ꓡ ꓞꓳ ꓐꓴ ꓮ ꓘꓶꓸ ꓛꓲ ꓠꓯ ꓞꓲꓹ ꓓꓰ ꓡꓰ_ ꓟ ꓔꓶꓸ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓚꓬꓴ ꓙ_ ꓡꓳ꓾
ꓕꓲ ꓠꓽ ꓡꓲ ꓕꓲ ꓠꓽ ꓠꓽ ꓢꓽ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ_ ꓟ ꓐꓰ ꓙꓵꓻ ꓠꓲꓹ ꓚꓱꓹ ꓟꓸ ꓖꓶ_ ꓟ ꓙꓵꓹ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲ ꓫꓬ_ ꓟ ꓠꓽ ꓛꓳꓼ ꓠꓬꓲ ꓓꓽ ꓟ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓝꓴꓲ ꓗꓪ ꓐꓰ ꓫꓵꓻ ꓡꓰ ꓢꓴ ꓐꓴ ꓠꓯ ꓞꓲꓹ ꓟ ꓘꓴꓽ ꓗꓪ ꓐꓰ ꓡ ꓞꓳ ꓐꓴ ꓐꓱ ꓶ ꓠꓬꓲ ꓟꓳ ꓓꓴ ꓔꓯ ꓔꓯ, ꓖꓶ ꓠ, ꓟ ꓔꓲꓸ ꓗꓪ ꓬꓯꓼ ꓡ ꓟ ꓔꓯ ꓐꓯ ꓖꓶ ꓔ ꓡꓳ=
ꓶꓼ ꓓꓳ ꓫꓱꓹ ꓓꓳ ꓚꓺ ꓖꓶ ꓟ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓡꓯꓽ ꓐꓳ ꓔꓶꓸ ꓓꓴ ꓕꓯ ꓢꓲ ꓫꓵꓻ ꓗꓷ ꓗꓸ ꓠꓯꓸ ꓟꓽ ꓢꓯꓸ ꓬꓯꓼ ꓡ ꓢꓲ ꓢꓲ ꓫꓬ_ ꓟ ꓠꓽ ꓛꓳꓼ ꓠꓬꓲ ꓓꓽ ꓟ ꓗꓪ ꓚꓬꓸ_ ꓟ ꓔꓶꓸ ꓗꓪ ꓬꓯꓼ ꓡ ꓟ ꓠꓬ ꓣꓳ ꓠꓯꓼ ꓗꓪ ꓔꓬ ꓟ ꓪꓴ-ꓢ ꓪꓴ ꓓꓰ ꓡꓰ_ ꓟ ꓠꓵꓻ ꓠꓲꓹ ꓥ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷ ꓟ ꓡꓰ ꓟꓽ ꓝꓲ ꓣꓳ ꓠꓯ ꓞꓲꓹ ꓟ ꓘꓴꓽ ꓗꓪ ꓟꓶꓽ ꓡꓰ ꓟ ꓙꓵꓹ ꓗꓪ ꓥ ꓟꓲ ꓧꓪ ꓔꓬ ꓟ ꓥ ꓡꓳ꓾ ꓪꓴ-ꓢ ꓚꓬꓴ ꓙ ꓟ ꓠꓬꓲ ꓟꓳ ꓓꓴ ꓢꓯꓼ ꓪ ꓗꓪ ꓐꓰ ꓡꓰ ꓕꓱ ꓠꓯ ꓞꓲꓹ ꓟ ꓔꓯ ꓗꓳꓸ ꓙ ꓙꓰ ꓐ ꓡ ꓟ ꓟꓳ ꓐ ꓡ ꓟ ꓥ ꓡꓳ꓾
ꓕꓱ ꓗꓪ ꓛꓬꓸ ꓟ ꓔꓶꓸ ꓐꓯ ꓟ ꓠꓬ꓾ ꓬꓲꓸ ꓔꓶꓸ ꓕꓲ ꓔꓶꓸ ꓓꓰ ꓢ ꓬꓲ ꓚꓱꓹ ꓕꓲ ꓟ ꓥ ꓢꓲ ꓠꓬꓲ ꓢꓯꓼ ꓟꓬ ꓠꓬ ꓖꓴ ꓡꓰ ꓟ꓾ ꓠꓻ ꓔꓬ ꓟ꓾ ꓕꓲ ꓣꓳ ꓕꓵꓼ ꓡꓰ ꓔꓬ ꓟ꓾ ꓪꓴ-ꓢ ꓐꓰ ꓠꓱꓸ ꓐꓯꓼ ꓢꓴ ꓐꓰ ꓶꓽ ꓡꓰ ꓟ ꓕꓱ ꓡꓱ ꓐꓰ ꓐꓲ ꓞꓹ ꓔꓬ ꓟ ꓥ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓛꓬꓽ ꓟꓵꓽ ꓗꓪ ꓬꓯꓼ ꓡ ꓢꓲ ꓫꓵꓻ ꓟ ꓠꓯꓼ ꓘꓴꓽ ꓗꓪ ꓓꓵꓽ ꓡꓰ ꓢꓲ ꓠꓬꓲ ꓖꓳ ꓗꓪ ꓛꓲ ꓔꓬ ꓢꓴ ꓔꓯ ꓕꓲ ꓣꓳ ꓐꓰ ꓕꓲ ꓣꓳ ꓔꓯ ꓚꓬꓴ ꓙ ꓢꓲ ꓡꓲꓹ ꓙꓰ ꓝꓲ ꓟ ꓥ ꓡꓳ=
ꓢꓲ ꓒ ꓬꓰ-ꓢꓴ ꓕꓱ ꓡꓱ ꓬꓯꓼ ꓡ ꓟ ꓠꓬ ꓡꓳꓹ ꓬꓰ ꓟ ꓗꓪ ꓐꓰ ꓡꓰ ꓟꓽ ꓥ꓾ ꓮ ꓟꓶ ꓤꓶꓻ ꓦꓬꓼ ꓠꓬꓲ ꓗꓪ ꓐꓰ ꓥ ꓟꓲ ꓗꓴꓸ ꓙꓲꓽ ꓙꓳ_ ꓡꓳ= ꓫꓵꓻ ꓕꓲ ꓡꓲ, ꓥ ꓟ ꓛꓬ, ꓟ ꓟꓵꓽ ꓗꓪ ꓬꓯꓼ ꓡ ꓟ ꓢꓲ ꓒ ꓬꓰ‐ꓢꓴ ꓠꓬ ꓐ, ꓐ ꓬꓲ ꓠꓵꓻ ꓠꓲ, ꓔꓯ ꓢꓷ. ꓙ ꓟꓳ ꓙ ꓠ, ꓟ ꓐꓱ ꓶ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓔꓳ, ꓜꓳ ꓔꓬ ꓟ ꓙꓳꓺ ꓓꓴ꓾ ꓕꓲ ꓣꓳ ꓕꓵꓼ ꓡꓰ ꓥ ꓟ꓾ ꓒꓰ, ꓗꓷ ꓡ ꓟ ꓙꓻ ꓫꓱ_ ꓟ ꓤꓶꓻ ꓢꓯꓼ ꓕꓵꓼ ꓢꓯ. ꓔꓬ ꓟ ꓛꓬꓽ ꓟꓵꓽ ꓗꓪ ꓬꓯꓼ ꓡ ꓟ ꓥ ꓡꓳꓵ ꓐꓰ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓛꓬ, ꓟ ꓟꓵꓽ ꓮ‐ꓓꓯ ꓐꓰ ꓜꓲ ꓡꓯ ꓘꓳ ꓟ ꓠꓬ” ꓪꓴ‐ꓢ ꓐꓰ ꓞꓳ ꓤ ꓠꓬꓲꓽ ꓗꓳ. ꓚ. ꓗꓪ ꓗꓷ ꓡꓰ ꓓ_ ꓟ ꓜꓲꓽ ꓡꓯ ꓘꓳ_ ꓟ ꓮ ꓙꓵ ꓬꓲ ꓔꓯ ꓥꓳꓽ” ꓥ ꓡꓳ꓿
ꓪꓴ‐ꓢ ꓠꓬ “ꓡ ꓞꓳ ꓟꓬꓱꓺ ꓔꓯ ꓘꓴ ꓢꓲ” ꓠꓯ ꓞꓲ, ꓟ ꓗꓪ ꓐꓰ ꓘꓴ ꓓꓳ ꓢꓲ ꓠꓬꓲ ꓟꓳ ꓓꓴ ꓗꓪ ꓧꓳꓽ ꓔꓯ, ꓖꓶ_ ꓡꓳ꓿ ꓕꓱ ꓡꓱ ꓬꓰ ꓖꓶ_ ꓟ ꓗꓪ “ ꓐꓲ ꓜꓲꓼ ꓟ ꓙꓵꓽ ꓪ ꓡꓰ ꓟꓽ ꓞꓲ꓾ ꓐ, ꓐ ꓕꓲ ꓣꓳ ꓠꓬ ꓬꓲ ꓔꓯ ꓟꓽ ꓠꓲ, ꓠꓵꓻ ꓡ꓾ꓳ ꓐꓰ ꓙꓳꓺ ꓡꓰ ꓟ ꓤ ꓠꓱ ꓤ ꓕꓲ ꓣꓳ ꓔꓯ ꓠꓲ, ꓡꓱ ꓟ ꓔꓯ ꓟ. ꓖꓶ ꓟ ꓡꓰ ꓟꓽ ꓞꓲ꓾ ꓬꓲ ꓟꓶ ꓗꓪ ꓛꓲ ꓟꓽ ꓗꓳ, ꓟꓽ ꓩꓴ꓾ ꓠꓴꓽ ꓞ, ꓬꓰ_ ꓟ ꓥꓳ꓿ ꓖꓳ ꓟ ꓑꓶ ꓓꓴ ꓢꓲ ꓫꓬ_ ꓟ ꓠꓽ ꓛꓳꓼ ꓠꓬꓲ ꓠꓬ ꓟꓴ ꓗꓪ ꓗꓪ ꓐꓰ ꓟꓲ ꓠꓯ ꓗꓪ ꓛꓲ ꓬꓲ ꓠꓯ, ꓟ ꓐꓰ ꓬꓯꓼ ꓡ ꓟ ꓥ ꓡꓳ꓿
ꓢꓲ ꓫꓬ_ ꓟ ꓠꓽ ꓛꓳꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓚꓰꓼ ꓔ ꓟ ꓮ ꓙꓵ ꓔꓯ ꓚꓬꓴ ꓙ ꓟ ꓟꓬꓱꓽ ꓗꓪ ꓛꓲ ꓠ, ꓟ ꓪꓴ‐ꓢ ꓠꓯꓼ ꓗꓪ ꓝꓮꓲ ꓟ. ꓖꓶ ꓠ, ꓟ ꓢꓲ ꓡꓲ, ꓐꓰ ꓪꓳ ꓔ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
