ꓙꓲ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ “ꓟꓬꓽ ꓠꓬꓲ ꓖꓼ ꓖꓶˍ ꓟ ꓟꓶ ꓢꓴ ꓠꓬ ꓟꓬꓽ ꓠꓬꓲ ꓠꓲ, ꓠꓵ ꓗꓴ.ˍ ꓡꓳ” ꓐꓯˍ ꓟ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓢꓲꓽ ꓫꓬ ꓕꓳꓽ ꓶ ꓠꓬ (ꓡꓴ‐ꓘ 7ꓽ36‐50) ꓗꓪ ꓟ ꓥꓳ꓿ ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓠꓬ ꓕꓱ ꓡꓱ ꓥꓳ꓿
ꓢꓲ ꓒ ꓬꓰ‐ꓢꓴ ꓐꓰ ꓒ‐ꓡꓲ‐ꓢꓷ ꓐꓴ ꓜꓻ ꓜꓽ ꓔꓬ ꓕꓯ ꓝꓴꓲ. ꓙꓳ ꓢꓴ ꓐꓰ ꓐꓯˍ ꓟ ꓬꓲ ꓖꓳ ꓓꓱꓽ ꓪꓴꓽ ꓜꓽ ꓢꓴ ꓤ ꓟꓶ ꓤ ꓕꓲ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓛꓲ ꓔꓲꓺ ꓗꓪ ꓟꓳꓼ ꓡꓰ ꓢꓲ ꓟꓬ ꓐꓲ ꓞꓰ ꓢꓲ ꓠꓬꓲ ꓬꓲ ꓪꓴ. ꓞꓱ ꓐꓰ ꓢꓲ ꓒ ꓬꓰ‐ꓢꓴ ꓛꓲ ꓒꓯ, ꓔꓯ ꓫꓵ, ꓖꓶˍ ꓡꓳ꓿ ꓐꓳꓼˍ ꓟꓲ ꓐꓳꓼ ꓖꓶˍ ꓡꓳ꓿ ꓖꓳ ꓗ ꓠꓯ. ꓠꓬꓲ ꓢꓲ ꓒ ꓬꓰ‐ꓢꓴ ꓛꓲ ꓒꓯ, ꓔꓯ ꓫꓳ ꓠꓱ ꓞꓶ ꓟꓰ ꓖꓶ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓔꓲꓺ ꓖꓶ ꓔꓬ ꓡꓳ꓿
ꓖꓳ ꓕꓯ ꓠꓬ ꓒ‐ꓡꓲ‐ꓢꓷ ꓟꓳꓻ ꓡꓰ ꓠꓬꓲ ꓟꓷ ꓠꓷ, ꓝ. ꓒ ꓕꓱ ꓕꓲ ꓣꓳ ꓠꓽ ꓮ ꓫꓵꓽ ꓑꓶ. ꓓꓴ ꓬꓲ ꓔꓯ ꓝꓴꓲ. ꓙꓳ ꓢꓴ ꓕꓲ ꓣꓳ ꓕꓲꓺ ꓡˍ ꓟꓲ ꓮ ꓫꓵꓽ ꓟꓽ ꓐꓯ ꓐꓯ ꓔꓬ ꓡ꓾ ꓐꓰ ꓐꓯˍ ꓡꓳ꓿ ꓖꓳ ꓕꓱ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓢꓲ‐ꓟꓴ ꓔꓯ ꓔꓯꓺ ꓥꓳꓽ ꓕꓲ ꓟ ꓐꓯ ꓟ. ꓖꓶˍ ꓡꓳ꓿
ꓢꓲꓽ ꓒ ꓕꓲ ꓣꓳ ꓔꓬ ꓗꓪ ꓡ ꓞꓳ ꓠꓬꓲꓽ ꓣꓳ ꓠꓬ ꓒꓴ ꓐꓵ ꓞ, ꓡꓳ꓿ ꓕꓲ ꓣꓳ ꓟ ꓠꓬ ꓓꓲ‐ꓠ‐ꓣꓲ 50꓾ ꓝꓮꓲ ꓕꓲ ꓣꓳ ꓟ ꓠꓬ ꓥꓪ ꓦꓬ ꓕꓱ ꓡꓱ ꓐꓵ ꓞ, ꓡꓳ꓿ ꓖꓳ ꓕꓯ ꓢꓲꓽ ꓒ ꓖꓳ ꓕꓲ ꓣꓳ ꓠꓬ ꓖꓳ ꓠꓬꓲꓽ ꓣꓳ ꓔꓯ ꓫꓱ. ꓤ ꓢꓲ ꓠꓬꓲ ꓖꓳ ꓠꓬꓲꓽ ꓣꓳ ꓔꓯ ꓐꓯˍ ꓟ ꓠꓬ꓾ ꓠꓴ ꓪ ꓠꓬꓲꓽ ꓣꓳ ꓕꓱ ꓡꓱ ꓖꓳ ꓑꓳ. ꓥꓪ ꓔꓯ ꓐꓵ ꓞ, ꓟ ꓮ ꓙꓵꓽ ꓠꓬ ꓥꓪ ꓡꓰ ꓖꓽ ꓖꓶ ꓗꓷꓳ꓾ ꓐꓰ ꓐꓯˍ ꓕꓯ ꓠꓽ ꓖꓳ ꓠꓬꓲꓽ ꓣꓳ ꓟ ꓠꓬ ꓢꓲꓽ ꓒ ꓔꓯ ꓮ ꓡꓲ ꓕꓲ ꓣꓳ ꓟ ꓠꓬ ꓪ ꓜꓲ ꓠꓲ, ꓠꓵˍ ꓡ꓾ ꓐꓰ ꓢꓲ‐ꓟꓴ ꓒꓲ‐ꓕꓱ ꓔꓯ ꓠꓺ ꓠꓬꓲˍ ꓡꓳ꓿ ꓖꓳ ꓕꓯ ꓢꓲ‐ꓟꓴ ꓒꓲ‐ꓕꓱ ꓠꓽ꓾ ꓢꓲꓽ ꓒ ꓖꓳ ꓟ ꓔꓯ ꓟꓬꓽ ꓠꓬꓲ ꓐꓵ ꓞ, ꓟ ꓔꓯ ꓖꓽ ꓖꓶˍ ꓟ ꓟꓶ ꓡꓰ ꓢꓴ ꓠꓬ ꓢꓲꓽ ꓒ ꓖꓳ ꓟ ꓔꓯ ꓟꓬꓽ ꓠꓬꓲ ꓠꓲ, ꓠꓵˍ ꓡꓳ꓾ ꓐꓰ ꓒꓳ, ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓪꓴ‐ꓢ ꓬꓲ. ꓖꓽ ꓖꓶˍ ꓟ ꓮ ꓟꓬ, ꓟꓶ ꓡꓰ ꓠꓬꓲ ꓪꓴ‐ꓢ ꓔꓯ ꓒ‐ꓡꓲ‐ꓢꓷ ꓐꓴ ꓕꓯꓽ ꓢꓲ ꓠꓲ, ꓠꓵ ꓗꓴ.ˍ ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓒ‐ꓡꓲ‐ꓢꓷ ꓐꓴ ꓕꓯꓽ ꓢꓲ ꓘꓳ ꓣꓴ ꓗꓴ.ˍ ꓟ ꓥꓳ ꓾ ꓐꓰ ꓔꓯꓺ ꓥꓳꓽ ꓣꓱꓽ ꓢꓲ ꓥˍ ꓟꓲ ꓣꓳ ꓔꓯ ꓐꓯ ꓖꓶ ꓔꓬ ꓟ ꓥꓳ꓿ ꓕꓱ ꓟˍ ꓡꓰꓽ ꓟꓽ ꓞꓲꓺ ꓠꓬꓲ. ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓣꓳ ꓠꓬ ꓝꓴꓲ. ꓮ ꓙꓵꓽ ꓖꓽ ꓖꓶˍ ꓟ ꓟꓶ ꓡꓰ ꓠꓬꓲ ꓚꓬꓴ. ꓟꓶˍ ꓟ ꓟꓶ ꓡꓰ ꓠꓬꓲ ꓣꓳ ꓠꓬ ꓪꓴ‐ꓢ ꓔꓯ ꓮ ꓘꓶ. ꓠꓲ, ꓠꓵ ꓠ, ꓟ ꓥꓳ꓾ ꓐꓰ ꓐꓯˍ ꓟ ꓔꓯ ꓥˍ ꓟꓲ ꓐꓯ ꓬꓯꓼˍ ꓡꓳ꓿
ꓖꓳ ꓡꓱ ꓐꓯˍ ꓥ ꓟꓲ ꓣꓳ ꓠꓲ, ꓟ ꓠꓯꓸꓼ ꓗꓪ ꓠꓬ ꓕꓱ ꓡꓱ ꓓꓵꓽ ꓙꓽ ꓗꓴ.ˍ ꓡꓳ꓿ ꓥꓪ ꓕꓲ ꓠꓬꓲ ꓕꓲ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓙꓰ ꓔꓬ꓾ ꓪꓽ ꓘꓴ ꓔꓬ꓾ ꓮꓽ ꓢꓴ ꓔꓯˍ ꓟꓲ ꓟꓽ ꓢꓰꓼ꓾ ꓮꓽ ꓢꓴ ꓔꓯˍ ꓟꓲ ꓟꓽ ꓛꓬ ꓡꓰ꓾ ꓐꓰ ꓕꓰ ꓡꓰ ꓐꓯ ꓗꓴ.ˍ ꓡꓳ꓿ ꓖꓳ ꓕꓯ ꓠꓬ ꓣꓳ ꓠꓬ ꓝꓴꓲ. ꓟꓽ ꓙꓳ꓾ ꓐꓰ ꓠꓲ, ꓟ ꓗꓪ ꓕꓱ ꓡꓱ ꓓꓵꓽ ꓙꓽ ꓗꓴ.ˍ ꓡꓳ꓿ ꓕꓱ ꓡꓱ ꓓꓵꓽ ꓙꓽ ꓔꓬ ꓥꓳ ꓐꓯˍ ꓠꓬ ꓣꓳ ꓠꓬ ꓪꓴ‐ꓢ ꓖꓽ ꓖꓶˍ ꓟ ꓔꓯ ꓣꓳ ꓟꓲ ꓡꓰ, ꓗꓷ ꓢꓲ ꓠꓬꓲ ꓪꓴ‐ꓢ ꓔꓯ ꓠꓲ, ꓠꓵ ꓗꓴ. ꓠ, ꓟ ꓙ ꓖꓴ ꓠꓬ ꓣꓳ ꓶꓽ ꓡꓰˍ ꓟ ꓥꓳ꓿
ꓣꓳ ꓠꓬ ꓮ ꓡꓲ ꓐꓰ ꓓꓵꓽ ꓙꓽ ꓪˍ ꓡ꓿ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓠꓬ ꓣꓳ ꓚꓲ. ꓛꓬ ꓖꓳ ꓓꓱꓽ ꓗꓪ ꓐꓰ ꓣꓳ ꓟꓽ ꓬꓰ ꓐꓯˍ ꓥ ꓟꓲ ꓣꓳ ꓠꓲ, ꓟ ꓠꓯꓸꓼ ꓗꓪ ꓐꓰ ꓝꓴꓲ. ꓮ ꓟꓬ, ꓬꓰ ꓔꓬ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓕꓱ ꓟ ꓔꓯ ꓪꓴ‐ꓢ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓔꓯ ꓫꓱ. ꓤ ꓢꓲ ꓠꓬꓲ ꓖꓽ ꓖꓶ ꓔꓬ ꓡꓳ꓾ ꓐꓰ ꓣꓳ ꓠꓲ, ꓟ ꓠꓯꓸꓼ ꓗꓪ ꓣꓳ ꓚꓬ, ꓪˍ ꓥꓳ꓾ ꓣꓳ ꓢꓷ.ˍ ꓥꓳ ꓐꓯˍ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓖꓽ ꓖꓶˍ ꓟ ꓟꓶ ꓡꓰ ꓠꓬꓲ ꓪꓴ‐ꓢ ꓔꓯ ꓣꓳ ꓠꓲ, ꓠꓵ ꓗꓴ.ˍ ꓟ ꓥꓳ꓿ ꓕꓱ ꓡꓱ ꓟꓽ ꓥ ꓕꓯ ꓠꓽ ꓣꓳ ꓠꓽ ꓪꓴ‐ꓢ ꓔꓯ ꓠꓲ, ꓠꓵ ꓟꓽ ꓗꓴ.꓿ ꓪꓴ‐ꓢ ꓠꓬ ꓥꓪ ꓔꓯ ꓮ ꓫꓵꓽˍ ꓟꓲ ꓟꓽ ꓐꓵ ꓞ,꓾ ꓥꓪ ꓠꓬ ꓪꓴ‐ꓢ ꓔꓯ ꓮ ꓫꓵꓽ ꓟꓽ ꓛꓬ ꓡꓰ꓾ ꓣꓳ ꓕꓰ ꓡꓰ ꓓꓵꓽ ꓙꓽˍ ꓥꓳ ꓐꓯˍ ꓠꓬ ꓣꓳ ꓠꓬ ꓪꓴ‐ꓢ ꓔꓯ ꓠꓲ, ꓠꓵ ꓗꓴ. ꓠ, ꓟ ꓶꓽ ꓡꓰˍ ꓥꓳ꓿
