ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓬꓰ ꓐ ꓡ ꓡ? (Climate change)
ꓟꓲ ꓠꓯ ꓕꓱ ꓟ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓲ ꓐꓶ ꓞꓺ ꓡ ꓟ ꓥ ꓢꓲ ꓠꓬꓲ ꓕꓱ ꓡꓱ ꓗꓷ ꓡ ꓟ ꓪꓴ. ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓫꓵꓽ ꓪꓴꓽ ꓓꓽ ꓟ ꓒꓬꓱꓼ ꓡ ꓔꓬ ꓡꓳ ꓐꓰ ꓓꓴ ꓙ ꓔꓬ ꓟ ꓟꓽ ꓙꓳ ꓟ ꓥ ꓡꓳ꓿ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓠꓬ ꓮ ꓘꓶ. ꓛꓲ ꓡ ꓞꓳ ꓐꓱ ꓶ ꓙꓲ ꓖꓴ ꓟꓽ ꓙꓳ ꓐꓰ ꓓꓴ ꓙ ꓥ ꓟꓲ ꓟꓬꓱꓽ ꓬꓰ ꓠ, ꓟ ꓟꓽ ꓢꓯꓼ ꓕꓵꓼ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓟꓬꓱꓽ ꓬꓰ ꓠ, ꓟ ꓓꓽ ꓪꓴ. ꓟꓬꓱꓽ ꓔꓴ ꓡ ꓟ ꓥ ꓡꓳ꓿
ꓟꓲ ꓠꓯ ꓗꓴꓷꓼ ꓜꓴꓻ ꓘꓴꓽ ꓗꓪ ꓖꓪꓽ ꓙꓱ ꓜꓲꓼ ꓓꓴ ꓓꓽ ꓟ ꓗꓪ ꓠꓬ ꓟꓵꓽ ꓘꓳꓼ ꓟꓽ ꓐꓬ ꓡꓰ ꓠ, ꓟ ꓖꓪꓽ ꓙꓱ ꓜꓲꓼ ꓓꓴ ꓠꓬ ꓮ ꓘꓶ. ꓣꓺ ꓚꓵ. ꓟ ꓖꓪꓽ ꓙꓱ ꓜꓲꓼ ꓓꓴ ꓕꓲ ꓟ ꓗꓷ ꓡꓰ ꓟ ꓥ ꓡꓳ꓿ 1992 ꓘꓳꓼ ꓗꓪ ꓟꓵꓽ ꓘꓳꓼ ꓔꓯ ꓟꓳ. ꓖꓪꓽ ꓙꓱ ꓜꓲꓼ ꓓꓴ ꓓꓽ ꓟ ꓕꓲ ꓟ ꓬꓰ ꓗꓷ ꓟ ꓥ ꓡꓳ꓿ ꓕꓱ ꓖꓪꓽ ꓙꓱ ꓟ ꓠꓬ ꓦ‐ꓐ (18) ꓟ ꓙꓳˍ ꓡꓰ ꓟ ꓙꓵ, ꓕꓯ ꓗꓴꓷꓼ (104) ꓠꓬ ꓟꓵꓽ ꓘꓳꓼ ꓟꓽ ꓒꓳ, ꓡ ꓠ, ꓟ ꓮ ꓡꓰ ꓢꓯꓼ ꓕꓵꓼ ꓠ,ꓟ ꓔꓶ ꓐꓬꓱ ꓕꓲ ꓟ ꓔꓯ ꓖꓪꓽ ꓙꓱ ꓪ ꓡꓰ ꓢꓲ ꓠꓬꓲ ꓟꓬꓱꓺ ꓐꓳ ꓔꓲ ꓔꓯ ꓟ ꓬꓰ ꓗꓷ ꓟ ꓥ ꓡꓳ꓿
ꓕꓱ ꓖꓪꓽ ꓙꓱ ꓪ ꓡꓰ ꓟ ꓗꓪ ꓖꓣꓰꓰꓠ ꓧꓳꓴꓢꓰ ꓖꓮꓢ ꓐꓯ ꓟ ꓟꓲ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲ ꓟ ꓚꓱ, ꓔꓯ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓖꓪꓽ ꓙꓱ ꓗꓷ ꓥ ꓡꓳ꓿ ꓕꓱ ꓡꓰ ꓬꓰ ꓕꓯ ꓠꓬ ꓢꓲꓽ ꓫꓬ ꓟ ꓟꓲ ꓦꓲꓻ ꓣꓳ ꓪ ꓢꓲ ꓠꓬꓲ ꓚꓮ‐ꓐꓳ ꓐꓯ ꓠꓬ ꓟꓽ ꓢꓲꓽ ꓫꓬ ꓟ ꓦꓲꓻ ꓔꓯ ꓣꓳ ꓮ ꓘꓶ. ꓟꓽ ꓪ ꓡ ꓓꓴ ꓥꓳ ꓐꓰ ꓐꓯ ꓔ ꓡꓳ꓿
ꓖꓳ ꓡꓱ ꓥ ꓟꓲ ꓴꓢꓮ ꓗꓴꓷꓼ ꓗꓪ ꓙꓼ ꓧꓪꓽ ꓞꓶꓻ ꓔꓯ ꓮ ꓟꓬ, ꓟꓽ ꓣꓱ ꓠ, ꓟ ꓟꓽ ꓘꓳ, ꓣꓴ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓗꓴꓷꓼ ꓮ ꓟꓬ, ꓪꓽ ꓢꓲ ꓠꓬꓲ ꓖꓪꓽ ꓙꓱ ꓔ ꓟ ꓮ ꓙꓵꓽ ꓠꓬ ꓙꓲ ꓖꓴ ꓮ ꓟꓬ, ꓟꓽ ꓙꓳ ꓡꓰ ꓐꓰ ꓗꓷ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓴꓢꓮ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓗ‐ꓡꓲ‐ꓓ ꓗꓴꓷꓼ ꓔꓯ ꓙꓵꓽ ꓢꓴ ꓒꓬꓱꓼ ꓡ ꓕꓯ ꓠꓬ ꓟꓲ ꓠꓯ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓗꓷꓳ꓿
ꓢꓷ. ꓠꓲ, ꓙꓳ ꓢꓴ ꓐꓴ ꓠꓬ ꓖꓣꓰꓰꓠ ꓧꓳꓴꓢꓰ ꓖꓮꓢ ꓟꓲ ꓦꓲꓻ ꓔꓯ ꓟꓽ ꓢꓲꓽ ꓫꓬ, ꓡꓰ ꓝꓲ ꓟ ꓔꓯ 100 ꓩꓴ. ꓗꓪ ꓐꓰ 50 ꓩꓴ. ꓛꓲ ꓠꓽ ꓡꓰ ꓠ ꓟ ꓖꓪꓽ ꓙꓱ ꓗꓷ ꓠ ꓟ ꓓꓴ ꓙ ꓔ ꓥ ꓟꓲ 2010 ꓘꓳꓼ ꓕꓯ 5 ꓩꓴ. ꓡꓰ ꓢꓲ ꓠꓬꓲ ꓠꓽ ꓡꓰ ꓟ ꓔꓯ ꓡꓳ. ꓟꓳ ꓓꓽ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓺ ꓡ ꓓꓴ ꓙꓳ ꓟ ꓥ ꓡꓳ꓿
ꓟꓲ ꓠꓯ ꓗꓪ ꓒꓴ ꓫꓵˍ ꓙꓳ ꓢꓴ ꓐꓴ ꓐꓰ ꓗꓴꓷꓼ ꓙꓵꓽ ꓢꓴ ꓐꓴ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓔꓯ ꓮ ꓘꓶ. ꓢꓯꓼ ꓕꓵꓼ ꓢꓲ ꓠꓬ ꓟꓬꓱꓽ ꓬꓰ ꓓꓴ ꓟꓽ ꓙꓳ ꓠꓬ ꓣꓳ ꓮ ꓘꓶ. ꓠꓲ, ꓟ ꓫ. ꓓꓴ ꓕꓲ ꓫꓵꓽ ꓥ ꓡꓳ꓿ ꓫ. ꓟꓳ ꓪ꓿
