ꓔꓲꓺ ꓒ ꓪ ꓔꓲ ꓠꓬ 10 ꓦ 30 ꓠꓬꓲ ꓠꓽ ꓡꓲ. ꓠꓬꓲ ꓠꓯꓼ ꓙꓵ, ꓕꓯ ꓝꓲꓖꓲꓮꓠ ꓗꓴꓷꓼ ꓙꓵꓽ ꓢꓲ ꓒꓽ ꓣꓮꓔꓴ ꓠꓮꓲQꓮꓟꓮ ꓔꓮꓪꓮꓗꓰꓚꓳꓡꓮꓔꓲ ꓡꓮꓡꓮꓐꓮꓡꓮꓦꓴ ꓐꓰ ꓦꓮꓔꓲꓚꓮꓠ ꓗꓪ ꓜꓲ ꓗꓷ ꓟ ꓥꓳ꓿ ꓖꓳ ꓟ ꓡꓰ ꓐꓰ ꓗꓴꓷꓼ ꓙꓵꓽ ꓢꓲ ꓒꓽ ꓠꓬ ꓝꓲ ꓓꓴ ꓐꓴ ꓬꓰ ꓟ ꓟꓬꓱꓽ ꓚꓱ, ꓡꓰ ꓐꓰ ꓔꓲꓺ ꓒ ꓪ ꓔꓲ ꓐꓰ ꓜꓲ ꓗꓷ ꓗ. ꓠꓯ. ꓦꓮꓔꓲꓚꓮꓠ ꓟꓬꓱꓽ ꓙ ꓥ ꓟ꓾ ꓚꓮꓣꓓꓲꓠꓮꓡ ꓑꓲꓰꓔꓣꓳ ꓑꓮꓣꓳꓡꓲꓠ ꓐꓰ ꓟꓢꓖꓣ ꓓꓮꓠꓲꓰꓡ ꓑꓮꓚꓧꓳ ꓐꓴ ꓐꓰ ꓜꓲ ꓡꓯ ꓘꓳ ꓗꓷ ꓟ ꓥꓳ꓿
ꓦꓮꓔꓲꓚꓮꓠ ꓓꓳꓽ ꓗꓪ ꓐꓰ ꓐꓯ ꓑꓶ ꓔ ꓟ ꓗꓪ ꓕꓱ ꓡꓱ ꓜꓲ ꓡꓯ ꓘꓳ ꓗꓷ ꓟ ꓗꓪ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓙꓲ_ ꓟ ꓙꓻ ꓡꓯ ꓘꓳ ꓗꓷ ꓟ ꓑꓶ ꓓꓴ ꓗ, ꓛꓲ_ ꓟ꓾ ꓝꓲꓖꓲꓮꓠ ꓗꓴꓷꓼ ꓘꓴꓽ ꓗꓪ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓬꓲ ꓚꓱ, ꓔꓯ ꓥ ꓟꓲ ꓗ, ꓛꓲ ꓓꓴ ꓙꓳ_ ꓟ꓾ ꓖꓳ ꓟ ꓡꓰ ꓐꓰ ꓗꓴꓷꓼ ꓶꓻ ꓡꓯꓼ ꓚꓱ,꓾ ꓞꓳ ꓙꓳ ꓚꓱ,꓾ ꓗꓴꓷꓼ ꓚꓱ,꓾ ꓟꓵꓽ ꓘꓳꓼ ꓚꓱ, ꓔꓯ ꓟꓳ. ꓠꓬꓲ ꓙ ꓡꓳ. ꓙ ꓠ, ꓟ ꓐꓰ ꓗꓴꓷꓼ ꓙꓻ ꓢꓲ ꓠꓬꓲ ꓟꓽ ꓙꓲ_ ꓟ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓔꓯ ꓗꓽ ꓕ ꓠ, ꓟ ꓚꓱ, ꓖꓪ ꓙꓱ ꓡꓯ ꓘꓳ ꓗꓷ ꓟ ꓥꓳ꓿
ꓖꓳ ꓟ ꓡꓰ ꓐꓰ ꓔꓲꓺ ꓒ ꓪ ꓔꓲ ꓠꓬ ꓖꓳ ꓕꓲ ꓠꓬꓲ ꓘꓴꓽ ꓗꓪ ꓡꓰ ꓖꓮꓐꓳꓠ ꓗꓴꓷꓼ ꓢꓲ ꓒꓽ ꓐꓣꓲꓚꓰ ꓚꓡꓳꓔꓮꓲꓣꓰ ꓳꓡꓲꓖꓴꓲ ꓠꓖꓴꓰꓟꓮ ꓔꓯ ꓥ ꓟꓲ ꓜꓲ ꓗꓷ ꓟ ꓥꓳ꓿ ꓗ. ꓠꓯ. ꓗꓴꓷꓼ ꓙꓵ ꓢꓲ ꓒꓽ ꓠꓬ ꓚꓮꓣꓓꓲꓠꓮꓡ ꓑꓲꓰꓔꓣꓳ ꓑꓮꓣꓳꓡꓲꓠ ꓐꓰ ꓟꓢꓖꓣ ꓓꓮꓠꓲꓰꓡ ꓑꓮꓚꓧꓳ ꓐꓴ ꓐꓰ ꓜꓲ ꓡꓯ ꓘꓳ ꓗꓷ ꓟ ꓥꓳ꓿
ꓗꓴꓷꓼ ꓠꓬꓲ ꓗꓳ. ꓚ. ꓗꓪ ꓙꓲ_ ꓟ ꓙꓻ ꓡꓯ ꓘꓳ ꓫꓱ, ꓡꓯ ꓘꓳ ꓟ ꓚꓱ,꓾ ꓖꓮꓐꓳꓠꓰꓢꓰ ꓗꓴꓷꓼ ꓙꓵꓻ ꓠꓲ,꓾ ꓗꓴꓷꓼ ꓚꓱ,꓾ ꓞꓳ ꓙꓳ ꓚꓱ,꓾ ꓐꓰ ꓗꓴꓷꓼ ꓘꓴꓽ ꓗꓪ ꓗ‐ꓕꓳ‐ꓡꓲꓗ ꓢ‐ꓢꓲ‐ꓠ ꓐꓰ ꓕꓲ ꓪ ꓢꓷ. ꓠꓲ,꓾ ꓧꓪ ꓖꓳ ꓓꓱ ꓔꓬ ꓢ ꓚꓱ,꓾ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓞꓳ ꓡꓱ ꓐꓴ ꓔꓯ ꓢꓷ. ꓠꓲ, ꓖꓶ ꓠ, ꓟ꓾ ꓢꓷ. ꓫꓵ ꓢꓷ. ꓙꓰ ꓖꓶ ꓠ, ꓟ꓾ ꓖꓪ ꓙꓱ ꓗꓷ ꓟ ꓥꓳ꓾ ꓖꓳ ꓟ ꓡꓰ ꓐꓰ ꓗꓴꓷꓼ ꓘꓴꓽ ꓗꓪ ꓒꓬꓱꓼ ꓔꓬ ꓟ ꓬꓲ ꓚꓱ, ꓐꓰ ꓟꓵꓽ ꓗꓳ. ꓓꓵ ꓓꓵ ꓬꓲ ꓚꓱ, ꓐꓰ ꓫꓱ, ꓢꓲ ꓠꓬꓲ ꓗꓳ. ꓚ ꓟꓳ ꓟ꓾ ꓓꓵ ꓙ ꓟ ꓔꓯ ꓙꓻ ꓡꓯ ꓘꓳ ꓗꓷ ꓟ ꓡꓰ ꓐꓰ ꓫꓵ ꓪꓴ ꓒꓬꓱꓼ ꓔꓬ ꓟ ꓞꓳ ꓫꓵ꓾ ꓗꓴꓷꓼ ꓐꓰ ꓠꓬꓲꓽ ꓗꓳ. ꓚ. ꓗꓪ ꓖꓪ ꓙꓱ ꓡꓯ ꓘꓳ ꓠ, ꓟ ꓠꓬ ꓮ ꓘꓶ. ꓣꓳ. ꓚꓵ_ ꓟ ꓡꓰ ꓐꓰ ꓟꓬ ꓠꓬꓲ ꓪꓴ ꓡ ꓟꓴ ꓡ ꓠ, ꓟ ꓐꓱ ꓶ ꓥ ꓟꓲ ꓬꓰ ꓠ, ꓟ ꓣꓳ. ꓚꓵ ꓟ ꓔꓯ ꓖꓪ ꓙꓱ ꓶꓯ ꓘꓳ ꓗꓷ ꓟ ꓥꓳ꓾ ꓐꓰ ꓦꓮꓔꓲꓚꓮꓠ ꓓꓳꓽ ꓗꓪ ꓐꓰ ꓐꓯ ꓑꓶ ꓔ ꓡꓳ꓿
