ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓽ ꓡ ꓟ ꓚꓱ, (Global warming)
ꓠꓬꓲ. ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓚꓱ, ꓗꓪ ꓐꓰ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓽ ꓡ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓟꓬ, ꓠꓬꓲ ꓞꓽ ꓡ ꓟ ꓥ ꓡꓳ꓿ ꓖꓳ ꓟ ꓠꓬ ꓣꓳ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓮ ꓘꓶ. ꓛꓲ ꓙꓳꓺ ꓠ, ꓟ ꓔ ꓟ ꓚꓱ, ꓥ ꓡꓳ꓿ ꓕꓱ ꓡꓰ ꓐꓰ ꓟꓲ ꓠꓯ ꓞꓽ ꓡ ꓟ ꓚꓱ, ꓗꓪ ꓡꓶ. ꓙꓰ ꓪ ꓠ, ꓟ ꓬꓰ ꓠ, ꓟ ꓠꓬ ꓟꓬꓱꓽ ꓓꓽ ꓟ ꓕꓲ ꓟ ꓥ ꓡꓳ꓿ ꓠꓬꓲ. ꓠꓬꓲ ꓒꓴ ꓫꓵꓽ ꓮ ꓟꓬ, ꓙꓳ ꓢꓴ ꓞꓳ ꓫ. ꓐꓴ ꓥ ꓟꓲ ꓟꓵꓽ ꓘꓳꓼ ꓞꓽ ꓡ ꓟ ꓔꓯ ꓓꓴ ꓙ ꓫ. ꓢꓴ ꓡꓰ ꓥ ꓡꓳ꓿
ꓕꓲ ꓦꓲꓻ ꓡꓰ ꓕꓲ ꓠꓬꓲ ꓚꓲ. ꓛꓬ ꓬꓰ ꓜꓽ ꓠ, ꓟ ꓟꓬꓱꓽ ꓖꓳ ꓡꓰ ꓟꓽ ꓞꓲ ꓚꓲ. ꓛꓬ ꓕꓲ ꓦꓲꓻ ꓐꓴ ꓔꓳ, ꓜꓳ ꓟ ꓫꓵꓽ ꓪꓴꓽ ꓥ ꓔ ꓑꓳ ꓔꓯ ꓟꓬ, ꓠꓬ ꓓꓴ ꓙ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓓꓴ ꓙ ꓠ, ꓟ ꓙꓵ, ꓮ ꓘꓶ. ꓟꓽ ꓙꓳ ꓟ ꓚꓱ, ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓞ ꓡ ꓟ ꓚꓱ, ꓔꓯ ꓓꓴ ꓙ ꓫ. ꓢꓴ ꓟꓽ ꓙꓳ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿
ꓟꓲ ꓠꓯ ꓡ ꓞꓳ ꓐꓴ ꓓꓴ ꓙ ꓫ. ꓔꓬ ꓟ ꓠꓬ ꓟꓲ ꓠꓯ ꓒꓴ ꓫꓵˍ ꓮ ꓡꓰ ꓧꓪ꓾ ꓒꓴ ꓫꓵ ꓮ ꓡꓰ ꓣꓱ ꓠ, ꓟ ꓔꓯ ꓡꓰ ꓓꓴ ꓙ ꓔꓬ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓦꓲꓻ ꓥꓪ. ꓒꓴ ꓟꓬꓽ ꓡ ꓟ ꓢꓷ. ꓠꓲ, ꓢꓳꓻ ꓒꓵꓽ ꓬꓲ ꓑꓶ. ꓟꓬ, ꓡ ꓟ ꓒꓴ ꓫꓵˍ ꓡꓰ ꓣꓱ ꓠ, ꓗꓷ ꓡꓰ ꓟ ꓔꓯ ꓡꓰ ꓓꓴ ꓙ ꓔꓬ ꓟ ꓥ ꓡꓳ꓿
ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓓꓴ ꓓꓳ ꓓꓴ ꓔꓯ ꓪꓴꓽ ꓜꓽ ꓠ, ꓟ ꓐꓱ ꓶ ꓣꓱ ꓠ, ꓟ ꓒꓴ ꓫꓵˍ ꓞꓲꓼ ꓪꓴꓽ ꓡꓰ ꓢꓲ ꓠꓬꓲ ꓟꓬꓱꓽ ꓗꓪ ꓐꓰ ꓠꓽ ꓡꓰ ꓕꓯ ꓠꓺ ꓦ ꓟ ꓒꓴ ꓫꓵ ꓔꓯ ꓮ ꓡꓰ ꓐꓰ ꓣꓱ ꓠ, ꓟ ꓮ ꓡꓰ ꓐꓰ ꓒꓴ ꓠꓺ ꓠ, ꓟ ꓐꓱ ꓶ ꓡꓰ ꓓꓴ ꓙ ꓔꓬ ꓟ ꓪꓴ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟꓲ ꓠꓯ ꓞꓽ ꓡ ꓟ ꓔꓯ ꓓꓴ ꓙ ꓠ, ꓟ ꓬꓲ ꓙꓵ, ꓟꓽ ꓙꓳ ꓟꓽ ꓓꓴ ꓙ ꓗꓷ ꓡꓰ ꓟ ꓥ ꓡꓳ꓿
ꓟꓲ ꓠꓯ ꓞꓽ ꓡ ꓟ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓠꓬ ꓮ ꓘꓶ. ꓪꓴꓽ ꓟ ꓫꓵꓽ ꓪꓴꓽ ꓓꓽ ꓕꓲ ꓟ ꓥ ꓡꓳ꓿ 1998 ꓘꓳꓼ ꓕꓯ ꓴꓢꓮ ꓗꓴꓷꓼ ꓗꓪ ꓒꓬꓱꓼ ꓗꓷ ꓟ ꓟꓲ ꓦꓲꓻ ꓕꓳꓽ ꓥꓳꓽ ꓙꓱ ꓡ ꓟ ꓪꓴ. ꓠꓬꓲ ꓑ ꓫꓬ ꓮ ꓟꓬ, ꓫꓵꓻ ꓡꓰ ꓟ ꓥ ꓡꓳ꓿ ꓝꓮꓲ ꓐꓬ ꓡꓰ ꓑ ꓫꓬ ꓦꓲꓻ ꓥ ꓟꓲ ꓮ ꓟꓬ, ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓲ ꓠꓯ ꓞꓽ ꓡ ꓟ ꓚꓱ, ꓔꓯ ꓓꓴ ꓙ ꓠ, ꓟ ꓬꓲ ꓙꓵ, ꓟꓽ ꓖꓶ ꓟ ꓥ ꓡꓳ꓿ ꓟꓲ ꓠꓯ ꓞꓽ ꓡ ꓟ ꓔꓯ ꓫꓬ, ꓠ, ꓟ ꓫꓵꓽ ꓪꓴꓽ ꓔꓯ ꓫꓬ, ꓠ, ꓟ ꓬꓲ ꓚꓱ, ꓪꓽ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓕꓱ ꓡꓱ ꓟꓽ ꓬꓰ ꓠꓬ ꓛꓲ ꓡ ꓟ ꓤꓶꓻ ꓦꓬꓼ ꓠꓬꓲ ꓟꓲ ꓠꓯ ꓞꓳ ꓤ ꓐꓴ ꓮ ꓘꓶ. ꓛꓲ ꓔꓬ ꓫ. ꓡ ꓓꓴ ꓙꓳ ꓡꓳ ꓐꓰ ꓕꓳ ꓶ ꓗꓪ ꓐꓳ ꓔ ꓡꓳ꓿
