ꓪꓴ‐ꓢ ꓠꓬ ꓬꓲ ꓤ ꓠꓱ ꓤ ꓐꓴ ꓮ ꓙꓵ ꓐꓱ ꓶ ꓢꓲ ꓡꓲ, ꓗ, ꓛꓲ ꓠ, ꓟ ꓠꓲ, ꓫꓵ_ ꓡꓳ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓙꓲ ꓢꓴ ꓢꓲ ꓤ ꓐꓴ ꓠꓯꓼ ꓗꓪ ꓙ ꓘꓶ_ ꓟ꓾ ꓫ ꓙꓵ ꓟꓷꓼ ꓙꓵ ꓬꓰ_ ꓟ ꓔꓯ ꓟꓽ ꓙꓳ ꓠ, ꓟ ꓐꓱ ꓶ ꓶ ꓓꓰ ꓢꓲ ꓠꓬꓲ ꓙꓵ ꓙꓵ ꓟꓴ ꓟꓴ ꓬꓰ_ ꓟ ꓮ ꓙꓵ ꓔꓯ ꓠꓽ ꓗꓷ ꓠ, ꓟ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓮ ꓟꓬ, ꓐꓱ ꓶ ꓙꓲ ꓖꓴ ꓙꓳ ꓠ, ꓟ ꓐꓱ ꓶ ꓕꓲ ꓪ ꓬꓰ ꓐ ꓡ ꓠ, ꓟ ꓪꓽ ꓘꓴ ꓖꓶ ꓗꓷ ꓟ ꓥꓳ꓿
ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓜꓲ ꓜꓲ ꓟꓴ ꓟꓴ ꓬꓰ_ ꓟ ꓐꓰ ꓗꓴꓷꓼ ꓫꓵ ꓪꓴ ꓑꓶ ꓓꓴ ꓢꓰꓼ ꓡꓯ ꓘꓳ ꓟ ꓗꓪ ꓐꓰ ꓔꓳ, ꓜꓳ ꓔꓬ ꓡꓰ ꓢꓴ ꓐꓴ ꓐꓱ ꓶ ꓔꓱ_ ꓟ ꓠꓲ, ꓟ ꓘꓴ ꓗꓪ ꓐꓰ ꓶ ꓓꓰ ꓗꓷ ꓟ ꓥꓳ꓿ ꓖꓳ ꓟ ꓡꓰ ꓐꓰ ꓙꓲ ꓢꓴ ꓢꓲ ꓤ ꓐꓴ ꓠꓯꓼ ꓗꓪ ꓙ ꓘꓶꓽ ꓟ ꓐꓰ ꓫ ꓙꓵ ꓟꓷꓼ ꓙꓵ ꓓꓴ ꓬꓰ_ ꓟ ꓔꓯ ꓠꓲ, ꓟ ꓟꓽ ꓢ ꓟ ꓚꓱ, ꓐꓯ ꓔ ꓡꓳ꓿
ꓟꓬ ꓠꓬꓲ ꓠꓬ꓾ ꓐꓮꓠꓖꓡꓮꓓꓰꓢꓧ꓾ ꓠꓲꓖꓰꓣꓲꓮ꓾ ꓟꓳꓜꓮꓟꓐꓲQꓴꓰ꓾ ꓢꓴꓓꓮꓠ꓾ ꓐꓰ ꓠꓱ. ꓐꓯꓼ ꓗꓴꓷꓼ ꓗꓪ ꓪꓽ ꓘꓴ ꓟ ꓙꓵ, ꓗꓪ ꓬꓲ ꓜꓴ ꓬꓲ ꓟꓯꓼ ꓢꓰꓼ ꓡ ꓟ꓾ ꓫꓵ ꓪꓴ ꓔꓯ ꓮ ꓕꓯ ꓟꓲ ꓑ ꓙ ꓔꓬ ꓟ ꓥꓳ꓾ “ꓪꓴ‐ꓢ ꓠꓬ ꓬꓲ ꓤ ꓠꓱ ꓤ ꓐꓴ ꓔꓯ ꓮ ꓕꓯ ꓟꓲ ꓢꓲ ꓡꓲ, ꓗ, ꓛꓲ ꓟꓶ ꓠ, ꓟ ꓠꓲ, ꓡꓶꓽ ꓙꓳ_ ꓡꓳ꓾ ꓐꓰ ꓐꓯ ꓔ ꓡꓳ꓿
ꓖꓳ ꓟ ꓡꓰ ꓐꓰ ꓚꓳꓠꓖꓳ ꓗꓴꓷꓼ ꓖꓴ ꓪꓴ. ꓗꓲꓦꓴ ꓗꓪ ꓫ ꓙꓵ ꓟꓷꓼ ꓙꓵ ꓔꓳ, ꓜꓳ ꓔꓬ ꓟ ꓕꓲ ꓦꓲꓻ ꓢꓴ ꓐꓰ ꓠꓶꓽ ꓞ, ꓢꓲ ꓕꓲ ꓪ ꓔꓬ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓠꓽ ꓥꓪꓽ ꓠꓬꓲ ꓟꓶ ꓘꓶꓼ ꓙꓵ, ꓕꓯ ꓛꓴ ꓙꓳ ꓡ ꓢꓴ ꓐꓴ ꓠꓬ ꓐꓬꓮꓟꓐꓪꓰ ꓞꓳ ꓘ, ꓗꓪ ꓪꓽ ꓘꓴ ꓦꓲꓻ ꓗꓪ ꓐꓰ ꓒꓴ ꓔ ꓟ ꓠꓯꓻ ꓞꓲꓼ ꓦꓲꓻ ꓕꓲ ꓟ ꓗꓪ ꓑ ꓫꓬ 20 ꓣꓳ ꓔꓯ ꓢꓰꓼ ꓗꓷ ꓟ ꓥꓳ꓿
“ꓕꓱ ꓡꓱ ꓫ ꓙꓵ ꓓꓴ ꓮ ꓙꓵ ꓔꓯ ꓠꓽ ꓗꓷ ꓢꓲ ꓠꓬꓲ ꓙꓲ ꓢꓴ ꓢꓲ ꓤ ꓐꓴ ꓠꓬ ꓮ ꓟꓬ, ꓐꓱ ꓶ ꓙꓲ ꓖꓴ ꓙꓳ ꓠ, ꓟ ꓕꓲ ꓠꓲ, ꓕꓲ ꓪꓢꓯꓼ ꓕꓵꓼ ꓐ ꓡ ꓠ, ꓟ ꓪꓽ ꓘꓴ ꓓꓴ ꓬꓰ ꓡꓯ꓾”
ꓔꓲꓺ ꓒ ꓪ ꓔꓲ ꓡꓰ ꓴꓗꓣꓮꓲꓠꓰ꓾ ꓗꓬꓲꓦ ꓡꓳ ꓒꓱ ꓓꓳꓽ ꓔꓯ ꓮ ꓕꓯ ꓟꓲ ꓠꓬꓲ ꓠ. ꓔꓬ ꓡꓳ꓾ ꓕꓱ ꓛꓴ ꓙꓳ ꓡ ꓟ ꓠꓬ ꓑ ꓫꓬ ꓐꓴ ꓔꓯ ꓫ ꓙꓵ ꓝꓲ_ ꓟ꓾ ꓔꓬ ꓦꓲꓻ ꓐꓬ ꓡꓰ ꓝꓲ_ ꓟ꓾ ꓢꓯꓼ ꓟꓬ ꓟꓶꓽ ꓡꓰ ꓝꓲ_ ꓟ ꓡꓰ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
“ꓢꓰꓼ ꓡꓯ ꓘꓳ ꓟ ꓐꓰ ꓐꓬ ꓡꓰ ꓝꓲ_ ꓟ ꓠꓬ ꓣꓳ ꓫꓱ, ꓕꓽ ꓗꓷ ꓡꓰ ꓝꓲ꓾ ꓐꓰ ꓐꓯ ꓔ ꓡꓳ꓾ ꓗꓴꓷꓼ ꓫꓵ ꓪꓴ ꓑꓶ ꓓꓴ ꓢꓰꓼ ꓡꓯ ꓘꓳ ꓔꓬ ꓐꓰ ꓔꓳ, ꓜꓳ ꓔꓬ ꓟ ꓴꓗꓣꓮꓲꓠꓰ ꓗꓪ ꓔꓱ, ꓜꓳ ꓢꓲ ꓟꓶ ꓫꓵ ꓟ ꓢꓲ ꓡꓲ, ꓗ, ꓛꓲ ꓓꓴ ꓪ ꓟꓶ ꓠ, ꓟ ꓐꓱ ꓶ ꓕꓲ ꓠꓲ, ꓕꓲ ꓪ ꓪꓽ ꓘꓴ ꓓꓴ ꓬꓰ ꓡꓯ꓾”
ꓔꓲꓺ ꓒ ꓪ ꓔꓲ ꓡꓰ ꓙ ꓖꓴ ꓗꓪ ꓟꓳ‐ꓓꓳ ꓕꓯꓼ ꓫꓵ ꓡꓰ ꓢꓴ ꓐꓴ ꓐꓱ ꓶ ꓥ ꓟꓲ ꓪꓽ ꓘꓴ ꓙ ꓔꓬ ꓟ ꓥ ꓡꓳ꓾ ꓠꓽ ꓢꓽ ꓠꓬꓲ ꓕꓯ ꓖꓴ ꓪꓴ. ꓑꓰꓣꓴ ꓗꓪ ꓗꓷ ꓡꓰ ꓟ ꓟꓳ‐ꓓꓳ ꓕꓯꓼ ꓢꓲ ꓞꓳ ꓤ ꓫꓵꓻ ꓡꓰ ꓟ ꓥ ꓡꓳ꓾ ꓖꓳ ꓟ ꓡꓰ ꓐꓰ ꓚꓧꓮꓡꓮ ꓗꓪ ꓐꓰ ꓮꓣꓰQꓴꓲꓑꓮ ꓗꓪ ꓙꓰ_ ꓟ ꓟꓳ‐ꓓꓳ ꓠꓬ ꓠꓱ. ꓐꓯꓼ ꓟꓳ‐ꓓꓳ ꓕꓲ ꓟ ꓐꓰ ꓕꓯꓼ ꓡꓰ ꓢꓲ ꓐ ꓘꓶꓽ ꓗꓪ ꓞꓰ ꓡꓰ ꓟ ꓗꓪ ꓐꓰ ꓞꓳ ꓤ 37 ꓣꓳ ꓟꓽ ꓞꓲ ꓫꓵꓻ ꓡꓰ ꓟ ꓥ ꓡꓳ꓾ ꓕꓱ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰꓳ ꓡꓰ ꓪꓽ ꓘꓴ ꓙ ꓔꓬ ꓟ ꓥ ꓡꓳ꓿
“ꓪꓴ‐ꓢ ꓠꓬ ꓫꓵꓻ ꓡꓰ ꓢꓴ ꓐꓴ ꓔꓯ ꓘꓳ, ꓣꓴ ꓝꓲ꓾ ꓠꓻ ꓓꓴ ꓡꓰ ꓢꓴ ꓐꓴ ꓔꓯ ꓫꓬ, ꓖꓶ ꓝꓲ꓾ ꓠꓲ, ꓫ. ꓟꓬ ꓫ. ꓔꓳ, ꓜꓳ ꓔꓬ ꓢꓴ ꓔꓯ ꓠꓲ, ꓗꓳ ꓟꓬ ꓗꓳ ꓖꓶ ꓝꓲ꓾ ꓐꓰ ꓐꓯ ꓔ ꓡꓳ꓿ ꓕꓱ ꓡꓱ ꓟꓽ ꓓꓵ ꓙ ꓟ ꓗꓪ ꓐꓰ ꓗꓷ ꓡꓰ ꓟ ꓗꓪ ꓐꓰ ꓫꓵꓻ ꓡꓰ ꓢꓴ ꓐꓴ ꓔꓯ ꓮ ꓕꓯ ꓟꓲ ꓓꓵꓽ ꓙ ꓢꓲ ꓪꓽ ꓘꓴ ꓙ ꓓꓴ ꓬꓰ ꓡꓯ꓾ ꓣꓳ ꓮ ꓙꓵ ꓥ ꓟꓲ ꓕꓱ ꓟ ꓗꓪ ꓐꓰ ꓚꓲ ꓛꓬ ꓓꓵꓽ ꓙ ꓔꓱ, ꓕ ꓓꓴ ꓬꓰ ꓡꓯ꓾ ꓐꓰ ꓢꓯꓼ ꓖꓶ ꓔ ꓡꓳ꓿
