ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓡꓰ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓔꓯ ꓢꓰꓼ ꓗꓷ ꓟ ꓚꓱ, (St. Lawence)
ꓧꓪ. ꓧꓪ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓚꓺ ꓟꓲꓽ ꓗꓪ ꓐꓰ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓡꓰ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓔꓯ ꓢꓰꓼ ꓗꓷ ꓟ ꓚꓱ, ꓔꓯ ꓚꓺ ꓟ. ꓖꓶ ꓓꓴ ꓥ ꓡꓳ꓿ ꓮꓓ (254‐260) ꓘꓳꓼ ꓕꓯ ꓣꓳ‐ꓟ ꓗꓴꓷꓼ ꓗꓪ ꓠꓬ ꓪ ꓔꓲ ( Gallienus ) ꓡꓰ ꓙꓵꓽ ꓟ ꓙꓵ, ꓟꓲ ꓥ ꓡꓳ꓿
ꓪ ꓔꓲ ꓖꓮꓡꓡꓲꓰꓠꓴꓢ ꓣꓳ ꓟ ꓗꓴꓷꓼ ꓗꓪ ꓪ ꓔꓲ ꓙꓵꓽ ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓝꓴꓲ. ꓖꓶ ꓢꓲ ꓠꓬꓲ ꓢꓰꓼ ꓟ ꓙꓵ, ꓟꓲ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓠꓬ ꓔꓲꓺ ꓒ ꓪ ꓔꓲ ꓢꓲꓫꓔꓴꓢ (2) ꓥ ꓡꓳ꓿
ꓔꓲꓺ ꓒ ꓪ ꓔꓲ ꓢꓲꓫꓔꓴꓢ ꓐꓰ ꓓꓰꓮꓚꓳꓠ (6) ꓪ ꓠꓬ ꓟꓲ‐ꓢ ꓔꓲ ꓪꓽ ꓘꓴ ꓙꓵ, ꓬꓰ ꓔꓬ ꓟ ꓙꓵ, ꓕꓯ ꓣꓳ‐ꓟ ꓟꓯꓼ ꓐꓴ ꓡꓰ ꓢꓰꓼ ꓗꓷ ꓟ ꓥ ꓡꓳ꓿ ꓣꓳ‐ꓟ ꓟꓯꓼ ꓒꓽ ꓐꓴ ꓡꓰ ꓢꓰꓼ ꓗꓷ ꓟ (6) ꓣꓳ ꓘꓴꓽ ꓠꓯ, ꓗꓪ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓥ ꓟꓲ ꓐ ꓗꓷ ꓟ ꓥ ꓡꓳ꓿
ꓣꓳ‐ꓟ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓔꓯ ꓠꓬ ꓞꓽ ꓞꓽ ꓟꓽ ꓢꓰꓼ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓬꓲ ꓠꓬ ꓘꓴ ꓜꓲꓼ ꓞꓳ ꓠꓯ, ꓗꓪ ꓒꓴ ꓫꓵꓺ ꓔꓯ ꓫ. ꓢꓴ ꓥ ꓟ ꓪꓴ. ꓠꓬꓲ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓒꓴ ꓫꓵꓺ ꓔꓯ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓡꓯꓼ ꓙꓱ ꓖꓶ ꓠ, ꓟ ꓐꓯ ꓗꓷꓳ꓿
ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓑ ꓫꓬ ꓐꓴ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓠꓬ ꓫ. ꓢꓴ ꓟꓷꓽ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ‐ꓟ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓫ. ꓓꓴ ꓟꓷꓽ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓟꓽ ꓓꓴ ꓙ꓿ ꓘꓴ ꓜꓲꓼ ꓞꓳ ꓠꓬ ꓫ. ꓢꓴ ꓟꓷꓽ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓔꓬ ꓟ ꓟꓲ ꓥ ꓡꓳ꓿ ꓘꓴ ꓜꓲꓼ ꓞꓳ ꓠꓬ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓔꓯ ꓫ. ꓢꓴ ꓟꓷꓽ ꓢꓴ ꓐꓴ ꓔꓯ ꓬꓰ ꓙ ꓡꓳ. ꓙ ꓠ, ꓟ ꓙꓵꓽ ꓪ ꓖꓶ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓠꓬ ꓣꓳ‐ꓟ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓘꓴ ꓜꓲꓼ ꓞꓳ ꓠꓯ, ꓗꓪ ꓒꓴ ꓫꓵ ꓔꓯ ꓖꓶ ꓠ, ꓟ ꓐꓱ ꓶ ꓬꓲ ꓙꓵ, ꓢꓽ ꓠꓬꓲ ꓖꓶ ꓡꓯ ꓐꓰ ꓓꓰꓽ ꓗꓷꓳ꓿ ꓕꓱ ꓢꓽ ꓠꓬꓲ ꓕꓯ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓠꓬ ꓣꓳ‐ꓟ ꓑ ꓫꓬ ꓐꓴ ꓠꓯ, ꓗꓪ ꓐꓰ ꓫ. ꓓꓴ ꓟꓷꓽ ꓢꓴ ꓐꓴ ꓐꓰ ꓠꓻ ꓓꓴ ꓑꓬ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓔꓯ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓐꓴ ꓟꓲ ꓙꓱ ꓗꓪ ꓧꓳꓽ ꓡ ꓟ ꓥ ꓡꓳ꓿
ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓠꓬ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓔꓯ ꓕꓯ ꓟ ꓠꓬ ꓘꓴ ꓜꓲꓼ ꓞꓳ ꓠꓯ, ꓗꓪ ꓙꓳ ꓟ ꓒꓴ ꓫꓵꓺ ꓐꓴ ꓮ ꓙꓵꓽ ꓥ ꓡꓳ ꓐꓰ ꓫ. ꓕꓱ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓬ ꓠꓲ, ꓟ ꓩꓴ ꓡ ꓢꓲ ꓠꓬꓲ ꓮ ꓘꓶ. ꓛꓲ ꓞꓽ ꓟ ꓮ. ꓔꓳ ꓐꓬꓱ ꓗꓪ ꓞꓰ ꓩꓴ. ꓗꓷ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓙꓲꓻ ꓫꓬ ꓢꓴ ꓡꓮꓪꓰꓠꓚꓰ ꓠꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓟ ꓥ ꓡꓳ꓿
