ꓪꓴ-ꓢ ꓪꓴꓽ ꓓꓰ ꓡꓰ_ ꓟ ꓠꓵꓻ ꓠꓲꓹ ꓡꓰ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓢꓯꓼ ꓟꓬ ꓤꓶꓻ ꓐꓰ ꓒꓳꓹ ꓡꓶꓸ ꓖꓶ_ ꓟ꓾
ꓕꓲ ꓠꓽ ꓡꓲ ꓕꓲ ꓠꓽ ꓠꓽ ꓦꓬꓼ ꓠꓬꓲ ꓙꓲ ꓢꓴ ꓢꓲ ꓤ ꓐꓴ ꓐꓰ ꓜꓲ ꓡꓯꓽ ꓘꓳ ꓟ ꓙꓵꓹ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓫꓱꓸ ꓖꓶ_ ꓟ ꓑꓮꓲ ꓗꓪ ꓪꓴ-ꓢ ꓪꓴꓽ ꓓꓰ ꓡꓰ_ ꓟ ꓠꓵꓻ ꓠꓲꓹ ꓠꓬ ꓫꓵꓻ_ ꓟ ꓬꓲ ꓢꓷꓸ ꓡꓰ ꓓꓴ ꓥ ꓟ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓢꓯꓼ ꓟꓬ ꓤꓶꓻ ꓚꓱꓹ ꓐꓰ ꓒꓳꓹ ꓡꓶꓸ ꓖꓶ ꓗꓷ ꓟ ꓔꓯ ꓢꓯꓼ ꓖꓶ ꓗꓷ ꓟ ꓥꓳ=
ꓢꓲ ꓫꓬ ꓟ ꓡꓯꓼ ꓐꓳ ꓔꓶꓸ ꓓꓴ ꓫꓱꓸ ꓖꓶ ꓑꓮꓲ ꓦꓬꓼ ꓠꓬꓲ ꓔꓯ ꓬꓰ_ ꓟ ꓠꓬ ꓮ ꓟꓶ ꓤꓶꓻ ꓗꓪ ꓣꓳ ꓐꓱ ꓶ ꓮ ꓫꓵ ꓔꓯ ꓐꓯ ꓔ ꓡ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓠ ꓠꓬꓲ ꓘꓶꓽ ꓓꓵꓽ ꓙ ꓔꓱꓹ ꓕꓽ ꓓꓴ ꓕꓲ ꓟ ꓐꓰ ꓪꓴꓸ ꓓꓴ ꓗꓷ ꓟ ꓥꓳ=
ꓕꓱ ꓟ ꓔꓯ ꓐꓯ ꓠꓬ ꓖꓳ ꓕꓲ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ-ꓢꓴ ꓐꓰ ꓠꓲ-ꓗ-ꓓꓲ-ꓟꓴ ꓜꓲ ꓡꓯ ꓘꓳ_ ꓟ ꓚꓱꓹ꓾ ꓬꓲ ꓪ ꓪꓴ-ꓢ ꓔꓯ ꓧꓪ ꓔꓬ ꓟ ꓥ ꓡꓳ=ꓖꓳ ꓟ ꓑꓶ ꓓꓴ ꓬꓲ ꓔꓯ ꓬꓲ ꓚꓱꓹ ꓧꓳꓽ ꓪꓴꓸ ꓟꓴ ꓢꓴ꓾ ꓠꓬꓲ ꓟꓳ ꓓꓴ ꓖꓶ ꓢꓴ ꓣꓱ ꓬꓯꓼ ꓔꓬ ꓟ ꓥ ꓡꓳ꓾ ꓖꓳ ꓟ ꓑꓶ ꓓꓴ ꓬꓲ ꓧꓪ ꓔꓬ ꓟ ꓪꓴ-ꓢ ꓔꓯ ꓧꓪ ꓟꓳ ꓠꓹ ꓟ ꓠ-ꓢ-ꓡꓱ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓶꓼ ꓓꓰ_ ꓟ ꓥꓳ=
ꓖꓳ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓥ ꓟꓲ ꓠꓲ-ꓗꓳ-ꓓꓲ-ꓟꓴ ꓔꓯ ꓘꓳꓹ ꓣꓴ ꓗꓷ ꓟ ꓥꓳ= ꓬꓲ ꓐꓯ ꓘꓶꓽ ꓔꓯ ꓠ ꓠꓹ ꓖꓶ_ ꓡꓳ꓾ ꓬꓲ ꓟꓶꓽ ꓗꓪ ꓞꓳ ꓤ ꓠꓬ ꓛꓵ ꓔꓴ ꓟꓶ ꓡ ꓟ ꓚꓱꓹ꓾ ꓖꓳ ꓟ ꓡꓰ ꓐꓰ ꓬꓲ ꓔꓯ ꓙꓵꓻ ꓡ ꓢꓴ ꓮ ꓙꓵ ꓠꓬ ꓕꓲꓽ ꓞꓲꓼ ꓕꓲ ꓑ ꓢꓯꓼ ꓟꓬ ꓔꓯ ꓪ ꓟꓶ ꓡ ꓟ ꓚꓱꓹ ꓟꓸ ꓖꓶ ꓗꓷ ꓟ ꓥ ꓡꓳ=
ꓖꓳ ꓕꓲ ꓙꓵꓹ ꓗꓪ ꓠꓲ-ꓗꓳ-ꓓꓲ-ꓟꓴ ꓠꓬ ꓕꓱ ꓟ ꓚꓱꓹ ꓔꓯ ꓐꓲ ꓜꓲꓼ ꓠ ꓟꓽ ꓢꓷꓸ ꓢꓰ꓾ ꓢꓲ ꓒ ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓢꓰꓼ ꓗꓷ ꓕꓯ ꓢꓲ ꓬꓲ ꓠꓬ ꓕꓱ ꓟ ꓔꓯ ꓢꓷꓸ ꓡꓰ ꓟ ꓥꓳ= ꓪꓴ-ꓢ ꓠꓬ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓙ ꓠꓹ ꓟ ꓐꓱ ꓶ ꓡ ꓞꓳ ꓕꓲ ꓣꓳ ꓡꓰ ꓐꓰ ꓣꓴ ꓢꓲ ꓠꓬꓲ ꓡꓯꓼ ꓐꓳ ꓔꓶꓸ ꓓꓴ ꓕꓯ ꓢꓲ ꓫꓵꓻ ꓗꓷ ꓟ ꓔꓯ ꓬꓲ ꓢꓷꓸ ꓡꓰ ꓟ ꓥ ꓡꓳ=
ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓢꓲ ꓒ ꓬꓰ-ꓢꓴ ꓐꓰ ꓠꓲ-ꓘꓳ-ꓓꓲ-ꓟꓴ ꓫꓸ ꓕꓱ ꓔ ꓟ ꓗꓪ ꓩꓴ ꓚꓱꓹ ꓐꓯ ꓖꓶ ꓟ ꓥ ꓡꓳ꓾ ꓡꓲ ꓛꓲ ꓟꓵꓽ ꓗꓪ ꓪꓴ-ꓢ ꓔꓯ ꓒꓳꓹ ꓔꓴ ꓔ ꓟ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓔꓯ ꓩꓴ ꓡꓰ ꓕꓳꓹ ꓡ ꓟ ꓗꓪ ꓐꓰ ꓚꓬꓴ ꓙ ꓠꓹ ꓟ ꓐꓱ ꓶ ꓪꓴ-ꓢ ꓡꓰ ꓟ-ꓫꓲ ꓔꓯ ꓩꓴ ꓙꓱ ꓔꓯ ꓬꓰ ꓢꓲ ꓔꓳꓹ ꓔꓴ ꓡꓰ ꓝꓲ_ ꓟ ꓕꓱ ꓟ ꓠꓬ ꓮ ꓫꓵ ꓔꓯ ꓐꓯ ꓔ ꓡ꓾ ꓪꓴ-ꓢ ꓠꓬ ꓬꓲ ꓚꓲ ꓛꓬ ꓢꓲ ꓫꓬ ꓑ ꓑ ꓘꓴꓽ ꓗꓪ ꓐꓰ ꓘꓰꓸ ꓗꓷ ꓟꓶ ꓟ ꓑ ꓑ ꓐꓰ ꓙꓵꓻ ꓢꓴ ꓢꓲ ꓤ ꓐꓱ ꓶ ꓪꓴ-ꓢ ꓠꓬ ꓛꓳ ꓒꓯꓹ ꓕꓲ ꓣꓳ ꓡꓰ ꓐꓰ ꓠꓯꓺ ꓞꓲꓼ ꓟꓸ ꓒꓽ ꓕꓲ ꓣꓳ ꓡꓰ ꓐꓰ ꓟꓸ ꓒꓽ ꓕꓲ ꓣꓳ ꓡꓰ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳ ꓡꓰ ꓐꓰ ꓣꓳ ꓔꓯ ꓚꓬꓴ ꓙ ꓗꓷ ꓟ ꓥꓳ= ꓪꓴ-ꓢ ꓟꓬꓱꓽ ꓔꓯ ꓐꓲ ꓜꓲꓼ ꓡꓰ ꓠꓹ ꓟ ꓐꓱ ꓶ ꓞꓳ ꓤ ꓒꓬꓱꓼ ꓡꓰ ꓝꓲ_ ꓡꓳ꓾ ꓡꓯꓼ ꓐꓳ ꓔꓶꓸ ꓓꓴ ꓕꓯ ꓢꓲ ꓕꓯꓼ ꓔꓶꓸ ꓗꓷ ꓟ ꓗꓪ ꓐꓰ ꓐꓲ ꓜꓲꓼ ꓡꓰ ꓝꓲ_ ꓡꓳ=
ꓖꓳ ꓟ ꓗꓪ ꓐꓰ ꓠꓬꓲ ꓠꓬꓲ ꓪꓴ-ꓢ ꓪꓴꓽ ꓓꓰ ꓡꓰ_ ꓟ ꓠꓵꓻ ꓠꓲꓹ ꓠꓬ ꓣꓳ ꓬꓰ ꓛꓬ ꓗꓷ ꓟ ꓝꓴꓲ ꓓꓰ ꓢ ꓟꓬ ꓠꓬꓲ ꓪꓴꓽ_ ꓟ꓾ ꓣꓳ ꓔꓯ ꓮ ꓫꓵ ꓗꓪ ꓐꓰ ꓡꓰ ꓪꓴ-ꓢ ꓐꓰ ꓧꓹ ꓙꓰ ꓡꓰ ꓟꓽ ꓓ ꓟ꓾ꓪꓴ-ꓢ ꓪꓴꓽ ꓓꓰ ꓡꓰ ꓟ ꓠꓵꓻ ꓠꓲꓹ ꓠꓬ ꓫꓵꓻ ꓟ ꓬꓲ ꓚꓱꓹ ꓥ ꓟ ꓡꓯꓼ ꓐꓳ ꓔꓶꓸ ꓓꓴ ꓔꓯ ꓢꓯꓸ ꓟꓬ ꓤꓶꓻ ꓚꓱꓹ ꓐꓰ ꓒꓳꓹ ꓡꓶꓸ ꓖꓶ ꓗꓷ ꓟ ꓥꓳ=
ꓡꓸꓯꓼ ꓐꓳ ꓔꓶꓸ ꓓꓴ ꓔꓯ ꓘꓳꓹ ꓣꓴ ꓟ ꓗꓪ ꓐꓰ ꓪꓴ-ꓢ ꓠꓬ ꓣꓳ ꓚꓬꓴ ꓙ ꓟꓶ ꓠꓹ ꓟ ꓐꓱ ꓶ ꓖꓶ ꓔ ꓟ ꓕꓱ ꓡꓯꓼ ꓐꓳ ꓔꓶꓸ ꓓꓴ ꓑꓮꓲ ꓔꓯ ꓠꓬꓲꓸ ꓠꓬꓲ ꓗꓪ ꓬꓰ ꓔꓬ ꓟ ꓥ ꓡꓳ=
ꓬꓲꓸ ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓪꓴ-ꓢ ꓠꓬ ꓬꓲ ꓕꓲ ꓤꓶꓻ ꓡꓱꓼ ꓔꓯ ꓣꓳ ꓐꓱ ꓶ ꓖꓶ ꓔ ꓟ ꓡꓰ ꓐꓰ ꓣꓳ ꓥ ꓟꓲ ꓠꓱꓸ ꓐꓯꓼ ꓢꓴ ꓐꓱ ꓶ ꓣꓳ ꓤꓶꓻ ꓔꓯ ꓖꓶ ꓐ ꓡ ꓢꓴ ꓒꓬꓱꓼ ꓠꓹ ꓟ ꓐꓱ ꓶ ꓚꓬꓴ ꓙ ꓟ ꓠꓵꓻ ꓠꓲꓹ ꓠꓬ ꓣꓳ ꓤꓶꓻ ꓘꓴꓽ ꓗꓪ ꓬꓲꓸ ꓚꓰ ꓪꓴꓽ ꓓꓰ ꓠꓹ ꓟ ꓟꓹ ꓟ ꓟ-ꓡꓲ ꓡꓰ ꓶꓽ ꓓꓰ ꓖꓶ ꓠꓹ ꓟ ꓐꓱ ꓶ ꓶꓼ ꓓꓰ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ ꓔ ꓟ ꓥꓳ=
