ꓞꓳ ꓤ ꓕꓲ ꓣꓳ ꓒꓬꓱꓼ ꓡ ꓗꓷ ꓕꓯ ꓠꓵꓻ ꓠꓲꓹ ꓟꓶ ꓠꓲꓹ ꓫꓵ꓾ ꓢꓷꓸ ꓙ ꓟꓳ ꓙˍ ꓟ ꓟꓶ ꓠꓲꓹ ꓫꓵ꓾ ꓔꓬꓹ ꓖꓴ ꓖꓶˍ ꓟ ꓟꓶ ꓠꓲꓹ ꓫꓵ꓾ ꓕꓱ ꓡꓱ ꓫꓵꓽ ꓠꓲꓹ ꓟ ꓙꓳˍ ꓟ ꓥ ꓡꓳ= ꓣꓳ ꓬꓰ ꓖꓶ ꓗꓷ ꓟ ꓕꓲ ꓙꓰꓽ ꓐꓱ ꓶ ꓢꓷꓸ ꓙ ꓟꓳ ꓙ ꓝꓲ ꓠꓲꓹ ꓫꓵˍ ꓡꓳ= ꓣꓳ ꓖꓶ ꓗꓷ ꓟ ꓠꓵꓻ ꓠꓲꓹ ꓐꓱ ꓶ ꓚꓱꓹ ꓡꓲꓸ ꓖꓶ ꓡˍ ꓟ ꓔꓯ ꓣꓳ ꓟꓷꓽ ꓠꓷꓹ ꓗꓪ ꓐꓰ ꓟꓽ ꓐꓯ ꓓꓳ ꓡ ꓐꓯˍ ꓥ ꓟꓲ ꓠꓲꓹ ꓟ ꓗꓪ ꓥꓳ ꓡꓳꓸ ꓔꓬ ꓟ ꓠꓽ ꓚꓵ ꓚꓵ ꓥꓳ=
ꓣꓳ ꓠꓬ ꓞꓳ ꓤ ꓮ ꓟꓬꓹ ꓡꓰ ꓣꓳ ꓔꓯ ꓠꓬꓲ ꓙˍ ꓟ꓾ ꓠꓵꓻ ꓠꓲꓹ ꓟꓽ ꓟꓶ ꓟ ꓔꓯ ꓣꓳ ꓮ ꓘꓶꓸ ꓙꓳꓺ ꓔꓬ ꓗꓴꓸˍ ꓡꓳ= ꓣꓳ ꓠꓬ ꓣꓱꓽ ꓟꓽ ꓬꓯꓼ (ꓮꓸ ꓫꓵꓽˍ ꓟꓲ ꓟꓽ ꓑꓳꓽ ꓡꓳꓽ) ꓐꓰ ꓢꓴ ꓡꓰ ꓐꓯ ꓡˍ ꓟ꓾ ꓠꓬꓲ ꓟꓽ ꓟꓵ ꓬꓰ ꓡˍ ꓟ ꓔꓯ ꓙꓳꓺˍ ꓟ ꓠꓲꓹ ꓟˍ ꓟꓲ ꓙꓳ ꓗꓴꓸˍ ꓡꓳ= ꓖꓳ ꓡꓰ ꓠꓬꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓟ ꓞꓳ ꓮ ꓟꓬꓹ ꓠꓬ ꓠꓱꓸ ꓐꓯ ꓢꓴ ꓐꓴ ꓡꓰ ꓣꓳ ꓔꓯ ꓢꓷꓸ ꓙ ꓟꓳ ꓙ ꓡˍ ꓟ꓾ ꓣꓳ ꓔꓯ ꓚꓬꓹ ꓪ ꓡˍ ꓟ ꓔꓯ ꓟꓶ ꓠꓹ ꓟ ꓢꓯꓼ ꓕꓵꓼ ꓡ ꓔꓬ ꓡꓳ= ꓕꓲ ꓟꓲ ꓠꓯ ꓡꓱꓸꓼ ꓣꓱꓽ ꓔꓬ ꓟ Social Media ꓕꓲ ꓟ ꓥ ꓟ ꓝꓮꓚꓰꓐꓳꓳꓗ ꓠꓬ ꓞꓳ ꓤ ꓮ ꓟꓬꓹ ꓣꓱꓽ ꓡ ꓟ ꓮꓑꓑ ꓕꓲ ꓟ ꓒꓬꓱꓼ ꓡ ꓔꓬ ꓡꓳ=
ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓗꓪ ꓠꓬ ꓗ-ꓔꓳ-ꓡꓲꓗ ꓕꓳꓽ ꓶ ꓐꓳ ꓢꓴ ꓔꓲꓺ ꓒ ꓕꓲ ꓣꓳ ꓥ ꓟ ꓗ-ꓟ-ꓡꓴ ꓡꓰ ꓐꓳ ꓔ ꓟ “ꓖꓳꓻ ꓟꓲꓽ ꓕꓯꓽ ꓢꓲ ꓗꓪ ꓢꓲꓹ ꓪꓰꓻ ꓟꓲ ꓙꓳˍ ꓡꓳ” ꓐꓰ ꓟꓬꓱ ꓔ ꓟ ꓕꓳꓽ ꓶ ꓗꓪ ꓐꓰ “Social Media ꓗꓪ ꓟ ꓟꓲ ꓠꓯ ꓞꓳ ꓤ ꓐꓴ” ꓐꓯˍ ꓟ ꓚꓱꓹ ꓔꓯ ꓐꓯ ꓟꓸ ꓖꓶ ꓠꓲꓹ ꓫꓵˍ ꓡꓳ=
ꓞꓳ ꓤ ꓠꓲꓹ ꓟ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯ ꓔ ꓟ ꓗꓪ ꓠꓬ ꓝꓮꓚꓰꓐꓳꓳꓗ ꓔꓯ ꓞꓳ ꓤ ꓮ ꓟꓬꓹ ꓠꓵˍ ꓟ ꓬꓳꓸ ꓚꓵˍ ꓟ ꓚꓱꓹ ꓠꓬ꓾ ꓝꓮꓚꓰꓐꓳꓳꓗ ꓠꓬ ꓞꓳ ꓤ ꓐꓴ ꓬꓲ ꓫꓱꓹ꓾ ꓞꓳ ꓤ ꓠꓲꓹ ꓟ ꓔꓯ ꓕꓲꓺ ꓕꓲꓺ ꓡꓰꓽ ꓚꓵꓹ ꓣꓴ ꓐ ꓡˍ ꓟ ꓑꓶꓸ ꓓꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ= ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓖꓴ ꓟꓸ ꓖꓶ ꓠꓲꓹ ꓫꓵˍ ꓟ꓾ ꓢꓷꓸ ꓙ ꓟꓳ ꓙ ꓡˍ ꓟ ꓔꓯ ꓟꓶ ꓠꓲꓹ ꓫꓵˍ ꓟ꓾ ꓚꓲꓸ ꓛꓬ ꓠꓲꓹ ꓟ ꓗꓪ ꓮ ꓡꓲ ꓓꓵꓽ ꓙ ꓔꓬ ꓟ ꓠꓲꓹ ꓟ ꓗꓪ ꓮ ꓡꓲ ꓗꓹ ꓔꓬ ꓟ ꓔꓯ ꓐꓯ ꓟꓸ ꓖꓶ ꓠꓲꓹ ꓫꓵˍ ꓟ꓾ ꓕꓱ ꓡꓱ ꓫꓵꓽ ꓠꓲꓹ ꓟ ꓔꓯ ꓐꓲ ꓡꓰ ꓠ ꓬꓰ ꓙ ꓖꓶ ꓐ ꓡˍ ꓟ ꓑꓶꓸ ꓓꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ=
ꓖꓳ ꓟ ꓑꓶꓸ ꓓꓴ Social Media ꓚꓵ ꓚꓵ ꓥ ꓟˍ ꓡꓰ ꓐꓰ ꓣꓳ ꓔꓯ ꓓꓵꓽ ꓙꓽ ꓟꓶ ꓡꓰ ꓝꓲˍ ꓡꓳ= ꓚꓵ ꓚꓵ ꓥ ꓟ ꓣꓳ ꓗꓳ ꓡꓳ ꓗꓪ ꓢꓯꓼ ꓕꓵꓼˍ ꓟ ꓢꓶꓸ ꓟꓽ ꓞꓲ ꓚꓵ ꓚꓵ ꓟꓽ ꓥ ꓟ Social Media ꓗꓴꓷꓼ ꓗꓪ ꓣꓳ ꓔꓯ ꓧꓳꓽ ꓪꓴꓸ ꓙꓰ ꓝꓲˍ ꓡꓳ=
ꓠꓱꓸ ꓐꓯ ꓢꓴ ꓗꓪ ꓐꓰ ꓙꓲˍ ꓟ ꓚꓳꓟꓟꓰꓠꓔ꓾ ꓡꓲꓗꓰ ꓟꓶ ꓠꓹ ꓟ ꓐꓱ ꓶ ꓟꓬꓽ ꓠꓬꓲ ꓢꓯꓼ ꓕꓵꓼ ꓔꓬ ꓡꓳ= ꓚꓲꓸ ꓛꓬ ꓐꓬꓱꓽ ꓔꓯ ꓥˍ ꓟꓲ ꓟꓽ ꓠꓽ ꓠꓽ ꓚꓰꓹ ꓢꓲ ꓡꓲꓗꓰ ꓵꓻ ꓠꓬꓲˍ ꓟ꓾ ꓚꓳꓟꓟꓰꓠꓔ ꓵꓻ ꓠꓬꓲˍ ꓟ ꓗꓪ ꓐꓰ ꓟꓬꓱꓽ ꓟꓬꓽ ꓔꓬ ꓖꓴˍ ꓡꓳ= ꓚꓵ ꓚꓵ ꓣꓳ ꓤꓶꓻ ꓗꓪ ꓝꓮꓚꓰꓐꓳꓳꓗ ꓠꓬ ꓣꓳ ꓤꓶꓻ ꓐꓱ ꓶ ꓟꓽ ꓙꓳ ꓟꓽ ꓓꓻ ꓟ ꓒꓬꓱꓼ ꓡꓰ ꓝꓲ ꓟꓽ ꓓꓻ= ꓣꓳ ꓤꓶꓻ ꓙꓲꓻ ꓖꓴ ꓐꓱ ꓶ ꓬꓲ ꓡꓯꓼ ꓗꓸ ꓕꓲ ꓗꓸ ꓤ ꓡꓰꓽ ꓗꓷ ꓝꓲ ꓠ ꓗꓹ ꓡꓳ= ꓕꓲ ꓝꓲꓸ ꓤꓽ ꓡꓰꓽ ꓚꓳꓻ ꓙꓰ ꓠ ꓟ꓾ ꓛꓰꓸ ꓙꓰ ꓠꓹ ꓟ ꓙꓲˍ ꓥ ꓟꓲ꓾ ꓖꓳ ꓗꓪ ꓕꓲ ꓞꓲꓼ ꓔꓬꓹ ꓠꓹ ꓟ ꓠꓽ ꓟꓽ ꓜꓳꓽ=
ꓓꓳꓽ ꓫꓵꓽ ꓓꓳꓽ ꓙꓰꓽ ꓵˍ ꓟ꓾ ꓢꓷꓸ ꓠꓲꓹ ꓢꓳ ꓣꓴˍ ꓟ꓾ ꓠꓱꓸ ꓐꓯ ꓙꓲꓻ ꓖꓴ ꓐꓱ ꓶ ꓣꓱꓽ ꓐ ꓡˍ ꓟ ꓑꓶꓸ ꓓꓴ ꓣꓳ ꓠꓬ Social Media ꓔꓯ ꓣꓱꓽ ꓠ ꓔˍ ꓡꓳ ꓐꓯˍ ꓥ ꓟꓲ꓾ Social Media ꓠꓬ ꓣꓳ ꓤꓶꓻ ꓒꓬꓱꓼ ꓡꓰ ꓝꓲ ꓟꓽ ꓓꓻ=
ꓝꓮꓚꓰꓐꓳꓳꓗ ꓗꓪ ꓡꓲꓗꓰ ꓕꓲ ꓟ ꓟꓶ ꓠꓹ ꓟ ꓠꓽ ꓟꓽ ꓫꓸ ꓐꓯˍ ꓦ ꓟꓲ ꓚꓵ ꓚꓵ ꓠꓱ ꓫꓳꓸ ꓟꓸ ꓗꓪ ꓠꓽ ꓡꓲꓗꓰ ꓟꓶ ꓠꓹ ꓟ ꓮ ꓘꓶꓸ ꓫˍ ꓡꓳ= ꓞꓳ ꓤ ꓐꓴ ꓠꓲꓹ ꓟ ꓗꓪ ꓐꓰ ꓓꓳ ꓡˍ ꓟ ꓡꓲꓗꓪ ꓚꓵ ꓠꓬ ꓔꓱꓹ ꓚꓵˍ ꓟ꓾ ꓠꓵꓻ ꓠꓲꓹ꓾ ꓢꓲ ꓡꓲ ꓟ ꓙ ꓖꓴ ꓘꓴꓽ ꓗꓪ ꓙ ꓫꓱꓽ ꓔꓬ ꓢꓴ ꓐꓴˍ ꓡꓰ ꓟꓶˍ ꓡꓳ= ꓟꓬꓽ ꓠꓬꓲ ꓪꓴ-ꓢ ꓐꓯ ꓘꓶꓽ ꓬꓲ ꓝꓳꓹ ꓟꓶ ꓥ ꓟ ꓠꓵꓻ ꓠꓲꓹ ꓙ ꓖꓴ ꓗꓪ ꓫꓱꓽ ꓢꓴ ꓐꓴˍ ꓡꓰꓽ ꓞꓳ ꓤ ꓐꓴ ꓖꓶ ꓠꓲꓹ ꓒꓴˍ ꓟ꓾ ꓞꓳ ꓤ ꓠꓲ ꓟ ꓗꓪ ꓐꓰ ꓡˍ ꓟ ꓡꓲꓗꓪ ꓚꓵ ꓔꓯ ꓟꓶˍ ꓟ ꓥ ꓡꓳ=
ꓞꓳ ꓫꓸ ꓐꓴ ꓔꓯ ꓬꓰ ꓙˍ ꓟ꓾ ꓤ ꓛꓵꓽ ꓐꓴ ꓔꓯ ꓫꓱꓸ ꓤ ꓠꓲꓹ ꓗꓪ ꓐꓰ ꓔꓳꓹ ꓙˍ ꓟ꓾ ꓡꓳ ꓔ ꓟ ꓟꓶ ꓢꓴ ꓐꓴ ꓕꓲ ꓛꓱꓽ ꓗꓪ ꓔꓬ ꓢꓲ ꓦꓰꓼ ꓔꓴ ꓖꓶˍ ꓟ꓾ ꓙꓵꓻ ꓠꓲꓹ ꓚꓱꓹ ꓗꓪ ꓟꓬꓽ ꓠꓬꓲ ꓢꓯꓼ ꓕꓵꓼˍ ꓟ꓾ ꓚꓲꓸ ꓛꓬ ꓕꓲ ꓦꓲ ꓘꓴꓽ ꓗꓪ ꓥˍ ꓟꓲ ꓠꓵꓻ ꓠꓲꓹ ꓐꓱ ꓖꓶ ꓢꓲ ꓚꓳ ꓡꓳ ꓚꓳ ꓫꓵ ꓗꓪ ꓔꓬ ꓢꓴ꓾ ꓠꓶꓽ ꓛꓳꓽ ꓕꓲ ꓛꓳꓽ ꓐꓴ ꓔꓯ ꓠꓬꓲ ꓟꓳꓻ ꓓꓴ ꓟꓸ ꓖꓶ ꓐ ꓡˍ ꓟ ꓦꓲꓻ ꓘꓴꓽ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼˍ ꓟ ꓾ ꓕꓱ ꓡꓱ ꓫꓵꓽ ꓙꓲˍ ꓟ ꓟꓬꓱꓽ ꓔꓯ ꓬꓰ ꓔꓬ ꓢꓴ ꓐꓴ ꓠꓬ ꓞꓳ ꓤ ꓐꓴ ꓡꓰ ꓖꓶˍ ꓟ ꓡꓲꓗꓰ ꓔꓯ ꓟꓶˍ ꓟ ꓡꓰꓼ ꓟꓽ ꓞꓲꓺ ꓪꓴ-ꓢ ꓡꓰ ꓖꓶ ꓡˍ ꓟ ꓡꓲꓗꓰ ꓔꓯ ꓥˍ ꓟꓲ ꓟꓶ ꓡˍ ꓥꓳ=
ꓖꓳ ꓡꓱ ꓠꓬꓲ ꓣꓱꓽ ꓟꓽ ꓬꓯꓼ ꓟ Social Media ꓗꓪ ꓟ ꓡꓲꓗꓰ ꓕꓲ ꓟ ꓐꓱ ꓶ ꓬꓲ ꓙꓵꓹ ꓮ ꓟꓬꓹ ꓒꓬꓹ ꓢꓲ ꓢꓯꓼ ꓕꓵꓼˍ ꓟ ꓢꓶꓸ ꓟꓽ ꓞꓲ ꓞꓳ ꓤ ꓠꓲꓹ ꓟ ꓗꓪ ꓐꓰ ꓡˍ ꓟ ꓡꓲꓗꓰ ꓐꓰ ꓪꓴ-ꓢ ꓡꓰ ꓖꓶ ꓡˍ ꓟ ꓡꓲꓗꓰ ꓔꓯ ꓟꓬꓽ ꓠꓬꓲ ꓧꓪ ꓢꓯꓼ ꓕꓵꓼ ꓓꓴ ꓬꓰ ꓡꓯ ꓐꓰ ꓮ ꓙꓵꓽ ꓔꓯ ꓢꓯꓼ ꓖꓶ ꓠꓲꓹ ꓫꓵˍ ꓡꓳ=
