ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓕꓳꓽ ꓶ ꓕꓲ ꓝꓲ. ꓔꓯ ꓠ ꓠ, ꓓꓴ ꓬꓰ ꓡꓯ꓿
(ꓡꓴ‐ꓘ꓿17:5-10) ꓝꓲ ꓓꓴ ꓐꓴ ꓡꓰ ꓢꓲ ꓒꓽ ꓔꓯ꓾ ꓥꓪ ꓠꓴꓽ ꓙꓵꓻ ꓠꓲꓹ ꓪꓴꓽ ꓡ ꓝꓲ꓾ ꓐꓰ ꓓꓰꓽˍ ꓡꓳ꓿ ꓢꓲ ꓒꓽ ꓡꓰ꓾ ꓠꓴ ꓪꓽ ꓙꓵꓻ ꓠꓲꓹ ꓠꓬ ꓪꓳꓽ ꓒꓲꓻ ꓫꓵꓸ ꓕꓲ ꓢꓶꓽ ꓪꓴꓻ ꓛꓲ ꓤ ꓙꓳˍ ꓕꓯ ꓠꓽ꓾ ꓐꓵꓽ ꓜ ꓜꓲꓻ ꓕꓱ ꓕꓲ ꓜꓲ ꓔꓯ꓾ ꓠꓴ ꓚꓰꓺ ꓗꓪ ꓐꓰ ꓚꓵꓹ ꓑꓶꓺ ꓡ ꓢꓲ ꓬꓲꓻ ꓡꓴ ꓐꓱ ꓗꓪ ꓔꓶꓺ ꓬꓰ Gꓽ꓾ ꓐꓯˍ ꓟꓲ ꓠꓴ ꓪꓽ ꓔꓯ ꓠ ꓠꓹˍ ꓥꓳ꓾ ꓐꓯˍ ꓡꓳ꓿
ꓠꓴ ꓪꓽ ꓗꓪ ꓟ ꓕꓲ ꓣꓳ ꓠꓬ ꓚꓳ ꓑꓸ ꓙꓳ ꓢꓲ꓾ ꓚꓳ ꓑꓸ ꓠꓬ ꓦꓻ ꓟꓲ ꓟꓽ꓾ ꓥ ꓠꓬ ꓮ ꓣꓳ ꓡꓳꓸ ꓢꓲ ꓬꓲꓼ ꓡ ꓠꓬ꓾ ꓮꓽ ꓟ ꓡꓰ ꓬꓲ ꓔꓯ꓾ ꓮꓸ ꓟꓲꓸ ꓗꓳꓺ ꓢꓲ ꓜ ꓜꓽ ꓡꓯ꓾ ꓐꓰ ꓐꓯ ꓖꓶ ꓢꓴ ꓙꓳˍ ꓥꓳ ꓪ? ꓪꓻ ꓜꓲ ꓠꓴ ꓠꓽ ꓬꓲ ꓔꓯ꓾ ꓙꓽ ꓧꓷꓹ ꓧꓷꓹ ꓢꓲ ꓥꓪ ꓔꓯ ꓟꓶꓼ ꓘꓶꓼ ꓜꓻ ꓫꓬꓹ ꓖꓶ ꓜꓽ ꓡꓯ꓿ ꓥꓪ ꓜꓽ ꓐꓳ ꓓꓳꓻ ꓐꓳ ꓡꓰ ꓕꓯꓽ ꓢꓲˍ ꓡꓰ ꓠꓴ ꓜꓽ ꓓꓳ ꓛꓵˍ ꓡꓳ꓾ ꓐꓰ ꓐꓯˍ ꓥꓳ꓾ ꓟꓽ ꓥ ꓡ? ꓬꓲ ꓚꓳ ꓑꓸ ꓠꓬ ꓬꓲ ꓢꓲ ꓒꓽ ꓡꓰ ꓝꓲ ꓔ ꓟ ꓮꓽ ꓙꓵ ꓬꓰ ꓓꓳ ꓡꓰˍ ꓟꓲ꓾ ꓬꓲ ꓢꓲ ꓒꓽ ꓠꓬ ꓬꓲ ꓔꓯ ꓫꓸ ꓟꓳ꓾ ꓟꓽ ꓐꓯ꓿ ꓖꓳ ꓟ ꓡꓰ ꓐꓰ ꓠꓴ ꓪꓽ ꓔꓯ ꓝꓲ ꓔ ꓟ ꓮꓽ ꓙꓵ ꓬꓰ ꓓꓳ ꓡꓰˍ ꓟꓲ ꓠꓴ ꓪꓽ ꓠꓽ꓾ ꓥꓪ ꓠꓴꓽ ꓠꓬ ꓟꓽ ꓒꓵ ꓟ ꓚꓳ ꓑꓸ ꓐꓴ ꓥꓳ꓿ ꓥꓪ ꓠꓴꓽ ꓬꓰ ꓗꓷ ꓟ ꓠꓬ ꓥꓪ ꓠꓴꓽ ꓬꓰ ꓙꓲꓽ ꓙꓳˍ ꓡꓳ ꓫꓵꓽˍ ꓡꓰꓽ ꓥꓳ꓾ ꓐꓰ ꓐꓯ ꓠ ꓗꓹ ꓡꓳ꓾ ꓐꓯˍ ꓡꓳ꓿ “ꓕꓱ ꓟ ꓠꓬ ꓪꓴ‐ꓢ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓥ ꓡꓳ꓿”
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓡ ꓢꓲ ꓠꓬꓲ ꓬꓲ ꓪ ꓙꓵꓻ ꓠꓲ, ꓔꓯ ꓪꓴꓽ ꓡ ꓝꓲ ꓡꓯ꓾ ꓐꓰ ꓐꓯˍ ꓡꓳ꓿ ꓙꓵꓻ ꓠꓲ, ꓔꓯ ꓪꓴꓽ ꓡ ꓝꓲ ꓐ ꓡˍ ꓟ ꓠꓬ ꓪꓴ‐ꓢ ꓡꓰꓽ ꓥ ꓡꓳ꓿ ꓪꓴ‐ꓢ ꓟꓽ ꓥ ꓠꓬ ꓣꓳ ꓠꓬ ꓙꓵꓻ ꓠꓲ, ꓔꓯ ꓟꓶˍ ꓟꓲ ꓟꓶ ꓟꓽ ꓐ ꓡ꓾ ꓪꓴꓽ ꓡ ꓝꓲˍ ꓟꓲ ꓬꓰ ꓟꓽ ꓐ ꓡ꓿ ꓙꓵꓻ ꓠꓲ, ꓐꓯˍ ꓟ ꓠꓬ ꓮ ꓘꓶ. ꓬꓳ. ꓚꓰꓽˍ ꓟ ꓝꓲ ꓓꓴ ꓐꓴ ꓢꓷ.ˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓙꓵꓻ ꓠꓲ, ꓕꓱ ꓟ ꓟꓽ ꓙꓳ ꓕꓯ ꓠꓬ ꓣꓳ ꓞꓳ ꓙꓳˍ ꓟ ꓠꓬ ꓮꓽ ꓔꓳ ꓬꓲ ꓖꓳꓽ ꓥ ꓡꓳ꓿
ꓮ ꓡꓲ ꓗꓪ ꓥˍ ꓟꓲ ꓙꓵꓻ ꓠꓲ, ꓙꓳ ꓠ ꓔ ꓡꓳ꓿ ꓟꓬꓽ ꓠꓬꓲ ꓣꓳ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳˍ ꓕꓯ ꓢꓲ ꓒ ꓠꓬ ꓣꓳ ꓔꓯ ꓫꓱ. ꓤˍ ꓡꓳ꓾ ꓢꓲ ꓒ ꓠꓬ ꓣꓳ ꓔꓯ ꓠꓲ, ꓠꓵˍ ꓡꓳ꓾ ꓐꓯˍ ꓟ ꓟꓽ ꓙꓵꓻ ꓕꓯ ꓣꓳ ꓠꓬ ꓮ ꓡꓲ ꓥˍ ꓟꓲ ꓢꓲ ꓒ ꓔꓯ ꓣꓳ ꓖꓼ ꓛꓳ ꓟꓽ ꓐ ꓡ꓿ ꓝꓮꓲ ꓓꓵꓽ ꓙ ꓟꓶ ꓓꓴ ꓥˍ ꓟꓲ ꓬꓰ ꓟꓽ ꓐ ꓡ꓿ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓢꓯꓼ ꓪ ꓖꓶ ꓔ ꓡꓳ꓿ ꓮꓽ ꓟ ꓥˍ ꓟꓲ ꓪꓳꓽ ꓒꓲꓻ ꓫꓵ. ꓕꓲ ꓫꓵ. ꓪꓴ ꓞꓲ ꓙꓵꓻ ꓠꓲ, ꓙꓳˍ ꓥꓳ ꓐꓯˍ ꓠꓬ ꓢꓲ, ꓜꓲ ꓕꓲ ꓜꓲ ꓔꓯ ꓬꓲ ꓚꓰꓺ ꓗꓪ ꓐꓰ ꓚꓵ, ꓑꓶꓺ ꓗꓷ ꓢꓲ ꓬꓲꓻ ꓡꓴꓽ ꓐꓱ ꓗꓪ ꓣꓱꓻ ꓡꓯ ꓐꓰ ꓐꓯˍ ꓠꓬ ꓬꓲ ꓣꓱꓻ ꓡˍ ꓡꓳ꓿
ꓕꓱ ꓟ ꓠꓬ ꓮ ꓫꓵꓽ ꓬꓲ. ꓬꓲ ꓢꓲ ꓥ ꓡ꓿ ꓣꓳ ꓢꓲ ꓒ ꓔꓯ ꓙꓵꓻˍ ꓕꓯ ꓙꓵꓻ ꓠꓲ, ꓙꓳˍ ꓕꓯ ꓮ ꓫꓵꓽ ꓟꓬꓱꓽ ꓬꓰˍ ꓥ ꓟꓲ ꓒꓬꓱꓼ ꓡ ꓓˍ ꓡꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓣꓳ ꓐꓱ ꓶ ꓞꓳ ꓤ ꓕꓲ ꓣꓳ ꓢꓯꓼ ꓪ ꓗꓪ ꓐꓰ ꓒꓬꓱꓼ ꓡ ꓟꓽ ꓓꓻ ꓟ ꓥˍ ꓟꓲ ꓪꓴ‐ꓢ ꓔꓯ ꓙꓵꓻˍ ꓕꓯ ꓒꓬꓱꓼ ꓡ ꓓˍ ꓡꓳ ꓐꓯˍ ꓟ ꓬꓲ ꓟꓳ. ꓖꓶ ꓡˍ ꓟ ꓥ ꓡꓳ꓿ ꓞꓳ ꓤ ꓕꓲ ꓣꓳ ꓢꓯꓼ ꓪ ꓗꓪ ꓐꓰ ꓮ ꓡꓲ ꓥˍ ꓟꓲ ꓣꓳ ꓟꓷꓽ ꓠꓷ, ꓘꓶ ꓗꓪ ꓐꓰ ꓢꓲ, ꓜꓲ ꓕꓲ ꓜꓲ ꓔꓯ ꓬꓲ ꓚꓰꓺ ꓗꓪ ꓐꓰ ꓚꓵ, ꓑꓶꓺ ꓗꓷ ꓢꓲ ꓬꓲꓻ ꓡꓴꓽ ꓐꓱ ꓘꓴꓽ ꓗꓪ ꓣꓱꓻ ꓝꓲ ꓟꓽ ꓐ ꓡ꓿ ꓖꓳ ꓡꓱ ꓥ ꓟꓲ ꓣꓳ ꓙꓵꓻ ꓠꓲ, ꓙꓳˍ ꓕꓯ ꓒꓬꓱꓼ ꓡ ꓟꓽ ꓓ ꓫꓵꓽ ꓬꓰ ꓐ ꓡˍ ꓡꓳ꓾ ꓐꓯˍ ꓟ ꓬꓲ ꓪꓴ. ꓕꓲ ꓫꓵꓽ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿
ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓢꓴ ꓮ ꓟꓬ, ꓙꓳˍ ꓥ ꓟꓲ ꓙꓵꓻ ꓠꓲ, ꓙꓳ ꓢꓴ ꓠꓬ ꓮ ꓔꓲ. ꓤ ꓙꓳˍ ꓡꓳ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓓꓵꓽ ꓙ ꓟꓶ ꓓꓴ ꓬꓰ ꓖꓶˍ ꓕꓯ ꓞꓳ ꓤ ꓮ ꓟꓬ, ꓬꓲ ꓜꓴ ꓬꓲ ꓟꓯꓼ ꓬꓲ ꓗ ꓠꓯ. ꓖꓼˍ ꓡꓳ꓿ ꓖꓳ ꓡꓱ ꓥˍ ꓟꓲ ꓖꓳ ꓟ ꓘꓴꓽ ꓗꓪ ꓕꓲ ꓐꓱˍ ꓡꓰꓽ ꓬꓲ ꓔꓯ ꓠꓲ, ꓠꓵˍ ꓡꓳ꓾ ꓕꓲ ꓐꓱˍ ꓡꓰꓽ ꓬꓲ ꓔꓯ ꓙꓵꓻˍ ꓡꓳ꓿ ꓙꓵꓻ ꓠꓲ, ꓟꓽ ꓙꓳ ꓟ ꓑꓶ. ꓓꓴ ꓮ ꓙꓵꓽ ꓬꓲ ꓗ ꓠꓯ. ꓖꓼ ꓛꓳ ꓟꓽ ꓐ ꓡ꓿ ꓠꓬꓲ. ꓠꓬꓲ ꓠꓴ ꓥꓪ ꓞꓳ ꓙꓳˍ ꓟ ꓗꓪ ꓪꓽ ꓘꓴ ꓠ, ꓟ ꓠꓬ꓾ “ꓢꓲꓺ ꓒꓽꓳ꓾ ꓥꓪ ꓠꓴꓽ ꓙꓵꓻ ꓠꓲ, ꓔꓯ ꓪꓴꓽ ꓡ ꓝꓲ ꓡꓯ꓾” ꓐꓰ ꓪꓽ ꓘꓴ ꓠ, ꓟ ꓥ ꓡꓳ꓿ ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓚꓳ ꓑ. ꓔꓯꓺ ꓥꓳꓽ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿
