ꓠꓬꓲꓽ ꓧꓪ, ꓕꓲꓽ ꓧꓪ, ꓔꓲꓺ ꓒ ꓓꓽ ꓐꓴ ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ ꓪꓽ ꓘꓴˍ ꓟ ꓗꓪ ꓐꓰ ꓪꓴ. ꓔꓴ ꓢꓲ ꓠꓬꓲ꓾ ꓟꓲꓽ ꓙꓬ ꓢꓲ ꓗꓪ ꓮ ꓡꓲ ꓐꓰ ꓟꓬꓱꓽ ꓬꓰ ꓠ, ꓟ ꓐꓰ ꓟꓬꓽ ꓠꓬꓲ ꓢꓲꓽ‐ꓫꓬ‐ꓟ‐ꓦ ꓠꓯꓸꓼ ꓗꓪ ꓖꓪ ꓙꓱ ꓡꓯ ꓘꓳ ꓐ ꓡ ꓠ, ꓟ ꓐꓱ ꓶ ꓪꓽ ꓘꓴˍ ꓟ ꓬꓰ ꓗꓷꓳ꓿
ꓬꓲ ꓪꓴ. ꓕꓲꓽ ꓧꓪ, ꓖꓪ ꓙꓱ ꓜꓲꓼ ꓓꓴ ꓬꓰˍ ꓟ ꓗꓪ ꓐꓯ ꓔ ꓟ ꓡꓰ ꓐꓰ ꓮ ꓟꓶ ꓕꓲꓽ ꓧꓪ, ꓠꓬ ꓧꓳꓺ ꓙꓻ ꓖꓴ ꓗꓪ ꓫꓱꓽ ꓙꓰˍ ꓥꓳ꓿ ꓟꓬꓽ ꓠꓬꓲ ꓐꓷ, ꓠꓬꓲ ꓣꓳꓽ ꓖꓪ ꓙꓱ ꓜꓲꓼ ꓢꓴ ꓬꓲ ꓜꓴꓻ ꓬꓲ ꓜꓴꓻ ꓘꓶꓽ ꓢꓲ ꓠꓬꓲ ꓥꓳꓽ ꓫꓵꓽ ꓟꓽ ꓫꓱ. ꓡꓯ ꓘꓳ ꓢꓴ꓾ ꓡꓲꓽ ꓒꓰꓼ ꓟꓽ ꓫꓱ. ꓡꓯ ꓘꓳ ꓢꓴ ꓫ. ꓕꓱ ꓡꓯ ꓘꓳ ꓢꓲ ꓠꓬꓲ ꓖꓪ ꓙꓱ ꓜꓲꓼ ꓠ, ꓟ ꓥꓳ꓿
ꓕꓱ ꓕꓲꓽ ꓠꓽ ꓠꓽ‐ꓕꓲꓽ‐ꓠꓬꓲ 10 ꓦ ꓟ 7 ꓠꓬꓲ ꓕꓯ ꓠꓬ ꓥꓪ ꓠꓴꓽ ꓖꓪ ꓙꓱ ꓜꓲꓼ ꓓꓴ ꓠꓬ “ꓮ ꓡꓲ ꓐꓰ ꓕꓲ ꓣꓳ ꓛꓳꓽ ꓕꓲꓽ ꓣꓳ ꓙꓻ ꓡꓯ ꓘꓳ ꓠꓯ, ꓥ” ꓐꓯˍ ꓟ Instrumentum Laboris ꓐꓯˍ ꓟ ꓔꓯ ꓖꓪ ꓙꓱ ꓜꓲꓼ ꓓꓴ ꓥꓳ꓿ ꓝꓮꓲ ꓮ ꓟꓶ ꓞꓲꓼ ꓘꓳꓼ ꓔꓯ ꓡꓳ. ꓢꓲ ꓠꓬꓲ ꓔꓲ ꓒ ꓪ ꓔꓲ. ꓝꓣꓮꓠꓚꓲꓢ ꓠꓬ ꓢꓲ ꓡꓲ ꓟ ꓙꓳ ꓡ ꓠ, ꓟ ꓐꓱ ꓶ ꓪꓽ ꓘꓴ ꓡꓯ ꓐꓰ꓾ ꓬꓲ ꓡꓰ ꓬꓲꓼ ꓠꓬꓲ. ꓖꓶ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓢꓲꓽ ꓫꓬ ꓟ‐ꓡꓲ‐ꓬ ꓔꓯ ꓖꓴ ꓢꓲ ꓠꓬꓲ ꓫꓬ, ꓔ ꓟ ꓪꓽ ꓘꓴ ꓦꓲꓻ ꓓꓽ ꓟ Basilica of Santa Maria ꓐꓯ ꓖꓴ ꓗꓪ ꓝꓮꓲ ꓕꓲꓽ ꓠꓽ ꓗꓪ ꓠꓬ ꓣꓳ‐ꓟ ꓔꓲꓺ ꓒ ꓓꓽ ꓟ ꓥ ꓟ ꓔꓲ ꓒ ꓪ ꓔꓲ. ꓝꓣꓮꓠꓚꓲꓢ ꓗꓪ ꓐꓰ ꓬꓰ ꓓꓴ ꓥꓳ꓿
ꓝꓮꓲ ꓕꓱ ꓡꓱ ꓔꓲꓺ ꓒ ꓓꓽ ꓐꓴ ꓠꓬꓲꓽ ꓧꓪ, ꓕꓲꓽ ꓧꓪ, ꓖꓪ ꓙꓱ ꓜꓲꓼ ꓓꓴ ꓬꓰˍ ꓟ ꓢꓲ‐ꓠꓳ (Synod) ꓗꓪ ꓠꓬ Theological Pastoral Forum ꓐꓰ ꓐꓯˍ ꓟ ꓘꓴ ꓜꓲꓼ ꓞꓳ ꓟꓬꓱꓽ ꓬꓰˍ ꓟ ꓗꓪ ꓬꓰ ꓫꓵꓽ ꓬꓰ ꓙꓰꓽ ꓔꓯ ꓟꓳ. ꓬꓲ ꓡꓰ ꓕꓱ ꓡꓱ ꓖꓪ ꓙꓱ ꓜꓲꓼ ꓓꓴ ꓡꓲꓺ ꓔꓶ. ꓡꓲꓺ ꓧꓪ, ꓕꓱ ꓡꓱ ꓬꓰ ꓓꓴ ꓥꓳ꓾ ꓐꓰ ꓐꓯ ꓞꓷ, ꓔ ꓡꓳ꓿
ꓮ ꓡꓲ ꓐꓰ ꓖꓪ ꓙꓱ ꓜꓲꓼ ꓓꓴ ꓔꓯ ꓬꓰˍ ꓡ ꓐꓯ ꓠꓬ ꓧꓶ. ꓕꓯ ꓟ ꓡꓰ ꓐꓰ ꓝꓳ, ꓝꓲ (ꓟꓲ ꓝꓳ,) 16 ꓟ ꓘꓳꓽ ꓢꓲ ꓠꓬꓲ꓾ ꓖꓳ ꓗꓪ ꓡ ꓞꓳ ꓠꓬ (10) ꓣꓳ꓾ ꓟꓽ ꓥ ꓠꓬ (11) ꓣꓳ꓾ ꓥꓳꓽ ꓫꓵꓽ ꓟꓽ ꓫꓱ. ꓡꓯ ꓘꓳ ꓟ ꓕꓲꓽ ꓜꓴꓻ ꓕꓲꓽ ꓜꓴꓻ ꓬꓰ ꓢꓲ ꓠꓬꓲ꓾ ꓖꓪ ꓙꓱ ꓜꓲꓼ ꓓꓴ ꓥꓳ꓿ ꓬꓲ ꓟꓶꓽ ꓕꓯ ꓠꓬ ꓖꓳ ꓗꓪ ꓚꓳ. ꓕꓲꓽ ꓣꓳ ꓓꓳ ꓡ ꓢꓲ ꓠꓬꓲ ꓬꓲ ꓪ ꓖꓪ ꓙꓱ ꓡꓯ ꓘꓳ ꓗꓷ ꓟ ꓬꓰ ꓗꓳ. ꓙꓰ ꓟ ꓔꓯ ꓮ ꓙꓵꓽ ꓟ ꓟꓲꓽ ꓙꓬ ꓗꓪ ꓐꓯ ꓟ. ꓖꓶˍ ꓟ ꓥ ꓡꓳ꓿
ꓝꓮꓲ ꓕꓱ ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ ꓠ ꓠꓬꓲ ꓘꓶꓽ ꓮ ꓟꓬ, ꓙꓳˍ ꓡꓳ꓿ ꓖꓳ ꓡꓱ ꓙꓳˍ ꓟ ꓘꓴꓽ ꓗꓪ ꓟꓽ ꓓ ꓬꓲ ꓪꓴ. ꓓꓵ ꓗꓷ ꓔ ꓟ ꓠꓬ “ꓣꓳ ꓘꓴ ꓜꓲꓼ ꓞꓳ ꓠꓬ ꓮ ꓡꓲ ꓬꓰ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓕꓲꓽ ꓠꓲ, ꓕꓲꓽ ꓪ ꓟꓬꓱꓽ ꓬꓰ ꓐ ꓡˍ ꓡ? ꓮ ꓡꓲ ꓬꓰ ꓢꓲ ꓪꓴ‐ꓢ ꓡ ꓞꓳ ꓐꓴ ꓠꓬ ꓚꓲ. ꓛꓬ ꓬꓰ ꓠ ꓔ ꓟ ꓪꓴ‐ꓢ ꓟꓬꓱꓽ ꓔꓯ ꓮ ꓡꓲ ꓐꓰ ꓜꓳꓽ ꓜꓳꓽ ꓬꓰ ꓐ ꓡˍ ꓥ?” ꓐꓯˍ ꓟ ꓔꓯ ꓖꓪ ꓙꓱ ꓜꓲꓼ ꓓꓴ ꓥ ꓡꓳ꓿
ꓝꓮꓲ ꓕꓱ ꓡꓱ ꓖꓪ ꓙꓱ ꓜꓲꓼˍ ꓟ ꓠꓬ ꓧꓶ. ꓕꓯ ꓬꓰ ꓗꓳ. ꓙꓰ ꓟ ꓕꓲ ꓟꓵꓽ ꓕꓲꓽ ꓫꓰ ꓗꓪ ꓟ ꓔꓲꓺ ꓒ ꓐꓴ ꓖꓪ ꓙꓱ ꓜꓲꓼ ꓓꓴ ꓢꓲ‐ꓠꓳ ꓬꓰ ꓗꓳ. ꓡ ꓟ ꓬꓲ ꓢꓶꓽ ꓮ ꓟꓶ ꓣꓳ ꓫ ꓟꓶˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓧꓶ. ꓕꓯ ꓬꓰ ꓗꓳ. ꓙꓰ ꓟ ꓔꓯ ꓛꓳꓻ ꓢꓲ ꓠꓬꓲ ꓖꓳ ꓗꓪ ꓡꓯꓼ ꓫꓵ ꓦꓰꓼ ꓞ, ꓔꓬ ꓟ ꓥ ꓡꓳ꓿
ꓝꓮꓲ ꓔꓲ ꓒ ꓪ ꓔꓲ. ꓡꓰ ꓣꓳ ꓕꓱ ꓡꓱ ꓬꓰˍ ꓕꓯ ꓪꓽ ꓘꓴ ꓗꓴ.ˍ ꓟ ꓬꓲ ꓜꓴꓻ ꓒꓬꓱꓼ ꓡ ꓠ, ꓟ ꓬꓳ. ꓚꓰꓽˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓽ ꓘꓴˍ ꓟ ꓗꓪ ꓐꓰ ꓢꓲꓽ‐ꓫꓬ‐ꓟ‐ꓦ ꓔꓯ ꓶꓼ ꓓꓰꓽ ꓢꓲ ꓠꓬꓲ ꓕꓱ ꓡꓱ ꓛꓳ ꓫꓱꓽ ꓠ ꓗ, ꓡꓳ꓾ ꓐꓰ ꓔꓲ ꓒ ꓪ ꓔꓲ. ꓡꓰ ꓐꓯˍ ꓡꓳ꓿
ꓝꓮꓲ ꓢꓲ‐ꓠꓳ ꓐꓯˍ ꓟ ꓔꓲ ꓒ ꓐꓴ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓐꓯˍ ꓟ ꓠꓬ ꓪꓽ ꓘꓴˍ ꓟ ꓟꓽ ꓙꓳ ꓠꓬ ꓬꓲ ꓖꓳꓽ ꓥꓳ꓿ ꓖꓳ ꓡꓱ ꓠꓬꓲ ꓡꓽ ꓞꓳ ꓬꓲ ꓜꓴꓻ ꓬꓲ ꓟꓯꓼ ꓔꓯ ꓔꓲ ꓒ ꓐꓴ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓥ ꓟ ꓢꓲ‐ꓠꓳ ꓔꓯ ꓐꓲ ꓐꓲ ꓜꓲꓼ ꓜꓲꓼ ꓬꓰ ꓐ ꓡ ꓠ, ꓟ ꓐꓱ ꓶ ꓪꓽ ꓘꓴ ꓙ ꓡꓯ꓾ ꓐꓰ ꓓꓰꓽ ꓠꓲ, ꓫꓵˍ ꓡꓳ꓿
Photo credit to ©synod.va/Lagarica
