ꓫ. ꓙꓵ ꓟꓷꓼ ꓙꓵ ꓔꓳ, ꓜꓳ ꓔꓬ ꓟ ꓙꓲ ꓢꓴ ꓢꓲ ꓤ ꓐꓴ ꓠꓬ ꓔꓱ, ꓟ ꓐꓰ ꓥꓳ ꓡꓳ. ꓓꓴ ꓔꓯ ꓢꓷ. ꓙ ꓟꓳ ꓙ ꓟ ꓥ ꓡꓳ꓾
11 ꓦ ꓟ 16 ꓠꓬꓲ ꓟꓵꓽ ꓗꓳ. ꓓꓵ ꓓꓵ ꓫ. ꓔꓬ ꓢꓴ ꓦꓬꓼ ꓠꓬꓲ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ “ꓚꓺ ꓟꓲꓽ ꓗꓪ ꓫ. ꓙꓵ ꓡꓳ, ꓬꓰ ꓟ ꓐꓰ ꓬꓲ ꓟꓶꓽ ꓟ ꓦꓬꓼ ꓠꓬꓲ ꓔꓯ ꓓꓵꓽ ꓙ ꓔꓱ, ꓕ ꓠ, ꓟ ꓣꓳ ꓔꓯ ꓘꓴ ꓔ ꓡꓳ꓾ ꓖꓳ ꓡꓱ ꓥ ꓟꓲ ꓟꓲ ꓠꓯ ꓬꓲ ꓟꓶꓽ ꓕꓲ ꓠꓬꓲ ꓗꓪ ꓒꓬꓱꓼ ꓡ ꓟ ꓢꓰꓼ ꓡꓯ ꓘꓳ ꓓꓴ꓾ ꓔꓳ, ꓡꓯ ꓘꓳ ꓓꓴ ꓔꓯ ꓟꓽ ꓙꓳꓺ ꓠ, ꓟ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓔ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓓꓳꓽ ꓠꓬ ꓮ ꓟꓶ ꓟ ꓦꓬꓼ ꓠꓬꓲ ꓐꓰ ꓮ ꓘꓶ. ꓛꓲ ꓫꓱꓽ_ ꓟ꓾ ꓣꓳ ꓠꓬ “ꓡ ꓞꓳ ꓮ ꓟꓬ, ꓔꓯ ꓫ ꓙꓵ_ ꓟ ꓫꓵ ꓪꓴ꓾ ꓕꓱ ꓡꓱ ꓫ. ꓓꓴ ꓟꓷꓼ ꓓꓴ ꓮ ꓟꓬ, ꓟ ꓓꓳꓽ ꓔꓯ ꓑ ꓙ ꓪ ꓟꓶ ꓔꓬ ꓟ ꓥꓳ꓾ ꓔꓳ, ꓜꓳ ꓔꓬ ꓟ ꓥꓳ꓾” ꓖꓳ ꓡꓱ ꓥ ꓟꓲ ꓕꓱ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓙꓲ ꓢꓴ ꓢꓲ ꓤ ꓐꓴ ꓔꓯ ꓢꓲ ꓒꓽ ꓠꓬ ꓠꓲ, ꓗꓳ. ꓟꓬ ꓗꓳ. ꓖꓶ_ ꓟ ꓥꓳ꓾ ꓟꓬ ꓠꓬꓲ ꓠꓯꓺ ꓞꓲ, ꓠꓬ ꓙꓵꓻ ꓠꓲ, ꓠꓬ ꓟꓶꓽ ꓞ ꓡꓰ ꓐꓰ ꓟꓬ ꓠꓬꓲ ꓐꓻ ꓡ ꓥꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
ꓡꓴ‐ꓘ ꓕꓳ ꓶ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓟꓬꓱ ꓪꓴ. ꓠꓬꓲ ꓡ ꓞꓳ ꓮ ꓟꓬ, ꓫ ꓙꓵ ꓟꓷꓼ ꓙꓵ ꓓꓴ ꓢꓰꓼ ꓡꓯ ꓘꓳ ꓓꓴ ꓔꓳ, ꓜꓳ ꓡ ꓢꓲ ꓠꓬꓲ ꓙꓲ ꓢꓴ ꓐꓱ ꓶ ꓢꓷ. ꓙ ꓟꓳ ꓙ ꓠ, ꓟ ꓬꓲ ꓙꓵ, ꓗꓷ ꓡꓰ ꓟ ꓔꓯ ꓠꓬꓲꓽ ꓧꓪ, ꓕꓵꓼ ꓪ ꓖꓶ ꓔ ꓟ ꓥ ꓢꓲ ꓠꓬꓲ ꓮ ꓙꓵ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓔꓯꓺ ꓢꓳꓻ ꓣꓴ ꓢꓲ ꓛꓳ ꓫꓱꓽ ꓠ, ꓟ ꓘꓴ ꓔ ꓟꓶ_ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓥꓳ꓿
ꓫ ꓙꓵ ꓟꓷꓼ ꓙꓵ ꓝꓲ_ ꓟ ꓠꓬ ꓑꓳꓺ ꓡ ꓛꓴ. ꓗꓪ ꓐꓰ ꓡꓰ ꓢꓰꓼ ꓟ ꓡꓰ ꓟꓽ ꓥ꓾ ꓐꓯ ꓘꓶꓽ꓾ ꓘꓶ. ꓘꓶꓽ꓾ ꓓꓵ ꓙ ꓟ ꓗꓪ ꓐꓰ ꓥ ꓟꓲ ꓮ ꓟꓬ, ꓫꓵ ꓗꓪ ꓐꓰ ꓥ ꓟꓲ ꓒꓬꓱꓼ ꓡꓰ ꓗꓴ._ ꓡꓳ꓿ ꓕꓱ ꓡꓱ ꓫ ꓙꓵ ꓓꓴ ꓠꓬ ꓮ ꓕꓯ ꓟꓲ ꓟꓽ ꓥ꓾ ꓟꓶ ꓫꓵꓻ ꓡꓰ ꓫꓵ ꓟꓽ ꓥ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓥ ꓡꓳ꓿ ꓟꓲ ꓠꓯ ꓬꓲ. ꓟꓶꓽ ꓦꓬꓼ ꓠꓬꓲ ꓞ, ꓠꓬꓲ ꓫꓵ ꓠꓬꓲ ꓔꓳ, ꓜꓳ ꓔꓬ ꓡ ꓟ ꓗꓪ ꓐꓰ ꓣꓳ ꓠꓬ ꓚꓲ ꓛꓬ ꓠꓲ, ꓟ ꓢꓯꓼ ꓙꓲ ꓖꓴ ꓙꓳ ꓡꓰ ꓝꓲ_ ꓡꓳ꓾ ꓚꓺ ꓟꓲꓽ ꓗꓪ ꓔꓳ, ꓜꓳ ꓡ ꓟ ꓬꓲ ꓚꓱ, ꓐꓰ ꓛꓬ ꓥꓳꓽ ꓡꓰ ꓟ ꓮ ꓙꓵ ꓔꓯ ꓝꓮꓲ ꓔꓳ, ꓐ ꓡꓰ ꓠ, ꓟ ꓣꓳ ꓔꓯ ꓢꓯꓼ ꓪ ꓖꓶ ꓡ ꓡꓳ꓾
ꓕꓲ ꓟꓲ ꓠꓯ ꓡꓱꓼ ꓗꓪ ꓢꓲ ꓒ ꓬꓰ‐ꓢꓴ ꓟꓬꓱ ꓗꓪ ꓐꓰ ꓔꓳ, ꓜꓳ ꓔꓬ ꓟ ꓫ ꓙꓵ ꓓꓴ ꓐꓰ ꓔꓳ, ꓜꓳ ꓔꓬ ꓟ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓰ ꓪ ꓡꓯ ꓘꓳ ꓢꓲ ꓠꓬꓲ ꓟ, ꓟ ꓟ‐ꓡꓲ ꓡꓰ ꓪꓽ ꓘꓴ ꓬꓰ ꓙ ꓡꓰ ꓝꓲ꓾ ꓔꓳ, ꓜꓳ ꓡ ꓟ ꓫ ꓓꓴ ꓠꓯꓼ ꓗꓪ ꓟ, ꓟ ꓟ‐ꓡꓲ ꓗꓪ ꓐꓰ ꓣꓳ ꓔꓯ ꓠꓲ, ꓗꓳ. ꓟꓬ ꓗꓳ ꓟꓶ ꓡꓰ ꓝꓲ꓾ ꓐꓰ ꓬꓲ. ꓟꓶꓽ ꓢꓰꓼ ꓔ ꓡꓳ꓿
