ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ “ꓠꓴ ꓪ ꓪꓽ ꓘꓴˍ ꓡꓳ ꓐꓯˍ ꓟ ꓠꓽ ꓕꓲ ꓧꓪ, ꓤ ꓐꓱ ꓶ ꓡꓰꓽ ꓟꓽ ꓥ꓿ ꓟꓽ ꓠꓽ ꓟꓽ ꓠꓽ ꓘꓴ ꓠ, ꓟ ꓥꓳ꓾ ꓟꓽ ꓠꓽ ꓟꓽ ꓠꓽ ꓬꓰ ꓓꓴ ꓥꓳ”꓾ ꓐꓰ ꓐꓯ ꓟ. ꓖꓶˍ ꓟ ꓟ. ꓟꓲꓽ ꓝꓲ. ꓥꓳ꓿ ꓟ. ꓟꓲꓽ ꓝꓲ. ꓠꓬ ꓡꓴ‐ꓘ ꓕꓳꓽ ꓶ 11ꓽ5‐13 ꓥꓳ꓿
ꓟ. ꓟꓲꓽ ꓝꓲ. ꓬꓲ ꓕꓲ ꓟꓴꓽ ꓠꓬ ꓕꓱ ꓡꓱ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓔꓯ ꓥꓳꓽ ꓣꓱꓽ ꓢꓲ ꓠꓬꓲ ꓕꓰ ꓡꓰ ꓐꓰ ꓐꓯ ꓟ. ꓖꓶˍ ꓡꓳ꓿ ꓡ ꓞꓳ ꓕꓲ ꓣꓳ ꓙꓳˍ ꓡꓳ꓿ ꓬꓲ ꓔꓯ ꓦꓲ ꓢꓲ ꓟˍ ꓟꓲ ꓙꓳˍ ꓡꓳ꓾ ꓤ ꓠꓱ ꓤˍ ꓟꓲ ꓙꓳˍ ꓡꓳ꓿ ꓬꓲ ꓪ ꓕꓲ ꓦꓲ ꓡꓱꓸꓼ ꓠꓬ ꓬꓲꓼ ꓔ ꓗꓷꓳ꓿ ꓦꓬꓽ ꓔꓱ, ꓫꓵ ꓛꓲ ꓡˍ ꓕꓯ ꓬꓲ ꓛꓳꓽ ꓒꓯ, ꓕꓲ ꓣꓳ ꓠꓬ ꓬꓲ ꓔꓬ ꓗꓪ ꓡ ꓢꓲ ꓠꓬꓲ꓾ ꓛꓳꓽ ꓒꓯ,ꓳ꓾ ꓥꓪ ꓔꓯ ꓑ ꓑ ꓮ ꓔꓲ. ꓤ ꓖꓶ ꓡꓯ꓾ ꓐꓰ ꓓꓰꓽˍ ꓡꓳ꓿
ꓖꓳ ꓕꓯ ꓡ ꓞꓳ ꓖꓳ ꓕꓲ ꓣꓳ ꓠꓬ ꓬꓲ ꓛꓳꓽ ꓒꓯ, ꓔꓯ꓾ ꓛꓳꓽ ꓒꓯ,ꓳ ꓥꓪ ꓬꓲꓼ ꓔ ꓗꓷꓳ꓾ ꓥꓪ ꓦꓲ ꓢꓴˍ ꓟꓲ ꓬꓲꓼ ꓔ ꓗꓷꓳ꓾ ꓗ ꓘꓶꓽˍ ꓟꓲ ꓚꓵ. ꓗꓷꓳ꓿ ꓦꓬꓽ ꓔꓱ, ꓫꓵˍ ꓟꓲ ꓙꓳ ꓡꓰꓳ꓾ ꓠꓴ ꓬꓲꓼ ꓙꓰ ꓨꓼ꓿ ꓢ. ꓢꓶ ꓕꓯ ꓢꓲ. ꓥꓪ ꓠꓴ ꓔꓯ ꓖꓶˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓬꓲ ꓛꓳꓽ ꓒꓯ, ꓒꓽ ꓠꓬ ꓡ ꓞꓳ ꓖꓳ ꓕꓲ ꓣꓳ ꓔꓯ ꓛꓳꓽ ꓒꓯ,ꓳ ꓥꓪ ꓔꓯ ꓫꓱ. ꓤ ꓡꓯ꓿ ꓥꓪ ꓔꓯ ꓑ ꓑ ꓮ ꓔꓲ. ꓤ ꓖꓶ ꓡꓯ꓿ ꓥꓪ ꓦꓲꓻ ꓗꓪ ꓠꓶꓽ ꓧꓪ ꓡˍ ꓠꓬꓲ ꓬꓲ ꓔꓯ ꓖꓶ ꓜꓽ ꓓꓴ ꓟꓽ ꓙꓳ꓿ ꓖꓳ ꓟ ꓑꓶ. ꓓꓴ ꓥꓪ ꓔꓯ ꓑ ꓑ ꓮ ꓔꓲ. ꓤ ꓖꓶ ꓡꓯ꓾ ꓐꓰ ꓟꓽ ꓠꓽ ꓟꓽ ꓠꓽ ꓓꓰꓽˍ ꓡꓳ꓿ ꓖꓳ ꓕꓯ ꓠꓬ ꓡ ꓞꓳ ꓖꓳ ꓕꓲ ꓣꓳ ꓠꓬ ꓥꓪ ꓬꓲ ꓔꓯ ꓟꓽ ꓖꓶ ꓠꓬ ꓥꓪ ꓔꓯ ꓬꓲ ꓕꓲ ꓦꓬ ꓡꓱꓸꓼ ꓓꓰꓽ ꓡˍ ꓥꓳ꓿ ꓕꓱ ꓟ ꓑꓶ. ꓓꓴ ꓥꓪ ꓬꓲ ꓔꓯ ꓖꓶ ꓗꓷ ꓠꓬ ꓕꓱ ꓟ ꓠꓬ ꓠꓽ ꓡꓰ ꓓꓴ ꓥꓳ ꓐꓰ ꓐꓯ ꓢꓲ꓾ ꓖꓶˍ ꓡꓳ꓿ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓟꓽ ꓠꓽ ꓠꓽ ꓓꓰꓽ ꓠ, ꓟ ꓣꓳ ꓔꓯ ꓔꓯꓺ ꓥꓳꓽ ꓡꓰ ꓐꓯ ꓟ. ꓖꓶ ꓡ ꓔꓬ ꓡꓳ꓿ ꓣꓳ ꓐ, ꓐ ꓪꓴ‐ꓢ ꓠꓽ ꓣꓳ ꓟꓽ ꓓꓰꓽ ꓕꓯ ꓡꓰ ꓣꓳ ꓓꓰꓽ ꓠꓲ, ꓫꓵˍ ꓟ ꓔꓯ ꓬꓲ ꓖꓶ ꓓꓴ ꓥꓳ꓿ ꓖꓳ ꓟ ꓑꓶ. ꓓꓴ ꓣꓳ ꓐ, ꓐ ꓔꓯ ꓟꓽ ꓠꓽ ꓟꓽ ꓠꓽ ꓓꓰꓽ ꓠ, ꓟ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓟ. ꓖꓶ ꓔꓬ ꓟ ꓥꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓟꓽ ꓠꓽ ꓟꓽ ꓠꓽ ꓓꓰꓽ ꓐꓰ ꓐꓯˍ ꓟ ꓠꓬ꓾ ꓣꓳ ꓟꓶ ꓠꓲ, ꓫꓵˍ ꓟ ꓮ ꓙꓵꓽ ꓔꓯ ꓓꓰꓽ ꓓꓴ ꓠꓽ ꓟꓽ ꓥ꓿ ꓣꓳ ꓟꓽ ꓠꓽ ꓟꓽ ꓠꓽ ꓓꓰꓽˍ ꓡꓳ ꓐꓯˍ ꓟ ꓕꓱ ꓟ ꓠꓬ ꓣꓳ ꓠꓬ ꓪꓴ‐ꓢ ꓐꓰ ꓟꓽ ꓠꓽ ꓟꓽ ꓠꓽ ꓠꓶꓽ ꓡꓰˍ ꓟ ꓔꓯ ꓐꓯˍ ꓫꓵꓽ ꓥ ꓡꓳ꓿ ꓪꓴ‐ꓢ ꓔꓯ ꓮ ꓘꓶ. ꓓꓰꓽ ꓮ ꓘꓶ. ꓣꓳ ꓠꓬ ꓪꓴ‐ꓢ ꓐꓰ ꓮ ꓘꓶ. ꓠꓶꓽ ꓡꓰˍ ꓟ ꓥ ꓡꓳ꓿ ꓐ, ꓐ ꓪꓴ‐ꓢ ꓥˍ ꓟꓲ ꓣꓳ ꓔꓯ ꓕꓱ ꓡꓱ ꓐꓰ ꓠꓲ, ꓫꓵˍ ꓟ ꓑꓶ. ꓓꓴ꓾ ꓣꓳ ꓐꓰ ꓒ ꓕꓲ ꓔꓬ ꓠꓲ, ꓫꓵˍ ꓟ ꓑꓶ. ꓓꓴ ꓟꓽ ꓠꓽ ꓟꓽ ꓠꓽ ꓓꓰꓽ ꓝꓲˍ ꓟ ꓥ ꓡꓳ꓾ ꓐꓰ ꓠꓬꓲ. ꓠꓬꓲ ꓟ. ꓖꓶ ꓔꓬ ꓟ ꓥ ꓡꓳ
