ꓛꓬ˗ꓐꓳ˗ꓛ ꓙꓲꓻ ꓫꓬ ꓢꓴ ꓬꓳ˗ꓦ ꓪꓽ ꓘꓴ ꓦꓲꓻ ꓗꓪ ꓪꓴ˗ꓢ ꓟꓬꓱꓽ ꓟꓯ ꓔꓬ ꓟ ꓟꓸ ꓟ ꓔꓯ ꓟꓬꓱꓺ ꓓꓳꓽ ꓖꓶ ꓟ ꓑꓮꓲꓽ ꓬꓰ ꓟ
10 ꓦ ꓟ 19 ꓠꓬꓲ 2025 ꓘꓳꓼ ꓢꓲꓺ ꓒ ꓦꓬꓼ ꓠꓬꓲ ꓕꓯ ꓙꓲꓻ ꓫꓬ ꓢꓴ ꓡꓴ˗ꓘ ꓑꓮꓲꓽ ꓦꓬꓼ ꓠꓬꓲ ꓗꓪ ꓗ˗ꓛꓲ ꓗꓴꓷꓼ ꓫꓴꓻ ꓟꓲ˗ꓚꓲ˗ꓠ ꓢ˗ꓢꓲ˗ꓠ ꓢꓔꓸ ꓟꓲꓚꓧꓰꓮꓡ ꓔꓲꓺ ꓒ ꓙꓵꓽ ꓔꓶꓸ ꓛꓬ˗ꓐꓳ˗ꓛ ꓞꓳ ꓘꓹ ꓗꓪ ꓪꓴ˗ꓢ ꓟꓬꓱꓽ ꓟꓯ ꓔꓬ ꓟ ꓟꓸ ꓟ ꓰꓡꓲꓜꓮꓐꓰꓔꓧ ꓠꓲꓠ˗ꓣꓮꓟ ꓔꓯ ꓟꓬꓱꓽ ꓓꓳꓽ ꓖꓶ ꓒꓴ ꓗꓹ ꓬꓰ ꓟ ꓑꓮꓲꓽ ꓔꓯ ꓬꓰ ꓗꓷꓳ꓿
ꓕꓲ ꓟꓲ ꓠꓯ ꓡꓱꓼ ꓗꓪ ꓪꓴ˗ꓢ ꓟꓬꓱꓽ ꓬꓰ ꓢꓴ ꓐꓴ ꓦꓬꓼ ꓠꓬꓲ ꓗꓪ ꓛꓬ˗ꓐꓳ˗ꓛ ꓞꓳ ꓘꓹ ꓗꓪ ꓬꓲ ꓙꓵꓹ ꓟꓶ ꓫꓵ ꓫꓵ ꓪꓴ˗ꓢ ꓟꓬꓱꓽ ꓟꓯ ꓗꓷ ꓟ ꓟꓸ ꓟ ꓓꓽ ꓔꓯ ꓥ ꓟꓲ ꓟꓬꓱꓺ ꓓꓳꓽ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓑꓮꓲꓽ ꓗꓪ ꓔꓲꓺ ꓒ ꓟꓲꓚꓧꓰꓮꓡ ꓥ ꓟꓲ ꓐ ꓢꓲ ꓠꓬꓲ ꓢꓯꓼ ꓖꓶ ꓪ ꓖꓶ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓡꓰ ꓢꓯꓼ ꓖꓶ ꓟ ꓗꓪ ꓪꓴ˗ꓢ ꓟꓬꓱꓽ ꓟꓯ ꓐꓯ ꓟꓸ ꓠꓬ ꓫꓸ ꓕꓱ ꓢꓯꓼ (ꓟꓶ ꓠꓶ) ꓗꓪ ꓐꓰ ꓡꓰ ꓟꓸ ꓟꓲꓽ ꓚꓺ ꓠꓹ ꓟ ꓟꓽ ꓥ꓿ ꓙꓲ˗ꓢꓴ ꓢꓲꓺ ꓤ ꓕꓲ ꓣꓳ ꓮ ꓡꓰ ꓐꓰ ꓢꓯꓸ ꓔꓬ ꓞꓳ ꓙꓳ ꓠꓹ ꓟ ꓔꓯ ꓟꓸ ꓖꓶ ꓠꓹ ꓟ ꓥ ꓡꓳ ꓐꓰ ꓢꓯꓼ ꓖꓶ ꓗꓷ ꓟ ꓥ ꓡꓳ꓿ ꓛꓬ˗ꓐꓳ˗ꓛ ꓟꓸ ꓟ ꓥ ꓟꓲ ꓮ ꓘꓶꓸ ꓢꓯꓼ ꓕꓵꓼ ꓢꓲ ꓠꓬꓲ ꓪꓴ˗ꓢ ꓟꓬꓱꓽ ꓗꓪ ꓧꓳꓽ ꓪꓴꓸ ꓟꓴ ꓔꓬ ꓟ ꓔꓯ ꓟꓬꓱꓽ ꓓꓳꓽ ꓖꓶ ꓔꓬ ꓡꓳ ꓐꓰ ꓔꓲꓺ ꓒ ꓡꓰ ꓢꓯꓼ ꓖꓶ ꓗꓷ ꓟ ꓥ ꓡꓳ꓿
ꓝꓮꓲ ꓟꓸ ꓟ ꓔꓯ ꓞꓳ ꓡꓯꓸ ꓐꓴ ꓐꓰ ꓧꓳꓡꓬ ꓚꓧꓲꓡꓓꓧꓳꓳꓓ ꓤ ꓠꓱ ꓜꓴꓻ ꓗꓪ ꓐꓰ ꓥ ꓟꓲ ꓟꓴ ꓗꓪ ꓖꓪ ꓢꓲ ꓠꓬꓲ ꓟꓬꓱꓺ ꓓꓳꓽ ꓖꓶ ꓗꓷ ꓟ ꓥ ꓡꓳ꓿ ꓙꓲ˗ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓥ ꓟꓲ ꓟꓸ ꓟ ꓔꓯ ꓫꓸ ꓟꓳ ꓒꓴ ꓗꓹ ꓬꓰ ꓗꓷ ꓢꓲ ꓠꓬꓲ ꓑꓮꓲꓽ ꓔꓯ ꓗꓹ ꓛꓲ ꓛꓲ ꓡꓰ ꓬꓰ ꓗꓷꓳ ꓐꓰ ꓢꓷꓸ ꓪ ꓡꓳ꓿
