴ ꓠꓬꓲ ꓦꓻ ꓡꓱ ꓚꓱ, ꓑꓶ. ꓓꓴ ꓢꓰꓼ ꓗꓷ ꓟ ꓥ ꓡꓳ꓿
ꓚꓰꓚꓲꓡꓲꓮ ꓠꓬ ꓬꓲ ꓠꓯ ꓐꓯ ꓟꓴ ꓘꓶꓽ ꓢꓴ ꓥ ꓟ ꓐꓯ ꓟꓴ ꓫꓬ ꓒꓽ ꓔꓯ ꓟꓽ ꓙꓳꓺ ꓙꓳꓺ ꓪꓴ‐ꓢ ꓦꓻ ꓡꓱ ꓢꓴ ꓔꓯ ꓮ. ꓔꓳ ꓟꓽ ꓢꓰꓼ ꓠ, ꓟ ꓐꓯ ꓗꓷꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓐꓯ ꓟꓴ ꓫꓬ ꓒꓽ ꓠꓬ ꓙꓲꓻ ꓫꓬ ꓢꓴ ꓚꓰꓚꓲꓡꓲꓮ ꓡꓯ, ꓐꓲ ꓔꓯ ꓢꓽ ꓧꓪ ꓮꓽ ꓕꓽ ꓡꓰ ꓓꓶ ꓗꓷ ꓟ ꓥ ꓡꓳ꓿ ꓚꓰꓚꓲꓡꓲꓮ ꓧꓪꓽ ꓖꓳ ꓓꓱ ꓔꓯ ꓚꓮꓡꓡꓲꓢꓔꓴꓢ ꓟꓬꓱꓺ ꓔ ꓟ ꓡꓯꓼ ꓜꓳ ꓗꓪ ꓔꓵꓼ ꓔ ꓟ ꓥ ꓡꓳ꓿ ꓖꓳ ꓗ. ꓠꓯ ꓚꓧꓴꓚꓧ ꓳꓝ ꓮꓠꓚꓔꓮ ꓚꓰꓚꓲꓡꓲꓮ ) ꓪꓽ ꓘꓴ ꓦꓲꓻ ꓗꓪ ꓚꓲ. ꓔ ꓟ ꓥ ꓡꓳ꓿
1599 ꓘꓳꓼ ꓕꓯ ꓚꓰꓚꓲꓡꓲꓮ ꓧꓪꓽ ꓖꓳ ꓓꓱ ꓔꓯ ꓝꓮꓲ ꓡꓳ. ꓠꓬꓲ ꓟ ꓙꓵ, ꓕꓯ ꓟꓽ ꓟꓶ ꓟꓽ ꓐꓬ ꓡꓰ ꓙꓳ ꓟ ꓔꓯ ꓡꓳ. ꓟꓳ ꓟ ꓥ ꓡꓳ꓿ ꓚꓰꓚꓲꓡꓲꓮ ꓠꓬ ꓬꓲ ꓟꓶ ꓔꓬ ꓟ ꓡꓰ ꓐꓰ ꓬꓲ ꓔ ꓔꓬ ꓟ ꓥ ꓡꓳ꓿
