ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓽ ꓡ ꓟ ꓚꓱ, (Global warming)
ꓠꓬꓲ. ꓠꓬꓲ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓘꓶ. ꓞꓽ ꓡ ꓟ ꓚꓱ, ꓥ ꓡꓳ꓿ ꓗꓳ. ꓗꓷ ꓟ 2020 ꓘꓳꓼ ꓠꓬ ꓟꓲ ꓠꓯ ꓚꓺ ꓟꓲꓽ ꓗꓪ ꓮ ꓘꓶ. ꓛꓲ ꓞꓽ ꓗꓷ ꓟ ꓘꓳꓼ ꓕꓲ ꓘꓳꓼ ꓥ ꓡꓳ ꓐꓰ ꓢꓷ. ꓠꓲ, ꓙꓳ ꓒꓽ ꓐꓴ ꓡꓰ ꓐꓯ ꓟ. ꓔ ꓟ ꓥ ꓡꓳ꓿ ꓟꓲ ꓠꓯ ꓕꓱ ꓟ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓽ ꓡ ꓟ ꓠꓬ ꓗꓳ. ꓗꓷ ꓟ 2005 ꓘꓳꓼ ꓗꓪ ꓐꓰ ꓝ. ꓢꓲ ꓠꓬꓲ ꓞꓽ ꓡ ꓟ ꓥ ꓢꓲ 2015 ꓘꓳꓼ ꓗꓪ ꓠꓬ ꓮ ꓘꓶ. ꓛꓲ ꓞꓽ ꓡ ꓟ ꓬꓲ ꓙꓵ, ꓥ ꓡꓳ꓿
ꓕꓱ ꓡꓱ ꓐꓰ ꓟꓲ ꓠꓯ ꓗꓪ ꓞꓽ ꓢꓯꓼ ꓟꓬꓽ ꓡꓰ ꓟ ꓠꓬ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓟꓵꓽ ꓗꓪ ꓢꓲ, ꓟꓽ ꓙꓳ ꓗꓷ ꓡꓰ ꓟ ꓪꓴ. ꓠꓬꓲ ꓥ ꓡꓳ꓿ ꓕꓲ ꓗꓴꓷꓼ ꓡꓰ ꓕꓲ ꓗꓴꓷꓼ ꓗꓪ ꓟꓵꓽ ꓘꓳ ꓮ. ꓔꓳ ꓐꓬ ꓡꓰ ꓟ ꓪꓴ. ꓠꓬꓲ ꓢꓲ, ꓜꓲ ꓟꓽ ꓙꓳ ꓗꓷ ꓡꓰ ꓟ ꓪꓴ. ꓠꓬꓲ ꓒꓬꓱꓼ ꓡ ꓟ ꓫꓵꓽ ꓠꓬ ꓟꓶ ꓞꓽ ꓮ ꓘꓶ. ꓞꓽ ꓡ ꓟ ꓥ ꓡꓳ꓿ ꓝꓮꓲ ꓡ ꓞꓳ ꓡꓰ ꓬꓰ ꓟ ꓙꓼ ꓫꓵꓽ ꓙꓼ ꓙꓵꓽ ꓥ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓽ ꓡ ꓢꓲ ꓠꓬꓲ ꓟꓴ ꓘꓴꓽ ꓥ ꓟꓲ ꓮ ꓘꓶ. ꓓꓳ ꓡ ꓟ ꓪꓴ. ꓠꓬꓲ ꓟꓲ ꓠꓯ ꓞꓽ ꓡ ꓝꓲ ꓟ ꓔꓯ ꓒꓬꓱꓼ ꓡ ꓝꓲ ꓟ ꓥ ꓡꓳ꓿ ꓟꓲ ꓠꓯ ꓞꓽ ꓡ ꓝꓲ ꓟ ꓫꓵꓽ ꓪꓴꓽ ꓠꓬ ꓕꓱ ꓠꓬꓲꓽ ꓫꓵꓽ ꓠꓬ ꓫꓵꓽ ꓪꓴꓽ ꓓꓽ ꓥ ꓡꓳ꓿
ꓟꓲ ꓠꓯ ꓞꓽ ꓢꓯꓼ ꓠꓬ 1990 ꓘꓳꓼ ꓗꓪ ꓐꓰ ꓠꓬꓲ. ꓠꓬꓲ ꓗꓪ ꓠꓬ ꓮ ꓘꓶ. ꓞꓽ ꓡ ꓟ ꓔꓯ ꓡꓳ. ꓟꓳ ꓓ ꓡꓳ꓿ ꓕꓱ ꓡꓰ ꓐꓰ ꓟꓵꓽ ꓘꓳꓼ ꓦꓬꓼ ꓠꓬꓲ ꓮ ꓘꓶ. ꓛꓲ ꓒꓳ, ꓡ ꓟ ꓑꓶ. ꓓꓴ ꓟꓶ ꓦ ꓥ ꓟꓲ ꓬꓲ ꓙꓵ, ꓟꓽ ꓙꓳ ꓦꓻ ꓟ ꓒꓬꓱꓼ ꓡ ꓢ ꓠꓬꓲ ꓬꓲꓻ ꓙꓬ ꓙꓵꓽ ꓟ ꓟꓵꓽ ꓡꓶꓽ ꓟ ꓮ ꓟꓬ, ꓫꓵꓽ ꓒꓬꓱꓼ ꓡ ꓟ ꓥ ꓡꓳ꓿ ꓟꓵꓽ ꓘꓳꓼ ꓒꓳ, ꓡ ꓟ ꓪꓴ. ꓠꓬꓲ ꓟꓵꓽ ꓗꓴ. ꓮ ꓟꓬ, ꓙꓳ ꓡ ꓢꓲ ꓠꓬꓲ ꓟꓶ ꓦ ꓟ ꓟꓵꓽ ꓖꓴꓽ ꓑꓴꓽ ꓟ ꓮ ꓟꓬ, ꓒꓬꓱꓼ ꓡ ꓟ ꓥ ꓡꓳ꓿
ꓗꓳ. ꓗꓷ 2020 ꓘꓳꓼ ꓕꓯ ꓟꓲ ꓠꓯ ꓗꓴꓷꓼ ꓮ ꓟꓬꓽ ꓗꓪ ꓮ. ꓔꓳ ꓐꓬ ꓡꓰ ꓒꓬꓱꓼ ꓗꓷ ꓟ ꓪꓴ. ꓠꓬꓲ ꓟꓽ ꓫꓬꓽ ꓟ ꓟꓲ ꓦꓲꓻ ꓠꓬ ꓟꓶ ꓦꓲꓻ ꓘꓴꓽ ꓗꓪ ꓮ ꓟꓬ, ꓙꓳ ꓡꓰ ꓟ ꓥ ꓡꓳ꓿ ꓕꓱ ꓡꓰ ꓒꓬꓱꓼ ꓡ ꓟ ꓠꓬ ꓢꓲ, ꓜꓲ ꓮ ꓟꓬ, ꓟꓽ ꓙꓳ ꓗꓷ ꓡꓰ ꓟ ꓪꓴ. ꓠꓬꓲ ꓥ ꓡꓳ꓿ ꓢꓲ, ꓜꓲ ꓔꓯ ꓮꓽ ꓔꓳ ꓔꓳ ꓕꓽ ꓐꓬ ꓡꓰ ꓝꓲ ꓡꓯ꓿ ꓢꓲ, ꓜꓲ ꓔꓯ ꓮ ꓟꓬ, ꓔꓶ ꓓꓴ ꓬꓰ ꓡꓯ꓿ ꓟꓲ ꓠꓯ ꓞꓳ ꓤ ꓔꓯ ꓢꓯꓼ ꓦꓻ ꓓꓴ ꓖꓶ ꓟ ꓟꓲ ꓦꓲꓻ ꓔꓯ ꓠꓬ ꓢꓲ, ꓗꓪ ꓐꓰ ꓖꓶ ꓔꓬ ꓟ ꓥ ꓡꓳ꓿ ꓢꓲ, ꓜꓲ ꓮ ꓟꓬ, ꓔꓶ ꓓꓴ ꓬꓰ ꓡꓯ꓿
