ꓮ ꓙꓵꓽ ꓔꓯ ꓧꓪ. ꓧꓪꓸꓼ꓾ ꓢ. ꓠꓯ ꓠꓬ 29 ꓠꓽ ꓟ ꓢꓲ‐ꓒ‐ꓦꓬꓼ‐ꓠꓬꓲ ꓥ ꓡꓳ꓿ ꓣꓳ ꓵꓻ ꓠ ꓔ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓟ‐ꓘꓳ 10ꓽ35‐45 ꓥ ꓡꓳ꓿ ꓟ. ꓟꓲꓽ ꓘꓴꓽ ꓗꓪ ꓠꓬ ꓬꓳ‐ꓦ ꓐꓰ ꓬ‐ꓗꓴ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓡ ꓢꓲ ꓠꓬꓲ꓾ “ꓟ. ꓒꓽꓳ꓾ ꓠꓴ ꓗꓴꓷꓼ ꓛꓲ ꓡ ꓕꓯ ꓥꓪ ꓠꓴꓽ ꓔꓯ ꓠꓴ ꓡꓯꓼ ꓙ ꓗꓪ ꓕꓲ ꓣꓳ ꓡꓯꓼ ꓶ. ꓗꓪ ꓕꓲ ꓣꓳ ꓠꓬꓲ ꓠ. ꓠ, ꓟ ꓙꓵꓽ ꓪ ꓖꓶ ꓡꓯ”꓾ ꓐꓰ ꓓꓽˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓬꓳ‐ꓦ ꓐꓰ ꓬ‐ꓗꓴ ꓬꓲ ꓪ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳꓻ ꓔꓬ ꓟ ꓠꓬ ꓟꓬꓱꓺ ꓓꓳꓽ ꓟꓶ ꓠ, ꓟ꓾ ꓙꓵꓽ ꓪ ꓟꓶ ꓠ, ꓟ ꓥ ꓡꓳ ꓐꓰ ꓬꓲ ꓪ ꓓꓵꓽ ꓙ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓞꓳ ꓤ ꓮ ꓙꓵꓽ ꓔꓯ ꓚꓬꓴ. ꓠ, ꓟ ꓐꓱ ꓶ ꓬꓯꓼ ꓡ ꓟ ꓚꓬꓴ. ꓢꓲ ꓒ ꓥ ꓡꓳ꓾ ꓐꓯ ꓟ ꓬꓲ ꓪ ꓔꓬ ꓟꓽ ꓪ ꓢꓰꓽ꓿ ꓬꓲ ꓪ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓬꓲ‐ꓢꓷ‐ꓡꓰ ꓐꓱ ꓶˍ ꓡꓰꓽ ꓣꓳ‐ꓟ ꓡꓽ ꓞꓳ ꓡꓯꓽ ꓒꓯ, ꓗꓪ ꓐꓰ ꓡꓲ, ꓗꓷ ꓐ ꓡ ꓠ, ꓟ ꓐꓱ ꓶ꓾ ꓓ‐ꓪꓵ ꓔꓯ ꓫꓱ.ˍ ꓟ ꓕꓲꓽ ꓣꓳ ꓥ ꓡꓳ ꓐꓰ ꓬꓲ ꓪ ꓓꓵꓽ ꓙˍ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓚꓵ ꓚꓵ ꓟꓽ ꓢꓷ. ꓡꓰ ꓢꓰꓽ꓿ ꓬꓲ ꓪ ꓢꓷ. ꓔ ꓟ ꓠꓬ꓾ ꓬꓲ ꓪ ꓢꓲ ꓒ ꓬꓰ‐ꓢꓴ ꓔꓯ ꓛꓳꓻ ꓔꓬ ꓟ ꓠꓬ ꓔꓬ, ꓖꓴ ꓓꓽ ꓟ ꓕꓲ ꓟ ꓟꓶ ꓠ, ꓟ ꓐꓱ ꓶ ꓬꓲ ꓪ ꓓꓰꓽˍ ꓡꓳ꓾ ꓠꓲ, ꓟ ꓠꓯꓸꓼ ꓙꓽ ꓖꓶ ꓔ ꓡꓳ꓿
ꓠꓴ ꓐꓰ ꓥꓪ ꓤꓶꓻ ꓗꓪ ꓓꓵꓽ ꓙ ꓠꓬꓲ ꓡꓯ ꓬꓲꓼ ꓤ ꓠꓬꓲ ꓤ ꓐꓴꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓮ ꓫꓵꓽ ꓑꓶ. ꓓꓴ ꓙꓵꓻˍ ꓡ꓿ ꓬꓲ ꓔꓯ ꓬꓲ ꓣꓳ ꓟꓲ ꓠꓯ ꓕꓲ ꓒꓳ, ꓗꓪ ꓪ ꓜꓽ ꓪ ꓓꓳꓻ ꓠ, ꓟ ꓐꓱ ꓶ꓾ ꓣꓳ ꓜꓳꓽ ꓜꓳꓽ ꓪ ꓔꓬ ꓠ, ꓟ ꓐꓱ ꓶ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓦ ꓡꓱ ꓔꓬ ꓟ ꓥ ꓡ꓿ ꓕꓲ ꓚꓱ, ꓐꓯ ꓠꓬ ꓟꓲ ꓠꓯ ꓕꓱ ꓟ ꓗꓪ ꓣꓳꓽ ꓜꓽ ꓪ꓾ ꓔꓬ, ꓪ꓾ ꓖꓪꓽ ꓪ ꓠ, ꓟ ꓐꓱ ꓶ꓾ ꓙꓲꓻˍ ꓟ ꓟꓶ ꓠ, ꓟ ꓐꓱ ꓶ꓾ ꓕꓱ ꓡꓱ ꓫꓵꓽ ꓐꓱ ꓶ ꓢꓲ ꓒ ꓬꓰ‐ꓢꓴ ꓔꓯ ꓣꓳꓽ ꓙꓵꓻ ꓔꓬ ꓡ꓿ ꓣꓳ ꓙꓳꓺ ꓛꓱꓽ ꓡ ꓕꓯ ꓫ. ꓑꓬ ꓖꓴ꓾ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳꓽ ꓡ ꓕꓯ ꓣꓳ ꓔꓽ ꓪꓴꓽ ꓖꓴ꓾ ꓕꓰ ꓡꓰ,ˍ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓙꓵꓻ ꓔꓬ ꓡ꓿ ꓙꓲꓻ ꓫꓬ ꓢꓴ ꓒꓳ‐ꓡꓳ ꓡꓰ ꓕꓱ ꓡꓱ ꓐꓯ ꓔ ꓡꓳ꓿ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓕꓱ ꓕꓲ ꓤꓶꓻ ꓐꓱ ꓶˍ ꓡꓰꓽ ꓙꓵꓻˍ ꓥꓳ ꓐꓯ ꓠꓬ ꓣꓳ ꓟꓬ ꓛꓲ ꓫꓱ. ꓤ ꓓꓴ ꓧ. ꓫꓵꓽ ꓞꓳ ꓤ ꓟꓽ ꓙꓳ꓾ ꓐꓰ ꓙꓲꓻ ꓫꓬ ꓢꓴ ꓒꓳ‐ꓡꓳ ꓡꓰ ꓐꓯ ꓔ ꓡꓳ꓿
ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓓ, ꓟ ꓡꓰ ꓐꓰ ꓠꓱ. ꓐꓯ ꓢꓴ ꓔꓯ ꓕꓽ ꓐꓯ ꓢꓰꓽ꓿ ꓬꓲ ꓝꓲ ꓓꓴ ꓐꓴ ꓘꓴꓽ ꓠꓯꓸꓼ ꓗꓪˍ ꓟꓲ ꓢꓲ ꓒ ꓬꓰ‐ꓢꓴ ꓗ ꓠꓯ. ꓗꓪ ꓛꓳ ꓔꓬ ꓟˍ ꓟꓲ ꓬꓲ ꓔꓶ ꓙꓱꓼ ꓙꓳˍ ꓡꓳ꓿ ꓕꓱ ꓟ ꓠꓬ ꓬꓲ ꓪ ꓠꓬ ꓬꓲ ꓪ ꓐꓱ ꓶˍ ꓡꓰꓽ ꓓꓵꓽ ꓙꓽ ꓢꓲ ꓕꓱ ꓡꓱ ꓖꓼ ꓛꓳꓻ ꓔꓬ ꓟ ꓙꓳˍ ꓡꓳ꓿ ꓔꓯꓺ ꓥꓳꓽ ꓐꓯˍ ꓠꓬ ꓬꓳ‐ꓦ ꓐꓰ ꓬ‐ꓗꓴ ꓕꓱ ꓡꓱ ꓓꓰꓽ ꓗꓷ ꓕꓯ ꓠꓱ. ꓐꓯ ꓝꓲ ꓓꓴ ꓐꓴ ꓥ ꓟ ꓒꓲ‐ꓕꓱ꓾ ꓯ‐ꓓꓱ‐ꓣꓴ ꓐꓴ ꓑ ꓙꓽˍ ꓕꓯ ꓬꓲ ꓪ ꓠꓬ ꓠꓲ, ꓟ ꓦꓶ ꓔꓴ ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ꓾ ꓣꓳꓽ ꓕꓲ ꓡꓰ, ꓐꓰ ꓢꓯꓼ ꓕꓵꓼ ꓔ ꓢꓲ ꓠꓬꓲ ꓠꓴ ꓪ ꓠꓬꓲꓽ ꓣꓳ ꓔꓵꓸꓼ ꓢꓲ ꓒ ꓬꓰ‐ꓢꓴ ꓒ ꓕꓲꓺ ꓗꓪ ꓔꓬ ꓠꓲ, ꓫꓵˍ ꓡ ꓐꓯ ꓢꓲ ꓠꓬꓲ ꓬꓲ ꓪ ꓠꓬ ꓠꓲ, ꓟ ꓦꓶˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓡꓯꓼ ꓫꓵ ꓐꓯ ꓟ. ꓖꓶˍ ꓡꓳ꓿
ꓖꓳ ꓡꓱ ꓠꓬꓲ ꓠꓱ. ꓐꓯ ꓢꓴ ꓔꓯ ꓕꓽ ꓐꓯ ꓢꓰꓽ꓾ ꓬꓲ ꓝꓲ ꓓꓴ 12 ꓣꓳ ꓠꓯꓸꓼ ꓘꓴꓽ ꓗꓪ ꓡꓲ. ꓠꓽ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳˍ ꓟ ꓗꓪ ꓬꓲ ꓪ ꓥꓳ ꓡꓳ. ꓓꓴ ꓕꓱ ꓟ ꓟꓲ ꓠꓯ ꓐꓱ ꓶ꓾ ꓟꓲ ꓠꓯ ꓖꓴꓽ ꓙꓴꓽ ꓐꓱ ꓶ ꓥꓳ ꓡꓳ. ꓢꓲ ꓠꓬꓲ ꓖꓼ ꓛꓳꓻ ꓔꓬ ꓫꓵꓽ ꓙꓳˍ ꓡꓳ꓿ ꓬꓲ ꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓢꓷ. ꓡꓰ ꓢꓰꓽ꓿ ꓢꓲ ꓒ ꓠꓬ ꓬꓲ ꓪ ꓔꓯ ꓮ ꓤ ꓤ ꓐꓰ ꓧꓳꓽ ꓣꓱꓽ ꓢꓲ ꓟ. ꓖꓶ ꓑꓱ ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓠꓬꓲ. ꓠꓬꓲ ꓔꓱ, ꓔꓱ, ꓐꓰ ꓓꓵꓽ ꓙꓽ ꓠꓬꓲ ꓡꓯ꓿ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓟ꓾ ꓣꓳ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼˍ ꓟ ꓠꓬ ꓟꓲ ꓠꓯ ꓖꓴꓽ ꓙꓴꓽ ꓐꓱ ꓶ ꓜꓽ ꓪ ꓓꓳꓻ ꓪ ꓠ, ꓟ ꓐꓱ ꓶ꓾ ꓙꓵꓽ ꓪ ꓟꓶ ꓠ, ꓟ ꓐꓱ ꓶ꓾ ꓖꓪꓽ ꓪ ꓠ, ꓟ ꓐꓱ ꓶ꓾ ꓒꓴ ꓫꓵ ꓟꓶ ꓠ, ꓟ ꓐꓱ ꓶ ꓬꓲ ꓔꓯ ꓪꓽ ꓘꓴ ꓠ, ꓟ ꓐꓱ ꓶ꓾ ꓕꓱ ꓫꓵꓽˍ ꓡꓰꓽ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓟ ꓟꓽ ꓥ ꓥ ꓐꓰ꓾ ꓣꓳ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶ ꓠ, ꓟ ꓐꓰ ꓶ꓾ ꓣꓳ ꓠꓬ ꓬꓲˍ ꓐꓰ ꓞꓳ ꓙꓳ ꓢꓲ꓾ ꓬꓲ ꓠꓯꓸꓼ ꓗꓪ ꓞꓳ ꓙꓳ ꓢꓲ ꓠꓬꓲ꓾ ꓬꓲ ꓐꓰ ꓕꓲꓽ ꓪ ꓞꓳ ꓙꓳ ꓢꓲ ꓠꓬꓲ꓾ ꓡ ꓠ, ꓟ ꓦꓬꓼ ꓠꓬꓲ ꓗꓪ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓟꓶ ꓠ, ꓟ ꓐꓱ ꓶ ꓙꓵꓻ ꓔꓬ ꓥꓳ ꓐꓯ ꓠꓬ ꓣꓳ ꓙꓵꓻ ꓠꓲ, ꓠꓬ ꓜꓳꓽˍ ꓡꓳ꓾ ꓔꓱ,ˍ ꓡꓳ꓾ ꓙꓲꓻˍ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓙꓵꓻ ꓠꓲ, ꓔꓯ ꓜꓳꓽ ꓜꓳꓽ ꓐꓰ ꓓꓵꓽ ꓙꓽ ꓠꓬꓲ ꓡꓯ꓿ ꓢꓲ ꓒ ꓬꓰ‐ꓢꓴ ꓗ ꓠꓯ. ꓣꓳ ꓖꓼˍ ꓡꓳ꓿ ꓬꓲ ꓔꓯ ꓣꓳꓽ ꓙꓵꓻˍ ꓡꓳ꓾ ꓚꓵ ꓚꓵ ꓙꓵꓻˍ ꓡꓳ꓿ ꓥ ꓡꓳ꓾ ꓟꓲ ꓠꓯ ꓕꓱ ꓟ ꓗꓪ ꓧꓪꓽ ꓖꓳ ꓓꓱꓽ ꓕꓲ ꓒꓳ, ꓗꓪ ꓥˍ ꓟꓲ ꓬꓲ ꓣꓳ ꓔꓯ ꓬꓰ ꓙ ꓠ, ꓟ ꓐꓱ ꓶ ꓣꓳ ꓬꓲ ꓔꓯ ꓪꓽ ꓘꓴˍ ꓡꓳ꓾ ꓶꓼ ꓓꓰꓽˍ ꓡꓳ꓿ ꓫ. ꓙꓵ ꓟꓷꓼ ꓙꓵ ꓡ ꓕꓯ ꓬꓲ ꓔꓯ ꓫ. ꓑꓬˍ ꓡꓳ꓿ ꓠꓲ, ꓥꓴꓻ ꓓꓴ ꓔꓳ, ꓜꓳꓽ ꓡˍ ꓕꓯ ꓬꓲ ꓠꓯꓸꓼ ꓗꓪ ꓣꓳ ꓓꓵꓽ ꓙꓰˍ ꓡꓳ꓿ ꓪꓽ ꓘꓴ ꓦꓲꓻ ꓗꓪ ꓔꓷ, ꓓꓵꓽ ꓙꓰˍ ꓡꓳ꓿ ꓕꓱ ꓟ ꓠꓬ ꓙꓲꓻˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ꓾ ꓣꓳ ꓙꓵꓻ ꓠꓲ, ꓠꓬ ꓕꓱ ꓟ ꓔꓯ ꓡꓰꓽ ꓥꓳ ꓡꓳ. ꓢꓲ ꓠꓬꓲ ꓟꓽ ꓫꓵꓻ ꓝꓲ ꓠ, ꓟ ꓬꓳ. ꓚꓰꓽˍ ꓡꓳ꓿ ꓟꓲ ꓠꓯ ꓕꓱ ꓕꓲ ꓒꓳ, ꓐꓱ ꓶˍ ꓡꓰꓽ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓟ ꓟꓽ ꓥ ꓥ ꓐꓰ꓾ ꓟꓲ ꓠꓯ ꓕꓱ ꓟ ꓗꓪ ꓔꓳ, ꓜꓳꓽ ꓠ ꓔ ꓟ ꓫ. ꓙꓵ ꓟꓷꓼ ꓙꓵ ꓓꓴ ꓠꓬꓲꓽ ꓗꓴ. ꓚꓸꓼ ꓗꓪ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓛꓳˍ ꓞꓳ ꓙꓳ ꓢꓲ ꓠꓬꓲ꓾ ꓡꓳ, ꓙꓰ ꓟꓽ ꓓꓻ ꓟ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓘꓳ, ꓣꓴ ꓠ, ꓟ ꓐꓱ ꓶ ꓬꓲ ꓔꓯ ꓙꓵꓻˍ ꓡꓳ꓾ ꓐꓯ ꓟ ꓣꓳ ꓓꓵꓽ ꓙꓽ ꓢꓲ ꓠꓬꓲ ꓣꓳ ꓡꓯꓼ ꓫꓵ ꓢꓯꓼ ꓕꓵꓼ ꓙꓰ ꓡꓯ꓿
