ꓢꓴ-ꓓꓮꓠ ꓗꓴꓷꓼ ꓗꓪ ꓟꓯꓼ ꓐꓰ ꓣꓢꓝ ꓐꓴ ꓠꓬꓲ: ꓗꓴ. ꓚꓸꓼ ꓗꓪ ꓗꓳꓓꓳꓣꓝꓮꓠ ꓔꓱꓹ ꓫꓵ ꓟꓵ: ꓗꓪ ꓢꓰꓼ ꓡꓯ ꓘꓳˍ ꓟ ꓮ ꓘꓶ. ꓪ: ꓠꓬꓲ ꓡ ꓟ ꓑꓶ. ꓓꓴ ꓑ ꓫꓬ ꓬꓲ ꓔꓴ ꓣꓳ ꓛꓲ ꓠꓬ ꓬꓲ ꓪ ꓦꓲꓻ ꓔꓯ ꓡꓳ ꓔ ꓬꓰ ꓢꓲ ꓔꓷꓹ ꓛꓰꓹ ꓔꓬ ꓪˍ ꓡꓳ= ꓫꓵ: ꓪꓴ ꓕꓱ ꓟ ꓠꓬ ꓧꓶꓹ ꓕꓯ ꓡꓰ ꓑ ꓫꓬ 140 ꓫꓬꓹ ꓛꓲ ꓔꓯ ꓛꓰꓹ ꓙꓰ ꓝꓲ ꓟ ꓥ ꓢꓲ꓾ 120ꓹ000 ꓛꓲ ꓫꓵꓻ ꓗꓷ ꓟ ꓥ ꓡꓳ=
ꓢꓴ-ꓓꓮꓠ ꓟꓯꓼ ꓐꓰ ꓡ:-ꓛꓬꓴ. (ꓑꓳ) ꓔꓯꓹ ꓢꓴ ꓣꓢꓝ (Rapid Support Forces) ꓐꓴ ꓠꓬꓲ: ꓗꓴ. ꓚꓸꓼ ꓗꓪ ꓜꓲ: ꓜꓲ: ꓑꓰꓹ ꓑꓰꓹ ꓬꓰˍ ꓟ ꓟꓯꓼ ꓢꓰꓼ ꓡꓯ ꓘꓳ ꓓꓴ ꓑꓶ. ꓓꓴ ꓚꓲ. ꓛꓬ ꓦꓲꓻ ꓔꓯ ꓡꓳ ꓔ ꓬꓰ ꓪ ꓡꓰ ꓢꓴ 140 ꓫꓬꓹ ꓛꓲ ꓬꓲ ꓪ ꓫ. ꓙꓵ ꓟꓶ ꓙꓵ ꓓꓴ ꓐꓰ꓾ ꓜꓲ: ꓜꓲ: ꓑꓰꓹ ꓑꓰꓹ ꓟꓬ: ꓠꓬꓲ ꓬꓰ ꓡˍ ꓟ ꓪꓴ. ꓠꓬꓲ ꓑ ꓫꓬ ꓬꓲ ꓔꓴ ꓣꓳ ꓛꓲ ꓠꓬ ꓕꓱ ꓕꓲ ꓠ: ꓡꓳꓹ ꓬꓰˍ ꓕꓯ ꓬꓲ ꓪ ꓦꓲꓻ ꓔꓯ ꓡꓳ ꓔ ꓬꓰ ꓢꓲ ꓝꓮꓲ ꓔꓷꓹ ꓛꓰꓹ ꓙꓰ ꓪ ꓡꓰꓳ=
ꓬꓲ ꓦꓬꓼ ꓠꓬꓲ ꓟꓶ ꓤ ꓙꓵ: ꓗꓷ ꓟ Omar al-Bashir ꓔꓯ ꓚꓵꓹ ꓞꓰ ꓗꓷ ꓗ ꓠꓯ. 2023 ꓘꓳꓼ ꓕꓯ ꓢꓴ-ꓓꓮꓠ ꓑꓳ ꓔꓯꓹ ꓜꓴ ꓐꓴ ꓐꓰ ꓣꓢꓝ ꓐꓴ ꓙꓵ: ꓪ ꓦꓴꓻ ꓡꓯ ꓘꓳˍ ꓟ ꓫꓵ: ꓪꓴ ꓓꓳ ꓡ ꓗꓷˍ ꓟ ꓗꓪ ꓐꓰ ꓪꓴ. ꓔꓴ ꓢꓲ ꓠꓬꓲ ꓡ ꓞꓳ 120ꓹ000 ꓛꓲ ꓫꓵꓻ ꓗꓷꓳ꓾ ꓐꓰ ꓚꓬꓹ ꓪˍ ꓡꓳ=
ꓗꓳ. ꓗꓷ ꓟ ꓕꓲ: ꓠ: ꓘꓴ: ꓗꓪ ꓣꓢꓝ ꓡꓰ El Fasher ꓡꓳ ꓒꓱ ꓔꓯ ꓫ ꓟꓶ ꓡꓰ ꓗ ꓠꓯ. ꓖꓴ ꓪꓴ. ꓓ-ꓩꓴ (Darfur) ꓗꓪ ꓑ ꓫꓬ ꓐꓴ ꓔꓯ ꓜꓲ: ꓜꓲ: ꓑꓰꓹ ꓑꓰꓹ ꓬꓰˍ ꓟ ꓙꓳꓺ ꓓꓴ ꓓꓳ: ꓓꓳ ꓡ ꓗ ꓠꓯ.꓾ ꓗꓳ. ꓡ ꓟ 3 ꓠꓬꓲ ꓘꓴ: ꓠꓯꓸꓼ ꓗꓪ ꓢꓴ-ꓓꓮꓠ ꓗꓴꓷꓼ ꓔꓱꓹ ꓫꓵ ꓗꓪ ꓢꓰꓼ ꓡꓯ ꓘꓳˍ ꓟ ꓝꓮꓲ ꓕꓲ ꓧꓪꓹ ꓒꓬꓱꓼ ꓡ ꓗꓷ ꓢꓲ ꓠꓬꓲ ꓡ ꓞꓳ 2000 ꓣꓳ ꓛꓲ ꓠꓬ ꓬꓲ ꓪ ꓔꓬꓹ ꓦꓲꓻ ꓔꓯ ꓡꓳ ꓔ ꓬꓰ ꓪ ꓡꓰꓳ ꓐꓰ ꓴꓠ ꓡꓰ ꓐꓯˍ ꓡꓳ=
ꓟꓲ ꓠꓯ ꓔꓬꓹ ꓖꓴ ꓚꓵ. ꓙ ꓖꓶ ꓜꓴ (International Organisation for Migration) ꓡꓰ ꓐꓯ ꓔ ꓟ ꓗꓪ ꓠꓬ꓾ ꓚꓲ. ꓛꓬ ꓦꓲꓻ ꓔꓯ ꓡꓳ ꓔ ꓬꓰ ꓢꓲ ꓛꓰꓹ ꓙꓰ ꓢꓴ ꓐꓴ ꓠꓬ ꓠ: ꓥꓪ: ꓠꓬꓲ ꓗꓪ ꓐꓰ ꓠ: ꓦꓬꓼ ꓠꓬꓲ ꓠꓬꓲ: ꓗꓴ. ꓚꓸꓼ ꓗꓪ ꓖꓴ ꓪꓴ. ꓗꓳ-ꓓꓳ-ꓩꓯ (North Kordofan) ꓗꓴꓷꓼ ꓫꓴ ꓗꓪ ꓙꓳˍ ꓟ ꓐ-ꓣ (Bara) ꓗꓪ ꓟ ꓡꓳ ꓒꓱ ꓐꓰ ꓞꓳ ꓘꓹ ꓤ ꓮ ꓟꓬꓹ ꓗꓪ ꓐꓰ ꓡ ꓢꓴ ꓐꓴ ꓥ ꓡꓳ꓾ ꓐꓰ ꓢꓷ. ꓪˍ ꓡꓳ=
ꓔꓲꓺ ꓒ ꓪ ꓔꓲ. ꓡꓰꓳ 14 ꓠꓬ ꓢꓴ-ꓓꓮꓠ ꓗꓪ ꓜꓲ: ꓜꓲ: ꓑꓰꓹ ꓑꓰꓹ ꓬꓰˍ ꓟ ꓔꓯ ꓕꓼ ꓗꓷ ꓢꓲ꓾ ꓟꓯꓼ ꓢꓰꓼ ꓡꓯ ꓘꓳˍ ꓟ ꓠꓲꓹ ꓞ ꓠ: ꓗꓷ ꓠꓹ ꓟ꓾ ꓑ-ꓔꓲ ꓐꓴ ꓖꓪ ꓙꓱ ꓡꓯ ꓘꓳ ꓠꓹ ꓟ꓾ ꓬꓰ ꓙ ꓔꓳꓹ ꓙ ꓢꓴ ꓐꓴ ꓐꓱ ꓶ ꓙ ꓖꓴ ꓒꓴ ꓖꓶ ꓠꓹ ꓟ꓾ ꓟꓵ: ꓗꓳꓹ ꓓꓵ ꓓꓵ ꓗꓪ ꓐꓰ ꓥˍ ꓟ ꓬꓰ ꓙ ꓔꓳꓹ ꓙ ꓖꓶ ꓠꓹ ꓟ ꓓꓰ: ꓖꓶ ꓗꓷꓳ꓾ Vatican News ꓓꓳ: ꓗꓪ ꓐꓯ ꓔ ꓡꓳ=
