Vatican ꓗꓪ Israel ꓗꓴꓷꓼ ꓙꓵꓽ ꓢꓲꓽ ꓒ Isaac Herzog ꓐꓰ ꓔꓲꓺ ꓒ ꓪ ꓔꓲ. ꓡꓰꓳ (14) ꓜꓲ ꓡꓯ ꓘꓳ ꓢꓲ ꓖꓪ ꓙꓱꓻ ꓡꓯ ꓘꓳ ꓗꓷꓳ꓾
ꓠꓽ‐ꓡꓲ.‐ꓠꓬꓲ꓾ 2025 ꓘꓳꓼ 9 ꓦ 4 ꓠꓬꓲ꓾ ꓮ ꓟꓰ ꓕꓯ ꓔꓲꓺ ꓒ ꓪ ꓔꓲ. ꓡꓰꓳ (14) ꓠꓬ Israel ꓗꓴꓷꓼ ꓙꓵꓽ ꓢꓲꓽ ꓒ Isaac Herzog ꓔꓯ ꓔꓲꓺ ꓒ ꓪ ꓔꓲ. ꓬꓲ ꓬꓳ, ꓗꓪ ꓘꓳ ꓣꓴ ꓢꓲ ꓜꓲꓺ ꓡꓯ ꓘꓳ ꓗꓷꓳ꓿
ꓲꓢꓣꓮꓰꓡ ꓗꓴꓷꓼ ꓙꓵꓽ ꓢꓲꓽ ꓒ ꓠꓬ ꓗ ꓠꓯ. ꓕꓯ ꓦꓮꓔꓲꓚꓮꓠ ꓠꓱ. ꓐꓯ ꓗꓴꓷꓼ ꓐꓰ ꓙꓻ ꓡꓯ ꓘꓳ ꓟꓬꓱꓽ ꓢꓲꓽ ꓒ Cardinal Pietro Parolin ꓐꓰ꓾ ꓟꓵꓽ ꓗꓳ, ꓓꓵ ꓓꓵ ꓗꓴꓷꓼ ꓜꓴꓻ ꓐꓴ ꓐꓰ ꓙꓻ ꓡꓯ ꓘꓳ ꓟꓬꓱꓽ ꓬꓰ ꓢꓴ ꓥ ꓟ Archbishop Paul R. Gallagher ꓐꓴ ꓐꓰ ꓜꓲꓺ ꓡꓯ ꓘꓳ ꓗꓷꓳ꓿
ꓔꓲꓺ ꓒ ꓪ ꓔꓲ. ꓬꓳ, (Holy See Press Office) ꓗꓪ ꓐꓰ ꓐꓯ ꓑꓶ ꓔˍ ꓟ ꓗꓪ ꓠꓬ꓾ “ꓔꓲꓺ ꓒ ꓪ ꓔꓲ. ꓐꓰ Cardinal ꓐꓴ ꓐꓰ ꓖꓪ ꓙꓱ ꓡꓯ ꓘꓳˍ ꓟ ꓗꓪ ꓠꓬ꓾ ꓫꓵꓽ ꓪꓴ ꓮ ꓟꓬ, ꓒꓬꓱꓼ ꓔꓬ ꓟ ꓐꓶ ꓓꓳ ꓔꓱ, ꓫꓵ ꓗꓪ ꓟ ꓗꓴꓷꓼ ꓙꓵꓽ ꓚꓱ, ꓐꓰ ꓞꓳ ꓤ ꓐꓴ ꓙ ꓡꓯ ꓘꓳ ꓚꓱ, ꓐꓴ ꓔꓯ ꓖꓪ ꓙꓱ ꓡꓯ ꓘꓳ ꓗꓷ ꓢꓲ꓾ ꓟꓬꓽ ꓠꓬꓲ ꓠꓬ ꓖ‐ꓜ ꓗꓪ ꓒꓬꓱꓼ ꓔꓬ ꓟ ꓠꓲ, ꓟ ꓫ. ꓓꓴ ꓫꓵꓽ ꓪꓴ ꓔꓯ ꓟꓳ. ꓖꓪ ꓙꓱ ꓡꓯ ꓘꓳ ꓗꓷꓳ꓾” ꓐꓰ ꓐꓯ ꓔ ꓡꓳ꓿
“ꓗꓴꓷꓼ ꓢꓲ ꓡꓲ ꓡꓰ ꓠ, ꓟ ꓐꓱ ꓶ ꓠꓬꓲꓽ ꓛꓱꓽ ꓟꓯꓼ ꓖꓪ ꓙꓱ ꓡꓯ ꓘꓳˍ ꓟ ꓞꓼ ꓞꓼ ꓬꓰ ꓐ ꓡ ꓠ, ꓟ꓾ ꓠꓲ, ꓡꓶꓽ ꓙꓳˍ ꓟ ꓡꓰ ꓟꓽ ꓙꓳꓺ ꓙꓳꓺ ꓓꓵꓽ ꓙꓽ ꓞꓷ, ꓐ ꓡ ꓠ, ꓟ꓾ ꓟꓲ ꓠꓯ ꓗꓴꓷꓼ ꓐꓴ ꓡꓰ ꓬꓰ ꓙ ꓔꓳ, ꓙˍ ꓟ ꓗꓪ ꓐꓰ ꓞꓳ, ꓟꓶ ꓔ ꓢꓴ ꓮ ꓙꓵꓽ ꓡꓲ, ꓗꓷ ꓟꓶ ꓠ, ꓟ꓾ ꓢꓰꓼ ꓡꓯ ꓘꓳˍ ꓟ ꓚꓵ ꓚꓵ ꓠꓽ ꓡꓰ ꓠ, ꓟ꓾ ꓫꓱ. ꓤ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓥˍ ꓟꓲ ꓫ. ꓙꓵ ꓔꓬ ꓟ ꓑ ꓫꓬꓼ ꓐꓴ ꓔꓯ ꓬꓰ ꓙ ꓠ, ꓟ ꓐꓱ ꓶ ꓢꓰꓼ ꓡꓯ ꓘꓳ ꓔꓬ ꓟ ꓬꓲ ꓘꓴꓽ ꓗꓪ ꓢꓻ ꓢꓻ ꓡꓰꓽ ꓓꓵꓽ ꓡꓰ ꓪ ꓠ, ꓟ ꓐꓱ ꓶ ꓬꓰ ꓙ ꓠ, ꓟ꓾ ꓕꓱ ꓡꓱ ꓫꓵꓽ ꓚꓱ, ꓐꓴ ꓔꓯ ꓖꓪ ꓙꓱ ꓡꓯ ꓘꓳ ꓗꓷꓳ꓾ ꓐꓰ ꓐꓯ ꓔ ꓡꓳ꓿
ꓖꓳ ꓡꓱ ꓐꓯ ꓑꓶ ꓔˍ ꓟ ꓘꓴꓽ ꓗꓪ ꓑꓮꓡꓰꓢꓔꓲꓠꓰ ꓞꓳ ꓫꓵꓽ ꓐꓴ ꓟꓲ ꓕꓯꓽ ꓢꓲ ꓟ ꓬꓲ ꓪ ꓤꓶꓻ ꓔꓯ ꓟꓽ ꓗ. ꓧꓪ ꓠ, ꓟ꓾ ꓗꓴꓷꓼ ꓘꓴꓽ ꓗꓪ ꓢꓲ ꓡꓲ ꓠ, ꓟ ꓐꓱ ꓶ ꓖꓪ ꓙꓱ ꓡꓯ ꓘꓳ ꓗꓷ ꓢꓲ꓾ ꓠꓬꓲꓽ ꓗꓴꓷꓼ ꓡꓱꓸꓼ ꓠꓬ ꓢꓰꓼ ꓡꓯ ꓘꓳˍ ꓟ ꓔꓯ ꓠꓽ ꓗꓷ ꓠ, ꓟ ꓥ ꓡꓳ꓾ ꓐꓰ ꓦꓮꓔꓲꓚꓮꓠ ꓗꓪ ꓐꓰ ꓝ. ꓢꓲ ꓐꓯ ꓔ ꓡꓳ꓿ ꓖꓪ ꓙꓱ ꓡꓯ ꓘꓳˍ ꓟ ꓗꓪ꓾ ꓗꓴꓷꓼ ꓘꓴꓽ ꓗꓪ ꓟ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓗꓴꓷꓼ ꓘꓴꓽ ꓗꓪ ꓟ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬꓲꓽ ꓗꓴ. ꓚꓸꓼ ꓗꓪ ꓙꓻ ꓡꓯ ꓘꓳˍ ꓟ ꓚꓱ, ꓮ ꓟꓬ, ꓔꓯ ꓥˍ ꓟꓲ ꓖꓪ ꓙꓱ ꓗꓷ ꓢꓲ꓾ ꓟꓬꓽ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓐꓴ ꓠꓬ ꓗꓴꓷꓼ ꓘꓴꓽ ꓗꓪ ꓣꓱꓽ ꓬꓯꓼˍ ꓟ꓾ ꓝꓮꓲ ꓫꓱ. ꓤ ꓓꓴ ꓟꓬꓱꓽ ꓮ ꓟꓬ, ꓬꓰ ꓐ ꓡ ꓠ, ꓟ꓾ ꓟꓬꓽ ꓠꓬꓲ ꓢꓷ. ꓠꓲ, ꓢꓳ ꓚꓱ,꓾ ꓞꓳ ꓤ ꓕꓲ ꓠꓲ, ꓕꓲ ꓪˍ ꓬꓰˍ ꓟ ꓐꓰ ꓟꓵꓽ ꓗꓪ ꓢꓲ ꓡꓲ ꓠ, ꓟ ꓐꓰ ꓶ ꓬꓲ ꓪ ꓪꓵꓼ ꓙꓱꓼ ꓔˍ ꓟ ꓔꓯ ꓪꓴ. ꓓꓵ ꓗꓷ ꓢꓲ ꓖꓪ ꓙꓱ ꓡꓯ ꓘꓳ ꓗꓷꓳ꓾ ꓐꓰ ꓢꓷ. ꓪˍ ꓡꓳ꓿
