ꓙꓲꓻ ꓫꓬ ꓢꓴ Leo the great ꓚꓺ ꓟꓲꓽ (St.Leo the great)
ꓙꓲꓻ ꓫꓬ ꓢꓴ Leo the great ꓠꓬ ꓘꓴ ꓜꓲꓼ ꓞꓳ ꓗꓪ ꓮ‐ꓠꓱ ꓟ ꓙꓲ‐ꓢꓴ ꓢꓲꓺꓤ ꓐꓴ ꓔꓯ ꓙꓵꓻ ꓠꓲ, ꓔꓯ ꓔꓱ, ꓚꓵ ꓟ ꓚꓱ, ꓗꓪ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓪ ꓔꓲ ꓕꓲ ꓪ ꓥ ꓟ ꓪꓴ. ꓠꓬꓲ ꓥ ꓪꓴ. ꓠꓬꓲ ꓟꓬꓱꓺ ꓓꓳꓽ ꓮ ꓟꓬ, ꓙꓳ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ ꓮꓓ (400) ꓘꓳꓼ ꓕꓯ ꓣꓳ‐ꓟ ꓗꓴꓷꓼ ꓗꓪ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓞꓲꓼ ꓣꓳ ꓟ ꓙꓵ, ꓗꓪ ꓟꓲ ꓠꓯ ꓢꓷ. ꓠꓲ, ꓗꓪ ꓥ ꓟꓲ ꓮ ꓘꓶ. ꓓꓽ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ ꓠꓬ ꓟꓲ ꓠꓯ ꓕꓳ ꓶ ꓗꓪ ꓮ ꓘꓶ. ꓛꓲ ꓓꓽ ꓟ ꓡꓯꓼ ꓫꓴꓻ ꓔꓯ ꓪꓴ‐ꓢ ꓡꓰ ꓖꓶ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓔꓲꓺ ꓒ ꓐꓴ ꓜꓴꓻ ꓗꓪ ꓓꓵꓽ ꓡꓰ ꓢꓲ ꓠꓬꓲ ꓔꓲꓺ ꓒ ꓪ ꓔꓲ ꓔꓯ ꓬꓰ ꓙ ꓢꓴ (Secretary) ꓒꓬꓱꓼ ꓡ ꓗꓷꓳ꓿ ꓬꓲ ꓠꓬ ꓮꓓ (440) ꓘꓳꓼ ꓗꓪ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓡꓳ꓿ ꓖꓳ ꓕꓲ ꓙꓵ, ꓗꓪ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓔꓲꓺ ꓒ ꓪ ꓔꓲ ꓠꓬ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓡꓳꓻ ꓬꓰ ꓟ ꓙꓵ, ꓕꓯ ꓙꓲꓻ ꓫꓬ ꓢꓴ ꓡꓰꓳ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓠꓬ ꓔꓲꓺ ꓒ ꓪ ꓔꓲ ꓢꓲ, ꓗꓷ ꓟ ꓥ ꓡꓳ꓿
ꓙꓲꓻ ꓫꓬ ꓢꓴ Leo the great ꓠꓬ ꓘꓴ ꓜꓲꓼ ꓞꓳ ꓔꓯ ꓟꓲ ꓠꓯ ꓡ ꓞꓳ ꓐꓴ ꓟꓽ ꓓꓴ ꓙ ꓔ ꓟ ꓚꓱ, ꓗꓪ ꓐꓰ ꓧꓳꓽ ꓪꓴ. ꓟꓴ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓙꓵꓻ ꓠꓲ, ꓮ ꓟꓬ, ꓙꓳ ꓢꓴ ꓔꓲꓺ ꓒ ꓪ ꓔꓲ ꓥ ꓟ ꓪꓴ. ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷꓳ꓿ ꓬꓲ ꓠꓬ ꓙꓵꓻ ꓠꓲ, ꓚꓱ, ꓗꓪ ꓥ ꓟꓲ ꓮ ꓘꓶ. ꓛꓲ ꓪꓴꓽ ꓟ ꓟꓬꓱꓽ ꓓꓽ ꓟ ꓔꓯ ꓬꓰ ꓗꓷ ꓟ ꓠꓬ ꓮꓓ (451) ꓘꓳꓼ ꓕꓯ ꓬꓰ ꓗꓷ ꓟ ꓖꓪꓽ ꓙꓱ ꓜꓲꓼ ꓓꓴ ꓥ ꓟ (Chalcedone) ꓡꓳ ꓒꓱ ꓗꓪ ꓬꓰ ꓗꓷ ꓟ ꓖꓪꓽ ꓙꓱ ꓜꓲꓼ ꓓꓴ ꓗꓪ ꓥꓳꓽ ꓡꓰ ꓙꓵꓻ ꓠꓲ, ꓔꓯ ꓗꓽ ꓕꓽ ꓖꓶ ꓗꓷꓳ꓿ ꓔꓲꓺ ꓒ ꓪ ꓔꓲ ꓡꓰꓳ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓙꓵ, ꓕꓯ ꓥꓳꓽ ꓡꓰ ꓟ ꓙꓵꓻ ꓠꓲ, ꓥ ꓟ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓟꓽ ꓥ ꓐꓯ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰꓳ ꓠꓬ ꓗꓽ ꓕꓽ ꓖꓶ ꓗꓷꓳ꓿
ꓚꓧꓮꓡꓚꓰꓓꓳꓠꓰ ꓡꓳ ꓒꓱ ꓗꓪ ꓘꓴ ꓜꓲꓼ ꓞꓳ ꓖꓪꓽ ꓙꓱ ꓜꓲꓼ ꓓꓴ ꓬꓰ ꓗꓷ ꓟ ꓮ ꓫꓵꓽ ꓔꓯ ꓖꓪꓽ ꓙꓱ ꓗꓷ ꓟ ꓚꓱ, ꓔꓯ ꓔꓲꓺ ꓒ ꓪ ꓔꓲ ꓡꓰꓳ ꓵꓻ ꓗꓷ ꓟ ꓙꓵ, ꓕꓯ ꓔꓲꓺ ꓒ ꓓꓽ ꓐꓴ ꓠꓬ ꓝꓲ ꓓꓴ ꓒꓲ‐ꓕꓱ ꓠꓬ ꓔꓲꓺ ꓒ ꓪ ꓔꓲ ꓡꓰꓳ ꓒ ꓕꓲ ꓗꓪ ꓔꓬ ꓢꓲ ꓠꓬꓲ ꓫ. ꓕꓱ ꓔꓬ ꓡꓳ ꓐꓰ ꓐꓯ ꓗꓷ ꓟ ꓥ ꓡꓳ꓿
ꓝꓮꓲ ꓮꓓ (452) ꓘꓳꓼ ꓕꓯ ꓪꓴ‐ꓢ ꓡꓰ ꓝꓴꓲ. ꓖꓶ ꓟ ꓘꓳꓼ ꓐꓰ ꓟꓬꓱꓽ ꓙꓳ ꓟ ꓘꓳꓼ ꓗꓪ ꓖꓳ ꓕꓲ ꓙꓵ, ꓗꓪ ꓟꓯꓼ ꓢꓰꓼ ꓟ ꓗꓪ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓢꓴ (ꓧꓴꓠ) ꓞꓳ ꓫꓵꓽ ꓐꓴ ꓠꓬ ꓣꓳ‐ꓟ ꓗꓴꓷꓼ ꓔꓯ ꓢꓰꓼ ꓠ, ꓟ ꓧꓴꓠ ꓐꓰ ꓬꓲ ꓟꓯꓼ ꓒ ꓐꓴ ꓠꓬ ꓣꓳ‐ꓟ ꓡꓳ ꓒꓱ ꓓꓽ ꓗꓪ ꓡ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ‐ꓟ ꓑ ꓫꓬ ꓐꓴ ꓮ ꓘꓶ. ꓛꓲ ꓙꓳꓺ ꓔꓬ ꓟ ꓥ ꓡꓳ꓿ ꓣꓳ‐ꓟ ꓟꓯꓼ ꓒꓽ ꓐꓴ ꓮ ꓟꓬ, ꓥ ꓟꓲ ꓘꓰꓺ ꓙꓰ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ ꓡꓰꓳ ꓔꓧꓰ ꓖꓣꓰꓮꓔ ꓠꓬ ꓡꓯꓼ ꓐꓳ ꓔꓶ. ꓓꓴ ꓔꓯꓺ ꓔ ꓢꓲ ꓠꓬꓲ ꓟꓯꓼ ꓜꓲꓼ ꓒꓽ ꓧꓴꓠ ꓔꓯ ꓣꓳ‐ꓟ ꓡꓳ ꓒꓱ ꓗꓽ ꓘꓶꓽ ꓗꓪ ꓡ ꓢꓲ ꓠꓬꓲ ꓜꓲꓼ ꓗꓷ ꓟ ꓥ ꓡꓳ꓿ ꓖꓳ ꓕꓯ ꓟꓯꓼ ꓜꓲꓼ ꓒꓽ (ꓮꓔꓔꓲꓡꓮ) ꓠꓬ ꓣꓳ‐ꓟ ꓡꓳ ꓒꓱ ꓔꓯ ꓟꓯꓼ ꓟꓽ ꓓꓶꓽ ꓡ ꓙꓰ ꓟ ꓥ ꓡꓳ
ꓖꓳ ꓟ ꓔꓯ ꓟꓳꓺ ꓘꓴ ꓜꓲꓼ ꓞꓳ ꓠꓯ, ꓗꓪ ꓚꓺ ꓟꓲꓽ ꓙꓳ ꓟ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓔꓯ ꓟꓯꓼ ꓢꓰꓼ ꓡ ꓟ (ꓮꓔꓔꓲꓡꓮ) ꓠꓬ ꓙꓲꓻ ꓫꓬ ꓢꓴ ꓡꓰꓳ ꓔꓯ ꓡꓳ. ꓟꓳ ꓗꓷ ꓟ ꓙꓵ, ꓕꓯ ꓝꓲ ꓓꓴ ꓒꓲ‐ꓕꓱ ꓗꓪ ꓬꓲ ꓒ ꓕꓲ ꓗꓪ ꓔꓬ ꓟ ꓔꓯ ꓡꓳ. ꓟꓳ ꓟ ꓪꓴ. ꓠꓬꓲ ꓮ ꓘꓶ. ꓙꓳꓺ ꓟ ꓟ ꓪꓴ. ꓠꓬꓲ ꓡ ꓙꓰ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓙꓲꓻ ꓫꓬ ꓢꓴ ꓡꓰꓳ ꓔꓧꓰ ꓖꓣꓰꓮꓔ ꓠꓬ ꓮ ꓘꓶ. ꓛꓲ ꓙꓵꓻ ꓠꓲ, ꓙꓳ ꓢꓴ ꓔꓲꓺ ꓒ ꓪ ꓔꓲ ꓥ ꓢꓲ ꓠꓬꓲ ꓬꓲ ꓠꓬ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓙꓵ, ꓕꓯ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓗꓷ ꓟ ꓥ ꓡꓳ꓿ ꓝꓮꓲ ꓬꓲ ꓠꓬ ꓙꓵꓻ ꓠꓲ, ꓚꓱ, ꓗꓪ ꓟꓽ ꓥꓳꓽ ꓡꓰ ꓟꓽ ꓐꓬ ꓡꓰ ꓠ, ꓟ ꓕꓳ ꓶ ꓮ ꓟꓬ, ꓐꓳ ꓗꓷ ꓟ ꓥ ꓡꓳ
ꓙꓲꓻ ꓫꓬ ꓢꓴ Leo the great ꓠꓬ ꓮꓓ (461) ꓘꓳꓼ ꓕꓯ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓧꓪꓽ ꓖꓳ ꓓꓱ ꓔꓯ ꓦꓮꓔꓲꓚꓮꓠ ꓗꓴꓷꓼ ꓗꓪ ꓮ ꓟꓶ ꓗꓪ ꓛꓲ ꓙꓳ ꓟ ꓥ ꓡꓳ=
