ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓒꓵꓽ ꓓꓰ ꓡꓰ ꓟ ꓪꓽ ꓘꓴ ꓚꓱꓹ ꓕꓲ ꓚꓱꓹ ꓥ ꓟ ꓔꓲꓺ ꓒ ꓡꓰ ꓟꓲ-ꓢ ꓛꓴ ꓔꓲ ꓖꓶ_ ꓟ ꓠꓯꓼ ꓗꓪ ꓣꓱ_ ꓟ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓚꓱꓹ ꓔꓯ ꓠ ꓠꓹ ꓓꓴ ꓬꓰ ꓡꓯ=
ꓣꓳ ꓟꓲ-ꓢ ꓬꓰ_ ꓟ ꓗꓪ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓕꓱ ꓠꓬꓲꓽ ꓫꓵ ꓟꓽ ꓙꓳ ꓠꓬ ꓮ ꓡꓰ ꓥ ꓟꓲ ꓟꓲ-ꓢ ꓬꓰ ꓟꓽ ꓐ ꓡ꓾ ꓮ ꓡꓰꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪꓽ ꓠꓬ ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓗꓪ ꓐꓰ ꓒꓬꓱꓼ ꓡ ꓟ ꓥ ꓡꓳ= ꓑ ꓑ ꓐꓰ ꓛꓱꓼ ꓡꓱꓼ ꓙꓵ ꓕꓱ ꓠꓬꓲꓽ ꓫꓵ ꓟ ꓠꓬ꓾ ꓔꓲꓺ ꓒ ꓡꓯ ꓒꓯꓹ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓗꓼ ꓐꓰ ꓒꓬꓱꓼ ꓡ ꓡꓳ= ꓣꓳ ꓢꓲ ꓫꓬ ꓕꓳ ꓶ ꓗꓪ ꓡꓳꓸ ꓠꓬꓲ ꓕꓯ ꓢꓲ ꓒ ꓬꓰ-ꓢꓴ ꓥ ꓟꓲ ꓬꓲ ꓟꓶꓽ ꓘꓶꓼ ꓜ ꓜ ꓟ ꓑꓮꓲ ꓗꓪ ꓑ ꓑ ꓔꓯ ꓣꓴ ꓢꓲ ꓠꓬꓲ ꓕꓱ ꓟ ꓠꓬ ꓥꓪ ꓧꓪꓽ ꓥ ꓡꓳ꓾ ꓐꓯ ꓗꓷ ꓡꓳ= ꓛꓱꓼ ꓡꓱꓼ ꓙꓵ ꓔꓯ ꓥ ꓟꓲ ꓕꓱ ꓟ ꓠꓬ ꓥꓪ ꓫꓵ ꓥ ꓡꓳ꓾ ꓐꓯ_ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓑ ꓑ ꓥꓪ ꓑꓬꓸ ꓐꓰ ꓥꓪ ꓠꓬꓲꓽ ꓟ ꓔꓯ ꓟꓬ ꓡ ꓝꓲ ꓢꓲ ꓞꓳ ꓤ ꓥꓪꓽ ꓔꓴ ꓣꓳ ꓔꓯ ꓖꓶ ꓜ ꓟ ꓥ ꓟꓲ ꓢꓲ ꓒ ꓬꓰ-ꓢꓴ ꓟꓽ ꓟꓶꓽ ꓫꓵ ꓕꓯ ꓬꓲ ꓠꓬ ꓬꓲ ꓖꓳ ꓓꓱ ꓔꓯ ꓑ ꓑ ꓬꓰ ꓗꓷ ꓟ ꓚꓱꓹ ꓟꓸ ꓖꓶ_ ꓟ ꓥ ꓡꓳ= ꓕꓱ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓬꓲꓻ ꓙꓬ ꓔꓯ ꓛꓱꓼ ꓡꓱꓼ ꓙꓵ ꓡꓶꓸ ꓗꓷ ꓟ ꓑꓲꓸ ꓗꓷ ꓟ ꓚꓱꓹ ꓬꓲ ꓪꓴ-ꓢ ꓟꓬꓱꓽ ꓬꓰ ꓕꓯ ꓓ ꓪꓴꓸ ꓬꓰ_ ꓟ ꓓꓵꓽ ꓙ ꓟꓶ ꓓꓴ ꓥ ꓡꓳ=
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓬꓲ ꓕꓱ ꓡꓱ ꓐꓯ ꓖꓶ_ ꓕꓯ ꓠꓴ ꓪ ꓠꓬ ꓥꓪ ꓧꓪ ꓜ꓾ ꓥꓪ ꓫꓵ ꓓꓳ꓾ ꓥꓪ ꓧꓪ ꓜ ꓢꓲ ꓥꓪ ꓫꓵ ꓓꓳ ꓢꓴ ꓟꓽ ꓥ ꓠꓬ ꓮꓽ ꓟ ꓥ ꓟꓲ ꓢꓯꓼ ꓟꓬ ꓟꓽ ꓓꓯ ꓐꓰ ꓐꓯ ꓕꓯ ꓬꓳ-ꓦ ꓕꓳ ꓶ 66 ꓕꓱ ꓗꓪ ꓐꓯ ꓔ ꓟ ꓥ ꓡꓳ= ꓬꓲ ꓝꓲ ꓓꓴ ꓐꓴ ꓮ ꓟꓬꓹ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓧꓹ ꓙꓰ_ ꓡꓳ ꓐꓰ ꓡꓳꓸ ꓟꓳ ꓡꓳ= ꓮ ꓫꓵ ꓑꓶ ꓓꓴ ꓥ ꓡ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓜ ꓙꓬ_ ꓟ ꓑꓶ ꓓꓴ ꓮꓽ ꓟ ꓥ ꓟꓲ ꓬꓲ ꓔꓯ ꓖꓼ ꓛꓳ ꓟꓽ ꓐ ꓡ꓾ ꓐꓰ ꓐꓯ_ ꓡꓳ= ꓠꓬꓲꓸ ꓠꓬꓲ ꓣꓳ ꓗ-ꓔꓳ-ꓡꓲꓗ ꓘꓴ ꓜꓲꓼ ꓞꓳ ꓠꓬ ꓠꓬꓲ ꓠꓬꓲ ꓗꓪ ꓛꓲ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓔꓯ ꓜ ꓔꓬ ꓟ ꓥ ꓡꓳ= ꓓꓵ ꓙ ꓟꓶ ꓓꓴ ꓚꓵꓸ ꓟꓶ ꓓꓴ ꓟꓽ ꓥ꓾ ꓚꓵ ꓚꓵ ꓔꓲꓺ ꓒ ꓡꓯ ꓒꓯꓹ ꓛꓰꓹ ꓕꓯ ꓢꓲ ꓫꓬ ꓑ ꓑ ꓖꓳ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓫꓵ ꓬꓲ ꓧꓪ ꓒꓬꓱꓼ ꓡ ꓡꓳ=
