ꓪꓴ‐ꓢ ꓠꓬ ꓣꓳ ꓝꓴꓲ ꓔꓯ ꓟꓽ ꓟꓳ꓾ ꓖꓽ ꓖꓶ ꓢꓲ ꓛꓲ ꓔꓴ ꓖꓶ_ ꓡꓳ꓿
ꓕꓲ ꓠꓽ ꓡꓲ ꓕꓲ ꓠꓽ ꓠꓽ ꓢꓽ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ ꓟ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓪꓴ‐ꓢ ꓠꓬ ꓖꓽ ꓖꓶ_ ꓟ꓾ ꓛꓲ ꓔꓴ ꓖꓶ_ ꓟ ꓐꓰ ꓙꓵꓻ ꓠꓲ, ꓔꓯ ꓫꓬ, ꓔꓱ, ꓖꓶ_ ꓟ ꓔꓯ ꓬꓰ ꓖꓶ_ ꓟ ꓚꓱ, ꓟ. ꓖꓶ_ ꓡꓳ꓿
“ꓣꓳ ꓥꓳ ꓡꓳ. ꓓꓴ ꓥ ꓟ ꓢꓲ ꓒ ꓬꓰ‐ꓢꓴ” ꓚꓱ, ꓟ. ꓖꓶ_ ꓟ ꓗꓪ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓠꓬ ꓣꓳ ꓥꓳ ꓡꓳ. ꓓꓴ ꓬꓲ. ꓚꓰ ꓓꓽ ꓟ ꓥ ꓟ ꓔꓯ ꓐꓯ ꓖꓶ ꓢꓲ꓾ ꓬꓲ ꓢꓯ. ꓬꓲꓼ ꓡ ꓟ ꓠꓬ ꓣꓳ ꓙꓵꓻ ꓠꓲ, ꓬꓲ ꓚꓰ ꓥ ꓢꓲ ꓠꓬꓲ ꓥꓳ ꓡꓳ. ꓓꓴ ꓠꓲ, ꓟ ꓘꓴꓽ ꓗꓪ ꓕꓷꓻ ꓞ, ꓢꓲ ꓬꓲ ꓚꓰ ꓣꓳꓺ ꓡꓰ ꓟ ꓔꓯ ꓓꓵꓽ ꓙ ꓡꓰ ꓝꓲ_ ꓟ ꓗꓪ ꓐꓰ ꓪꓴ. ꓔꓴ ꓗꓷ ꓟ ꓥ ꓡꓳ꓿
ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓔꓯ ꓵꓻ ꓠꓬꓲ ꓠꓬ ꓬꓲ ꓠꓯ. ꓟ ꓐꓰ ꓓꓵ ꓙ ꓮʼ ꓡꓰ ꓓꓴ ꓙꓳ_ ꓟ ꓔꓯ ꓢꓷ. ꓡ ꓥꓳ꓿ ꓬꓲ ꓚꓱ, ꓠꓬ ꓪꓴ‐ꓢ ꓬꓲ ꓤ ꓔꓲ ꓠꓬ ꓫꓵꓻ ꓟ ꓗꓪ ꓐꓰ ꓝꓮꓲ ꓢꓯ. ꓬꓲꓼ ꓡ ꓟ ꓡꓰ ꓟꓽ ꓞꓲ꓾ ꓢꓲ ꓒꓽ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓢꓲꓺ ꓣꓴ ꓗꓷ ꓟ ꓑꓶ ꓓꓴ ꓓꓵꓽ ꓙ ꓮʼ ꓡꓰ ꓓꓴ ꓙꓳ ꓟ ꓥ ꓡꓳ꓿
ꓚꓵ ꓚꓵ꓾ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓠꓬ ꓮ ꓘꓶ. ꓛꓲ ꓪꓴꓽ ꓓꓰ ꓡꓰ_ ꓟ ꓧꓪ. ꓡꓰ ꓓꓴ ꓕꓲ ꓟ ꓟꓽ ꓥ ꓟ ꓡꓰ ꓐꓰ ꓛꓴꓽ ꓙꓳ ꓢꓴ ꓠꓯꓼ ꓗꓪ ꓝꓮꓲ ꓔ ꓔꓳ, ꓟ ꓡꓰ ꓥ ꓟꓲ ꓟꓽ ꓥ꓾ ꓖꓳ ꓟ ꓡꓰ ꓐꓰ ꓪꓴꓽ_ ꓟ ꓞꓳ. ꓡꓰ ꓓꓴ ꓠꓯꓼ ꓗꓪ ꓐꓰ ꓠꓵꓻ ꓠꓲ, ꓠꓬ ꓟꓽ ꓠꓽ ꓠꓽ ꓠꓲ, ꓠꓵꓻ ꓐ ꓡ ꓟ ꓔꓯ ꓟ. ꓖꓶ_ ꓟ ꓓꓵꓽ ꓙ ꓟꓶ ꓓꓴ ꓕꓲ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
ꓪꓴ‐ꓢ ꓓꓵꓽ ꓙ_ ꓟ ꓐꓰ ꓣꓳ ꓓꓵ ꓙ_ ꓟ ꓟꓽ ꓫꓱ, ꓟ꓾
ꓣꓳ ꓠꓬ ꓠꓱ. ꓐꓯꓼ ꓢꓴ ꓑꓶ ꓓꓴ ꓠꓻ ꓓꓴ ꓡꓰ ꓢꓲ ꓝꓮꓲ ꓓꓻ ꓡꓰ ꓕꓯ ꓓꓽ ꓪꓴ. ꓔꓳ, ꓡ ꓟ ꓠꓬ ꓬꓲ ꓔꓯ ꓠꓲ, ꓟ ꓦꓶ_ ꓟ꓾ ꓣꓳ ꓔꓳ, ꓜꓳ ꓡ ꓟ ꓑꓶ ꓓꓴ ꓕꓲ ꓣꓳ ꓣꓳ ꓔꓯ ꓝꓴꓲ ꓖꓶ ꓠꓲ, ꓫꓵ_ ꓟ ꓕꓱ ꓡꓱ ꓗꓷ ꓡꓰ ꓗꓴ._ ꓡꓳ꓿ ꓢꓯ. ꓬꓲꓼ ꓡ , ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓟ ꓠꓯꓼ ꓗꓪ ꓠꓯ. ꓘꓪ ꓐꓰ ꓬꓯꓼ ꓡ ꓥ ꓟꓲ ꓬꓲ ꓠꓬ ꓝꓮꓲ ꓔ ꓔꓳ, ꓓꓴ ꓟꓽ ꓬꓰ꓾ ꓢꓲ ꓒꓽ ꓠꓬ ꓢꓯ. ꓬꓲꓼ ꓡ ꓗ. ꓠꓯ. ꓢꓯꓼ ꓪ ꓗꓪ ꓐꓰ ꓝꓮꓲ ꓟꓽ ꓬꓯꓼ ꓡ꓾ ꓖꓳ ꓟ ꓗꓪ ꓐꓰ ꓠꓴꓽ ꓓꓰ ꓡꓰ_ ꓟ ꓠꓲ, ꓟ ꓐꓰ ꓮ ꓫꓵ ꓗꓪ ꓐꓰ ꓓꓰ ꓢ ꓪꓴꓽ ꓓꓰ ꓡꓰ_ ꓟ꓾ ꓮ ꓟꓬ ꓛꓴꓽ ꓙꓳ ꓡ ꓢꓴ ꓠꓯꓼ ꓓꓰ ꓢ ꓔꓷ, ꓟ ꓠꓵꓻ ꓠꓲ, ꓗ, ꓛꓲ ꓟ ꓔꓯ ꓟ. ꓖꓶ ꓠ, ꓟ ꓡꓰ ꓬꓯꓼ ꓡ ꓟ ꓥ ꓡꓳ꓿
ꓢꓲ ꓡꓲ, ꓟ ꓟꓶ ꓝꓲ꓾
“ꓠꓴ ꓪ ꓠꓯꓼ ꓗꓪ ꓢꓲ ꓡꓲ, ꓟ ꓟꓶ ꓝꓲ” ꓐꓯ_ ꓟ ꓪꓴ‐ꓢ ꓐꓯ ꓘꓶꓽ ꓠꓬ ꓕꓲ ꓡꓲ, ꓥ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓠꓻ ꓓꓴ ꓔꓬ ꓟ ꓬꓲ ꓡꓯ ꓒꓯ, ꓐꓰ ꓬꓲ ꓠꓲ ꓖꓴ ꓔꓯ ꓟ. ꓖꓶ_ ꓕꓯ “ ꓮ ꓘꓶ. ꓛꓲ ꓡꓳ. ꓐꓲ ꓢꓲ ꓓꓵ ꓙ ꓟꓶ ꓓꓴ” ꓕꓲ ꓟ ꓔꓯ ꓟ. ꓖꓶ ꓗꓷ ꓟ ꓥꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓳ, ꓜꓳ ꓗꓷ ꓟ ꓮ ꓙꓵ ꓐꓰ ꓮ ꓟꓶ ꓝꓮꓲ ꓫꓬ ꓡꓰ ꓟ ꓑꓶ ꓓꓴ ꓝꓮꓲ ꓒꓳ, ꓔꓴ ꓠ, ꓟ꓾ ꓛꓴ ꓙꓳ_ ꓟ ꓠꓲ, ꓟ ꓠꓬ ꓟꓽ ꓟꓳ꓾ ꓢꓲ ꓒꓽ ꓠꓬ ꓬꓲ ꓠꓻ ꓓꓴ ꓔꓯ ꓬꓲ ꓛꓳꓽ ꓒꓯ, ꓐꓴ ꓔꓯ ꓟ. ꓖꓶ_ ꓟ ꓠꓬ ꓝꓴꓲ ꓓꓰ ꓠ, ꓟ ꓟꓽ ꓥ꓾ ꓛꓴ ꓙꓳ ꓠ, ꓟ ꓓꓰ ꓢ ꓟꓬ ꓠꓬꓲ ꓕꓷ ꓞ, ꓟ ꓠꓵꓻ ꓠꓲ, ꓔꓯ ꓟ. ꓖꓶ ꓠ, ꓟ ꓥ ꓡꓳ꓾ ꓕꓱ ꓠꓻ ꓓꓴ ꓠꓬ “ꓣꓳ ꓞꓳ. ꓡꓰ ꓟ ꓙꓵ, ꓕꓯ ꓥ ꓟꓲ ꓪꓴ‐ꓢ ꓠꓬ ꓟꓽ ꓒꓰ, ꓒꓰ, ꓣꓳ ꓔꓯ ꓟꓽ ꓡꓯꓼ ꓡꓲ, ꓟ. ꓖꓶ_ ꓟ ꓢꓷ. ꓙ ꓟꓳ ꓙ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
ꓫꓱ. ꓤ ꓠꓲ, ꓥꓳ ꓡꓳ. ꓓꓴ ꓠꓯꓼ ꓗꓪ ꓒꓳ, ꓡꓶ. ꓟ꓾
ꓛꓴꓽ ꓙꓳ_ ꓟ ꓠꓬ ꓣꓳ ꓔꓯ ꓠꓻ ꓓꓴ ꓡꓰ ꓝꓲ_ ꓕꓯ ꓣꓳ ꓔꓯ ꓮ ꓕꓯ ꓟꓲ “ꓕꓱ ꓟ ꓠꓬ ꓟꓽ ꓣꓳ. ꓚꓵ ꓡꓳ꓾ ꓕꓱ ꓟ ꓮ ꓙꓵ ꓠꓬ ꓡꓳ, ꓬꓰ ꓟ ꓥ ꓡꓳ꓾” ꓐꓰ ꓐꓯ ꓔ ꓥ ꓟꓲ ꓣꓳ ꓠꓬ ꓚꓵ ꓚꓵ ꓢꓲ ꓡꓲ, ꓟ ꓟꓽ ꓙꓳ”ꓖꓳ ꓡꓱ ꓥ ꓟꓲ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓬꓰ_ ꓟ꓾ ꓓꓵ ꓙ_ ꓟ ꓟꓽ ꓥ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓢꓲ ꓒꓽ ꓠꓬ “ꓖꓽ ꓖꓶ_ ꓟ ꓢꓷ. ꓙ ꓟꓳ ꓙ ꓟ ꓐꓰ ꓬꓲ ꓠꓻ ꓓꓴ ꓔꓯ ꓖꓶ ꓔ ꓟ ꓥ ꓡꓳ꓾” “ꓢꓯ. ꓬꓲꓼ ꓡ ꓟ ꓠꓬ ꓡꓳ, ꓬꓰ ꓟ ꓔꓯ ꓐꓬ ꓡꓰ ꓝꓲ_ ꓟ ꓟꓽ ꓥ꓾ ꓫꓱ. ꓤ ꓟ ꓔꓯ ꓥꓳ ꓡꓳ. ꓓꓴ ꓐꓰ ꓒꓳ, ꓡꓶ. ꓖꓶ_ ꓡꓳ꓾” ꓐꓰ ꓐꓯ ꓔ ꓡꓳ꓿
ꓪꓴ‐ꓢ ꓠꓬ ꓖꓽ ꓖꓶ ꓖꓶ_ ꓡꓳ꓾ ꓤꓶꓻ ꓔꓯ ꓛꓲ ꓔꓴ ꓖꓶ_ ꓡꓳ꓾ ꓙꓵꓻ ꓠꓲ, ꓔꓯ ꓝꓮꓲ ꓫꓬ, ꓔꓷ ꓖꓶ_ ꓡꓳ꓾ ꓪꓴ‐ꓢ ꓠꓬ ꓢꓲ ꓡꓲ, ꓟ ꓐꓯ ꓘꓶꓽ ꓐꓰ ꓝꓲ ꓓꓴ ꓐꓴ ꓔꓯ ꓟꓲ ꓠꓯ ꓗꓪ ꓢꓲ ꓡꓲ, ꓗ, ꓛꓲ_ ꓟ ꓟꓶ ꓠ, ꓟ ꓙꓵꓽ ꓪ ꓖꓶ_ ꓡꓳ꓾ ꓢꓲ ꓒꓽ ꓠꓬ ꓢꓲ‐ꓫꓬ‐ꓟ‐ꓦ ꓔꓯ ꓬꓲ ꓪ ꓠꓯꓼ ꓗꓪ ꓡꓵꓽ ꓖꓶ ꓢꓲ ꓖꓳ ꓢꓲ‐ꓫꓬ‐ꓟ‐ꓦ ꓠꓬ ꓐ, ꓐ ꓔꓯ ꓒꓵꓽ ꓛꓳ ꓠ ꓠ, ꓟ ꓐꓰ ꓡꓯ ꓐꓳ ꓔꓶ. ꓓꓴ ꓔꓯ ꓠꓲ, ꓠꓵꓻ ꓢꓲ ꓢꓲ ꓒꓽ ꓔꓯ ꓬꓰ ꓙ ꓔꓳ, ꓙ ꓟ ꓢꓲ‐ꓫꓬ‐ꓟ‐ꓦ ꓥ ꓡꓳ꓿
ꓖꓳ ꓟ ꓗꓪ ꓐꓰ ꓝꓲ ꓓꓴ ꓐꓴ ꓠꓬ ꓪꓴ‐ꓢ ꓠꓬ ꓖꓽ ꓖꓶ_ ꓡꓳ꓾ ꓛꓲ ꓔꓴ ꓖꓶ_ ꓡꓳ꓾ ꓙꓵꓻ ꓠꓲ, ꓔꓯ ꓫꓬ, ꓔꓱ, ꓖꓶ_ ꓡꓳ꓾ ꓐꓯ_ ꓟ ꓔꓯ ꓬꓲ ꓪ ꓟꓳ ꓪ ꓢꓷ. ꓪ ꓡꓳ꓿
ꓕꓱ ꓟ ꓠꓬ ꓢ‐ꓢꓲ‐ꓠ ꓟꓬꓱꓽ ꓬꓲ ꓚꓰ ꓓꓽ ꓟ ꓥ ꓡꓳ꓾ ꓠꓱ. ꓐꓯꓼ ꓢꓴ ꓔꓯ ꓙꓵꓽ ꓪ ꓐꓰ ꓙꓵꓽ ꓠ, ꓟ ꓟꓽ ꓥ꓾ ꓠꓲ, ꓠꓵꓻ ꓟꓶ ꓢꓴ ꓐꓴ ꓠꓯꓼ ꓗ, ꓛꓲ_ ꓟ ꓔꓯ ꓬꓲ ꓪ ꓟꓽ ꓟꓶ ꓥ ꓟꓲ ꓠꓲ, ꓠꓵꓻ ꓠ, ꓟ ꓥ ꓡꓳ꓿ “ꓕꓱ ꓡꓱ ꓠꓲ, ꓠꓵꓻ ꓟ ꓐꓰ ꓢ‐ꓢꓲ‐ꓠ ꓔꓯ ꓙꓲ ꓢꓴ ꓢꓲ ꓤ ꓐꓴ ꓚꓳ ꓡꓳ ꓔꓯ ꓪꓴ ꓓꓰ ꓡꓰ ꓟ ꓢꓯꓼ ꓪ ꓥ ꓡꓳ꓾ ꓬꓲ ꓟꓶꓽ ꓗꓪ ꓐꓰ “ꓣꓳ ꓔꓯ ꓥ ꓟꓲ ꓝꓲ ꓩꓴ ꓟꓶ ꓡꓳ꓾ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓐꓯ ꓔ ꓢꓲ ꓠꓬꓲ ꓢꓲ ꓒꓽ ꓠꓬ ꓬꓲ ꓠꓻ ꓓꓴ ꓔꓯ ꓣꓳ ꓔꓯ ꓟ. ꓖꓶ ꓢꓲ ꓠꓴ ꓪ ꓠꓯꓼ ꓗꓪ ꓢꓲ ꓡꓲ, ꓟ ꓟꓶ ꓝꓲ” ꓐꓰ ꓐꓯ ꓘꓶꓽ ꓠꓬ ꓣꓳ ꓔꓯ ꓬꓲ ꓡꓰ ꓢꓲ ꓡꓲ, ꓟ ꓐꓱ ꓶ ꓢꓷ. ꓙ ꓟꓳ ꓙ ꓢꓴ ꓒꓬꓱꓼ ꓠ, ꓟ ꓶꓽ ꓓꓰ ꓔ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
